Luke 15
15
Kokome a tabe wuwaniambene
1Letsuge lemochi, babongi ba mapaga na baate ba ngua bubi bua maambe nibàkukele va pédi a Sése mu yoge maambe ma ndɛ yàmbelenge. 2Baate ba lebuli la bafarichi na basupili ba mangidi ma Nzɛmbi nibàningene pfuɛchi abɔ muɛne na bɔ muɛne bo: «Lebagele lineli muki ayake baate bangua bubi bua maambe banebe na tchade bone a bɔ itchige imochi.» 3Sése nàlɛle bɔ ndé: 4«Mutu va pfuɛchi a béne ti alidi na mukame mumochi wa mandɔmbe, lendɔmbe lemochi laniambene, ndɛ ka achiniage makumi wa mamandɔmbe na mandɔmbe wa va itchige chi mɔ matchade mu yɛnde gu isage lendɔmbe lelenimbini kuange nachi ndɛ ki sɔlele lɔ vɛ?» 5Ndɛ sɔlele lɔ, akuade na ngɔmbe, abéke lɔ va yulu a ngɔngɔte, akagabege na lɔ gu nzɔ ndɛ. 6Ndɛ sote gu nzɔ, atɛde bambɛgi na ngage a ndɛ akalɛle bɔ ndé: Yadani letsakenani na ngɔmbe, muti lendɔmbe lɛme leleniɛmbeni mɛ, solili. 7Avanekaniva Sése àlɛle bɔ ndé: «Mumbuli mɛ lɛle béne mé, ngɔmbe yi batome ba Nzɛmbi ba gu yulu batsakene na yɔ va mutu ngua bubi bua maambe agɛle mulinge, yilutili ngɔmbe yibakuade na yɔ mu makumi wa ma baate na baate wa babayɛbene babasalidi na nzale lepɔtege vɛ.»
Kokome badɔle ba baniambene
8Sése nàbàtadele bɔ kokome ikime ndé: «Mukaase ti alidi na mitochini mitaane na mikame miɔli mia badɔle, ndɛ niambese mikame mitaane na makumi mɔli, ndɛ ka achitsome page na gɔmbele nzɔ mu sage badɔle babaniémbini kuange nachi ndɛ ki sɔlele bɔ vɛ?» 9Ndɛ sɔlele bɔ, atɛde bambɛgi bɛndi na ngage a ndɛ, akalɛle bɔ ndé: «Yadani letsakenani na ngɔmbe muti badɔle bɛme babaniémbini, mɛ solili. 10Mumbuli mɛ lɛle béne mé, va mutu ngua bubi bua maambe agɛle mulinge, batome ba Nzɛmbi ba gu yulu tsakenenge ndile na ngɔmbe.»
Kokome a muane wuwaniambe
11Sése nàbàlɛle bɔ ndé: «Lebagele nàbade na baane bɔli bababagele.» 12Letsuge lemochi, mugɛge àyɛnde gulidi tɛyi nàlɛle ndɛ ndé: «Taate kabe mabuɛ, wɛ vɛde alɛme lekabe. Tɛyi àkabe, nàvɛde awunewu muane lɛndi lekabe, awunewu muane lɛndi lekabe.» 13Tsuge iviɔge, mugɛge àsombese lɛndi lekabe la mabuɛ, àbage badɔle, nàyɛnde gu tsɛnge a vale. Gu tsɛnge muɛne, ndɛ àsàbade na itségili chi bibuɛ vɛ. Ndɛ nàkabe badɔle botchi. 14Ndɛ mane badɔle botchi kabe, nzale ikogele tsɛnge yotchi, ndɛ nàbande mimbɔnde mɔne. 15Avanekaniva ndɛ yɛnde gu fule isale na mutu wu wàbade gu tsɛnge muɛne. Mutu muɛne nàtchindege ndɛ gutsɔ manungi gu kɛle bangulu bɛndi. 16Muane muɛne nàtɔndenge tchade biéle bi bàvɛdenge ba ngulu. Tɔ àsàbagenge mutu wuwa mbé vɛde ndɛ biɔ vɛ 17Ndɛ bangele maambe motchi mamabi ma ndɛ sade, nàlɛle ndé: «Kiti baséli ba taate a mɛ, balidi na biéle bia tchade mvuabiɔvɛ. Mvuati nɛme muane a ndɛ gu mɛ lidi guni mɛ kaniwukikuadenge na nzale?» 18Ka buédi ti mɛ gabege gu mboge a taate a mɛ mɛ lɛle ndɛ mé: «Taate kɔkɔle a wɛ, mɛ chidi maambe mamabi va busu bua Nzɛmbi na va busu bua wɛ. 19Mɛ salidi tchitse mu babade muane a wɛ vɛ. Tɔ bɔnge mɛ ngane a muséli a wɛ.» 20Ndɛ tɛmene, nàgabege gu mboge a taate a ndɛ. Va ndɛ bàde ki vale na nzɔ taate a ndɛ, tɛyi àtalele ndɛ, àmɔne ndɛ tinge yalotele, àkɛsele ndɛ, bone a ndɛ nibàsambene. 21Avanekaniva muane àlɛle taate a ndɛ ndé: «Taate kɔkɔle a wɛ, mɛ chidi maambe mamabi va busu bua Nzɛmbi na va busu bua wɛ. Mɛ salidi tchitse mu babade muane a wɛ vɛ.» 22Tɔ taate a ndɛ nàlɛle baséli bɛndi ndé: «Tsualani mɛ lengoyi lelebuɛ na mukase, béne leluatese ndɛ lɔ. Tsualani na lengɛchi béne leluatese ndɛ mu mulémbe namoni a bapɔnde mu mile. 23Bɔngani muane a ngɔmbi wuwavɔnge wulidi gutsɔ ivange béne lebome. Béne lemane ndɛ lambe, letchadani. 24Muti muane a mɛ wunewu wu bédi amakuade, ndɛ ndoge amasoge. Ndɛ wubédi amaniambene, ndoge amasolege.» Avanekaniva bɔ bàsade mayayi. 25Va bɔ bàtsakekenge na ngɔmbe, muane wa ivonde gutsɔ manungi àbade. Ndɛ mate gu manungi, àtɔde va tsɔmbe a bole, àyoge kɛle a mangombi na ya baate bàbàkénenge, 26àtɛde muséli mumochi vatsɔ basɛli ba taate a ndɛ, nàfule ndɛ tchambe le baate bàtsakenenge na ngɔmbe mu lɔ. 27Muséli nàkale ndɛ ndé: «Ngɛ mugɛge a wɛ wuwubédi gu tsɛnge a vale ayigabege. Taate a wɛ naléli ndé babome muane a ngɔmbi wuwavɔnge. Muti muane a ndɛ ayigabege na pɔle yotchi.» 28Kéchi yikuate muane wa ivonde, ndɛ nàbise ningele gutsɔ nzɔ. Taate a ndɛ nàpole gu bɔnde muane mu ningele gutsɔ nzɔ. 29Tɔ muane wa ivonde nàkale tɛyi ndé: «Biléme biotchi mɛ salelenge ndile wɛ. Mɛ sàmàvɔngele tchambe ti lemochi le wɛ lɛle mɛ mu sade vɛ. Mɛ wulidi na wɛ lekɛse lotchi, wɛ sàmàvɛde mɛ ti muane a tabe mu sade mayayi na bambɛgi bɛme vɛ.» 30Mane muane a wɛ wu gɛndji buchine bua wɛ na bivɛchi bia bakaase, abayade, wɛ kababomele ndɛ muane a ngɔmbi wuwavɔnge. 31Tɛyi nàkale ndɛ ndé: «A muane a mɛ, lekɛse lotchi bése na wɛ vaneve lelidi. Mabuɛ mɛmɛ motchi mawɛ. 32Buédi ti bése a béne lesatsékini na ngɔmbe muti mugɛge a wɛ wu bédi amakuade ndoge amasoge. Ndɛ wuwubédi aniambene ndoge amasolege.»
Tällä hetkellä valittuna:
Luke 15: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
