Luke 12
12
Yabadani baate ba ngua levédi
1Piti a baate mvuayɔvɛ yikokene, a bane tchate ka bambɛgi a bane na bɔ tchate ka bambɛgi, Sése nàlɛle baate bɛndi ndé: «Yabadani ngane a baate ba lebuli la Bafarichi babalidi na levédi. Bɔ ngane a pfupfuchi yibatɛde levain balidi. Babɔnge yɔ, babuge na farine, farine yikanzanzene. 2Maambe motchi ma basade gutsɔ musuɛge bayabe. Namoni a maambe ma basade gutsɔ ifunde namɔ bayabe. 3Maambe motchi ma béne la yambele gutsɔ ifunde nibáyabe. Namoni a maambe ma béne la yambele gutsɔ makundu namɔ nibáyabe.» 4Mɛ ka béne bambɛgi bɛme mɛ lɛle mé yamɔnani bɔɔme bua baate bababome ndile ma niute pénze. Vayulavane, bɔ bachibatoge tchambe lekime basade vɛ. 5Mɛ ka béne mɛ lɛle mutu wu béne lekimɔne bɔɔme buɛndi. Nzɛmbi ndɛ pénze niwu béne lekimɔne bɔɔme. Mɔnani bɔɔme bua mutu wulidi na bungudi bua bome niute, amane, akatɛte béne gutsɔ itchige cha mimbɔnde mia mubunamubu.
6Mabingi mataane ka basasombese ndile mu badɔle bɔli vɛ? Tɔ Nzɛmbi asadimbele lebingi ti lemochi vatsɔ mɔ vɛ. 7Namoni a nange yiyilidi gu yulu mitsuɛ mia béne, Nzɛmbi ayɛbi lerange layɔ. Niagani bɔɔme mɔne, béne lelutili mabingi buyimbe.
Umɛme na bise Sése va mise ma baate
8Mɛ ka béne mɛ lɛle mé, Mutu wuwachinge mɛ va mise ma baate, mɛ Wuwàbɔnge ndjime a baate, mɛ nichinge ndɛ va mise ma batome ba Nzɛmbi ba gu yulu. 9Tɔ mutu wuwatone mɛ Wuwàbɔnge ndjime a baate va mise ma baate, mɛ nitone ndɛ va mise ma batome ba Nzɛmbi ba gu yulu. 10Pɛti mutu wuwalɛle tchambe lelebi gulidi mɛ Wuwàbɔnge ndjime a baate, Nzɛmbi náchindele ndɛ tchambe muɛne. Tɔ mutu wuwavɔngele Lenioni Labuyimbe, Nzɛmbi ásákáchindele ndɛ tchambe muɛne vɛ. 11Va bákábéte béne gutsɔ manzɔ mabakokene mu bɔnde na lɔngesenge mabige ma Nzɛmbi na va busu bua baate ba batome béne na bua bapɛchi ba mipame gu sɔsese béne, yabadani na ibɛyi mu maambe ma béne lekápose. 12Muti Lenioni Labuyimbe nilevɛde béne mabige ma mayɛbene mu kale bɔ.
Kokome a ichine ngua budoke
13Vatsɔ piti a baate, mutu nàlɛle Sése ndé: «A Mulongichi, kɔkɔle a wɛ, lɛle mukulu a mɛ akabe mikuani mi taate àniàgele bése a ndɛ.» 14Sése nàkale ndɛ ndé: «Wu léli wɛ ndé mɛ kani mupéchi a mipame na mukɛbi a mikuani mi taate a béne àniàgele béne naa?» 15Vayulavane, Sése nàlɛle baate botchi bàbàbade vane ndé: «Rambelani. Yabadani na letɔnde la mabuɛ ma bulɔnge bunebu. Mutu nabade ichine, ndɛ asafuade moyi mu mabuɛ ma ndɛ lidi namɔ vɛ.» 16Avanekaniva Sése àtàdele bɔ kokome ndé: «Ichine nichàbade na manungi màmàbote biéle mvuabiɔvɛ.» 17Ndɛ tase, nàlɛle ndé: «Mɛ kabuni mɛ kisade? Mɛ salidi na itchige cha kɛle biéle muɛne vɛ.» 18Ndɛ nàbàlɛle ndé: «Mɛ yɛbi buni mɛ kisade. Mɛ panze manzɔ ma mɛ kɛle biéle biɛme, mɛ katonge ka mamanéni mu kɛle biéle na mabuɛ mɛmɛ.» 19Avane mɛ ka lɛle mé: «Mɛ ndile ka tsagele, muti mu biléme bia gu busu mɛ mabage biéle mvuabiɔvɛ. Mɛ ndile katchadenge na niɔdenge, na tsakenenge na ngɔmbe.» 20Tɔ Nzɛmbi nàlɛle ndɛ ndé: «A idoke chinechi, na butsuge bua lɔlɔ, lɔ wɛ kuade. Wuki sale na mabuɛ ma wɛ kukichi ka naa?» 21Sése nàbàbuɛse ndé: «Abone nibubasade gulidi mutu wabole lebiɔge mu mabuɛ mɛndi, tɔ ndɛ asatɔnde bage Buyumune bua Nzɛmbi vɛ.»
Yabadani na ibɛyi cha maambe ma bulɔnge
22Sése nàlɛle baate bɛndi ndé: «Niagani ibɛyi mɔne ti bése lɔlɔ lɔ kabiki lekitchade, na biki lekiluate. 23Muti fuade gua moyi gulutili biéle biatchade, namoni a niute nayɔ yilutili mangoyi ma baluate. 24Kɛngesani bakavange. Bɔ basavade vɛ, bɔ basatɔle vɛ, bɔ manzɔ mabasuɛge biéle vɛ, tɔ Nzɛmbi asakɔnde bɔ bongele vɛ. Béne lelutili bakavange. 25Mutu na vatsɔ béne akitoge buɛse tsuge a ndɛ ya gu tɔtɔ guni mu ibɛyi chi ndɛ lidi na chɔ? 26Béne ti lesalidi na bungudi bua sade maambe mamakɛge vɛ, béne kamuki lamɔne ibɛyi cha maambe mane motchi? 27Kɛngesani buni mapfungi maboge gutsɔ manungi. Mɔ masadianze vɛ, mɔ masakɔme vɛ. Mumbuli mɛ lɛle béne mé, kiti Salemon kumu gutsɔ buyumune buɛndi buotchi, àsàluatenge mangoyi màmàbade na bubuɛ ngane a bua mapfungi muɛne vɛ. 28Nzɛmbi kiti mapfungi mabatsoge gutsɔ mbuage avɛde bubuɛ, mvuati na béne baate ka niba ndɛ kibise vɛde biluɛti bibibuɛ? A baate ba ngua lebiɔge lapése banebe. 29Yabadani na ibɛyi mu bia tchade na bia niɔde. 30Baate ba bulɔnge bunebu babavɛ buge mutéme na Nzɛmbi, nibabalidi na ibɛyi cha maambe muɛne. Taate a béne Nzɛmbi ayɛbi bi béne lelidi na nzale a biɔ. 31Pasagani mu bage Buyumune bua Nzɛmbi, tsɔvane ndɛ akavɛde béne bi béne lelidi na nzale a biɔ.»
Buchine bua gu mboge a Nzɛmbi
32«A baate bɛme, niagani bɔɔme mɔne muti béne lemabage Buyumune bua Nzɛmbi.» 33Sombesani bitsale bia béne biotchi, béne levɛde badɔle gulidi baate babavɛ na matsɔnge. Badani na mapɛnge mamavɛ ganzene, mu kokese mabuɛ ma béne gu mboge a Nzɛmbi gu yulu gu mɔ ma vɛ ganzene. Agone muyibi achitoge mabuɛ muɛne yibe vɛ, namoni a batsélili bachitoge mɔ ganze vɛ. 34Mutu ti alidi na mabuɛ ma ndɛ kuade tsɔnge mu mɔ, mutéme a ndɛ ndile nivane.
Badani baate babakoge
35«Badani na bungose, badani baate babakoge. Futani lengɔnde mu salele Nzɛmbi butsuge na niange, 36ngane a baate babatale kumu abɔ va ndɛ mate gu mubéke lekuɛle. Ayade, adume nzɔ, bɔ bakadibele ndɛ yɔ.» 37Bubuɛ gulidi baséli ba kumu a bɔ ákábakese muchigi va ndɛ káyade. Mumbuli mɛ lɛle béne mé: «Kumu a bɔ nágɛle mangoyi, nátsagese bɔ mu vɛde bɔ biéle bia tchade.» 38Bubuɛ gulidi basɛli ba kumu ákábakese muchigi va ndɛ káyade kɛtiakɛti a buchi voki va makiaki ma buchi.
39«Kumu a nzɔ mbégi wuyɛbi lekɛse le muyibi ayade gu yibe gu nzɔ ndɛ, mbégi ndɛ achichingese muyibi mu bole nzɔ ndɛ vɛ. 40Kabadani babakoge muti béne lesayɛbi lekɛse le mɛ Wuwàbɔnge ndjime a baate ákáyade vɛ.»
Muséli wuwavɛ na maambe maledite na ngua maambe maledite
41Piɛre nàlɛle Sése ndé: «A Kumu, kokome muɛne ndile mu bése wɛ tédili voki gulidi baate botchi?» 42Sése nàkale ndɛ ndé: «Vatsɔ béne muséli wulidi na maambe maledite na buyédi niwu kumu a nzɔ ákávɛde leniange lakɛle nzɔ ndɛ na mu vɛde basɛli bane biéle biatchade lekɛse lotchi.» 43Bubuɛ gulidi muséli wu kumu ákábakese asade mudianze a ndɛ. 44Mumbuli mɛ lɛle béne mé: «Ndɛ niwu kumu ákávɛde leniange lakɛle mabuɛ mɛndi motchi.» 45Tɔ ti muséli alɛle ndé: «Kumu a mɛ achipayade namanze vɛ.» Ndɛ bande ka muɛse baséli ba babagele na babakaase mimbɔnde. Ndɛ ndile katchadenge na niɔdenge na langenge. 46Kumu muséli ayade itsundiatsundi, afunze muséli muɛne, akatchise ndɛ chigi ngane a yi batchise baate babavɛ na maambe maledite. 47Muséli wuyɛbi maambe ma kumu a ndɛ atɔnde, tɔ ndɛ mɔ basade vɛ, chigi yi kumu atchise ndɛ ya lotele. 48Tɔ muséli wusayɛbi maambe ma kumu a ndɛ atɔnde vɛ, ndɛ bise mɔ sade, chigi yi kumu atchise ndɛ ndile ya tchitse. Mutu wubavɛde bikumbe bia kune bafule ndɛ tsɔtse ndile ya bikumbe bia kune. Bababuɛse ndɛ bikumbe bikime va yulu a bi ndɛ lidi na biɔ, tsɔtse yibákáfule ndɛ ka ya bikumbe bia lotele.
Sése gu kagele baate àyade
49Sése nàbàlɛle ndé: «Mɛ mbuage mɛ tsuéli gu tɔtɔ. Mɛ ka yɔ mɛ tɔnde mé yikibange. 50Mɛ mɔne mimbɔnde mia lotele. Mɛ mutéme ki va giliagili alidi kuange nachi maambe muɛne mákásopege. 51Béne latase ti mɛ gu tɔtɔ gu nɔngese baate mɛ yidi? Anibone vɛ. Mumbuli mɛ lɛle béne mé, mɛ gu kagele baate mɛ yidi. 52Bande lɔlɔ, gutsɔ itsuku cha baate bataane, bɔ bakagege. Baate batate babɛle baba bɔli bane. Baba bɔli bane babɛle babatate bane. 53Tɛyi abɛle muane a ndɛ wa lebagele. Muane wa lebagele na ndɛ abɛle taate a ndɛ. Ngu abɛle muane a ndɛ wa mukaase. Muane wa mukaase na ndɛ abɛle nguɛndi. Bukɔ bua mukaase abɛle mukɛdi a muane a ndɛ. Mukɛdi a muane na ndɛ abɛle ngua mulumi a ndɛ.»
Utchikese gua maambe mámákáyade
54Sése nàbàlɛle piti a baate ndé: «Va béne lamone buchi bua pinde ngule yi letɛdi lapole, béne lɛlenge ti mvulu lɔlɔ nanɔge. Avane mvulu akanɔge. 55Va béne lamɔne levoge lamate ngule a bande, béne lɛlenge ti buchi bua lɔlɔ, lɔ na chotsele. Avane chotsele chikayade. 56A baate ba gua levédi banebe, béne leyɛbi tchikese maambe mamaviɔge gu yulu na gu tɔtɔ. Béne ka muki lesatchikese maambe ma Nzɛmbi asade vɛ?»
Songese tchambe na mbɛne a wɛ
57Sése nàbàlɛle bɔ ndé: «Béne ka muki lesatchikese ti maambe maneme masayɛbene vɛ?» 58Ti wɛ na tchambe na mbɛne a wɛ, va béne a ndɛ layɛnde gu mboge bapéchi ba mipame, mu ndjile pasongensani lɔ. Ti béne a ndɛ lesasongese lɔ vɛ, ndɛ bɛge wɛ gu mboge bapɛchi ba mipame, bapɛchi ba mipame babɛge wɛ gu mboge bagɔdi, bagɔdi bakatɛte wɛ gu tsugu. 59Mumbuli mɛ lɛle béne mé: «Wɛ ti mugane muɛne wotchi mane fute vɛ, wɛ sákápole gu tsugu vɛ.»
Tällä hetkellä valittuna:
Luke 12: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
