Matius 3
3
Yohanis Tukang Baptis kasi siap orang-orang par tarima Yesus
3:1-12
(Markus 1:1-8; Lukas 3:1-18; Yohanis 1:19-28)
1Satu waktu, Yohanis Tukang Baptis muncul di padang gurun di propinsi Yudea la tabaos kata, 2“He orang-orang e! Kasi tinggal kamong pung dosa-dosa, tagal seng lama lai Allah pegang parenta jadi Raja!”#Matius 4:17; Markus 1:15 3Yohanis ni yang Allah pung Juru Bicara Yesaya maksud waktu dia bilang,
“Nanti ada orang yang tabaos di padang gurun kata,
‘He orang-orang e! Kasi siap jalang par Tuhan!
Kasi barsi jalang#3:3 Kasi barsi jalang: Teks bahasa Yunani bilang, “Kasi lurus jalang”. par Antua langgar!’ ”#Yesaya 40:3
4Yohanis pake baju panjang luar dari onta pung bulu deng rim dari binatang pung kuli. Dia pung makanang tu bilalang deng madu.#2 Raja-Raja 1:8; Markus 1:6 5Tarus, orang banya datang par Yohanis. Dong datang dari Yerusalem, samua negri di Yudea, deng dari daera-daera yang ada di pinggir-pinggir aer Yordan. 6Abis dong mangaku dong pung dosa-dosa, Yohanis baptis dong di aer Yordan.
7Waktu itu jua ada orang Farisi deng orang Saduki banya yang datang par dapa baptis lai. Mar waktu Yohanis lia dong, dia bilang par dong kata, “Hoe kamong ular-ular babisa! Sapa yang bilang kata kalo kamong dapa baptis mar seng roba kamong pung pikirang deng kalakuang yang bardosa, kamong bisa lapas dari Allah pung morka deng hukumang yang nanti jadi?#Matius 23:33 8Jadi, kalo kamong su bale balakang dari kamong pung dosa-dosa, kamong jua musti biking apa yang bae! 9Jang kira kamong nanti seng dapa hukumang dari Allah tagal kamong pung moyang par Abraham. Dengar beta bilang par kamong: Allah bisa biking batu-batu ni par jadi Abraham pung anana cucu!#Lukas 3:8; Yohanis 8:33 10Allah su siap hukum sapa sa yang seng mau kasi tinggal dia pung dosa-dosa la biking apa yang bae. Akang macang deng orang su kasi siap mancadu par potong pohong-pohong yang seng kasi kaluar bua yang bae lapis deng akang pung akar-akar, la buang akang ka dalang api.#Matius 7:19
11Beta baptis kamong deng aer, tanda kalo kamong su kasi tinggal kamong pung dosa-dosa. Mar ada Satu Orang yang pung kuasa labe basar dari beta, yang nanti datang dari balakang beta. Mau buka Antua pung sandal dari kaki sa beta seng pantas. Antua tu yang nanti baptis kamong deng Allah pung Roh deng api. 12Antua macang ada pegang nyiru par kasi pisa gandum dari akang pung kuli. Biji gandum Antua simpang dalang gudang, mar akang pung kuli Antua buang ka dalang api yang seng mati-mati.”
Yohanis baptis Yesus
3:13-17
(Markus 1:9-11; Lukas 3:21-22)
13Satu hari bagini, Yesus datang dari propinsi Galilea la pi ka aer Yordan par dapa baptis dari Yohanis. 14Mar Yohanis seng mau biking apa yang Antua minta tu. Yohanis bilang, “Bapa e, beta yang musti dapa baptis dari Bapa! Mangapa kong Bapa datang par beta?”
15Mar Antua bilang, “Biking sa iko apa yang Beta minta par ale. Katong musti biking bagitu, tagal deng bagitu katong biking samua yang Allah mau.” Tarus Yohanis baptis Antua.
16Abis dapa baptis, Yesus langsung kaluar dari aer tu. Skrek bagini langit tabuka la Antua dapa lia Allah pung Roh macang deng burung pombo turung ka atas Antua. 17La skrek bagini, ada suara dari sorga yang bilang, “Dia ni Beta pung Ana yang Beta paleng sayang. Dia biking Beta pung hati paleng sanang.”#Carita Mula-Mula 22:2; Lagu-Lagu 2:7; Matius 12:18; Markus 1:11; Lukas 9:35
Tällä hetkellä valittuna:
Matius 3: ABMA
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022, Sinode Gereja Protestan Maluku
