Matayo 8
8
UYesu akumunaniya umunya kinyamuvili
(Maluko 1:40-45; Luka 5:12-16)
1UYesu iikwikaga ukuhuma ku kidunda, ililugu likomi lya vaanu likumuniniilaga. 2Neke umwadaada yumwinga umunya kinyamuvili#8:2 Kinyamuvili Kwe kutigila, wutamwa wuwuvedzaga wa ngwembe ya muvili. aadzage, afugamage pawutalo pa Yesu, amulongelage atigilage, “Mutwave, ngana úkeeliye, uumbaladze.”#8:2 Uumbaladze Umuunu ye aavedzaga nu wutamwa wuwuvedzaga wa kinyamuvili, aavedzaga lupumba. AVayahudi avaali lupumba, vaapeeliilwe imilagililwe gya kuvaladzwa, ukuta vaanukilwe nu Nguluvi, Valevi 13:1–14:32. 3UYesu iigolosaga iliwoko lyakwe, akumupamyaga,#8:3 Akumupamyaga AVayahudi vaalagiidzwe vatanage ukumupamya umunya kinyamuvili, ukuta vatane ukuvedza lupumba, Valevi 5:3. akumulongelaga iitigilaga, “Ndíkeeliye, uvalale!” Umusika guugo, umuunu uyo iivalalaga ikinyamuvili kyakwe. 4UYesu akumulongelaga iitigilaga, “Utanage ukumulongela muunu ye avedzaga imola idzi! Nda haamu, uhelelage ukiiwoneese kwa muteekedzi,#8:4 Muteekedzi Uyu aali nu wutawulilwe uwa kulonga ukutigila, umunya kinyamuvili ávaliidzwe, ukuta ahangage kangi na vaanu avangi, Valevi 14:1-32; Lwiwuko 24:8. Lole Avateekedzi ku Figanulo. ukatawule uwusembe ngita kye aalagiidze uMose, wuvedzage we woolesi ku vaanu vonda ukutigila, úvaliidzwe.”
UYesu akumunaniya umulimila-vangi va mukomi va Valoma
(Luka 7:1-10; Yohana 4:43-54)
5Neke uYesu apilukage ku wudzenge wa Kapelenahumu. Mu wudzenge uwo, aali mwali umukomi va Valoma va kipuga kya vakolakyanda ligana limwinga (100). Umukomi uyo akumuhelelelaga uYesu, akumugongoolaga 6iitigilaga, “Mutwave, umulimila-vangi vangu ágonile ku kaaya ali ni liteela, iipumuka mbandu.” 7UYesu akumuhigaga iitigilaga, “Ndiikwadza kuuko ndimunaniye.” 8Neke kangi umukomi uyo atigilage, “Nambi Mutwave! Sindivagiye ukutigila uveeve wiingile mu nyumba yangu. Lino ulonge ilidzwi swe, umulimila-vangi vangu iinana. 9Na yuune ndili paanyi pa wutawulilwe. Kangi ndili navo avakolakyanda avali paanyi apangu. Ngana ndimulongele yumwinga nditigile, ‘Helele,’ iihelela. Uyungi, nditigile, ‘Waadze,’ iikwadza. Nu mulimila-vangi vangu, nditigile, ‘Lime ulu,’ iilima.”
10UYesu pe agapuliike amadzwi ago, iidzumaga mbandu, akuvalongelaga avamuniniilaga iitigilaga, “Ndakyene ndikuvalongela ndiitigila, mu Vaisilaheli vonda ndisinaa ndiwonaga umuunu ye avedzaga, ye ali nu lufuuwo lukomi ngita ulu! 11Kangi ndikuvalongela ndiitigila, avaanu voloofu ukuhuma inyi dzonda, valaadza nu kwikalasa na vakuhwesu uAbulahamu, uIsaka nu Yakobo pa lukeelanilo mu wutwa wa kukyanya. 12Neke kangi aVaisilaheli nde vavedze vaahaaguliilwe ukuvedza vaanu va wutwa uwo, avo valaatoodzwa kwivala ku kiisi. Uko kulaavedza ni ngʼuuto nu kugeledzula amiino.”
13Neke uYesu amulongelage umukomi uyo atigilage, “Uhelelage! Luhadza lwilimika ukwako ngita ulufuuwo lwako kye lugenda.” Umulimila-vangi uyo iiponaga umusika guugo.
UYesu akuvananiya avatamwa voloofu
(Maluko 1:29-34; Luka 4:38-41)
14Pambele uYesu aafikile ku nyumba ya Petulo, iikwingilaga umo, akumuwonaga umwayuuva umukwive va Petulo ágonile pa wulili, iivawa imungo ya lihilidzi. 15UYesu akumupamyaga iliwoko, umusika guugo iiponaga imungo yaakwe. Iikwimaga, iivangaga ukumuwombela.
16Ikyamihe pe yaafikile, avaanu vakumuleetelaga uYesu avatamwa voloofu, aviibiitwe ni mibepo imiviifu. Neke uYesu agilosage wugendela wa lidzwi lyakwe, kangi avananiyage vonda avaavawaga ni fitamwa. 17Dzonda idzo dzaahumiye ukuta likwile ilidzwi lya Nguluvi, lye aalongile wugendela wa muvidzi uIsaya ukutigila, “Aanyamuwe uwulemwa weesu nu kwitwika ifitamwa fyesu.”#Isaya 53:4
Aviivagila ukumuniniila uYesu
(Luka 9:57-62)
18Umusika ugo, uYesu pe aaweene avaanu voloofu vámupiliime, akuvalagidzaga avanyigendwa vaakwe vagelanidze uwaato, ukuta valowoke imwambu iya nyandza ya Galilaya. 19Neke umuwulanidzi va milagililwe amuhegelelage uYesu, atigilage, “Muwulanidzi, ndihadza ndikukuniniila konda kwe wiihelela.” 20UYesu akumuhigaga iitigilaga, “Amakeve gali ni milindi, ni fidege fili ni fyaso, neke kangi uMuswamuve va Muunu#8:20 UMuswamuve va Muunu UYesu aatambuwe ilitaawa ili ukwisoonela yumwene. Lole ku Figanulo. angaya kaaya!”
21Neke umuunu yungi ye amuniniiliye uYesu atigilage, “Mutwave, uunawule ndihelele tandi ndikamusiile udaada.” 22Neke kangi uYesu amuhigage atigilage, “Uuniniilage! Uvaleke ávafuwe vavasiile ávafuwe vaawo.”
UYesu iinyaamadza ilivelo mu nyandza
(Maluko 4:35-41; Luka 8:22-25)
23Neke uYesu iingilage mu waato, avanyigendwa vaakwe vamuniniilage, vahegage. 24Baaho na baaho, ilivelo likomi liihumilaga mu nyandza, liidwadwalusaga amavingo makomi, ago giivangaga ukugubika uwaato uwo. Umusika ugo, uYesu aali ágoneeliye. 25Avanyigendwa vaakwe vakumuhelelelaga, vakumulamusaga, viitigilaga, “Mutwave! Utupoke! Twifuwa!”
26Nave iitigilaga, “Unyeenye vanya lufuuwo lukeefuanye, kye kiki mwikoogopa?” Neke iimage, akenyelage ilivelo na mavingo, inyandza yiilitamaga. 27Avanyigendwa vaakwe viidzumaga viitigilaga, “Uyu ye ani? Nali livelo na mavingo fikumwidika!”
UYesu akuvananiya avaanu vavili avanya mibepo imiviifu
(Maluko 5:1-20; Luka 8:26-39)
28UYesu na vanyigendwa vaakwe vaalowiike imwambu iya nyandza ya Galilaya, viifikaga ku nyi ya Vagadala,#8:28 Vagadala Uwusimbe uwungi uwa kataali wiitigila Vagelasi. uko viitaangʼanaga na vaanu vavili, aviibiitwe ni mibepo imiviifu. Avaanu avo vaahumile ku mombwe.#8:28 Mombwe Gyali mivedzehedze gya Vayahudi ukuvasiila ávafuwe mu manga, enewuli mu mulindi gwe vaabuguwe kwave mu lutalaawe ululi mu kidunda. Vaali vasali mbandu, sikwali umuunu ye aagelaga ukugendela ingʼaasi iyo.
29Avaanu avo viiyovaga viitigilaga, “Ve Muswamuve va Nguluvi! Uli wuki naafwe? Wáadzile mu kutupumusa umusika pe gusinaa gukwila?” 30Kwali nu lupinga lukomi lwa magubi agaadiimilidzwaga pataali ludoodo na apo. 31Neke imibepo imiviifu igyo gimugongoolage uYesu gitigilage, “Ngana ukutulosa, utwidike tukiingile mu lupinga lwa magubi lula.”
32UYesu iitigilaga, “Muhelelage!” Neke imibepo imiviifu givahumage avaanu avo, gihelelage, giingilage mu magubi ago. Baaho amagubi gonda giisulunukaga lunyilo ku ligeema, giigwilaga mu nyandza, giifuwaga.
33Avadiimi va magubi pe valuweene ulo, viinyilaga lunyilo ukuhelela ku wudzenge. Vakuvalongelaga avaanu dzonda ídzilimiike ku vaanu aviibiitwe ni mibepo imiviifu. 34Avaanu vonda va wudzenge uwo, viihelelaga, viitaangʼanaga nu Yesu. Pe vamuweene, vakumugongoolaga mbandu ukutigila, ahege mu nyi yaawo.
Tällä hetkellä valittuna:
Matayo 8: BEZ
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022 Wycliffe Bible Translators, Inc. All rights reserved.
