Matayo 27

UYesu iisindikwa kwa Pilato

(Maluko 15:1; Luka 23:1-2; Yohana 18:28-32)

1Pamilaawo pe kúkiye, avateekedzi avakomi vonda pamwinga na vavaha va Vayahudi, viikwidiingʼanaga ukutigila vamukome uYesu. 2Vakumupingaga, vakumunyamulaga nu kumugotola kwa mutemi va nyi, ye aatambulwaga Pilato.#27:2 Pilato Uyu aali Muloma, ye aatemile umugoola gwa Yudeya.

UYuda akwitumbika

(Malimo ga Vatume 1:18-19)

3Apo, uYuda yula ye amusutuwe uYesu, pe aaweene uYesu áhigiilwe ukutigila akomwe, lukumuvavaga hiilo. Iihelelaga ku vateekedzi avakomi na vavaha va Vayahudi, iipilusaga amagoobeli makyumi gadatu (30) gala ukwawo. 4Akuvalongelaga iitigilaga, “Ndíhokile, pakuva ndímusutuwe umuunu ye angaya nongwa yiyivedzaga.” Neke kangi avo vatigilage, “Ulo si lukaani lwesu, lukaani lwako yuuve.” 5Neke uYuda ataagage amagoobeli ago mu tembeli, ahegage, ahelelage kwitumbika. 6Avateekedzi avakomi viiholaga amagoobeli ago, viitigilaga, “Ulo lusiikwidikwa mu milagililwe gya Mose ukuhandza amagoobeli ago na ga mu sanduka ya tembeli, pakuva gáhombiilwe ukuta umuunu akomwe.” 7Apo viikwidiingʼanaga ukunyamula amagoobeli ago nu kugulila umugunda gwa muwufi va fiviya, ukuta vavasiilage umo avagendzi. 8Lwe lwene umugunda ugo viitambula Mugunda gwa Danda nayi neengʼuli.

9Neke likwilage ilidzwi ilyalongiilwe nu muvidzi uYelemya ukutigila, “Vaanyamuwe amagoobeli makyumi gadatu, ikikelelo kya muunu kye viidiingʼiine aVaisilaheli ukuhomba. 10Apo viigulilaga umugunda gwa muwufi va fiviya, ngita uMutwa kye aandagiidze.”#Yelemya 19:1-13; 32:6-9; Sakalya 11:12-13

UYesu pawutalo pa Pilato

(Maluko 15:2-15; Luka 23:2-3, 13-25; Yohana 18:29–19:16)

11Umusika ugo, uYesu iimile pawutalo pa mutemi uPilato. Neke umutemi uyo amuwuudzage atigilage, “Ongo, uli Mutwa va Vayahudi?” UYesu akumuhigaga iitigilaga, “Yuuve ye úlongile ulo.” 12Avateekedzi avakomi na vavaha va Vayahudi, viivangaga ukumutaaha uYesu, neke kangi umwene atanage ukuvahiga nambe lidzwi. 13UPilato akumuwuudzaga iitigilaga, “Siwiipulika dzonda idzo dze vakukutaaha?” 14Neke kangi uYesu atanage ukuhiga nambe lidzwi limwinga, uPilato iidzumaga hiilo.

UYesu iihigwa ukukomwa

(Maluko 15:6-15; Luka 23:13-25; Yohana 18:39–19:16)

15Nagula umwaka mu kyaka kya Paasaka, umutemi aavedzaga ni mivedzehedze gya kumudindulila umudindilwa yumwinga, ye vamusakaga avaanu. 16Umusika ugo, kwali nu mudindilwa yumwinga, ye aatambulwaga Balaba. Umudindilwa uyo aadzeelaniike hiilo wiimila wa wuhosi we aalimaga. 17Neke uPilato avawuudzage avaanu pe válundiine atigilage, “Mu vadindilwa vavili ava, ye ani ye mwisaka ndivadindulile? UBalaba enewuli uYesu ye iitambulwa Mesiya?” 18UPilato avawuudziidze ewo, pakuva aludzeeliye ukutigila, avateekedzi avakomi na vavaha va Vayahudi vámugotuwe uYesu ukwakwe wiimila wa giila.

19UPilato pe iikalile pa kideego kyakwe kya luhigilo lwa nongwa, umudala vaakwe akumusindikilaga imola iyiitigila, “Utane ukumulimila uluviifu luluvedzaga umuunu uyo, mungaya nongwa, pakuva ndípumwiswe hiilo mu malooto pakilo wiimila waakwe.”

20Neke kangi avateekedzi avakomi na vavaha va Vayahudi vavafundage avaanu ukutigila, vamunyilike uPilato avadindulile uBalaba nu kumuhiga uYesu ukuta akomwe. 21UPilato akuvawuudzaga kangi iitigilaga, “Ye ani mu vadindilwa vavili ava, ye mwisaka ndivadindulile?” Viihigaga viitigilaga, “Twisaka utudindulile uBalaba.” 22UPilato akuvawuudzaga kangi iitigilaga, “Lino ndimulimile kiki uYesu uyu, ye vakumutambula avaanu ukutigila Mesiya?” Avaanu vonda viiyooyaga viitigilaga, “Atovelelelwe!” 23UPilato akuvawuudzaga kangi iitigilaga, “Kye kiki? Áhokile kiki?” Neke kangi aveene vaginage ukuyooya vatigilage, “Atovelelelwe!”

24UPilato pe aaweene ukutigila, iilemwa ukupitusa amahoodzo ga vaanu avo, pakuva vávangile ilyowo, iinyamulaga ululenga, iikalavaga amawoko pa miiho gaawo, kwe kutigila angaya nongwa yiyivedzaga. Neke avalongelage atigilage, “Ndingaya nongwa yiyivedzaga ulwa fuwa ya muunu uyu. Idzo dzeenyo yuunye!” 25Avaanu vonda vakumuhigaga viitigilaga, “Inongwa iyo yivedzage yeesu na vaana veesu!” 26Neke uPilato avadindulilage uBalaba ngita kye vamunyiliike, neke kangi amugotolage uYesu ku vakolakyanda, ukuta vamutove ni mikopodzi nu kumutovelelela pa kipindulihidzo.

Avakolakyanda vakumuyeyewula uYesu

(Maluko 15:16-20; Yohana 19:2-3)

27Neke avakolakyanda va mutemi uPilato avo, vamunyamulage uYesu, vahelelage nave mu lipaala lya litengule lya mutemi. Vakuvakemeelaga avakolakyanda avangi vonda, viilundanaga. 28Vakumufuulaga imyenda gyakwe nu kumufwalidza umwingila umuduungʼu. 29Viitivaga ingeela ya miifwa, vakumufwalidzaga pa mutuwe, vakumuviikilaga uludete mu liwoko lyakwe ilya kundiyo. Viifugamaga pawutalo apaakwe, vakumuyeyewulaga viitigilaga, “Aadze senga, ve Mutwa va Vayahudi!” 30Neke vamufuunyilage amati, vanyamulage uludete ulo mu liwoko lyakwe, vamutovelage pa mutuwe. 31Avakolakyanda avo pe vaaviye vámuyeyewuwe, vakumufuulaga umwingila ugo, vakumufwalidzaga imyenda gyakwe kangi. Neke vahelelage nave kumutovelelela pa kipindulihidzo.

UYesu iitovelelelwa pa kipindulihidzo

(Maluko 15:21-32; Luka 23:26-43; Yohana 19:17-27)

32Avakolakyanda vaahegile nu Yesu mu wudzenge wa Yelusalemu. Pe vali mu ngʼaasi, viitaangʼanaga nu muunu yumwinga ye aatambulwaga Simoni. Umuunu uyo aahumile ku wudzenge wa Kilene. Avakolakyanda avo vakumugagiilidzaga anyamule ikipindulihidzo kya Yesu. 33Neke vakafikage nu Yesu apoono apiitambulwa Goligota.#27:33 Goligota Lole IGoligota ku Figanulo. Ilitaawa ili kwe kutigila, Libangʼa lya Mutuwe. 34Pambele vakumupeelaga uYesu idifwayi ye váhandziidze nu mugoda umukali, ukuta atanage ukwipulika wuvafi. Pe aagedziidze, iikaanaga ukunyuwa. 35Vakumutovelelelaga pa kipindulihidzo, viisoolanilaga ulusolo lwa kugavana imyenda gyakwe. [Lwalimiike ulo, ukuta gakwile amadzwi ga muvidzi agiitigila, “Viigavana imyenda gyangu mu veene pa kusoolanila ulusolo.”#Ndzimbililo 22:18]#27:35 Amadzwi aga simoogali mu wusimbe uwa kataali. 36Vakwikalaga baaho, ukuta vamuloleele. 37Pakyanya pa mutuwe gwakwe pa kipindulihidzo, vaatoveleliye amadzwi ga kumutaaha agaasimbiilwe ukutigila,

uyu ye yesu, mutwa va vayahudi

38Umusika guugo, avagonadaasi vavili viitovelelelwaga pamwinga nu Yesu, yumwinga ulubali ulwa kundiyo kwa Yesu, uyungi kungʼigi. 39Avaanu avaahelanidzaga ingʼaasi iyo, vamuligaga kuno viiyudza imituwe gyawo 40viitigilaga, “ Ha! Uveeve waatigiye wiimamula itembeli nu kudzenga mu figono fidatu. Lino, ngana uveeve ve Muswamuve va Nguluvi, wiike pa kipindulihidzo, wiipoke yuuve!” 41Ndeeni, avateekedzi avakomi na vawulanidzi va milagililwe pamwinga na vavaha va Vayahudi vamuyeyewusaga vaatigilaga, 42“Akiipokaga avangi, neke kangi iilemwa ukwipoka mwene! Ngana uyu ye Mutwa va Vaisilaheli, iike pa kipindulihidzo, apo na yuufwe tuhadza tukumufuuwa. 43Umwene akumuhuuvila uNguluvi, apo lino uNguluvi amupoke ngana akumwenda, pakuva akiilongaga ukutigila, ‘Uneene ndili Muswamuve va Nguluvi.’ ” 44Ndeeni, avagonadaasi avaatoveleliilwe pamwinga nave, navo vamuyeyewusaga.

UYesu iifuwa pa kipindulihidzo

(Maluko 15:33-41; Luka 23:44-49; Yohana 19:28-30)

45Ukuvangila ikivalilo kya mutanda (6.00) pa muunyi, ukufikila ikivalilo kinyigondza (9.00), ikiisi kiigwidzaga mu nyi yonda. 46Ngita ikivalilo kinyigondza, uYesu iikoolaga iitigilaga, “Eloyi, Eloyi, lama sabakitani?” Kwe kutigila, “Nguluvi vangu, Nguluvi vangu, kye kiki úundekile?”#Ndzimbililo 22:1 47Avaanu avangi aviimile apo, pe vaapuliike ulo, viitigilaga, “Uyu akumukemeela umuvidzi uEliya.”#27:47 Uyu akumukemeela umuvidzi uEliya Avaanu vaahoodzaga ewo, pakuva uNguluvi amunyamuwe uEliya kuhelela kukyanya kitafuwa, 2 Vatwa 2:11. Kangi aVayahudi vaahuuvilaga ukutigila, uEliya alaadza kangi kwe naanyi, umusika gwa kwadza kwa Kilisiti, Malaki 4:5. 48Baaho na baaho, yumwinga mu avo iinyilaga kisaatu, iidzabikaga akenda mu difwayi indzadzu,#27:48 Difwayi indzadzu Lole Idifwayi ku Figanulo. iipatikaga mu ludete, iipelanidzaga pa mulomo gwa Yesu ukuta anyuwe.#Ndzimbililo 69:21 49Neke kangi avangi avo valongage vatigilage, “Umuleke, twilolele ngana uEliya iikwadza mu kumupoka!” 50Neke kangi uYesu akuutage mu sawuti ngomi, gwidumukaga.

51Umusika guugo, ilibupa lya mwenda mu tembeli,#27:51 Ilibupa lya mwenda mu tembeli Ili lyabaagulaga aPiimike pa Piimike nu kungi. Lole Itembeli ku Figanulo. liideemukaga fipiidza fivili ukuhuma pakyanya ukufikila paanyi. Inyi yiilindimaga, amatalaawe giibadzukaga. 52Imombwe dziidindukaga, imivili gya viimike voloofu avaafuwe giidzulubukaga. 53UYesu pe aaviye ádzulubwike, avaahumile mu mombwe viikwingilaga mu wudzenge uwiimike wa Yelusalemu nu kuvahumila avaanu voloofu.

54Umwimiilidzi va kipuga kya vakolakyanda pamwinga na vakolakyanda avo avamuloleelaga uYesu, pe vaapuliike ikilindima nu kudziwona dzonda idzo ídzihumiye, viikoogopaga hiilo, viitigilaga, “Ndakyene umuunu uyu akali Muswamuve va Nguluvi!”

55Apoono apo vaali poovali na vamwayuuva voloofu, avaali vámuniniiliye uYesu ukuhuma mu Galilaya nu kumuwombela. Avamwayuuva avo viimile pataali viilola dzonda idzaalimikaga. 56Mu vamwayuuva avo, aali mwali uMaliya Magadalena,#27:56 Magadalena UMaliya aali ni litaawa ili, pakuva aahumaga ku wudzenge uwaatambulwaga Magadala. uMaliya ungʼina va Yakobo nu Yosefu, nayu ngʼinaawo va vaswamuve va Sebedayo.

UYesu iisiilwa

(Maluko 15:42-47; Luka 23:50-56; Yohana 19:38-42)

57Imihe pe yífikile, iikwadzaga umuunu yumwinga umumosi, ilitaawa lyakwe Yosefu, umuhuma ku wudzenge wa ku Alimataya. Uyo aali munyigendwa va Yesu. 58UYosefu iihelelaga kwa Pilato ukumunyilika umufimba gwa Yesu ukuta akagusiile.#27:58 Akagusiile AVayahudi vaalagiidzwe ukusiila umufimba gwa muunu ye átoveleliilwe pa kipindulihidzo ikigono kiikyo, Lwiwuko 21:22-23. Neke uPilato avalagidzage avakolakyanda vaakwe ukutigila, vamupeele umufimba ugo. 59UYosefu iinyamulaga umufimba, iipilingidzaga nu mwenda umuvalafu umupiya. 60Iiviikaga umufimba ugo mu mombwe yaakwe imiya ye aabuguwe kwave mu lutalaawe.#27:60 Mu lutalaawe Mu mivedzehedze gya Vayahudi gya kusiila avaanu, vavaviikaga ávafuwe mu manga, nu kudinda ni liganga likomi pa mulyango. Imombwe ya Yesu yaali mu manga. Neke abiiluhidzage iliganga likomi ukudinda pa mulyango gwa mombwe iyo, ahegage apo. 61Umusika ugo, uMaliya Magadalena nu Maliya, vaali víikalile baaho pa mombwe.

Avakolakyanda viiloleela imombwe

62Ikigono ikya kavili ikyali kigono ikya Sabato, avateekedzi avakomi na Vafwalisayo viilundanaga kwa Pilato. 63Neke vamulongelage vatigilage, “Mutwave, twikwiwuka ukutigila, umudzandzi yula pe aali muumi, aalongile ukutigila, ‘Pa kigono ikya kadatu, ndihadza ndiidzulubuka ukuhuma ku wulungu.’ 64Lino twinyilika uvalagidze avakolakyanda vaako valoleelage imombwe, ukufikila ikigono ikya wudatu. Ngana imombwe iyo yisiiloleelwa, avanyigendwa vaakwe vasiilemwa ukwadza vahiidze umufimba gaakwe nu kuvadzanga avaanu ukutigila, ádzulubwike ukuhuma ku wulungu. Uwudesi uwo wiivedza wuviifu ukulutila uwudesi wa kutala.”#27:64 Uwudesi wa kutala Avalongodzi va Vayahudi vaasoonelaga umusika ugo uYesu pe avalongiye ukutigila, umwene ye Kilisiti, Matayo 26:63-64. 65UPilato akuvahigaga iitigilaga, “Muvanyamule avakolakyanda, muhelele ku mombwe mukaloleelage mu ngufu dzeenyo dzonda.” 66Neke vahelelage ku mombwe, vakolekelage ikikolekelelo pa liganga. Apo vakuvalekaga avakolakyanda ukuta valoleelage imombwe.

Tällä hetkellä valittuna:

Matayo 27: BEZ

Korostus

Jaa

Kopioi