मत्ती 1
1
येसु ख्रीस्ट्की म्हेम्हेमा
(लुका ३:२३-३८)
1अब्रहाम्तेङ् दाउद्की छकोन् येसु ख्रीस्ट्की म्हेम्हेमाकी मीन्मा चुमा य्हीन्ब- 2अब्रहाम् इसहाक्की अप, इसहाक् याकुब्की अप, ओसेम् याकुब् यहुदातेङ् थेइ अज्यो-अलेमाकी अप मुबल, 3यहुदा फारेस्तेङ् जाहेर्की अप मुबल, थेङ्यीमाकी अम तामार् मुबल। फारेस् हेस्रोन्की अप, ओसेम् हेस्रोन् आराम्की अप मुबल, 4आराम् अम्मीनादाब्की अप, अम्मीनादाब् नहसोन्की अप, नहसोन् सल्मोन्की अप, 5सल्मोन् बोअज्की अप मुबल, बोअज्की अम रहाब् मुबल, बोअज् ओबेद्की अप मुबल, ओबेद्की अम रुथ् मुबल, ओबेद् यीसैकी अप मुबल, 6ओसेम् यीसै दाउद् ग्यल्बोइ अप मुबल।
दाउद् सोलोमन्की अप मुबल। सोलोमन्की अम#१:६ सोलोमन्की अम- दाउद्चे स्यीबे उरीयाहकी म्रीङ्त भ्या स्य्हेङ्ज्यीम् थे ग्यम्से सोलोमन् न्हज्यी। स्यीबे उरीयाहकी म्रीङ् मुबल, 7सोलोमन् रहबाम्की अप, र्हबाम् अबीयाकी अप, अबीया आसाइ अप मुबल, 8आसा यहोसापात्की अप, यहोसापात् यहोराम्की अप, यहोराम् उज्जीयहाकी अप मुबल, 9उज्जीयहा योताम्की अप, योताम् आहाज्की अप ओसेम् आहाज् हीजकीयाकी अप मुबल, 10हीजकीया मनस्सेकी अप, मनस्से अमोन्की अप ओसेम् अमोन् योसीयाहकी अप मुबल, 11योसीयाह यकोनीयस्तेङ् थेइ अलेमाकी अप मुबल, थेङ्यीमा यहुदीमात चुङ्ज्यीम् बेबीलोन् य्हुल्री बोर्ब बीम ङोन्ग्यम् न्हबल मुबल।
12बेबीलोन्री चुङ्ज्यीम् बोर्ब बीसेम् यकोनीयस्की ज साल्तीएल् न्हज्यी, साल्तीएल् यरुबाबेल्की अप मुबल, 13यरुबाबेल् अबीउद्की अप, अबीउद् एल्याकीम्की अप ओसेम् एल्याकीम् आजोर्की अप मुबल, 14आजोर् सादोक्की अप, सादोक् आखीम्की अप, आखीम् एलीउद्की अप, 15एलीउद् एलाजार्की अप, एलाजार् मत्तान्की अप, मत्तान् याकुब्की अप, 16ओसेम् याकुब् योसेफ्की अप मुबल, योसेफ् मरीयम्की र्हेम्बो मुबल, चु मरीयम् ग्यम्सेनो येसु न्हज्यी, म्हीमाचे थेङ्त मुक्ती न्हङ्बे ख्रीस्ट् पङ्ब।
17चोले अब्रहाम् य्हङ्से दाउद् सम्म पुस्ता चुब्ली तज्यी। दाउद्की बेलो य्हङ्से इस्राएलीमात बेबीलोन्री चुङ्ज्यीम् बोर्बे बेलोसम्म पुस्ता चुब्ली तज्यी। ओसेम् हुजु बेलो य्हङ्से मुक्ती न्हङ्बे ख्रीस्ट्की बेलोसम्म पुस्ता चुब्ली तज्यी।
येसु न्हबल
(लुका २:१-७)
18येसु ख्रीस्ट् चोले न्हज्यी- योसेफ्चे येसुइ अम मरीयम्त भ्या स्य्हेङ्बरी र्हीत्पल मुबल। मरीयम्तेङ् योसेफ्की भ्या तब बीम ङोन्ग्यम्नो मरीयम्की फोरी पबीत्र आत्मा ग्यम्चे कोल खबल मुबल। 19योसेफ् धर्मी म्ही मुबल। होत्तज्यीम् मरीयम्त म्हीमाकी ङोन्री पेत्न अलनले खुसुक्ले न्हङ्न्हङ्नो ख्लाबे सेम् लज्यी। 20योसेफ्चे चु तम् म्हेन्टीबे बेलोरी परम्प्रभुइ स्वर्गदुत् गी म्हङ्री म्रङ्खज्यीम् पङ्ज्यी, “ओ योसेफ्, दाउद्की ज, मरीयम्त म्रीङ् स्य्हेङ्बरी थलोङो। तलेपङ्सम् थेइ फोरी मुबे कोल पबीत्र आत्मा ग्यम्से य्हीन्ब। 21मरीयम्चे ज गी न्हस्ये मुब, ओसेम् एचे थेङ्की छेन् येसु#१:२१ येसु- येसु पङ्बे मीन् हीब्रु ग्योत्की “यहोसु” पङ्बे छीः ग्यम्से खबल य्हीन्ब। चु पङ्बल “परम्प्रभुचे थर्नलजेत्प” थेन्स्ये मुब। तलेपङ्सम् थेङ्चे र्हङ्की म्हीमात थेङ्यीमाकी पाप्मा ग्यम्चे थर्नलजेत्स्ये मुब।” 22परम्प्रभुचे अगम्बक्त ग्यम्से सुङ्बे तम्मा तबरी चु जम्मनो तबल य्हीन्ब, 23“च्याको, कङ्य अमकोलइ फोरी कोल खज्यीम् थेचे ज गी न्हस्ये मुब। ओसेम् म्हीमाचे थेङ्त इम्मानुएल् पङ्स्ये मुब।”#यसैया ७:१४ (इम्मानुएल् पङ्बलमी, “पर्मेस्वर् ङ्य्हङ्तेङ्” य्हीन्ब।)
24योसेफ् म्हेर्ब ग्यम्चे छोर्खज्यी, ओसेम् थेचे परम्प्रभुइ स्वर्गदुत्चे पङ्बे तम् ङ्येन्ज्यीम् मरीयम्त भ्या स्य्हेङ्ज्यी। 25तर मरीयम्चे ज अन्ह गदेसम्म योसेफ् थेतेङ् बक्च्य अन्हु। मरीयम्चे ज न्हब बीसेम् योसेफ्चे हुजु कोलइ मीन् येसु थेन्ज्यी।
Tällä hetkellä valittuna:
मत्ती 1: WTDG
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2025 by Mother Tongue Translators Society, Nepal Bible Society
and Wycliffe Bible Translators, Inc.
