MATEU 4
4
Yeesu ateen-teenana
(Mar 1.12-13; Lúk 4.1-13)
1 #
Bay 2.18; 4.15 Din a Uwejats-ujënts tsëpand Yeesu ulaalats, pa Ujabël pii teen-teenanul. 2A bi na bër bi mlik aka kënak ngëntaaja ngëbaakër, ni ngërëm ngëntaaja ngëbaakër, a na ru bonats. 3A nateen-teenan kika awokul, a na jaul: “Uci bi m ci bank Abuk Nasien-batsi, jaan ilaak yi i witsa upom.” 4#Ulú 8.3A Yeesu yankës, aja: “Ko wi, picana wun: Cits bariala rin ka bun ñaan kë yafënts, maa kara përim pan pëni pi di mtum Nasien-batsi.” 5A Ujabël tsëpandul te di përaasa pëyëman, a u jutanul di ruets kato-kayëman, 6#Iya 91.11,12a u jaul: “Uci bi m ci bank Abuk Nasien-batsi, jucan-e di utsia, par ko wi picana wun: ‘Ka ja ngëwaanjuul përim, ulekau, din ngë jaabu tsi iñan ngul, pa pëtsiimu rits júnk pëlaak.’” 7#Ulú 6.16Din a Yeesu ja : “Ko wi buts, picana wun: ‘Cäts teen-teenan Ajug, nul nan cii Nasien-batsiu.’” 8A Ujabël tsëpandul kak, te di ruets untunda uyampal mak, a u pibanul msien bëlieng tsi umundu ni përëmb mul, 9a u jaul: “Ngi bëlieng, ma welu ngul, uci m yër m jintëlain.” 10#Ulú 6.13A Yeesu ja : “Pënan tsi, wi useetaani, par ko wi picana wun: ‘Jintëlaan Ajug, nul nan cii Nasien-batsiu, kuu bëndanul, nul koorul.’” 11Bi Ujabël kikoul bi, din a ngëwaanju bi ee ka këmandul.
Yeesu di Galileeya
(Mar 1.14-15; Lúk 4.14-15)
12 #
Mat 14.3; Mar 6.17; Lúk 3.19,20 Bi Yeesu te bi u jaka Joŋ arica, a na witsa Galileeya. 13#Joŋ 2.12Apën di Nasaret, a na tsëp ee ci di Kafarnaum, untab un ci wi tsi kambaŋ bërëk, tsi kajara pëboos Sabëlon ni pëboos Neftali. 14Aro ank, pa u ci bi Isaaya nayëlia ja bi: 15#Isa 8.23; 9.1“Pëboos Sabëlon ni pëboos Neftali, kajara pëya bërëk, tsi kalutar Jordan, Galileeya bañaan ban cits biki Bajudeu! 16Bañaan bando biki ci tsi karëm, bu win ufac uwiak; bando biki ci di mcäts a pëcäts límëntsan bukul, ufac afietsi bukul.” 17#Mat 3.2Pëkur tsi uwal umënts wun, a Yeesu jot pëleents përim, a nuu ja: “Nda yaari ibats, par pësien batsi awokani.”
Yeesu ajot përui bafetsul
(Mar 1.16-20; Lúk 5.1-11)
18Bi Yeesu kë yandaar bi tsi kambaŋ bërëk Galileeya, a na win tsul bañaan batëb ban tsaar biki, aci Simon, ni kanjakee Per, ni ni ba tsaari, Andëre, a bu kë guts itseenk di bërëk, par bë ci bábuets. 19A Yeesu ja bukul: “Nda fetsin, ka tsu ind pëci babuets bañaan.” 20Tsi uyëk umënts wun, a ba bër itseenk, a ba fets Yeesu. 21A na kikara bërun, a na win balon batëb kak, ban tsaar biki; aci Jakob abuk Sebede, ni atsaul Joŋ. Bu ci di kanawa, ni Sebede asin bukul, a bu këyecës itseenk bukul. A na ru bukul. 22Tsi uyëk umënts wun, a ba ruk asin bukul, ni kanawa, a ba fets Yeesu.
Yeesu ajukan indënd bañaan, a na yësan bamoj
23 #
Mat 9.35; Mar 1.39 Yeesu kë yaana Galileeya bëlieng, nuu jukan di ito-ijuki bukul, nuu leents Upetsan-uwar uleka pësien batsi, nuu yësanaand maak bëlieng, ni basal ban ci bi ba këci tsi bañaan. 24A katimul jëk ucaak Siiria bëlieng. A bañaan kë rëŋaniul bamoj bëlieng, ba maak biki gëkorar mmaak bëlieng a ba tsijar mak ni ngëliaf bukul: Biki ngëcaay niaj biki, ni bacäts-bëcäts ni balab; a Yeesu yësan bukul bëlieng. 25A indënd bañaan kë fetsul, ban pëni biki Galileeya, ni #4.25 Dekapolis: Aci përim tsi ugërek, ko wi pa pac wi aci, këraasa untaaja Dekapolis, ni Jerusalem, ni Judeeya ni biki kalutar kabulaŋ Jordan.
Tällä hetkellä valittuna:
MATEU 4: KPKNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Le Nouveau Testament en langue Manjaku © Alliance Biblique du Sénégal, 2020.