Intaliko 41
41
Ivilota vyakwe Fero avizimbulwa
1Ila imyaka yasila yiwili, Fero alota ayimilile mu mbali ya luzi Nayilo, 2alola ing’ombe njine intelepe munenulambali zyafuma mu luzi zikulya matete. 3Swinya alola ing’ombe zinji imbipe injonde munenulambali aziya azyimilila mupipi ni mbuye pa chituntu cha luzi Nayilo. 4Ni ng’ombe mbipe injonde azilya ing’ombe ntelepe injine, ngapano Fero aziwuka. 5Anyoka aponechela alota impindi yachitiwili alota imisante ya malezi munenulambali, amache amazima yamela ulusawa longa. 6Swinya pansizi alola yanji yafumya imitwe iminyale imipofoke nu muza wakapela. 7Imitwe minyale imilula imitwe ya malezi mache munenulambali. 8Akula kwacha atamika mu mwezo nkaninye atuma izwi kwe wakamanya mayele na ku wantu wa mane wonsi mu Ijeputi, Fero awawumbulila ivilota vyakwe, lela kutalinji nanti wenga wino wamuzimbulizile.
9Achaleka kayamwite mukulu anena Fero ati, Nizuka ukuwifya kwane ilelo, 10amuno pano Fero wavitizilwe awawomvi wakwe, wambisile nene nu katenda mu ng’anda ya vingololo yakwe musika wa vita. 11Twalosile ivilota uwanda uwuliwonga, wila muntu walosile ichilota chakwe na muno chikusulila. 12Twalinji nu mulumendo wumwi umu Heberi, umuwomvi wakwe musika wa vita; twalanga pano twamunena ivilota vitu atuzimbulila wila muntu ndimuno ichilota chakwe chawezile. 13Walanga watwilulila achiza achiwa ndimuno watunenezile; nenji nanyosizwe pa mulimo wane, ukuwa katenda anyongwa,
14Apano Fero watumile mukwita Jozefu, amufumya zuwa-zuwe mu chingololo; ala wapela azwala ivizwalo vizima, aya kwe Fero. 15Fero anena Jozefu ati, Ndosile ichilota lela pasi wumwi wino anganzimbulila, njivwile wakuti wewe ndi wivwa ichilota unganzimbulila. 16Jozefu atolelela ati, Chisi a chane, e Leza a wino wandi azimbulile Fero ichete. 17Achaleka Fero anena Jozefu ati, Mu chilota chane nalosile njimilile pa chituntu cha luzi Nayilo. 18Ing’ombe njine intelepe munenulambali zyafumile mu luzi Nayilo zikulya matete. 19Ing’ombe zinji munenulambali ziza pansizi pakwe zyolizyo, imbipe injonde zino nsitela nzilole munsi ya Ijeputi. 20Ing’ombe njonde imbipe ziza zyalya ing’ombe zyakutalika munenulambali injine, 21pano zyalya pasi nanti wenga wino wamanyile kuno zilile imbuye amuno injonde imbipe zyalolekanga ndivino pakutalika. Apano inziwuka. 22Swinya ndota imitwe ya malezi munenulambali ku lusawa longa, amache nkani, amazima; 23ni mitwe munenulambali imifoke iminyale imipofoke ku muza wa kapela yino yamezile pansizi. 24Ni mitwe minyale imilula imitwe mizima munenulambali. Nanenile awamayele, lela kutalinji nanti wenga wino wanzimbulizile.
25Achaleka Jozefu anena Fero ati, Ivilota vyako vyowili vikusula ichilichanganye; Leza akuwumbulizile chino alichita. 26Ing’ombe munenulambali inzima a myaka munenulambali; ni mitwe ya malezi munenulambali amache a myaka munenulambali a chilota chilichonga. 27Ing’ombe mbipe zino zyakonsile pansizi a myaka munenulambali, ni mitwe ya malezi mapofoke ku muza wa kapela, nayonye a myaka munenulambali iya chinkumbili. 28Chili ndimuno nanenela Fero. Leza wakumanyisya chino ali mupipi nu kuchita. 29Amuno mu myaka munenulambali kwandi kuwe ichakulya chivule nkaninye munsi yonsi iya Ijeputi, 30ukuwa ndi myaka munenulambali yiza yasila kuliwa ichinkumbili chikulu nkaninye ni myaka yonsi mizima iliyiwililwa munsi ya Ijeputi. 31Mpindi yavivule iliyiwililwa munsi muno a chinkumbili chikulu chino chilipona. 32Pano Fero walota ivilota vyowili akupanichisya ukuti Leza alichita wowonye, swinya alichichita nanti kuzimba.
33Acheleka kanonzi sola umuntu wino ayine uwa mano, umulasike munsi ya Ijeputi ku myaka munenulambali iya chakulya. 34Swinya usole wane wangawomba munsi, wasenda ichipya chachitisano kuvilimwa vino wakulima munsi ya Ijeputi, ku myaka munenulambali iya chakulya chivule. 35Leka wawunganike ivyakulya mu myaka mizima yino ikwiza, walonga mu zyankoma zya mu makasa yakwe Fero, chize chiwe a chakulya mu twaya, awachisunga. 36Ichakulya-nye chocho chilisunjilwa kunsi pano imyaka munenulambali iya chinkumbili yiza yapona munsi ya Ijeputi, alyakuti insi itize Howe ku chinkumbili.
Jozefu awa we kapanzya mu Ijeputi
37Ilango-nye lyoo lyalolesile a lizima kwe Fero, na ku wawomvi wakwe wonsi. 38Achaleka Fero anena awawomvi wakwe ati, Tutalizana umuntu winji ndivino wee, wino umuzimu wakwe Leza wuli mwakwe weliwe. 39Achaleka Fero anena Jozefu ati, Pano Leza akulanjizizye chonyechoo, kusi umuntu winji umuchenjele uwa mana ndivino wewe. 40Wandi uwakwikalamu ng’anda yane, na wantu wane wonsi wandi wakwivwa wakutontela kwe chonsi chino walanda; ukuwa nenji muno ne mfumu indi pa chilimba ne songo nkulusizye wewe. 41Nga Fero anena Jozefu ati, Kanonzi nakulasika munsi yonsi iya Ijeputi. 42Achaleka Fero azula imbalaminwe mwi kasa lyakwe azwika Jozefu kwi kasa, amuzwika ni myinjilo miyembe amuzwika nu munyololo wakwe golide mu nsingo; 43amukwezya na mwi geleta lyachitiwili, awapundilila akapundu ku nkolelo wakuti, Musilani nzila! Mu mwata wonyewoo amuno wamulasichizile munsi yonsi iya Ijeputi, 44Swinya Fero anena Jozefu ati, Ndi akusowa wewe ngali pasi umuntu nanti wenga wino angatumpula ikasa lyakwe nanti itamba lyakwe munsi ya Ijeputi. 45Fero wisile Jozefu izina ati Zafenatipaneya; amupomela; umwana mukazyana Asenati umwanakwe Potifera e sikapemba wa mu Oni. Achaleka Jozefu wapitanga munsi yonsi iya Ijeputi.
46Jozefu walinji ni myaka amakumi yatatu yankulo yakwe pano watalisile umulimo wakwe Fero imfumu ya Ijeputi, Jozefu afuma apita paminso yakwe Fero, apita munsi yonsi iya Ijeputi. 47Ku myaka munenulambali kwalinji ichakulya chivule nkaninye. 48Kwalonzilwe ichakulya cha myaka munenulambali, muno kwalinji ichakulya chivulenye munsi ya Ijeputi, awalonga mu twaya, alonga na mwakwe wila kaya ukufuma mu vyalo vino vyaliwilizizye. 49Jozefu walonzile amalezi mavule nkaninye, ndivino uluselusenga lwa mwe sumbi, asuka aleka nu kupima muno yamupota.
50Pano ichinkumbili chachilinji ukupona Jozefu walinji na wana wawili, wane Asenati wapafile, umwanakwe Potifera e sikapemba wa mu Oni. 51Jozefu wisile katote wakwe izina ati, We Manase, amuno watili, Leza wanjiwilizya vyonsi ivya kuyimba kwane ni ng’anda yakwe tata yonsi. 52Izina lya mwana wa chitiwili amwita ati, We Efulemu, watili, Amuno Leza wampa ikwata munsi ya kuyimba kwane.
53Ila imyaka munenulambali iya vyakulya vivule munsi ya Ijeputi yasila, 54itela imyaka munenulambali iya chinkumbili yapalamila ndimuno Jozefu wavwanjizile. Kwalinji ichinkumbili munsi zyonsi, nkandi munsi ya Ijeputi mweni mwalinji ichakulya. 55Amuno yalanga insi ya Ijeputi yatalika ukuyimba ku nzala, awantu awalilila Fero ku chakulya; nga Fero anena awa mu Ijeputi wonsi ati, Yanji kwe Jozefu, chonsi chino waya wawanena muchite. 56Achaleka achila ichinkumbili chakwila munsi yonsi, Jozefu ayiyula izyankoma, awakazya awa mu Ijeputi, muno ichinkumbili chawifile nkaninye kweneko. 57Swinya na wa munsi zinji zyonsinye awaya kwe Jozefu mukukala amalezi, amuno kwalinji ichinkumbili chiwipe munsi zyonsi.
Tällä hetkellä valittuna:
Intaliko 41: WWN82
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Chinamwanga Bible © United Bible Societies, 1981.