От Матфея 8

Иисусым На̄лъҳускаңа Проказалык

1Иисус қымимың укигьян, юлӷутыҳлъягым малихтыка̄. 2Та̄хкын ю̄к, проказалык, тагилюни лъңанун, сыгысқуҳфиклъюку, пика̄: «Атанық, пиюкылъқыхкувңа, укмаңиқаӷңа».

3Ынка̄м Иисусым таўавык ся̄флъюку пика̄: «Пиюкылъқақа, укмаңӣҳтын!» Таўаниңинақ проказаңӣткақ. 4Та̄хкын Иисусым пика̄: «Ўатаҳлъяк кина алңунак уңипа̄тыхпына̄н на̄лъҳутылъыҳпының, йыӷлыги агля̄ священнигмун ысҳаӷлигу на̄лъҳутылъҳын. Та̄хкын аҳқыша̄ҳа̄тын Моисейем Лӣлиҳтӯся̄н писқылъҳатун ипапиҳқысқылъюку на̄лъҳутылъҳын».

Иисусым На̄лъҳускаңа Римым Умӣлўа̄ӷан Қыпҳаҳтыңа

5Та̄хкын Иисус Капернаумымун пикақ. Ка̄тақуқлъю, Римым умӣлўа̄ӷан такулюку каюсӣтаҳтысқылъюни пика̄: 6«Атанық, хўаңкунъи қыпҳаҳтыка, унӣӷума̄қ, икфиқыҳлъягӯқ».

7Иисусым пика̄: «На̄лъҳусяҳтуӷнақақа».

8Иўырңа умӣлўа̄ӷым пика̄: «Атанық, итагнанӷитуңа лъпынун итыӷвиксяҳқа̄люңа мыңтыӷамнун. Лыган таўанлъютын на̄лъҳутысқигу қыпҳаҳтыка ынка̄м на̄лъҳулъи. 9Қылӷикаюгмың умӣлылгӯңа ынка̄м хўаңалъю қылӷақанка пилъюўаҳтынка. Ата̄сиқ қылъқумкун: “Аӷуляқи” ага аӷуляқылъықуқ. Иляңа хўатын пикумкун: “Таги” тагилъықуқ. Қыпҳаҳтыка қылъқумкун: “Уна пӣҳтигу”, ага пилъықа̄».

10Иисусым нагалъюку сяӷӣӷаюкақ, ынка̄м югыт малигулъҳӣт лъңанун пикӣ: «Ипа уңипа̄тамси, налъя̄сигатуңа китумың алңунак Израилыӷмӣмың, ӯтун юхтун ухпықиныҳтуткалӷӣмың. 11Уңипа̄тамси, асиваӷмыңлъю, пакфалъямыңлъю юлӷутыт тагиляӷа̄сяҳқа̄гут Атаныҳпагулъҳанун Қилягым. Таўани ақумӯлъютың ныӷылгусиҳлъықӣт сивуныпут Авраамылъю, Исаакылъю ынкам Иаковым. 12Иўырңа тама̄кут Атаныҳпагулъыӷмысяҳқа̄ялӷӣт а̄нысяҳқа̄гут мамлыхлъягмун, таўани ынңа̄талъ қия̄ӷўаҳлъяхлъықут хутытың тышқита̄хта̄мӣта авутыҳқым аңталяңаның». 13Та̄хкын Иисусым пика̄ умӣлўа̄қ: «Агляҳа̄тын, ухпықилъыҳпытун апыӷӣҳлъықуқ».

Ынка̄м таўаниңинақ умӣлўа̄ӷым қыпҳаҳтыңа на̄лъҳуткақ.

Иисусым На̄лъҳускаңи Юлӷутыт

14Иисус Петырынкунун пилюни, ысҳақа̄ аӷнақ Петырым сякиңа қаваӷвигмытыфтуқ пуқлъыӷалюни. 15Ся̄фсяқминигу ӣхакун пуқлъыӷаңӣткақ, ага макылъюни кыпсӣқука̄.

16Иӷивгаӷьягу Иисусымун тагиқӯткӣт туӷныӷалгыт илюмыхтыхун ынка̄м а̄нысқуқӣ туӷныӷӣт акузилъыӷмикун, қамахлъюкилъю қинуюгыт на̄лъҳуткӣ. 17Таўатын пикақ апыӷӣӷналюку ӯкналиқистым Исаиям хўатын пилъҳа:

«Тугукақӣ қинуюлъыпут,

иқиткақӣ ақниӷныпут».

Иисусымун Малихся̄ҳтыңуҳсюлӷӣк

18Иисусым ысҳаӷлюки увитминилңӯт юлӷутыҳлъягыт, ята̄ҳқысқыхкӣ на̄йвам иңлюңанун аӷвиӷналютың. 19Та̄хкын апыҳтуӷикаюгым Лӣлиҳтӯсямың такулюку пика̄: «Апыҳтуӷиста, малихлъықамкын натмун алңунак пикувык».

20Иисусым пика̄: «Кавӣӷыт рӣхтылгӯт, қаўа̄гыт уңлютылгӯт, иўырңа Иӷныӷа Югым иңаҳфигитақуқ».

21Иляңан малихся̄ҳтыңан пика̄: «Атанық, малихлъықамкын иўырңа сивуклъюку атака̄ лъивыӷьяҳтуқаӷлякун».

22Иўырңа Иисусым пика̄: «Малихтиңа. Тама̄кут малигусюнӷилңӯт хўаңамнун туқука̄гут таӷныӷамыхтыхун; лъивыӷлитки туқумаслъӣтың».

Иисусым Амсянаҳтыстыкаңа На̄фқылъыҳлъяк

23Та̄хкын Иисус аңьямун ӯхсян малихся̄ҳтыңилъю ӯхлъыӷа̄ткат. 24Пуглылъҳита кӣңуңӣҳа̄ның ыслъя нӯскахлъяган на̄фқыҳлъякақ, на̄йвақлъю имаҳлъюгуҳтыҳлъягумаӷми, рыпалъ аңьяқ имиӷа̄тақыхка̄. Иўырңа Иисус қава̄лӷӣ. 25Малихся̄ҳтыт такулюку таҳтуҳтыка̄т хўатын пима̄н: «Атанық, югуликут! Туқуляӷа̄нъақукут!»

26Иисусым пикӣ: «Сяңафси алиңыстык? Ухпықилъыҳқыста̄пигӯси!» Та̄хкын ныкывлюни иныҳтыкакык ануқалъю, имаҳлъюгытлъю ынка̄м амсянаҳлъюгуҳтыкақ.

27Қамахлъютың сяӷӣӷаюкат. Хўатын пикат: «Натылңӯўа ю̄к уна? Талўа ануқымлъю, имаҳлъюгытлъю қа̄ткыхкаңат!»

Иисусым На̄лъҳускык Туӷныӷалгык

28Иисусылъю ка̄сямың иңлюңанун на̄йвам, агляқат Гадараӷмӣт нунаңитнун. Та̄хкын ма̄лӷук югык туӷныӷалгык илюмыгныгун тагилютык лъивыӷның налъяқа̄к Иисус. Сю̄хлъюхлъягык рыпалъ кина алңунак та̄хун тӯмкун иглыҳсигалңуқ. 29Лыган ысҳаӷлюку Иисус акилӷӯкак: «Сянақсикут, Иӷныӷани Кияӷныӷым? Икфиқыснақсикут пилъыҳқақ ка̄тыстыхпына̄н?»

30Та̄ўаңуқ қантаӷани куругалӷутыт, ныӷақыфтут. 31Туӷныӷа̄т манигӯтыпихлъютың Иисус пика̄т: «А̄ныстыкуфкут, куругаӷнун итыӷа̄тыснакыфкут».

32Ынка̄м Иисусым пикӣ: «А̄нлыӷа̄тык!» А̄нлыӷа̄лъютың куругаӷнун итыӷа̄ткат. Ага куруга̄т паңалгуткат аситмун на̄йвамун нагныӷлютың мыӷми туқуляӷа̄ткат.

33Куругаӷның афлъыңакилӷӣт қима̄гӯткат нымун. Таўани а̄пқахкыт сяматкык туӷныӷалгуялӷӣк илюмыгныгун, сяматаңилъю куругалӷутыт. 34Ынка̄м қамахтыңъўа̄ӷлютың тама̄кумӣт ысҳаӷьяҳтӯтка̄т Иисус. Ысҳаӷьямыхтыху манигӯтыпихлъютың аӷуляқысқыхка̄т нунамыхның.

Tällä hetkellä valittuna:

От Матфея 8: ess2

Korostus

Jaa

Kopioi