Mi cilima 32
32
1Laban den fii ku tiŋaapanpangu ki gobini o bisiaba leni o yaabila, ki gaali ba. Li yaa puoli, o den fii ki guani o denpo.
Jakob bogindi ki baa tuogi Esayu
2Jakob go den fii ki taa u sanu, ke U Tienu malekinba den tuogi o. 3Jakob n den laa ba yaa yogunu, o den yedi: «Li tie U Tienu yaa goli.» O den yini laa kaanu Mahanayimi.#32.3 Mahanayimi bundi “golalie.”
4Jakob den soani bi tondiba o liiga o kpelo Esayu kani hali Seyiiri diema nni, Edomi dogu nni. 5O den teni ba li naa ñoamabonli, ki yedi: «Diidi yin baa yedi n daano Esayu yaala: ‹Line n tie a naacemo Jakob n yedi yaala. N den kali Laban kani, ki ye likani hali moala. 6N pia i ne, i ŋunbi, i pe, a jatuada leni a puotuada. N soani ki waani n daano laa bonla, ki sugini ke a pali n mangi n po.› »
7Bi tondiba den guani ki cua Jakob kani, ki yedi o: «Ti tuogi a kpelo Esayu, ki sua ke o kpendi ki baa tuogi a leni niba kobinaa.»
8Jakob den jie hali boncianla, ke ti yanyagidi cuo o. O den boagidi yaa niba n ye leni o kaanilie, ki go boagidi i pe, i ne leni ti yuoyuodi yeni, ki yedi: 9«Li yaa tie ke Esayu cua ki tuogi kaanyendu yaaba ki paadi ba, yaaba n sieni baa fidi ki sani ki cia.» 10Jakob den yedi: «O! O Diedo, n baa Abalahama leni n baa Isaaka Tienu, fini yua n den yedi nni: ‹Guani a diema nni ŋan den mali naankani, ke n baa tieni a po yaala n ŋani.› 11Mini a naacemo wa boncianla leni ŋan doagidi n po a ŋanbili leni a dugidi maama. N den duodi Jurden ne leni n gbiamu bebe. Ama moala, n tua golalie. 12N mia ŋa, ŋan faabi nni n kpelo Esayu nuu nni, kelima n jie ke o baa cua ki pua nni, ki pua a bila leni bi naanba kuli. 13Fini, a den yedi ke a baa tieni nni yaala n ŋani, ke n yaabila baa tua nani mi ñincianma tanbiima, ki yabidi hali ke bi kan fidi ki coadi ba.» #Cil 22.17.
14Li den tie laa kaanu ke Jakob den duani ku ñiagu. O den taa wan kubi yaala o nuu nni, ki taani ki baa pa la o kpelo Esayu. 15Ŋuañuana kobilie, ŋuabuana piilie, peñuana kobilie, petona piilie, 16yuoyuoñuadi piitaa leni tin ŋaandi yaa bila, naañuana piinaa, naatona piiga, ŋunñoe piilie leni ŋunjala piiga. 17O den caa ba ki teni o naacenba, ki boagidi ba yankulu yankulu, ki yedi o naacenba: «Yaa cuoni mani n liiga, ki ŋaa li lenli yankulu kuli leni ulielu siiga.»
18O den teni li ñoamabonli yua n ye liiga, ki yedi o: «N kpelo Esayu yaa tuogi leni a ki buali ki yedi a: ‹A tie ŋme yaa yua yo? A caa le? Ŋan deli yaa yankulu tie ŋme yaa yuu yo?› 19A baa guani ki yedi o: ‹A naacemo Jakob n die u, li tie yaa paabu ke o soani n daano Esayu po, wani o ba ye puoli.› »
20O den teni laa ñoamabonli yua n den ŋua miliema, mitaama leni yaaba n den kubi i yankuli, ki yedi ba: «Li tie yeni ke yi baa maadi leni n daano Esayu yi yaa tuogi leni o yaa yogunu. 21Yi baa yedi o: ‹A naacemo Jakob mo ŋua ti puoli.› » Jakob den yedi o pali nni: «N baa kuugi Esayu pali leni yaa paabu n ye n liiga ne. Lani yaa pendi, n baa le o nunga, ke daalinba o baa biali nni leni ki nunmanga.» 22Bu paabu den ye o liiga ke o den duani laa ñiagu li nagili nni.
Jakob muali
23Laa ñiagu, o den fii ki taa o puoliediba, o puotualiediba leni o piiga n biyenga, ki duodi Jurden kpentaali yaali n yi Yaboki. 24O den taa ba ki teni ke bi duodi u kpenu, ki teni ke wan pia yaala kuli mo duodi. 25Jakob den sedi lankani o bebe. O joa den dua ki moa leni o hali ke li ban bua ki yendi. 26Wan den laa ke waa fidi ki paadi o, o joa den pua Jakob kpiegu. Jakob n den moa leni o yaa yogunu, o kpiegu den kpigidi. 27O den yedi Jakob: «Cedi min gedi ke li bua ki yendi.» Jakob den guani ki yedi o: «N kan ŋaa ŋa, se yaa yogunu ke a gaali nni.» #Ose 12.3-4.
28O den yedi o: «A yi lede?» O den guani ki yedi o: «N yi Jakob.»
29O go den yedi o: «A kan go yaa yi Jakob, ama bi ji baa yaa yi ŋa Isidayeli, kelima a moani leni U Tienu leni bi nisaaliba, ki paadi.» #Cil 35.10.
30Jakob go den buali o ki yedi: «N mia ŋa, ŋan teni min bandi a yeli.» O den guani ki yedi o: «Be yaa po ke a buali n yeli?» O den gaali o lankani. #Buj 13.17-18. 31Jakob den yini laa kaanu Penieli,#32.31 Penieli bundi “U Tienu nunga.” Bi go yi lankane Penueli. kelima o den yedi: «N den laa U Tienu nunga ke n naano ciadi.» 32U yienu den pudi ke o den fii ki suagi liiga Penueli po. Jakob den duugi kelima o kpiegu yeni po. 33Li tie lani yaa po yo ke hali moala Isidayeli yaaba kan ŋmani yaa jiinu n ye ku kpiegu nni, kelima U Tienu den pua Jakob kpiegu jiinu.
Tällä hetkellä valittuna:
Mi cilima 32: BGP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Gulmancema Protestant Bible © Bible Society of Burkina Faso, 2013.