LUKA 22
22
1Yaa dupen n ki pia *dabinli jaanma, yaama n yi mi *Pendima jaanma, den nagidi. 2Bi kopadicianba yudanba leni li *bali maama bangikaaba den lingi ban baa tieni maama ki kpa Jesu, kelima bi den jie ku niligu.
Judasa tuo ke o baa janbi Jesu
(Mat 26.14-16; Mak 14.10-11)
3Sutaani den kua Judasa pali nni, wani ban go yi yua Isikalioto, yua n den tie bi piiga n niliediba siiga yendo. 4O den gedi ki ban juogi leni bi kopadicianba yudanba leni U Tienu diegu jiidikaaba yudanba wan baa tieni maama ki janbi Jesu, ki teni ba ban cuo o. 5Bi pala den mani boncianla, bi den niani o ke bi baa teni o i ligi. 6O den tuo, ki di yaa lingi wan baa baa yaa folu ki janbi Jesu ki teni ba ke ku niligu ki bani.
Jesu teni ke bi ŋanbi mi Pendima jaanjiema
(Mat 26.17-25; Mak 14.12-21; Jan 13.21-30)
7Yaa dupen n ki pia dabinli jaanma dana siiga, lan den bili ban kodi mi Pendima jaanma pebiga yaa daali den pundi. 8Jesu den soani Pieli leni Jan ki yedi ba: «Gedi mani ki ban ŋanbi tipo mi Pendima jaanjiema tin je.» 9Bi den buali o: «A bua tin ŋanbi ma le?» 10O den goa ki yedi ba: «Diidi mani, yi yaa kua u dogu nni yaa yogunu, yi baa tuogi o ja ke o bugi li ñincuali. Yin ŋoadi o mani ki ban kua wan baa kua yaa diegu nni, 11ki yedi likani diedaano: ‹Canbaa yedi a daa: Mini leni n ŋoadikaaba n baa je mi Pendima jaanjiema yaa candieli nni ye le?› 12O baa waani yi li dietuadili, yaali n yaba ke yaala n dagidi kuli ye lienni. Yin ŋanbi mani lankani.» 13Bi den gedi ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.
O Diedo jiema
(Mat 26.26-30; Mak 14.22-26; 1Kol 11.23-25)
14U yogunu n den pundi Jesu den kali u saajekaanu kani, wani leni bi tondiba. 15O den yedi ba: «N den bua hali boncianla ki taani leni yi ki je yaa Pendima jaanjiema n tie na hali ki daa laa fala. 16Kelima n kadi ki waani yi ke n kan go je ma hali man baa tieni ki dudi *U Tienu diema nni.» 17Lani o den taa ki tadiñokaaga ki tuondi U Tienu ki yedi: «Yikuli n ga mani li bonñokaala na ki boagidi. 18N yedi yi, moala liiga n kan go ño duven, hali U Tienu diema n baa cua yaa yogunu.» 19O go den taa dupen ki tuondi U Tienu, ki cabidi ki teni ba ki yedi: «Line tie n gbanandi min puni yaadi yipo. Yaa tiendi mani yeni ki yaa tiani npo.» 20Ban den dini ki gbeni, o go den taa ki tadiñokaaga ki teni ba ki yedi: «Yaa bonñokaala n tie na tie n soama yaama n wuli yipo ki teni ke U Tienu *ŋantaadipaano n kua.
21Ama diidi mani, yua n baa janbi nni yaa nuu taani ki ye leni nni u saajekaanu na. 22O *Ja Bijua caa nani lan diani ki bili opo maama. Ama fala baa ye leni yaa nilo n baa janbi o.» 23Bi den cili ki buali biyaba, bi siiga yua n baa tieni laa bonla.
Bi ŋoadikaaba siiga yua n cie
24Mi niama moko den fii bi siiga ke bi bua ki bandi bi siiga yua n cie bikuli.#Mat 18.1; Mak 9.34; Luk 9.46 25Jesu den yedi ba: «I nilanbuoli badiba die ba leni u paalu, yaaba n mabindi ba mo teni ke bi yi baa bi nitodikaaba.#Mat 20.25-27; 10.42 26Lan da tie yeni yi yaa kani. Ama, yi siiga yua n cie yikuli n tua nani ki bonwaaga yeni, yua n tugi li yuli mo n tua nani o naacemo yeni.#Mat 23.11; Mak 9.35 27Ŋme n cie o yua, yua n ka u saajekaanu kani ki baa je bi, bi yua n tendi mi jieme? Yua n ka ki baa je kaa? Ama mini wani n ye yi siiga nani yua n tendi mi jiema yeni.#Jan 13.12-15 28Yinba, yi tie yaaba n den juuni ki ye leni nni n biigima kuli nni ki pundi hali moala. 29Lani yaa po nani n Baa n bili ke n baa je li bali maama, n moko bili ke li baa tua yipo yeni 30ke yi baa ti yaa di ki go ñu n saajekaanu kani n diema nni, ki ka i bali kalikaani po, ki jia Isalele piiga n buoliedi buudi.»#Mat 19.28
Pieli baa ti nia Jesu
(Mat 26.31-35; Mak 14.27-31; Jan 13.36-38)
31Jesu go den yedi: «Simono, Simono, diidi, Sutaani den mia ke wan baa u sanu ki yagi yikuli nani ban yagini *ŋalikama maama yeni. 32Die n mia U Tienu apo ke a *dandanli n da gbali. A yaa ti lebidi ki guani n kani, ŋan yaa paagidi a kpiiba pala.» 33Pieli den goa ki yedi o: «N Daano, n bogini ki baa ye leni a baa li kpaadidieli po leni mi kuuma po kuli.» 34Jesu den yedi o: «Pieli, n waani a, dinla ñiagu hali ke ku kootongu daa mua, a baa nia taalima taa ke ŋaa bani nni.»
35Lani Jesu den buali bikuli: «Min den soani yi ke yii kubi ligiboagili, kaa kubi sancenboagili leni cacaadi yeni, yi den luo liba bi?» Bi den goa ki yedi o: «Liba kuli.»#Mat 10.9-10; Mak 6.8-9; Luk 9.3; 10.4 36O den yedi ba: «Ama moala liiga, yua n pia ligiboagili, wan taa li, yua n pia sancenboagili, wan mo n taa li, yua n kaa pia jugisiega, wan kuadi o kpalibu ki da. 37Kelima n yedi yaala n diani npo kuli baa tieni ki dudi: ‹Bi den coadi ki taani o leni bi nikpaba.› Li baa tieni ki dudi moala.»#Esa 53.12 38Bi den yedi o: «Ti Daano, diidi ki le, jugisiemu lie ye ne.» O den yedi ba: «Li dagidi.»
Jesu gedi ki ban jaandi Olifie Tiidi juali po
(Mat 26.36-46; Mak 14.32-42)
39Jesu den ñani ki gedi *Olifie Tiidi juali po nani wan yen maani ki caa maama. O ŋoadikaaba den yegi leni o. 40Wan den pundi likani, o den yedi ba: «Yaa jaandi mani ke yin da ti kua mi tulinma nni.» 41Lani, o den piadi bikani nani o nilo n baa lugidi li tanli lin baa yaa bianu, ki gbaani ki jaandi ki tua: 42«N Baa, a yaa tuo, ŋan ñani n kani yaa tadiñokaaga n tie na min da ño, die lan da tua mini ka n bua yaala, kali fine n bua yaala.» [ 43Laa yogunu maleki den ñani tanpoli ki doagidi opo o yuli ki paagi o. 44Li paboancianli den kubi o ke o jaandi ki pugidi. O tontonjena den tua nani mi soama yeni ki condi tiipo.] 45Wan den jaandi ki gbeni, o den guani o ŋoadikaaba kani ki sua ke bi goagoa kelima bi paboanli po. 46O den yedi ba: «Be n teni ke yi goa? Fii mani ki yaa jaandi ke yin da kua mi tulinma nni.»
Bi cuo Jesu
(Mat 26.47-56; Mak 14.43-50; Jan 18.3-11)
47Jesu n da den maadi, ku niligu den cua, ke ban yi yua Judasa, bi piiga n niliediba siiga yendo, ye bi liiga. O den nagini Jesu ki baa gobini o. 48Jesu den yedi o: «Judasa, a baa gobini o Ja Bijua yene ki janbi o?»
49Yaaba n den ye leni Jesu n den laa yaala n baa tieni, bi den buali o ki yedi: «Ti Daano, tin pedi ba mu jugisiemu bi?» 50Bi siiga yendo den pedi ki joandi bi kopadicianba bado naacemo jientubili. 51Jesu den yedi: «Cedi mani yeni.» O den sii o ja yeni tubili ki paagi li.
52Lani Jesu den yedi bi kopadicianba yudanba leni U Tienu diegu jiidikaaba yudanba leni bi *nikpeliba, bani yaaba n den taani ki cua ki baa cuo o: «Yi cua ki kukubi mu jugisiemu leni i gbiami nani yi lingi o sanjialo yeni? 53Min den ye leni yi daali kuli U Tienu diegu nni, yii den cuo nni, ama moala yi di pia u folu, ke li *biigili paaciamu mo n die.»#Luk 19.47; 21.37
Pieli nia ke waa bani Jesu
(Mat 26.57-58,69-75; Mak 14.53-54,66-72; Jan 18.15-18,25-27)
54Bi den cuo Jesu ki gedini bi kopadicianba bado diegu nni. Pieli den ŋua foagima. 55Ban den cuoni mi fantama u luolu siiga, ki taani ki ka ki yie, Pieli den kali leni ba. 56Yaa jafanba n tuuni ku diegu yeni niinni siiga yendo den laa o ke o ka mi fantama kani, ki noanli o ki yedi: «O ja na moko den ye leni o.» 57Pieli den nia ki yedi o: «A-a, pua ne, mii bani o.» 58Lan yen waamu, nitoa den laa o ki yedi: «A moko tie bi niba yeni siiga yua yo.» Pieli den goa ki yedi: «A-a, mii tie.» 59Lan den waagi waamu, nitoa moko den ñi ki yedi: «Moamoani lige, o ja na moko den ye leni o, kelima o tie *Galile yua yo.» 60Pieli den goa ki yedi o: «A-a, mii bani ŋan maadi yaala.» Lanyogunu hali ke o da maadi, ku kootongu den mua. 61O Diedo den jigidi ki diidi Pieli. Pieli di den tiadi wani o Diedo n yedi o yaa maama na: «Ku naa ñiagu, hali ke ku kootongu daa mua, a baa nia taalima taa ke ŋaa bani nni.» 62O den ñani ki ban mua leni li paboanli.
Bi sugi ki go pua Jesu
(Mat 26.67-68; Mak 14.65)
63Yaaba n den kubi Jesu den ñuadi o ki pua o 64ki fini o nunga li cabili ki tua: «Ŋme pua ŋa? Bandi o.» 65Bi go den sugidi o sugitoadi boncianla.
Jesu sedi bi cancannikpeliba nintuali
(Mat 26.59-66; Mak 14.55-64; Jan 18.12-14,19-24)
66Lan den yendi, Jufinba *cancannikpeliba taancianli, lani n tie bi kopadicianba yudanba leni li bali maama bangikaaba leni bi nikpeliba, den taani ki gedini Jesu bi taanli kani#22.66 Bi taankaanu den ku leni U Tienu diegu. ki yedi o: 67«A yaa tie *U Tienu n Gandi Yua, ŋan waani ti.» Jesu den goa ki yedi ba: «N yaa waani yi la, yi kan dugi n maama po. 68N yaa buali yi liba mo, yi kan guani pu. 69Die moala liiga, o Ja Bijua baa yaaka U Paaciamu Kuli Daano U Tienu jienu po.» 70Bikuli den yedi o: «Lanwani, a tie U Tienu Bijua yo?» O den goa ki yedi ba: «Yinba yiba n yedi, n tie wane.» 71Lani yaa po bi den yedi biyaba: «Siedinba ki go tie tiladi. Tinba tiba ti gbadi la o ñoabu nni.»
Bi gedini Jesu Pilata bujiali kani
(Mat 27.1-2,11-14; Mak 15.1; Jan 18.28-32)
Tällä hetkellä valittuna:
LUKA 22: GUX03
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Gulmancema Bible © Bible Society of Burkina Faso, 2003.
