YOHANA 7
7
Yesu ea orjooga ghaamwat
1Ng'ata ng'asheesu gwaneayeewa Yesu jeeda ng'eanyiida Galilaya, aba gideaba magassa gwaneayi aba jeeda ng'eanyiida Yudeya aba gideaba fuga Yahudi gagasa gwanuus niny. 2Abeeda aba damandida ea nineekiit ghweelmeeda fuga Yahudi sisina Udahabeaschajeega. 3Hean ghwalamda orjooga ghaamwat ak gwayeesha, “Ng'amwana hiji ak guwi ng'eanyiida Yudeya ghwadaah giinealangaagu gadiyoojiga isinayi. 4Siida moamu gwasina gadiyeeda makcheameeda aba iigasa ghwadaambiir gheawungaaschi aba heeda buuneeda. Asi iisini gadiyoojusu abeeda giihiimsi geaw ng'eanyiida.” 5Aba gideaba eara orjooga ghaamwat mamwasa niny. 6Gwayeesha Yesu saawa, “Damandeanyu miighwahidu, amaduuku damandeang'wa gwanda galeagasean. 7Ng'eanyiida moamu ghwasteagwa, duuku aniini ghwastan aba gideaba geamuuwu gideaba gadiyoojigaaschi ea munyas. 8Aweayeena agooga jeedeaba ghweelmeedida nea goobeayi geat; aniini maydawa jeedeaba ghweelmeeni, aba gideaba miighwahidu damanda doabiiw aba heedeanyu.” 9Gwarukuta ng'asheesu amang'ata goobiida hoowa bea Galilayaan.
Yesu aba jeeda ghweelmeeda sisna udahabeaschajeega
10Ng'ata nea niweay Orjooga ghaamwat ghweelmeedida, iidu eara niny gawa nea mabwadakta. 11Hean gagaseadayi fuga Yahudi aba jeedeaba ghweelmeedida nea geeyeena, “Gwanda yeenu?” 12Iidu gwaheedu giiniikghta aba jeeda buuneeda. Mwaatkwa iissa gwayi, “Siisi aamiy,” nea mwaatkwa gwayi, “Manda, niny gahuteawi buuneeda.” 13Eara gwasa ghanyea manda siida badaksa ak gwarukuta ng'asheega badaydaanyi aba eeshpwara aba gheawalmeeda fuga Yahudi.
14Iidu siweay bugusta ghweelmeeda gawa Yesu gheeda sibata ASEETA ak goonealshi. 15Hean ghahamng'eanyi fuga Yahudi nea gwayi, “Siisi ghwanyasa yeenu fughareani nea mii ghoasoamwa?” 16Ghwasha Yesu ak gwayeesha saawa, “Ng'asheega anaali buuneeda mii geasu, gaba dea ajeaknean; 17siida bwariiy gwasin gida bwariiy niny, gayghwanal giinealshooni ea gwaleabu heeda ASEETA ghana gideaba gearuku aba gheambalmeedeanyu. 18Siida baloola gheambalmeadaanyi abeeda gagaseadayi giigheambiiteaba geaw, amaduuku siida gasa giigheambiita siida ghayi ajeagu gaba huumwa nea jeadaanyi ea manda munyinda. 19Ghayi Musa magooneegwa deaweeda? Eara gwasa manda jeedeang'wa eara siyagi ang'waay deaweeda. Ghwasaan inyas googasayi anuusean?” 20Hean ghwasha buuneeda nea gwayeesha, “Gindeawi meangeenda! Gagaseadayi ng'eaha gwanuusnyi?” 21Ghwasha Yesu nea gwayeesha, “Geasinyi gadiyeanagi, ak ghwanung' ghahameagwa ng'eanyi iyoadaayi. 22Musa ghayi gagooneegwa ghasmeahooda (Maleapna heeda Musa, gwaleabu heeda ghweaniga), ak ghoayaachi agooga siida ghasmeahooda eaweeda Sabaato. 23Iissa iisiyaat siida ghasmeahooda eaweeda Sabaato, ak abeeda ea meenuusa deaweeda Musa, abeeda goonyareeksean aba gideaba ghaahaapchi siida eaweeda Sabaatohi? 24Adoorgweakiisi buuneeda aba gidoadaakti, iissa goorgweaksi aba girgweageeda doabiiw.”
Heapi niny Mesiyahi?
25Hean gwayi fuga mwaatkwa bea Yerusalemu, “Heapi! Siidida sigasa gideaba gajeenuusiin mii nihi? 26Ak ghamneawa gabalool aba eeshpwara nea meerukusiina ng'ashaan! Gwadeepa eara fuga ambaliischi ea nijeeng'u gideaba siisi Gristohi? 27Eaweeda jea ghwahina Gristo manda siichea ghwanal heeleabu, duuku aseasa geanali heeleabu siisi.” 28Gwarugu Yesu aba ghuuta haw aba damanda anealsheewa aba jeeda gheeda sibata ASEETA, “Ghoanalaan ak ghoanali eara heeda ealeabu? Mwaawuni aba uhuudeanyu aniini; dea ajeaknean niny huumwa ak ea moanali niny. 29Ghaanali niny aba gideaba gealeabu headaanyi, ak goojeaknean.” 30Geegaseadayi gichea eang'waayda ak ea manda siida aheaksa geatinda ghoang'waay aba gideaba mii ghwahita damandaanyi. 31Iidu ghwamwas fuga saang'a niny; nea gwayi, “Gristo iihidu, gaygwasin gwadeagwajeega burdeawa geasin siisi?”
Geecheakta furiischoodiga ghoang'waay Yesu
32Ghwayiiy Farisaayajeega gidameang'sheata eemeeda aba badaydaanyi, hean goojeakta ashoohoodiga hees ea Farisaayajeega furiischoodiga gaweay ghoang'waay niny. 33Gwayeesha Yesu, “Gajeendeayeena gheadi nuwaas, amang'ata gaydaweesa dea ajeaknean; 34gajagassean ak ea mwajanyasaan, nea heechea deabiida ea majoamuusa ahini.” 35Gabalool fuga Yahudi nea gwayeeniissa geat, “Siisi gaygawa yeenu jea ea mwajeamuusa eanyasaan? Gaygawa heeda eemeeda dardaawaat mida Yunani ak ghoanaal eemeeni bea Yunani iin? 36Gwarukuna naaha ng'asheanji bea gideaba, ‘Gajagassean ak ea mwajanyasaniin,’ nea ‘heechea deabiida ea majoamuusa ahiniin’?”
Eeniga beega jea gweadu eaweega
37Eaweeda huuydean asheala ghweelmeeda eaweecheanda haw gil, ghamiinaada Yesu ak gwarugu aba ghuuta haw nea gwayi, “Siida bearji muwooshta, doani heedeanyu ghwaleayda. 38Siida mwasan aniini aba ginyaashta Ng'ooruutka, ‘Gayghwadalalaana jeadaanyi eeniga beega eatu eaweega manda muudeanooda aba jeeda gurooroadaanyi.’” 39Gwarugu ng'asheesu aba badayda Guroorooda, jea ghwanyas fugiga jea ghamwas ninyiin; damandida Guroorooda mii ghwaan aba gideaba damandida Yesu miyeekghaambiit.
Dardeayda aba jeeda buuneeda
40Iidu aba jeeda buuneeda gwanda fuga ama iiy nea gwarugu ng'asheesu gwayi, “Aba huumwa siida sibaneeda.” 41Gwayi fuga mwaatkwa, “Siisi Gristo gil.” Nea mwaatkwa gwayi, “Gristo ghoamu gwaleabu Galilaya? 42Neada ng'ooruutka ea mayi, Gristo gaygwaleabu dooshta Dawdi, ak gwaleabu Betlehemu gharang'da abiita Dawdi?” 43Hean ghwadarda buuneeda aba badaydaanyi. 44Gagasa fuga mwaatkwa ghoang'waay niny amadu ea manda siida aheaksa geatinda ghoang'waay.
Fuga ambaliischi bea Yahudi mandeawana masaweega
45Gabiikta Furiischoodiga heeda ashoohoodiga hees ea Farisaayajeega, ak gwayeesha saawa, “Ghwasaan anda miyooyeani?” 46Ghwasha Furiischoodiga, “Eara heeda ghayi manda siida ammu gabaloolda gidabaloolda siisi!” 47Ghwasha Farisaayajeega nea gwayeesha saawa, “Asi eara agooga sireenganeegwa? 48Ghoang'wa adaaha eara ea siyagi gil aba jeeda fuga ambaliischi dea mwas ghana Farisaayo dea mwas niny? 49Eemeeni mwanala deaweedean, simwaashta.” 50Ghwalamda siyagi aba jeenyaawa was Nikodemeeda, ghayi weah headaanyi aba mwadi ak gwayeesha saawa, 51“Neada deaweedeedeanya iissa goorgweaksa siida nea mii ghanyi ghwayiiy ak ghwanal gissini?” 52Ghwasha Saawa nea gwayeesha, “Asi eara ang'iing'i gileabu ng'eanyiida Galilaya? Asi sikteawana ak gay daaha gideaba Galilaya mii gwaleabu sibaneeda.”
53Hean gaba siisi ng'eat ak gawa gheanyi.
Tällä hetkellä valittuna:
YOHANA 7: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
