YOHANA 4
4
Yesu ea gatmooda Samariya
1Iimuchu nea ninal Ng'utamiida gideaba niyiiy Farisaayajeega gideaba Yesu ninyas giinealanga saang'a burdeawa Yohana nea goobaatiisan 2(nea Yesu niny ea miigoobaatiisan buuneeda, goobaatiisan ginealangaaschi), 3ghabeawa ng'eanyiida Yudeya ak gabiikta gicha Galilaya. 4Aba beadi gaygwasik jeeda ng'eanyiida Samariya. 5Ghwahita mujiineeda Samariya siguura Sikari, neekeewa madamnyeanda ghayi adaw Yakobo orjeedaanyi siguura Yosefu. 6Abeeda gwanda hoowa healadeeda Yakobo, hean ea nibur Yesu aba beata, ak goopteada aba murdeeda healadeeda. Nea abeeda gaba aseeta lah.
7Iidu ghwahidu gatmoomba Samariya ghwaram beega. Gwayeesha Yesu niny, “Goonean beesu aaleayi.” 8Abeeda aba damandida niweay ginealangaaschi mujiini ghwasha hamita. 9Gwayeesha Gatmoodida bea Samariyahiin niny, “Ang'iing'i guwoosi siida Yahudi, nea aniini geawooschi gatmooda Samariya giimuustiin gideaba gaymusean beega?” Aba gideaba fuga Yahudi maguuyi haleanja sea fuga Samariya. 10Ghwasha Yesu nea gwayeesha niny, “Inyeeda ghwanyawa ginali haleanjeeda goona ASEETA ak ea ng'eaha gil siida eeshiineey, ‘Goonean beega jea dali,’ ghwanyawa gaymusa niny ak gaygagoonyi beega mideawa eaweega.” 11Gwayeesha Gatmoodida niny, “Ea orjeeda siida mureeda ang'iing'i mindeawani geammooda jea ramnana beega, ak ghabwada nih healadeeda easheagi jih; abeeda gaygeannana yeenu beesu mideawa eaweegean? 12Neada ang'iing'i guwoosi haweewa ghweandeanya was Yakobo gooneasa healadeani nea ghwali niny beega sea diibigaaschi ea dugwaaschi?” 13Gwayeesha Yesu gatmoodida, “Siida wassean nyooh ghwali beesu gaygabiikta ghwaak muwoash, 14amaduuku siichea ghwali beega jea daadaw aniini mayghwaak muwoash earahay; aba gideaba beegiga jea daadawiin gayghoah aba jeadaanyi gheang'deenda nea goobeakbeaksa eaweega manda muudeanooda.” 15Gwayeesha Gatmoodida niny, “Siida mureeda, eaniyean goonean beesu, ea mabiikta ghwaagan muwoash gicha nea meabiikni hiji daram beega.”
16Gwayeesha Yesu niny, “Una, guursiina siyeadaang'u ak giideani hiji.” 17Gwayeesha gatmoodida niny, “Meandeawani siyeeda.” Gwayeesha Yesu gatmoodida, “Asi girgu huumwa gideaba, ‘Mindeawani siyeeda’; 18aba gideaba nindeawi siyeendi muut, ak ghamneawa nih indeawiin ea mii siyeadaang'u gil. Asi aba hiji girgu huumwa.” 19Gwayeesha Gatmoodida niny, “Siida mureeda, aniini iyeang'ulayi guwoosi sibaneeda. 20Ghweanigaasa ghayi iissa ghaghadoawan ASEETA aba uhuudeaba giijeeni, amadu gooyeenyi agooga heeda miisa ghadoawanda ASEETA Yerusalemu gil.” 21Gwayeesha Yesu gatmoodida, “Iya, mwasaan, ghwaan damanda jea ea majaghadoawana Bwaabwa aba uhuudeaba giijeeni, ghana hoowa bea Yerusalemuun. 22Agooga iissa ghoaghadoawanyi gida moanali, duuku aseasa geanali gida sighadoawanyi, aba gideaba lealeanooda gwaleabu heeda fuga Yahudi. 23Ak ghamneawa ghwaan damanda, nea damanda gwanda, nea fuga ghadoawan bea huumwa gayghadoawan Bwaabwa aba guroorooda ea huumwa, aba gideaba Bwaabwa gagaseadayi ghaghadoawan fuga sunu. 24ASEETA guroorooda gil nea fuga ghadoawan niny gammiisa ghaghadoawan aba guroorooda ea huumwa.” 25Gwayeesha Gatmoodida niny, “Ghaanali gideaba gayghwahidu Masiyeeda (siguura Gristo), eaweeda hina gayghoahiimneasa ng'asheega sean.” 26Gwayeesha Yesu gatmoodida, “Aniineani ghamneawa abaloolnyiin niny gil.”
27Deagheata ghapka Ginealangaaschi ak ghahamng'eanyi iidaah nea goobalool gatmooda, ghanyi ea manda siida eesha, “Gigasayi naaha?” ghana “Ghwasaan anda gibalooli sea gatmooda?” 28Gwanung'usa Gatmoodida sirbiidaanyi heeda ak gawa mujiini amahita gwarukusa buuneeda gideaba, 29“Apkaani adaaha siida rukunean ng'asheegeasu sean ghayi easinyi! Siisi gajea mii Gristohi?” 30Ghabeawa buuneeda mujiini ak gaweay headaanyi.
31Aba damandida gamearmearani Ginealangaaschi nea gwayeesha, “Rabi, agiischeena.” 32Hean gwayeesha niny saawa, “Aniini geandeawi hamita jea daak moanali agooga.” 33Hean goonyeari geat giinealanga gideaba, “Gwadeepa gwanda siida niyeassa hamita?” 34Gwayeesha Yesu saawa, “Hamiteanyu sinooda gidabwariiy siida ghayi ajeaknean gil, ak ghaahiichi gadiyeadaanyi. 35Neada ea mooyeeni agooga, ‘Ghwashoada sheeh ang'wan ak ghwahit, ak gay ghwahidu damanda lajita booga’? Ak geayeeshiineegwa aniini, oang'weerda ak ghoadaayi beadooda madameega nigeawiit gaweeriidi aba lajita. 36Siida lach booga ninyas mushaahareadaanyi, nea iissa ghoawaam haghweega aba eaweega manda muudeanooda, ak abeeda gaygahoosan duwaawi siida heeta hista ea dea lach. 37Ak ghoah huumwa ng'asheanda ghayi sirugu bea gideaba, ‘Gwahista siyagi ak ghwalach siinuut.’ 38Aniini geajeaktaneegwa alaja booga mii agadiyeesiina, ghayi gagadiiy fih suuk ak ghamneawa agooga ea nooweayi jeeda gadiyeeda nyaawa.”
39Ghamwas fuga saang'a bea Samariya niny aba jeedeaba mujiineedida aba badayda muuwuunoodeaba gatmoodida, bea gideaba, “Gwarukunean ng'asheega sean ghayi easinyiin.” 40Gaweay fuga Samariya heeda ak gamus gwandeayi saawa, ak goobiida hoowa eawooji iyeenya. 41Ghamwas fuga saang'a muuchi aba badayda ng'asheandaanyi. 42Gwayeesha saawa gatmoodida, “Aseasa meamwasi aba ng'asheagaagu irugu, aseasa siyiinyi, ak geanali gideaba aba huumwa siisi lealnoocheanda ng'eanyiida.”
Yesu ghoahaap orjeeda siida haw
43Iing'ata eawooji iyeenya ghabeawa hoowa ak gawa ng'eanyiida Galilaya. 44Aba gideaba Yesu gamuuwu gideaba sibaneeda moamu ghwanyas mureeda aba ng'eanyiidaanyi. 45Hean hita Galilaya, ghwadeapta fuga Galilaya, aba gideaba eara saawa abeeda gwanda jeeda ghweelmeeda, ak ea nidaah ng'asheega sean sin aba Yerusalemu damandida bea ghweelmeedean. 46Gabiikta gicha mujiineeda Ganeeda Galilaya heeda ghayi yamwa beega ak ghoah difaayeeda. Abeeda gwanda Gapernaumu siisi haw mideawa orjeeda miyaan. 47Iidu nea ghwayiiy siidida gideaba Yesu niwuna ng'eanyiida Yudeya ak ea nihidu Galilaya gawa heeda ak gamus gideaba beeni ahaabwa orjeedeanyu ghabwar miyeeda. 48Ak gwayeesha Yesu, “Iimoadaahi gwadeagooda ea haleanjeeda deamdeameadi ea majamwasa.” 49Gwayeesha Siidida hawiin niny, “Siida mureeda, eaniyean nung' eeweaya heeda miighameawa jeepteanyu.” 50Gwayeesha Yesu niny, “Una; orjeedang'u eamajeek.” Hean ghamwas Siidida ng'asheega Yesu ak ghang'eat gawa. 51Damandida duu ghwararang'aadawaan, gwaroonyi sea soomjoagaaschi ak geerukusa gideaba orjeedaanyi eamajeek. 52Ghoanyaashta niny damanda haabwa baleanda, gwayeesha saawa, “Ghabeawa sheagheeda heeta askweari nea gaba aseeta ispwa.” 53Iidu ghoapkaat ghwaan gideaba damandida rukusiina Yesu gideaba, “Orjeedaang'u ea majeegiin”; hean ghamwas niny, sea fugeaba gheanyi sean. 54Nih gwadeagoodeaba iyeenya sin Yesu gil damanda leapna ng'eanyiida Yudeya nea gawa Galilaya.
Tällä hetkellä valittuna:
YOHANA 4: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
