YOHANA 14
14
Yesu naweeda weah heeda Bwaabwa
1“Adiidu gwahirbaban jeesingeagwa, amwasa ASEETA, ak ghoamwaschaan eara aniini. 2Gheeda Bwaabeedeanyu gwanda giibinda haw, gwachi inyeeda ea masnu gajea neabay darukuneegwa asi ghamneawa geawi dasinneegwa hoorgeedeang'wa jea oopiidana. 3Nea iyeawi ak geasinneegwa hoorgeedeang'wa, gaydabiigu gicha ak ghaayaacheegwa heedeandi, abeeda heedeandi aniini eara agooga gajandana. 4Ak ghoanali naweeda gal heeda eagali.” 5Ghoanyaash Domaso niny, “Ng'utamiida, aseasa meanali heeda iigali; abeeda gajeanaldaan naweeda?” 6Gwayeesha Yesu niny, “Aniini geawooschi naweeda, ea huumeanda, ea eaweega; siida moamu gawa heeda Bwaabwa, geaghus gwasku heedeanyu. 7Inyeeda ghwanyawa ghoanalaan, gajanala eara Bwaabwa, ghang'eada ghamneawa ghoanali ak ea noadaayi niny.”
8Gwayeesha Filipo niny, “Ng'utamiida, ahiimneasa Bwaabwa ghoahiideasa.” 9Gwayeesha Yesu niny, “Geendeaydooschi sea agooga ea gooyang'u ak ea minalaani Filipo? Siida nidaahan aniini nidaah Bwaabwa; abeeda giimuustiin gideaba giyeeni, ‘Ahiimneasa Bwaabwa’? 10Mumwasi gideaba aniini geandi jeeda Bwaabwa nea Bwaabwa gwanda jeedeanyu? Ng'asheega earukuneegwean mearukunani gheambalmeedeanyu aniini, gwasin Bwaabeeda mida jeedeanyu gadiyoojigaaschi. 11Amwasa gideaba aniini geandi jeeda Bwaabwa, nea gwanda Bwaabwa jeedeanyu; ghoamwaschaan aba gadiyoojiga easinyi. 12“Aba huumwa, aba huumwa, geayeeshiineegwa, siida mwasan gaygwasin gadiyoojusu easinyi aniiniin; asi gaygwasin eara gadiyoojiga hees muuchi, aba gideaba aniini geawi heeda Bwaabwa. 13Nea gida wassean oomuschi aba gheawungeasu gaydasin, ak abeeda geakghambiit Bwaabwa aba badayda Orjeeda; 14iyoomuschi gida wassean aba gheawungeasu gaydasineegwa.
Heeleesiinda Guroorooda Ghaydit
15“Iyoabwariinyaan gajoang'waanya diigheanyeekeasu. 16Ak gaydamwaash Bwaabwa ak gaygagoneegwa Weedaneeda nuut, jea andeayeewana damanda manda muudeanooda, 17niny Gurooroodida bea huumwaan nea fuga ng'eanyiida ea moamu ghwadeapta aba gideaba moamu ghwadaah ghana ghwanal; agooga ghoanali niny aba gideaba gajandeawana nea gwanda jeedeang'wa.
18“Maydanung'useegwa heeda bananga; gaydahidu heedeang'wa. 19Sinung' gilimwanang' ak ea maygudu ghwadaahan ng'eanyiida, duuku agooga gajadaahaan; aba gideaba aniini geawooschi majeek, abeeda eara agooga gajawoosa majeekcheewi. 20Eaweedida gajanala gideaba aniini geandi jeeda Bwaabwa, nea goondi agooga jeedeanyu, nea geandi aniini jeedeang'wa. 21Siida mideawa diigheanyeekeasu nea ghoang'waay, nih dea bwariinyan gil, nea dea bwariinyan gayghabwariiy Bwaabwa, gaydabwariiy ak gaydeahiimsa geaw niny.” 22Hean gwayeesha Yudayda (mawoosa dea Iskariyote,) “Ng'utamiida, gayghoawataan gideaba gajahiimneasa geaw nea miihiimsiini geaw ng'eanyiida?” 23Ghwasha Yesu nea gwayeesha, “Siida iibwariinyan gayghoang'waay ng'asheandeanyu, nea abeeda Bwaabwa gayghabwariiy siisi, ak gajeapkaana aseasa headaanyi ak geepiidi headaanyi. 24Siida mabwariinyan mayghoang'waay ng'asheegeasu; nea ng'asheanda oayiinyi ea mii deanyu gil gaba Bwaabeeda ajeaknean.
25“Ng'asheesu gearukuneegwa, nea abeeda ea gudeendeayeena. 26Nea Weedaneeni, was Guroorooda Ghaydit jea goojeagu Bwaabwa aba gheawungeasuun, gayghoanaaleagwa haleanjeeda sean, nea goopkeaneegwa ng'asheega sean earukuneegwa. 27Gaydanung'uneegwa hoyyoo, geagonyeegwa hoyyooydeanyu; maydagoondaneegwa gidagooniida ng'eanyiida. Asi adagwasawana gurooruunatkeagwa, nea adaghang'udeagwa muuwda. 28Ghayi noayiinyi nea geayeeshiineegwa, ‘Neawi heechea dawa, ama muchu gaydabiigu gicha heedeang'wa.’ Inyeeda ghoabwariinyaan, gwachi gajahoosana aba gideaba geawi heeda Bwaabwa; aba gideaba niny ea haweewaneani. 29Ng'asheesu geabay darukuneegwa ghamneawa heeda mii ghwahina, ama eaweeda hina abeeda ghoamwaschi. 30Mayguteabaloolaneegwa gicha ng'asheega saang'a aba gideaba siida ahaaghwa ng'eanyiini gayghoan. Aba heedeanyu niny moamu gil; 31ak geasindi gidagoondanean Bwaabwa, ak abeeda ghwanal ng'eanyiida gideaba ghaabwariinyi Bwaabwa. Ang'eada eeweaya heechea eeweaya.
Tällä hetkellä valittuna:
YOHANA 14: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
