YOHANA 12
12
Yesu geayeasha nagheeda aba Betaniya
(Mat 26:6-13; Mar 14:3-9)
1Iimuchu nea ghwashoada eawooji lah aba hiteayda ghweelmeeda Basaaka, ghwahita Yesu Betaniya heeda ghayi abiita Lasarooyda aduuna Yesu miyeedean. 2Hean geesissa hamiteaba shing'ada; hean gagadiiyeesa Marta nea Lasaro abeeda gaba jeeda fuga ambuuchi sea niny. 3Ng'ata gageanu Mariya nagheeda ng'andit siguura nardo mida gideeshteayda siyiin buureata biissa gaba sheayeeda haw, ak ghwayeasha geeshanga Yesu ak goobuusa buudeagaaschi; gang'andiit gheesean aba shearooda nagheeda. 4Gwayeesha Yudayda Iskariyote bea jeeda ginealangaaschi (was dea jea ghwalabwadaw niny), 5“Ghwasaan anda ghwanyawa nagheani meeshaaydaawana dinaaraji bughalaji samwagu ak geelakiisa fuga barbari?” 6Mwanyaashtunu aba beadi samsa fuga barbari, gweagu gideaba niny mareanghweanda, eawoojisu iissa goodiiwi sandakooda lapiya nea iissa eawoojisu gwajagwadi lapiyeeda mida jeeda. 7Ghwasha Yesu ak gwayeesha, “Anung'waada gwandeawa, ghoamuughu eaweeda jea eepunyanean. 8Aba gideaba fuga barbari gajandeawana galeagasean, duuku aniini ea majeendeayeena galeagasean.”
Geamwaal gichea eenuusta Lasaro
9Nal eemeetuw bea Yahudi gideaba gwanda hoowa, ghapka nea mwaada gideaba gagasa ghwadaah Yesu, gagasa ghwadaah eara Lasarooyda heeta siituuna miyeeda. 10Hean ghamwaal Ashoohoodiga hees gichea eenuusta eara Lasaro. 11Nea gweagu gideaba aba badaydaanyi gooheeli geat fuga saang'a bea Yahudi ak ghamwas Yesu.
Hooseaneega aba hiteayda Yerusalemu
(Mat 21:1-11; Mar 11:1-11; Luk 19:28-40)
12Muchu ghwayiiy eemeetuw buwa ghweelmeeda gideaba Yesu gwanda naweeda ghwaan Yerusalemu. 13Hean gwahirjeawi damealga miilayga ak gaweay roonyeeda nea goojuur muuchi nea gwayi, “Hoosaana! Sing'usha siisi wuna gheawunga Ng'utamiidean, eara sugoocheanda Israeli!” 14Ghwanyas Yesu gureenda ak gwading'da badayda gawuurji gissing'oarda.
15“Adibeali hudeaba Sayuni; ang'wearda
sugoocheandaang'u ghwaan,
nea gwading'da gureenda digeeda!”
16Abeeda ginealangaaschi ea mii gwajeeng'u ng'asheesu aba mwadi; iidu nea siikghaambiit Yesu, hean ghoapkaat gideaba ng'asheesu geang'waar aba badaydaanyi ea gideaba sisissa buuneeda ng'asheesu. 17Hean gamuuwu eemeeda heeta mideayi sea niny eaweeda guursiina Lasaro gwarina jeeda bung'eeda ak gooduudu. 18Iidu ghoah giteaptaawa eemeeda aba gideaba nisin gwadeagoani. 19Ng'ata gaba Farisaayajeanji eesha niirja, “Moadaahi gideaba moamuusi asina gil; oang'wearda, ghwaat geeshta ng'eanyiida.”
Fuga mwaatkwa bea Yunani gaseadayi Yesu
20Nea aba jeeda fuga weay ghadooweeda eaweeda ghweelmeeda gwanda fuga mwaatkwa bea Yunani. 21Gaweay Fiisu heeda Filipoheeda leabu Betsaydeeda Galilaya ak gwayeesha niny, “Siida mureeda, geegasayi eadaaha Yesu.” 22Gawa Filipo ak gwarukusa Andreya; ak goodeayi Andreya sea Filipo ak gwarukusa Yesu. 23Ghwasha Yesu nea gwayeesha, “Nihita damanda jea eekghaambiida Orjeeda Siida. 24Aba huumwa, aba huumwa, geayeeshiineegwa, gheang'nyeanda ngaano iissa goobiida damwanagi ea eaghus goobissa jeesigeeda ak ghami. Iing'ata miyeeda gwaji haghweega saang'a. 25Siida bwariiy eaweagaaschi gaygwalaku, nea siida sit eaweagaaschi aba badaydeaba ng'eanyiini gayghoaghu ea gagul eaweega manda muudeanooda. 26Siida jea gwasinnean gadiyeeda geaghus gweadu geeshteanyu; ak abeeda heeda eandi aniini eara soomjeandeanyu gaygwanda eara niny; siida jea gwasinnean gadiyeeda abeeda gaygwasissa Bwaabwa mureeda.
Yesu gabaloola iita miyeadaanyi
27“Ghamneawa guroroodeanyu ning'ut muuwda. Ak gaydayiin? ‘Bwaabwa, lealnean aba damani’? Manda, aba badaydeaba ng'asheanji naahidu damani. 28Bwaabwa aghaambiida gheawungaagu.” Deagheata ghwanya ghuuta nyaasha humng'eeda nea gwayi, “Naaghaambiichi, ak gaydabiikta daaghaambiit.” 29Ghwayiiy eemeeda ghwanyawa miinaada aba hoowa ghuutida ak gwayi mwaatkwa, ghoaghweandan humng'eeda. Nea gwayi mwaatkwa, “Goobalool malaykajeanda.” 30Ghwasha Yesu nea gwayeesha, “Ghuudi oayiinyiin mwanya aba badaydeanyu aniini, ghwanya aba badahuukeagwa. 31Damani nihita heeda jea eergweaksiina ng'eanyiini, nihita damanda jea eejakteawa siida ahaaghwa ng'eanyiini. 32Nea aniini iisiitiing'danean humng'eeda daheeli ng'eanyiida, gaydaksu buuneesean ghapka heedeanyu.” 33Aba rukunoodeaba ng'asheanji ghoahiimu miyeeda jea ghami giduurji. 34Hean ghwasha eemeeda ak gwayeesha, “Aseasa gwarukuneasa deaweeda gideaba Gristo gayghwashng'u eaweega manda muudeanooda. Abeeda ghoamuustiin gideaba gajayeena Orjeeda siida gajeetiing'da humng'eeda? Orjeeni bea siidean ng'eaha?” 35Gwayeesha Yesu saawa, “Gudandeawana weeshinda gheadi nuwaas. Aneayeena hiji duu andeawana weeshindean ea majooreagwa misaneeda; siida neayeewa jeeda misaneeda mwanala eara heeda gal. 36Asi hiji duu andeawana weeshindean amwasa weeshinda, ak ghoahuuyi diibiga weeshinda.”
Fuga mandeawana masaweega
Iing'ata rukunoodeaba ng'asheesu ghang'eat Yesu gooheeli geaw ak gawa ghafunya geaw saawa. 37Earapeadi nisin gwadeagwajeega saang'a aba madeanyaawaan, saawa ghanyea meamwasa niny; 38ak gwasa ng'asheega rugu sibaneeda siguura Isaya nea gwayi,
“Ng'utamiida siida mwas ng'asheagaasa ng'eaha?
Ak ea siihiimsa ng'eaha geatinda Ng'utamiida?”
39Aba sareani ea mudughoamu ghamwas. Aba gideaba Isaya gabiikta gicha gwayi;
40“Ninung' gang'oowiidi gheanyanga nyaawa, nea gahang'oonyiidi jeesinga nyaawa,
adaghwadaah aba gheanyanga nyaawa, nea gwajeeng'u aba jeesinga nyaawa,
ak gwayamu geat ak ghaahaapchi.”
41Isaya gwarugu ng'asheesu aba gideaba nidaah giigheambiitaanyi, ak ghoah girukuna iitaanyi. 42Gwanda fuga saang'a eara aba jeeda gea ambaliischi mwas niny, iidu aba gheawalmeeda Farisaayajeega ea marukunana ghuusiga nyaawa aba gideaba gajiidu geeruuteawa jeeda ghooriida siinealshacheewa. 43Aba gideaba ghabwariiy duumsheesiinda buuneeda mwasamwa gideaba gaygwaduumsheesa ASEETA.
Ng'asheega Yesu goorgweaksa buuneeda
44Ng'ata gabalool Yesu aba ghuuta haw nea gwayi, “Siida mwasan aniini mamwasaan nea gabwageaw, ghamwas dea ajeaknean. 45Siida nidaahan aniini abeeda nidaah dea ajeaknean. 46Aniini ghaawunyi nea geawooschi weeshinda ng'eanyiida, ak abeeda siida mwasan ea meabiidana jeeda misaneeda. 47Siida iiy ng'asheegeasu ak ea moang'waanya, aniini maydeargweaksa; aba gideaba mwaawuni deargweaksa ng'eanyiida ghaawunyi dalealu ng'eanyiida. 48Siida jaktanean nea moang'waanya ng'asheegeasu gwandeawa dea jea goorgweaksa; ng'asheandida earguun dea jea goorgweaksa gil eaweeda huuydean. 49Aniini meabalooli aba gheambalmeedeanyu; aniini geaghus gearugu Bwaabeeda ajeaknean dea goonan diigheanda gil ea gichea dabaloola. 50Ak ghaanali gideaba diigheandaanyi eaweega manda muudeanooda. Asi aniini gearugu ng'asheega eeshean Bwaabwa rukuta.”
Tällä hetkellä valittuna:
YOHANA 12: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
