GADIYEEDA GIIJASOODIGA 4
4
Betaro ea Yohana aba madeeda girgweageeda
1Damanda duu goorgweaksiina buuneeda, ghapka heanyaawa ashoohoodiga sea shirikarajeanda haw ng'ula gheeda sibata ASEETA sea fuga siguura Sadukayajeega ghapka heanyaawa. 2Gwanyareesi muuchi aba gideaba ghoanaal buuneeda nea gwarukwiida gideaba Yesu niduuna miyeeda. 3Geang'waay saawa ak geehisa ghealooniga ea gamuchu, aba gideaba niiw shing'ada. 4Nea abeeda fugiga saang'a iiy ng'asheesuun ghamwas; nea mooneeda headiga ghwahita sagalamnyooji muut.
5Iimuchu ghabwat geat fuga ambaliischi sea gweargwa sea ng'oorshoodiga aba Yerusalemu, 6sea ashoohoocheanda haw siguura Anasi, ea Gayafa, ea Yohana, ea Iskanda, ea fuga sean bea dooshta ashoohoocheanda haw. 7Iidu nea niyiin bugusta nyaawa geanyaash gideaba, “Ng'asheesu goosinyi aba ana uur ghana aba gheawungeabeang'a?” 8Ng'ata ghwanyas Betaro Guroorooda Ghaydit, ak gwayeesha saawa, “Fuga ambal buuneeda ea gweargwa, 9asi ghamneawa iyoanyaashcheasa iita ng'asheanda miy sisissa siida badeeda, ea gidasiihaapta siida, 10gagasa anala oogasean, sea fuga sean bea Israeli, aba gheawunga Yesu Gristoyda Nasareti, ghayi oongoorji, ak gooduuna ASEETA miyeeda, aba badaydeaba niny siisi ghamiinaada aba madeedeang'wa nea majeek. 11Nih lagheaneeda ghayi heawa fuga deekshi, ak ghoah lagheaneeda washiin akar gheeda. 12Ak ea manda lealeanooda aba hichpa siinuut, aba gideaba manda gheawun suuk hing'eadayda humng'eeda ghayi siitaw buuneeda jea gwalealneasa.”
13Daah saawa meaynata Betaro sea Yohana, ak gwajeeng'u gideaba mii ghoasoamwa, fuga gealaan gil, hean ghahamng'eanyi; ak gwajeeng'u gideaba gwandeaydooschi sea Yesu. 14Iidu nea ghwadaah siidida siihaabiin nea ghamiinaada aba murdeeda nyaawa, ghwaraay gwarugu gil aba gichea ghwashaang'da. 15Iidu nea gwarukusa saawa gideaba ariteawana jeeda girgweageeda, hean goobalool geat saawa nea gwayi, 16“Asi gajeesimana naaha fiisu? Aba gideaba ng'asheanda daamdaamwaat sisin aba saawa ak ea nidaajiit aba heeda buuneesean abiita Yerusalemu, ak ea mwoamu usi eashaang'a. 17Iimayghaghayda ng'asheesu muuchi aba jeeda buuneeda, ghang'wana geereekusi saawa ea mabiikta gwarukusa siida wassean aba gheawung'su.” 18Ng'ata gaguursa saawa ak geereekusa saawa ea mabaloolana ghana ghoanaal aba gheawunga Yesu. 19Ghwalamda Betaro ea Yohana ak gwayeesha saawa, “Heapi nih huumeandea gideaba gajeeleeyseegwa iit ak ea mealeeysiini iit ASEETA asi girgweageeni alaja agooga; 20aba gideaba mwoamu usi easiinda gajeerukuna iita gissidaayi ea gissiyiinyi.” 21Hean nea nimuuw saawa, ghwanung'waada gaweay, aba gideaba mwanyasa gheata gichea ghwaakta aba ghoorjooda, aba gideaba gwanda hiji buuneeda; aba gideaba gwaduumsheesa buuneesean ASEETA aba ng'asheega bunu. 22Nea abeeda siisi gwachi siihaabiin abeeda gweanyeakaaschi ea ninaawa haradam.
Fuga mideawa masaweega gamus meaynata
23Iidu nea geetin gaweay heeda fuga duupchi ak gwarukusa saawa gidida gasa ashoohoodiga heesiin ea gweargwa. 24Nea ghwayiiy, gagatkat sean daghanuunatka nyaawa nea googeal heeda ASEETA nea gwayi, “Ng'utamiida Haw, ghayi sin humng'eeda ea ng'eanyiida ea basooda ea haleanjeeda sean mida jeeda, 25nea aba ghuuta ghweandeanya was Dawdi, was soomjeandaang'u, ak gwarugu aba naweeda Guroorooda Ghaydit,
‘Ghwasaan anda Eemoojiga gwanyareesi,
anda buuneeda gooteemsheesa haleanjeeda mwadaagha?
26Sugoodiga ng'eanyiida nijip geat,
nea fuga ambaliischi ea nibwatgeat,
ak ghaheawa Ng'utamiida ak ghaheawa eara dea simwaar’–
27nea aba huumwa jeedeaba mujiineani gabatiisa geat fuga heawa soomjeandaang'u ghaydit was Yesu, was dea ghayi imwaari, sean Herode sea Bontio Bilato, sea fuga Eemoojiga ea fuga Israeli, 28ak gwasin gida wassean ghayi bean gagasa geatindaang'u ea fughareadaang'u gideaba gaygwasa. 29Asi ghamneawa, Ng'utamiida, ng'ula giimuuwda nyaawa, ak giidawi soomjoagaagu ak gwarukwiida ng'asheandaang'u aba meaynata sean, 30ak giihaakti geatindaang'u ak ghoahaap siida, nea gwadeagwajeega ea deamdeamanga iissa geesin aba gheawunga soomjeandaang'u ghaydit was Yesu.” 31Iidu nea sishit mooshta ASEETA, gwaduumduum heeda gwachi bassa geat; ak gaba nih siinyiit Guroorooda Ghaydit ak gwarukwiida giijasta miy bea ASEETA aba meaynata.
Fuga mideawa masaweega goobareanyi haleanjeeda mideawa
32Nea ghamneawa bareanyeedeaba fugiga ghayi mwasiin gaba gurooroanagi ak ghanyea manda siida ayi haleanjeeda sean mideawa ghanyea maygwayi geasu, nih abeeda saawa goobareanyi haleanjeeda sean. 33Iidu gaweay giijasoodiga nea gwandeawa uurda haw muuchi ak gamuuwu iita duunooda Ng'utamiida was Yesu, ak ghwanyas sean dagheerjeanduumeeda haw. 34Ak ea manda eara siisi gasa gil aba jeenyaawa, aba gideaba fuga mideawa madameega ghana gealga gayghwashaayda, ak gweadu lapiyeedida bea gidasishaaydaan, 35ak lapiyeedida geayiin geatinga giijasoodiga; ak iidu geelaja gaba nih siitaw gidagasa. 36Nea Yosefuheeda ng'assa giijasoocheanda gheawunga siyi Barnaba (nea gideaba, Orjeeda jea goomajeek gil), nea niny ea siida Lawi, siida ng'eanyiida Gupro, 37ng'ata ghwashaayda madamnyeanda was daanyi, ak gweadu lapiya ak ghwayiin geeshanga giijasoodiga.
Tällä hetkellä valittuna:
GADIYEEDA GIIJASOODIGA 4: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
