GADIYEEDA GIIJASOODIGA 2
2
Hinooda Guroorooda Ghaydit
1Iidu nea nihita eaweeda Bendekosti, abeeda gwanda fuga sean hijagi. 2Deagheata ghwanya ghuuta leabu humng'eeda nyaashta jeameeda shaarareeda ng'waan, ea ghwanung' ghwanyiit ghooriidida sinda jeedean. 3Gwardu duguuga uurji ng'ushapta beasta, ak goobitpisa uhuumba gilinyo ea sihi. 4Hean geanyiit sean uurda Guroorooda Ghaydit ak gabalool aba iit nuut aba gidagasiida Guroorooda gwarukuteayda.
5Nea abeeda aba Yerusalemu gwanda Yahudi fuga bada ASEETA, leabu eemoojiga sean bea jeeda ng'eanyiida. 6Hean nea geeyiiy ghuuteaba nyeashtida ghabwat geat fuga saang'a nea ghahamng'eanyi sean muuchi aba gideaba gaba sih iiy nuut nea gabaloola iita gheanyaawa. 7Ak geabeal nea geahamng'eanyi, ak geeyi, “Heapi fiisu seaniin siyiinyi nea gabalooldunuun mii fuga ng'eanyiida Galilaya? 8Ak ghoawataan anda geayiinyi gil was sih nea gabaloola iita ghaheanya? 9Fuga ng'eanyiida Barti, ea Medi, ea Elami, ea fuga abiita Mesopotamiya, Yudeya ea Gapadokiya, Bonto ea Asia, 10ea gealeabu Frigia ea Bamfiliya, ea Misri, ea gealeabu murdajeega Libya, ea gea leabu Girene, ea rabasta leabu ng'eanyiida Rumi, sea fuga Yahudi ea gea niyamwa ghoah fuga diineeda Yahudi, 11fuga Grete ea fuga Arabiya, geayiinyi nea gabaloola sean iita ghaheanya gadiyoojiga hees bea ASEETA.” 12Hean ghahamng'eanyi sean nea ghang'ut muuwda, nea gaba siisi anyaash nuut nea geeyi, “Seh, ng'asheanji naaha?” 13Hean gwanda fuga juuga suurja nea geeyi, “Fiisu niboogit aba difaayeeda heeseadi.”
Gidargweachta Betaro
14Ghang'eat Betaro ghamiinaada sea giijasoodigiga atamanagiin, ak ghwajaat ghuutaanyi goorgweaksa buuneeda nea gwayeesha, “Ea fuga Yudeya ea buuneesean abiita Yerusalemu, geagasayi anala ng'asheesu, ak gooleeysiiniit ng'asheegeasu ak ghoanali nea ghoayiinyi iidigeagwa ng'asheesu 15Aba gideaba fiisu miigaboogit, aba gidoararji, aba gideaba ghwasaan ghamneawa nea aseeta gutgaba samwagu bea sakteayda; 16nih deaghayi rugu sibaneeda siguura Yoeli,
17‘Nea aba askwearjoojiga huuydean gaygwasnu, gwayi ASEETA,
gaydaadaw buuneassean Guroroodeanyu,
ak diibigeagwa was gheareemangaea haweega,
gayghwaramoaran ak gheareemangeagwa gayghwadaah giirgweatka,
nea gweargweagwa gaygoorgweadi giirgweatka;
18eara soomjoogeasu was headiga ea gwealajeega askweajoojigiga
gaydeadabearsa Guroroodeanyu; ak gayghwaramoaran.
19Ak gaydaahiimu deamdeamanga, aba humng'eeda,
ea gwadeagooda aba hiji bea ng'eanyiidean,
foojeanda, ea beasta, ea aroosta haw;
20ak gayghwayamwa aseeta gamisaniit,
ak ghwayamwa sheeda ea ghawaar foojeanda,
damanda miighwahina eaweedida bea Ng'utamiidean,
eaweeda biissa ea haw ak adaajiin
21Ak abeeda siida wassean nyooh gaguursa gheawunga Ng'utamiida gajeelealu.’
22“Fuga Israeli, ooleeysiina iit ng'asheesu: Yesuheeda Nasareti, was siida muuwuuneegwa ASEETA aba gadiyoojiga hees ea deamdeamanga ea gwadeagwajeega ghayi sin ASEETA aba badaydaanyi aba dageascheedeang'wa, gawuurji gidoanaldi agooga– 23Yesuheeni siyaat humng'eeda aba gidabay ghwanalda ASEETA, ak goongoorji ak goonuuschi aba geatinga fuga munyas. 24Ak siisi iidu gooduudu ASEETA, nea gageandeawa sawanadeeda miyeeda, aba gideaba niny moamu ghoang'waay miyeeda. 25Aba gideaba gwayi Dawdi aba badaydaanyi,
‘Aniini iissa ghaadaayi Ng'utamiida aba madeedeanyu,
aba gideaba niny gwanda meatkweedeanyu bea geatinda dugwa ak abeeda ea meetuumduuman;
26aba seareani gang'weela guroroodeanyu, nea gahoosan ng'ushapteanyu;
nea ghwaraanya saseedeanyu gaygoobiida jeeda rarooda.
27Aba gideaba maynung'usiina guroroodeanyu heeda maloonghajeega,
ghana nung' ghaghaarshan Siidaang'u Ghaydit.
28Ak ea ninung' danal naweadinga eaweega;
nea giinyiichaan ng'weelooda aba iisindeayi.’
29“Fuga eaduupcheewi, geagasayi darukuneegwa nea geang'achi iidigeagwa aba ng'asheega aararji ghayi nyas sugoocheanda siyi Dawdi, niny ghayi ghami ak geebuy, ak bung'eadaanyi gwanda hiji bea ng'eang'deanyean ea ghoah ghamneawa. 30Amadu nea ghoah sibaneeda, ghwanal gideaba ASEETA niyaak habeawooda aba badaydeaba niny gideaba gayghwayiin hoorgeadaanyi siida jea gwaleabu jeataanyi, 31gabean ghwadaah ak gabaloola duunooda Gristo, ea gideaba niny miyeenung'usa Gheeda Maloonghajeega, nea saseadaanyi ea mii goomealu. 32Yesuheeni gooduudu ASEETA, ak aba ng'asheanji geewooschi muushoodiga. 33Nea geetiing'da ea ghwahita meatkweeda geatinda dugwa bea ASEETA, iidu nea ninyas aba heeda Bwaabwa heeleesiinda Guroorooda Ghaydit, ng'ata goodalealsa gidida oadaayi nea ghoayiinyiin. 34Aba gideaba Dawdi niny mii gwadiyeada ea gawa humng'eeda; aba gideaba gwayi niny,
‘Ng'utamiida gwayeesha: Ng'utamiideanyu, Apteadawana meatkweedeanyu bea geatinda dugwa,
35ea danung' ghoah weajoodigaagu hoorgeeda geeshangaagu.’
36Fuga sean bea ghanyea Israeli, gammiisa ghwanal aba huumwa gideaba ASEETA ninung' ghoah Yesuheeni ghayi oongoorjiin Ng'utamiida ea Gristo.”
37Ak ghwayiiy buuneeda ng'asheesu ak gwasawana gurooruunatka nyaawa, hean geenyaash Betaro ea giijasoodiga suurja nea geeyeesha, “Fuga siduupcheewi, gajeesina naaha?” 38Ghwalamda Betaro ak gwayeesha, “Aduukuunana, giliwas sih geepaatiisananeegwa gheawunga Yesu Gristo aba samsiinda riing'eegeagwa; ak geegooneegwa Guroorooda Ghaydit. 39Aba gideaba heeleesiinda deang'wa gil ea diibigeagwa ea buuneesean sheagachi, gilinyoo ea sih gil jea gaguursa Ng'utamiideanya was ASEETA.” 40Ng'ata gamuuwu aba ng'asheega suuk saang'a nea ghamiin gheanyanga nea gwayeesha, “Alealni geat aba seaygeeni munyasiin.” 41Hean fugiga mwas ng'asheandaanyiin geepaatiisan, ak ghoahaada eaweedida fih sagalamnyooji samwagu. 42Ak goodeaga geat giinealshooda giijasoodiga nea gabareanyi, aba banachta mukaate ea mooshta ASEETA.
Giibinda fuga mwas ASEETA
43Iidu ghwanyas giliwas sih muuwda; ng'ata geesin ng'asheega hees ea gwadeagwajeega aba geatinga giijasoodiga. 44Ak fuga sean mideawa masaweegean goobiida hijagi ak eara haleanjeeda nyaawa geekuuyi; 45inyeesa gaba nih shaayda haleanjeadaanyi mideawa ak gwalakiisa geat ak gaba siisi siitaw gidagasa. 46Nea inyeesa galeagasean geeroonyeesa sean jeeda gheeda sibata ASEETA nea geabwanach mukaate aba gealga nyaawa, ghwaak hamita nea gahoosan gurooruunatka nyaawa, 47iidu geeduumsheesa ASEETA nea ghabwariiy buuneesean. Ak ghwanung' Ng'utamiida ghoahaada mooneeda fuga silealu galeagasean.
Tällä hetkellä valittuna:
GADIYEEDA GIIJASOODIGA 2: BG15
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The Bible in Datooga © Bible Society of Tanzania, 2015.
