Matayi 9
9
Ukuzuzuvuha kwa washulu
1-8: Mal. 2,1-12. Luk. 5,17-26.
1Pʼuwenʼahazuva mwivoti, ahalambʼukuvala munkaya yakwe. 2Pe vahamuleta wokʼuwashulu, vahamunyatula pashitala. UwenʼuYesu lwʼawenyʼulwitiho lwavo, pʼahayanga nawʼuwashulu ahati: Jimbaga we mwana wanʼiwe, she nswiliyʼamalandu gaho. 3Pe vamʼavamanyakalata vahasiva muhati zyavo vahati: UnʼakusamulʼuMulungu. 4UwenʼuYesu lwʼaziwenyi zye vali nazyo muhati, pʼahati: Zye mukusiva zyashi imbivʼizi mumoyo ginyu? 5Lye lipupusu lili kwi nilya kuti: Nswiliyʼamalandu gaho, nilya kuti: Vuhaga ujendaje? 6Nkandi ukuti mumanyaje ukuti uMwanamuntu ali namaha ga kuswilʼamalandu munsʼumu,—ilelo ahamuvuzya uwashulu ahati: Vuhaga, sendagʼishitala shaho, uvale kuhaya. 7Pʼuwenʼahavuha, ahavala kuhaya. 8Lwe vaziwenyi zinizʼavantʼimpuga yonti, pe vahatetema vahatinihʼuMulungu, wʼavapiyʼavantu amaha ganaga.
Ukwitwa kwa Matayi
9-13: Mal. 2,13-17. Luk. 5,27-32.
9Ilelo pʼuYesu lwʼapitiliye pupo, lwʼakujenda, pʼahenyʼumuntu wʼatendime pavusonkolamusonko we vatili uMatayi, ahamuvuzya ahati: Undandatʼine. Pʼuwenʼahamulandata. 10Ayazile lelo lwʼatendime ukulyʼiṿintu munyumba, pe vahavala mwʼali navasonkolamusonko navatalamalandu ve vinji, vahatendama nuYesu navasundikwa vakwe ukulyʼiṿintu. 11AvenʼavaFalisayi lwe vamuwenyi, pe vahavuzilizyʼavasundikwa vakwe vahati: Umusambilizi winyu akulya vulʼiṿintu navasonkolamusonko navatalamalandu? 12Wuyo lwʼahiṿwa pʼahati: Avapuma vatakwanzʼumuganga nkandʼavavinu. 13Muhavale muhamanye lye likuti:
Lwe lupepelezyo lwe nkwanzʼine,
ntakwanzʼimputile.
She ntinzilʼukuvitʼavagolosʼine, ninzilʼukuvita ve vatalamalandu.
Ukusitakulyʼiyintu
14-17: Mal. 2,18-22. Luk. 5,33-38.
14Pe vahamuvuzilizyʼavasundikwa va Yohani vahati: Naswe navaFalisayi tukufunga shonu shimʼiṿintu lwʼavasundikwa vaho vatakufunga? 15UwenʼuYesu ahavavuzya ahati: Pe vangasungama vulʼavalyaṿintu ṿwa pavusendamwantanda? Nkandi gakwinzʼamanda lwʼanyatulilwe kuli vuvo umusendamwantanda. Pala nyene pe valifungʼiṿintu. 16Numʼatakupatihʼahapatikwa ha mwendʼumupwa pamwendʼumukali. She hatakuyanana pamwendʼumukali ndali, hakuzepulanya vwelele, ilelo pʼuwenʼumwenda akwonjezya ukuzepuha. 17Shope nishinyanya sha mampensya numʼatakusota mumafuko amakali ga mampensya. Shenga vakusota mumwo pe gakuzepulʼamafuko, ilelo pʼagenʼamampensya gajende nukwitiha, gope namafuko gajende nukunanjiha. Ishenʼishinyanya sha mampensya vakusota mumafukʼamapwa ga mampensya, pe ṿwonti ṿikupona.
Umwana wa Yayili umulindu numwantanda wʼali nisha mwiho
18-26: Mal. 5,21-43. Luk. 8,40-56.
18Ilelo lwʼamakuvavuzya zinizi, pe vahaga akupalamila wokʼumusambilizi wavo umupiti akumusugamilila akuti: Umwana wanʼumulindu afuye shinishi. Nzagaga tuvale lelo kukwane, uhamuvishʼumuhonʼiwe, pʼalilandila. 19PʼuYesu ahavuha ahamulandata poka navasundikwa vakwe. 20Ilelo pʼumwantanda woka wʼalimbiliye nisha mwiho amahʼishumi nagavili ahapalamila mwisinda, ahapalamansyʼamenda gakwe kuvupinte. 21Shʼuwene muhati atili inga nkupalamansya ge menda gakwe nye, pe nkupola. 22UwenʼuYesu ahasyetuha ahamwenya ahati: Jimbaga we mwana wanʼiwe, lukuzuzuvushizizyʼulwitiho lwaho. Pʼumwantanda ahazuzuvuha pahavalilizyo hanaha. 23IlelʼuYesu lwʼavazilʼukufiha munyumba ya musambilizi wavo umupiti, pʼahavaga mumwo navahomamalonji navantʼimpuga avalosyʼilosyo. 24Vʼahavavuzya ahati: Mufupuhaje, shʼahalindu hatafuye ndali, hakasitʼutulo. Avene pe vahamuseha. 25Ilelo lwe vavafumizye kunzʼavantu mwe vavaliyʼimpuga yonti, pʼahinjila munyumba, ahalemʼumuhono wakwe ahalindu pe hahavuha. 26Panongwa zinizi zihakumuha munsʼila yonti.
Avantonko vavili
27IlelʼuYesu lwafumile pupo, lwʼakujenda pe vahamulandatʼavantonko vavili, ve vahavilishila vahati: Utupepelezyaje we Mwana-Davidi! 28Ilelo lwʼayinjiye munyumba, pe vahapalamila kukwakwe avantonko vanava. PʼuYesu ahavavuzilizya ahati: Muli nulwitiho ukuti ndi namaha ukuvomba zinizi? Avene vahamuvuzya ahati: Ena, Mwene. 29Pʼuwenʼahapalamansyʼaminso gavo ahati: Mukuposhela inza she zizyo mwitisile. 30Pʼaminso gavo gahiguha. UwenʼuYesu ahavapilila nkani ahati: Mwandaje lelo, zye numʼatazyiṿwaje zinizi. 31Avene nyene vahafuma kunzi, vahamukumusya munsʼila yonti.
Ushinunu havilʼuwa mpepʼimbivi
32Lwe vafumile vanava, pe vahaleta kukwakwe uwamwavʼumuntu wʼali wushinunu, shʼali nimpepʼimbivi. 33Ilelo pʼuwenʼahafumwʼimpepʼimbivi, pe wʼali wushinunu ahayanga. Pe vahasukumilʼavantu mwe vavaliyʼimpuga yonti vahati: Zinizi zyalolesile nalumo mwa Yisilayili. 34AvenʼavaFalisayi nyene vahati: Impepʼimbivi akuzivinjila nusongo wa mpepʼimbivi. 35PʼuYesu ahazyungula, ahamalʼinkaya zyonti nutuhaya twonti, ahasambilizya mumasinagogi gavo ahakumusyʼintumʼinyinza ya vumwene; ahakantulʼuvupotwe nuvuvinu vwonti vwa vantu.
Uvwila vwa Chilisiti kuvantu
36Lwʼawenyʼavantʼimpuga, pʼahavafwilʼuvwila, she vasamusu vanyampine fwe ngʼonzi zye zite numudimi. 37Pʼahavavuzyʼavasundikwa vakwe ahati: Imṿuno ye nyinji, nkandʼavaṿuni vansi. 38Mulambilizyaje lelo kumuhatamṿuno, atumajʼavaṿuni mumṿuno yakwe.
Tällä hetkellä valittuna:
Matayi 9: NYi1965
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Nyiha New Testament © British and Foreign Bible Society, 1965.
