Matio 9

Yěsô gÿǒ ngàŋa kwʉ́’te zeŋe

(Malékuse 2.1-12; Lukase 5.17-26)

1Pɔ́ gɔɔn pú’u, Yěsô kúu tsɛ̀ɛ kanú’, ńtúm ntse ḿbiŋ né tsɛ̀ɛ tÿǒsoŋ yɔ́b, 2ńkúu wó, mé lɔgɔ tsɔ̌ ngàŋa kwʉ́’te ńtó, á nuŋe ná páŋte. Yěsô gyá ntí gie, mbàŋa gie é lɔgɔ́ yé ńtó, lɔg ńzab ntʉ́m ná yé, ńgɔɔn né ngàŋa kwʉ́’te ngie: Míŋ wɔ̀ɔn ɔ́ɔ shÿó mbòŋo! Mé legé menò tepòŋ mú ńnáa mbwó gù. 3Etsɔ́ *pàkyagte lepʉ̌ Mǒsê gwɔ́ jʉ’ó, ńjú’, ńne ńgɔɔn tsetsɛ̀ɛ pɔ́b ngie: Nyìŋ wɔ̀ɔn kaŋá lʉŋe Ssé mboo! 4Yěsô zsé mmó gie pɔ́ ne ńkwaŋa, ńgɔɔn né pɔ́b ngie: Pi gÿo lêkɔ́ ńgẅiin yɛ̀ ntí mekwaŋá tepòŋ tsɛ̀ɛ ntʉ́m gẅí? 5Pi gyǎ ngie á zeŋe pɔ́ légɔɔn né nyìŋ ngie: Mé legé menò tepòŋ mú, ka pɔ́ légɔɔn ngie lu ssé ńgiŋ? 6Mèŋ n ge ké nyɛɛ gẅi ngie: *Míŋ Nyìŋ aa ndùmo ssé tsetsá’, mbà mé la ná metʉ̀ né yé lélɔg ńdege menò tepòŋ pʉ̀a mesoŋ ńnáa mbwó pɔ́b, ńdeen ńké ńgɔɔn né ngàŋa kẅʉ́’te ngie: Lu ssé, ńkaa páŋte gù, ńdɔg ńgʉa né mbʉ̀a gù. 7Nyìŋ ŋwɛ́ lu ssé, ńgʉa nê mbʉ̀a yé. 8Àlá’ gyá yɔ̀ɔn nò á kʉ’ʉ wɔ́b, pɔ́ ne ńgu’te Ssé ná pá’ à nǎ yɔ̀ɔn ntí metʉ̀ mbwó pʉ̀a mesoŋ.

Yěsô tsẅǐ né Matio ngie à cʉ́me nzèm yé

(Malékuse 2.13-22; Lukase 5.27-39; 15.1)

9Yěsô fó jʉ’ó ńgʉa, ńgwaa cʉa jʉ’ gie mé kẅé ncùb pà *Roma wó, atsɔ̌ nyìŋ ńnéŋe, lezíŋ sé gwɔ́ lê Matio. Yěsô gɔɔn né yé ngie: Tóo pɔ́gɔ zɔ cʉ́’ʉ ńgiŋe. Á lu ssé, ńcʉ́me nzèm yé. 10Yěsô gÿo ńgwɔ́ ndá Matio ńne ḿpfɛ́ɛ mmó, petsɔ́ pà kẅé ncùb pà *Roma tà ńgyɔ́ɔn, lâ tsɔ́ ngàŋa tsẅé tepòŋ, tó ńkẅɛ́te Yěsô pâ *ngàŋa kwò yé, pâ pɔ́ ńnéŋe ssé ńne ḿpfɛ́ɛ mmó. 11Pà *farisay gyá pú’u, ńzɛ́te *ngàŋa kwò Yěsô ngie: Mélà’a kɔ́ tá gẅi pâ pà kẅé ncùb pà *Roma lâ petsɔ́ pʉ̀a tepòŋ teme shúm ḿpfɛ́ɛ? 12Yěsô jú’ pá’ pɔ́ gɔ̌ɔn, ésaga mbwó pɔ́b ngie: Ńgwɔ́ nyìŋ le gwɔ́ ńtentʉ́, ńgʉa fa’a ngÿo meffo wɔ́, nyìŋ guɔ tá fa’a yé. 13Áa yɛ̌ tá mèŋ n ne ńgɔɔn né pi ngie: Pi gʉa nzí’i mmó gie yɔ̀ɔn nò gie mé la ŋwe’e lɔgɔ ńgɔɔn: «Mèŋ n kwoŋo tsɔ́ɔn mezìŋe, ńcʉa pwɔ́’ gẅie mé lɔgɔ ńgu’te wɔ̀ɔn». Yɔ̀ɔn aa mmó gie á gÿo, mèŋ n gɔɔn ngie: N ka te tó letóŋ pʉ̀a membóŋo wɔ́, mèŋ n kɔ̌ɔn ńtóo ntí pɔ́ megàŋ mefʉa ngie pɔ́ piŋe mbwó Ssé.

Lekwoŋ kwoŋ ńnéŋe nzyè ńtí nò Ssé

14Megàŋa kwò Jâŋ gÿo ńtó, ńzɛ́te Yěsô ngie: Peg lâ pà *farisay neŋé ńkwoŋ kwoŋ ńnéŋe nzyè, epú ké tè pú’u, gÿo mélà’a kɔ́? 15Yěsô tsɔ́’ɔ mbwó pɔ́b ngie: Tà à lɔɔn ńgwɔ́ mé gʉa leluŋó nyìŋ, á nyé ńnéŋe ńnéŋe meshǔ pie mé ně ńtóŋ ńnéŋe tsɛ̀ɛ lemÿɔg mélà’a kɔ́? Tá’ mé ge lá’ fó mbwó pɔ́b tsɔ́ lyɛ̌’ sa’a yé, pɔ́ leen ńké ńnéŋe nzyè fʉ̀’ó la. 16Yěsô gíŋe ság ngie: À lɔɔn ńgwɔ́ nyìŋ le lɔgɔ mmó nzsǒ sẅé ńdɔg ńtsɛ́ lepÿé nà nzẅìŋe nzsǒ wɔ́. Nyìŋ gÿò pú’u, mbà mmó nzsǒ sẅé ge kẅi’i shʉa nzsǒ, lepÿé pú fáŋ. 17Mé lɔɔn ne ńgee ńde’e melù’ tsɛ̀ɛ ntú’ *ngùb, mbà mé te néŋ melù’ mie mé nyé ńtsɔ́’ɔ á tsɛ̀ɛ nzẅìŋe ntú’ wɔ́. Mé lɔɔn ngÿo pú’u, mbà melù’ mesẅé ge fu’, éshʉ́a nzẅìŋe ntú’ ŋwɛ́, mé sɔ́ɔn melù’, ésɔ́ɔn ntú’. Á zɛ́te ngie mé néŋ melù’ mé sẅé pɔ́ tsɛ̀ɛ ntú’ yé sẅé, melù’ pɔ́ ntú’ pú ńtsẅɛ́.

Yěsô gÿǒ tsɔ̌ manzwě zeŋe, ḿbiŋ ńgíŋe ńzíme tsɔ̌ múɔ manzwě

(Malékuse 5.2,11-43; Lukase 8.40-56)

18Yěsô ne ńgɔɔn nò mbwó pɔ́b pú’u, àtsɔ̌ ndÿò tó, ńnuŋe mekwò yé ńgɔɔn ngie: Míŋ wɔ̀ɔn we manzwě lěen ńkwé pɔ́ fʉ̀’ɔɔn, tá tóo ńzába pwó jú ná yé à gwɔ́ wó. 19Yěsô lu ssé, pâ *ngàŋa kwò yé cʉ́me nzèm yé. 20Pɔ́ né ńgee, àtsɔ̌ manzwě gwɔ́ nùɔ lá’, ńgẅiin guɔ máshúɔ, mbà á gegé yé gege ngù’ tsɔ́b pʉ́a nê legém. Á ná’te, éfó nzèm, ńtó ńkíbe tsɔ̌ɔn nzsǒ Yěsô, 21mélà’mie à la ne ńgɔɔn ngie: N dɔɔn ńzé’e pwó yɔ́ɔn tà fó ńkíbe pɔ́ nzsǒ yé, mbà mèŋ n ge zeŋe! 22Yěsô sele nnɛ́, ńgyá yé, ńgɔɔn né yé ngie: Míŋ wɔ̀ɔn, ɔ́ɔ shÿó mbòŋo, ntí gie ɔ̀ lɔ̌g ńzáb ntʉ́m gú ná mèŋ lɛ̂, gÿǒ ɔ̀ zeŋe. Á gwóon ńzeŋe pɔ́ fʉ̀’ó fʉ̀’ó. 23Yěsô gʉa tà ńkúu mbʉ̀a ndÿò wá, ńgyá, mbà pàpú’ shúm ńdɔg ńtúŋo mpfó, ně ndá’ ńtó tà ńtyéte, àlá’ piŋ ne ńzẅɛɛ shwǒŋ. Yěsô gɔɔn né pɔ́b ngie: 24Pi gʉate, múɔ manzwě kaa kwé, à lye lyě. Àlá’ jú’ ńgẅe yé gẅe. 25Mé fó ndá ńkẅile pʉ̀a. Yěsô kúu ndà, ńkíbe pwó múɔ manzwě, á gwóon ńdu ssé. 26Mé lɔgɔ yɔ̀ɔn nò ḿbú saa jʉ’ nà yɛ̌ pàga ngwòŋ.

Yěsô gÿǒ pàfʉ̀ menÿɔ́g mépʉ́a zeŋe

27Yěsô fó jʉ’ó ne ńgee, etsɔ́ pàfʉ̀ menÿɔ́g mépʉ́a cʉ́me nzèm yé, ńne ńga’te ńgɔɔn ngie: Nyìŋ na ngẅɛ fùɔ Ndavíd tsɔ́ɔn mezìŋe még. 28Á gʉa tà ńkúu ndá, pàfʉ̀ menÿɔ́g pá tó ńkẅɛ́te yé, á zɛ́te wɔ́b ngie: Pi kwǎŋ ngie á lɔɔn ńgwɔ́ n gÿo mmó gie pi zɛ́te lɛ̂? Pɔ́ yé oon mé Cʉ̀apʉ̀a ɔ̀ ku’u légÿo. 29Yěsô leen ńké ńzába pwó ná menÿɔ́g mɔ́b, ńgɔɔn ngie á poŋ ngie à kɔ́ɔkɔ́ à gwɔ́ pá’ pi zǎb ntʉ́m ná mèŋ ńkwaŋ ngie á ge gwɔ́. 30Menÿɔ́g mɔ́b leen ńké ńgyá jʉ’. Yěsô tɔ’ɔ wɔ́b ngie: MÀbɔ́ɔn gẅi lé ké ńgÿo tà nyìŋ zsé pá’ á cʉ̌a pú’u. 31Tá’ pɔ́ zyɛ́’ tà ńkúu pǐ ńdɔg lezíŋ Yěsô ḿbú saa jʉ’ ntsèm ná yɛ̌ pàga lá’.

Yěsô gÿǒ tsɔ̌ mbu’ ncwò gɔɔn nò

32Pàfʉ̀ menÿɔ́g gwaa fó ndá kẅɛ, mé lɔgɔ tsɔ̌ nyìŋ ńtóo mvfò Yěsô, mbà tsɔ́ *ssé tepòŋ la gÿo á cʉ́’ʉ mbu’ ncwò. 33Yěsô gwɔ́ tà ńjwoŋ yɛ̌ *ssé tepòŋ, mbu’ ncwò ŋwɛ́ gwóon ńzye légɔɔn nò. Àlá’ gyá ḿbú ḿmɔ́ɔn, ńne ńgɔɔn ngie: Mé laa zɔɔn ńgyá yɛ̂ ntí nò á tsɛ̀ɛ ngwòŋ pà Israel wɔ́. 34Tá’ pà *farisay gɔɔn yɔ́b ngie: Tándá *messé tepòŋ zɔ gÿo tá Yěsô ku’u léjwoŋ *messé tepòŋ

Yěsô tsɔ̌ɔn mezìŋe nùɔ lá’

(Malékuse 6.34; Lukase 10.2)

35Yěsô ně ńcʉa tsɛ̀ɛ metÿǒsoŋ ntsèm mbɔɔ tsɛ̀ɛ melá’, ńkúu nzɔ̌ nzɔ̌ wɔ́ ńgee *ndá cú’tè, ńzí’i pʉ̀a nò Ssé, ésá’a nkʉ̀ mbòŋo gẅie éshwóŋó pá’ *lefùɔ Ssé ee pú’u, ńgÿo meguɔ ntí ntí maga nà pʉ̀a, *melɔ̌’ ntí ntí maga mbùm pʉ̀a, 36ńgyá menùɔ lá’, mezìŋe mɔ́b kúu yé, mélà’mie pɔ́ laa pá’ nùɔ *menjʉ̀njÿò mie àmpfele tè wó wɔ́. Pɔ́ gwɔ́ mezìŋe mezìŋe, mbà pɔ́ pǔ ńtsáŋ

37Á leen ńké ńgɔɔn mbwó *ngàŋa kwò yé ngie: Eshúm sie mé gee nká’ ńdagá é gyɔ́ɔn tɛ’, nzẅìŋ ngàŋa fà’ piŋ ńkɔ́g. 38Á poŋ ngie pi sẅíŋte ngàŋ nká’ à kẅi’i megàŋa fà’ pie pɔ́ ge ne laga shúm sé.

Tällä hetkellä valittuna:

Matio 9: NGBM

Korostus

Jaa

Kopioi