NITRITI 25

25
Yo di intun Abraham him tug hon nitnem bat mien nindigsi nya
(1Taw. 1:32-33)
1Lene Abraham wak nitnem mien Ketura. 2Lene Ketura gwam tut nipmot bat nya ibou muhwindagom bak Abraham ba, inyeng rino Zimran kin Yoksan kin Medan kin Midian kin Isybak kin Suah. 3Lene Yoksan yai nipmot bat cin di inyeng Syeba kin Dedan. Yo di intun Dedan him ne mben Asyur kin mben Letus kin mben Leum ri. 4Lene Midian nipmot bat nya inyeng rino Efa kin Efer kin Henokh kin Abida kin Eldaa. Yo dini yahagom intun Ketura him.
5Mbro nok gino Abraham kes mun di noni nyeng tut hagom bak nipmot Ishak lo, 6tirigi nide njap ngwig hon bigyo lene noni njei munkwas mang bibor bak nipmot bat nindigsi nya di nitnem mien nya igwam tut yok. Lene noni cuk nipmot bat nindigsi dini yok yahagom ug ei hanjop nite bei mpia nipriti ei minu ting leu nipmot Ishak niyati.
Abraham de njap ningwig honti
7Abraham de njap ug ei ari bingwam sratus gom ningot muhwindacan ba, muhwi. 8Niyati nddong leu api ninnei kimbas ba, noni ug bong bit nidigup bat-nidigai bat nya. 9Leu api nipmot cin di Ishak Ismael nya itig ei hak mihyeti Makhpela dideu Mamre nite bei mpia nipriti. Ei hanjop nsi po Efron de pima ba, nicig Zohar ne mben Het pima ri. 10#Kej. 23:3-16 Abraham pek mpia dima leu mben Het nipou su ba, nitnem Sara ningut cem jo ei sirima. 11Niabiati Abraham mai leu su lene Allah njei mun di kei bak nipmot Ishak. Noni bong dideu minyei bousi di ninyeng No Di Niyaijo Ngig Niyai Kep Da Nide Minyei Bousi Ri.
Yo di intun Ismael him
(1Taw. 1:28-31)
12Ismael nicig Abraham ba, nipmem Hagar di Sara de awak leu minu Mesir. 13Lene Ismael yai nipmot bat nya ibou simnaibrimigcan di inyeng rino Nebayot kin Kedar kin Abdeel kin Mibsam, 14kin Misyma kin Duma kin Masa, 15kin Hadad kin Tema kin Yetur kin Nafis kin Kedma. 16Yo dini inok pung di keret simnaibrimigcan intun him ba, ijem ide minu nya cem bibit leu nok tungwagom-gom ninyenga. 17Ismael de njap ug ei ari bingwam sratus gom ningot ningai ba, muhwindacan ug api noni mai. 18Ismael de nintun him yamti di ibram yam nya ibong ei minu Hawila kin Syur nikieti ba, minu ndig dini jo dideu minu Mesir nite bei mpia nipriti kikau ug ei minu Asyur. Ba, yahagom imbres yok bibong minu ting leu yo di intun Abraham him nindigsi nya.
Ribka gwam tut Esau kin Yakub
19Ayat dini yok pai sut Abraham nipmot Ishak. 20Tirigi Ishak de njap ug ei ari bingwam ningot bitai lene noni wak nitnem Ribka pima ba, Ribka nikijam rino Laban lene nicig rino Betuel di mben Aram ba, nitimieisi ei Mesopotamia. 21Mpe dima lene Ishak ngat nadi tindei nitnem lewo Ribka pijet leu api tuhan buhup nide nadi bibindei ba, Ribka nghop. 22Noni tta buhun tut munggwom nggre ba, tirigi munggwom nggre cin dima isrek bigyo lene idahat kukwei yam ei Ribka ninghopti. Gima rino noni lua sok bipai “Aye! Mun dini yok bon da nok tut nggon i?” Gima rino noni ug ba, hig ser tuhan ningon kanti tut.
23 # Rm. 9:12 Lene tuhan buhup “Atta buhun tut pung di intun him ningat can rin ba, mporo agwam tut munggwom nggre di inok pung di keret can di iba nitok biyam intun him. Keret gom misindem dor njiriek keret gom ba, munggwom mighumbou nok awak mem nikinjoi.”
24Tto bou dem tu lene Ribka gwam tut munggwom nggre nipinai hacem. 25Gi hi di mighumbou ningkek ngwoi ba, ningkek dip nta-nta. Gima rino ijem ninyeng Esau. 26Hammi tirigi Ribka gwam tut Esau rino nikinjoi kat nikindig nikien bingkiem bibor. Gima rino ijem ninyeng Yakub. Mpe dima lene Ishak de njap ug ei ari bingwam ningot muhwindagom.
Esau tri mun di nyeng tut tug hon gi nok mighumbou bak Yakub
27Tirigi munggwom cin dini indig nut tu lene Esau ngim igkei bibong kep susti noro Yakub nibou nddong ba, tot mpia ei ig bei. 28Lene Ishak ningon ngakei Esau tut mikwau di noni pilei bibam noro Ribka ningon ngakei Yakub.
29Mpe di gom lene Yakub kwen kiju nikwai koi ei yengti leu api Esau tau kwei leu ningimti ba, nggum bibor. 30Lene noni hara Yakub bipai “Ayo! Dimai dinggum ug ri! Ma aket kiju dima poi mien bidiyem i!” (Gima rino ijem ninyeng hi Edom.)
31Lene Yakub pai “Yo, gi nok ne ma atri mun di anyeng tut tug hon gi anok munggwom mighumbou bida bibie ug e leu api midiket kiju dima hi tut na.”
32Lene Esau buhup “Mun di dinyeng tut tug hon gi dinok munggwom mighumbou dima bon ninyeng mem da bi ba, ditri bina hak ug lewo dimai dinggum ug ri.”
33 # Ibr. 12:16 Noro Yakub pai binoni “Suar aheng bida tut gima nipou ug e.”
Apino Esau heng bak Yakub bibitri mun di ninyeng tut tug hon gi nok munggwom mighumbou bak. 34Leu api Yakub ki roti biket kiju pima hi tut Esau biyem. Tirigi noni yem kiju bingwig bidut minyei leu lene kiju bimbut. Gima rino ningkek ndok tut mun di ninyeng tut tug hon gi nok munggwom mighumbou.

Tällä hetkellä valittuna:

NITRITI 25: HAD

Korostus

Jaa

Kopioi

None

Haluatko, että korostuksesi tallennetaan kaikille laitteillesi? Rekisteröidy tai kirjaudu sisään