NITRITI 23
23
Sara de njap ningwig honti
1Sara de njap ug ei ari bingwam sratus gom ba, ningot can muhwindacan tu. 2Leu api nide njap ngwig hon ei Hebron ei minu Kanaan apino Abraham ningon ngguk tut bipim kep.
3Lene noni kes nitnem ningut bijo ei leu lene ug ngat mben Het di ibong ei minu dima bipai biyok, 4#Kis. 7:16; Ibr. 11:9, 13 “Dibong dingkiaisi dini ba, nna ba jipek dihyei hanjop nsi gom bida leu binhyepo ditig ditnem ningut eisi.”
5Lene mben Het ibuhup, 6“Andigpoi e, nipai ningon kanti gom bina. Niba nibou di cut bak na di Andigpoi lewo anok nibou di sindem bibor. Gima rino ma atig atnem ningut ei nyende jui nsi gi hi di kei bibor kei bit leu angon kanti hak ug. Bikwop nyeni nahagom ningon llei sut gima nitin ei nyende jui nsi gom mem gima atig atnem ningut eisi.”
7Lene Abraham kuk no ei yahagom yoho bei. 8Lene pai biyok “Gino jice tut gi ditig ditnem ningut ei jide mpia dini lene ma jiya hacan mem da bijihig Efron di Zohar nipmot, 9leu binhyepo noni mitri hak mihyeti ei Makhpela ei nide ngoi dum ninghas him bida. Lene ma noni tri bida bou jahagom jiyai him bit leu nok nibok di joti. Lene midijem mpia dima bou da nok jui dip mem ditig ditnem ningut eisi.”
10Mpe dima lene Efron no gwam srig mben Hetti hammi dimbou hui di nok gumihyep mem timiei nya isimbot kep mun biyam eisi. Gima rino Efron buhup Abraham nihyet lene nindigsi nya yahagom imiap nipaisi. 11Noni pai “Ditde keret dini yok yahagom ingat bou igyai him bipia midipek mpia dima bitut hak mihyeti di jo niti titut bak na di andigpoi mikuisi leu binhyepo atig atnem ningut eisi.”
12Lene Abraham kuk no hanyen ei mben Het yoho bei. 13Bipai bak Efron ei yahagom yoho bei “Ma jintu kep dihyet dini. Dijoi sut gima diba mitiei bipek mpia dima titut yam. Asindui sut da bidiyai mitiei nimangti bina leu api miditig ditnem ningut eisi.”
14Lene Efron buhup, 15“Nna ba mpia dima bon nibok ug ei mitiei nitig sratus bitai he lo, mitiei bon ninyeng mem sani bi. Ma atig atnem ningut eisi hak ug.” 16Lene Abraham ce tut nibok ba, nyohou kwop mitiei nitig nimangti bit leu nok Efron nipaisi ei yahagom yoho bei. Ba, nimangti ug ei mitiei nitig sratus bitai bit leu nok nitri-nibipek mun cig ide mitiei nibuhunti.
17Nok gima lene Abraham ninyeng tak kep dihyei hanjop nsi di Efron de ei Makhpela ei Mamre nite bei mpia nipriti. Hanjop nsi dima bitut hak mihyeti kin biei njem nya hagom kikau ug bipek ninghas him. 18Ba, mben Het di idem yam ei gumihyep di jo hammi dimbou hui pima yahagom ice tut yam bipia ipek mpia dima bak Abraham.
19Gima ngwig lene Abraham tig nitnem Sara ningut ei hak mihyeti Makhpela ei minu Kanaan. 20Gima rino hanjop nsi bitut hak mihyeti di joti nya po mben Het inyeng tak kep pima rinok Abraham de bu ba, nok jui dip mem noni tig nide bat nya di imai ingut eisi.
Tällä hetkellä valittuna:
NITRITI 23: HAD
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään