PĚNDARIADI 48
48
I Yakub něngal᷊amatẹ̌ si Efraim dẹ̌duan Manasye
1Ta nararěnnạ wọu ene i Yusup kai pinaul᷊ikang u i amang e kai masakị matědụ. Tangu i sie měngkatewe tamai kụ němaringang anạ e rarua, i Manasye rěduang Efraim kụ nětiwo si Yakub. 2Piạ e i Yakub nakaringihẹ̌ u i Yusup kai narěnta, i sie měngkatewe nẹ̌těngkawěbehu sěngapang ihạ u wadange, kụ naiang su raral᷊okaěng e. 3#Pěnd. 28:13-14 Angkuěng i Yakub si Yusup, ”Mawu Ruata Kawasam patikụ e seng nẹ̌tengkasilo si siạ su Lus, su ěntanang Kanaan, kụ seng něngal᷊amatẹ̌ siạ.” 4I Sie něhengetang si siạ, ”Iạ e sarung mangonggọ u anạ pulung makěpal᷊ẹ̌ tadeạu hěntonu e sarung makoạ umatẹ̌ mal᷊awọ su dunia. Iạ e sarung mangonggọ u wanua ini su hitenu kere tataghuaneng i sire sarang marěngụ-děngụ.”
5I Yakub naněpasu rụdatone, ”Yusup, anạ u rarua i Efraim dẹ̌duam Manasye kụ nawantelẹ̌ su Misirẹ̌ ini kụ den ta nạděnta sini e, takụ nikoạ kere anạku, mẹ̌sul᷊ungu i Ruben dẹ̌duang Simeon. 6Kereu i kau e relaim makareạ anạ u ute i sire tawe ikoạ anạku, kaiso i sire těbewe anạ u; kụ pusakạ baugʼi sire e sarung itarimạ i sire wọu i Efraim dẹ̌duam Manasye. 7#Pěnd. 35:16-19 Iạ mẹ̌kẹ̌koạ hal᷊ẹ̌ ene e waugʼi Rahel i ninangu e. Suraral᷊engku mẹ̌sul᷊e wọu Mesopotamia e, i ninangu naminsul᷊u singongone su ěntanang Kanaan, tawẹ karuane wọu i Efrata, dingangu iạ e měngkate apa masusa naungku. Iạ nělěbing i sie paị sene, su wiwihu ral᷊eng sol᷊ong Efrata.” (Orasẹ̌ ini e Efrata su singkạ u taumata ute Betlehem.)
8Sarangke i Yakub nakasilo manga anạ i Yusup ene, i sie nakiwal᷊o, ”Kai i sai manga rariọ ini e?”
9Angkuěng i Yusup, ”Seng ini e manga anạ kụ nạung nionggọ u Ruata si siạ sini su Misirẹ̌.” I Yakub nẹ̌bera, ”Apakaraniko ramahi sol᷊ong anuku e i sire mědeạu takụ al᷊amateng.” 10I Yakub tawe nakasilo mal᷊ahẹ batụu i sie kai sem maghurang dingangu matane kai sem mal᷊ebuhẹ̌. I Yusup napakarěduhu manga rariọ ene e si Yakub, kụ i sie limahěkụ dingangu riměngu si rẹ̌dua. 11Bọu ene nẹ̌berạ e i Yakub si Yusup, ”Mamben tawẹ harapẹ̌ku sarung mẹ̌sombang kapia ringangu, kai arawe orasẹ̌ ini Mawu Ruata e katewe napakawalang iạ den nakasilo manga anạ u e lai.” 12Bọu ene i Yusup něngal᷊ạ e si rẹ̌dua wọu hiwang Yakub, kụ bọu ene i sie nẹ̌těngkasumagẹ̌ su těngong amange.
13-14Bọu ene i Yusup něměllọ u anạ e rarua e su rěduhʼi Yakub, kụ i Efraim tuari e su sěmběkane kaihi ringangu i Manasye kaiakanenge su sěmběkane koaneng. Arawe i Yakub e napẹ̌kakandangu l᷊imane kụ nělěngkangu limane koaneng su těmbọ i Efraim, arawe limane kaihi e ute nilěngkange su těmbọ i Manasye. 15Bọu ene tangu nial᷊amatenge i Yusup,#48:15: Yusup: Piạ i Yakub něngal᷊amatẹ̌ si Efraim dẹ̌duan Manasye, tumuhụ hinone al᷊amateng ute kai i Yusup. angkuěnge,
”Mawu Ruata, seng i Sie Mawu nạung pạhamawuang i Abraham dingangu Ishak,
kụ seng i Sie e mạngahạ u iạ e sarangkewe orasẹ̌ ini.
16Seng i Sie malaekatẹ̌ nạung něliung iạ bọu patikụ silakạ.
Mal᷊owọko Mawu Ruata e měngal᷊amatẹ̌ manga rariọ ini.
Mal᷊owọko arengku e tatapẹ̌be isẹ̌sẹ̌bạ, kerẹewe lai areng i upungku i Abraham dingangʼi Ishak
ual᷊ingu manga rariọ ini e!
Mal᷊owọko i sire mẹ̌pulung kụ měmpẹ̌hite mal᷊awọ su dunia ini.”
17I Yusup tawẹ dal᷊uase sarang nakasilo si amange kawe naměllọ u l᷊imane koaneng su těmbọ i Efraim; kụ i sie nangumbelẹ e limang amange kụ nial᷊ing e wọu těmbo i Efraim su těmbo i Manasye. 18Angkuěnge si amange, ”Abe kerene, Amang! Kai ini e anạ i akang, kụ pěllọ e limang Amang koanenge su těmbọ e.”
19Kai i amange mang nạdiri, angkuěnge, ”Iạ masingkạ u anạku, iạ masingkạ. I Manasye sarung masěllahẹ̌ kawasane dingangu hitene mal᷊aing sarung makoạ umatẹ̌ masěllahẹ̌. Arawe tuarine sarung něngalembong kasěllahe kawasane wọʼi sie ringangu hitene ene sarung makoạ manga umatẹ̌ masěllahẹ̌.”
20 #
Ibr. 11:21
Bọu ene nial᷊amatenge kạpia manga rariọ ene su ěllo ene lai, angkuěnge, ”Tau Israel sarung mẹ̌sěbạ arengu kereu i sire měngal᷊amatẹ̌ taumata. I sire sarung měbera, ’Mal᷊owọko Mawu Ruata e mapakariading kau e Efraim děduang Manasye.’ ” Kụ ual᷊ingu ene i Yakub mapakal᷊imonang Efraim bọi Manasye.
21Bọu e nẹ̌berạ e i Yakub si Yusup, ”Kerẹewe sen nikasilonu, papateku e sem masandigẹ̌, arawe Mawu Ruata e sarung mẹ̌tul᷊ung i kamene ringangu mamaringang i kamene mẹ̌sul᷊e kapia sol᷊ong banuang i upung i kamene. 22Mang sol᷊ong anung kamene, ringangu wal᷊inewe sol᷊ong anung manga tuhangu, takụ pěmal᷊ohoěngu Sikem, banua matawa ene nạung takụ nipul᷊aho su tau Amori ringangu warạ dingangu papitịku.”
Tällä hetkellä valittuna:
PĚNDARIADI 48: SXN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään