PĚNDARIADI 46
46
I Yakub dingangu patikụ dal᷊ohom bal᷊ene něngal᷊ing sol᷊ong Misirẹ̌ e
1I Yakub nẹ̌kakomol᷊u kal᷊awọu apal᷊iwụ e kụ bọu ene rimal᷊eng. Nahumpạ e su Bersyeba i sie něnarakangkeng laonggọ su Mawu Ruata kụ isẹ̌sěmbang Ishak i amange. 2Su ral᷊ungu papasilo piạ su sěhěbi tangu Mawu Ruata e něhengetang si sie, ”Yakub, Yakub!”
”O Mawu,” angkuěnge.
3”Iạ e kai Ruata, Ruata i pěpẹ̌puding amangu,” angkuěnge. ”Abe katakụ matanaẹ sol᷊ong Misirẹ̌. Iạ e sarung apakariadim pal᷊ahitenu e makoạ umatẹ̌ masěllahẹ̌ paị sene. 4Iạ e sarung maněntanudẹ̌ si kau sol᷊ong Misirẹ̌, dingangu mapẹ̌bal᷊i u hitenu e kapia sol᷊ong banua ini. I Yusup e sarung ene su sěndihangu kereu i kau sem maraning maminsul᷊ẹ̌ singongonu e.”
5Tangu nẹ̌buạ e i Yakub bọu Bersyeba. Manga anạ e napasakeng amang i sire ringangkewem manga anạ dingangu kawing i sire su wowong kareta niringọ u ratum Misirẹ̌ e. 6#MMR. 7:15 I sire mal᷊aim němpěbawa kal᷊awọu binatang dingangu kal᷊awọu arětạ nikahombangeng i sire su Kanaan, mase wọu ene němpẹ̌buạ nakoạ sol᷊ong Misirẹ̌. I Yakub tangu němaringang kal᷊awọu hitene, 7kụ kěbịewe apang manga anạ e arau pulunge esẹ dingangu wawine.
8Manga anạ dingangu pulung i Yakub němpẹ̌tol᷊e sol᷊ong Misirẹ̌ e ute kai 9i Ruben, anạ e kaiakanenge; manga anạ e: i Henokh, i Palu, i Hezron, dingangu i Karmi. 10Manga anạ i Simeon kụ: i Yemuel, i Yamin, i Ohad, i Yakhin, i Zohar, dingangu i Saul, anạ su tau wawineng Kanaan. 11Manga anạ i Lewi ute kai i Gerson, i Kehat, dingangu i Merari. 12I Yehuda; manga anạ e: i Syela, i Peres dingangu i Zerah, arawe anạ i Yehuda wal᷊ine ute i Er rẹ̌duang Onan e kai nate su ěntanang Kanaan; kụ manga anạ i Peres ute i Hezron dingangu i Hamul. 13Manga anạ i Isakarẹ̌ e ute kai i Tola, i Pua, i Ayub dingangu i Simron. 14I Zebulon; ringangu manga anạ e; i Sered, i Elon, i Yahleel. 15I sire kěbị e kai manga anạ kinawantelʼi Lea si Yakub su Mesopotamia, kụ sul᷊ikude ene lai anạ e wawine i Dina. Kụ kal᷊awọu hěnton Yakub bọu kawinge i Lea e kal᷊awọe těllum pul᷊o těllu su kataune.
16I Gad; manga anạ e ute i Zipyon, i Hagi, i Syuni, i Ezbon, i Eri, i Arodi dingang i Areli. 17I Asyer; manga anạ e ute: i Yimna, i Yiswa, i Yiswi, mase i Beria ringangu i Serah wawinen sire. Manga anạ i Beria ute kai i Heber dingangu i Malkiel. 18I sire mapul᷊o ěnnung ene ute kai hěnton Yakub bọʼi Zilpa ute kai ěllang bawine gaghěllị i Laban si Lea, anạ e wawine.
19I Rahel kawingʼi Yakub kai piạ anạ e esẹ darua, kụ kai i Yusup dẹ̌duam Benyamin. 20#Pěnd. 41:50-52 Su Misirẹ̌ i Yusup nakareạ anạ e esẹ darua, kụ kai i Manasye, ringangu i Efraim kụ kinawantelu kawinge i Asnat, anạ i Potifera, nạung nakoạ imang su Heliopolis. 21Manga anạ i Benyamin esẹ e ute: i Bela, i Bekher, i Asybel, i Gera, i Naaman, i Ehi, i Ros, i Mupim, i Hupim dingangu i Ared. 22I sire mapul᷊o ěpạ ene ute kai hiten Yakub su kawinge i Rahel.
23Tuhụ e i Dan; anạ e i Husim. 24I Naftali manga anạ e ute: i Yahzeel, i Guni, i Yezer dingangʼi Syilem. 25I sire pitu ene, kai hěnton Yakub si Bilha, ěllang bawine kụ nionggọ i Laban su anạ e i Rahel.
26Hěnton Yakub kụ nakoạ sol᷊ong Misirẹ̌ e kěbị kai ěnnungu pul᷊o ěnnung su kataune kal᷊awọe bědalain tawe narekeng apang mirarating. 27#MMR. 7:14 Manga anạ i Yusup apang kụ nawantelẹ̌ su Misirẹ̌ e kai ruang katau, hakịeweng kakěpal᷊u ral᷊ohom bal᷊eng Yakub nawunạ su Misirẹ̌ e ute kai pitum pul᷊o su kataune.
I Yakub dingangu ral᷊ohom bal᷊ene su Misirẹ̌
28I Yakub dimolohʼi Yehuda niaparal᷊eng piněngal᷊imona mědeạu pěkẹ̌kui si Yusup tadeạu pẹ̌sombang i amang e su Gosyen. Piạ i sire nahumpạ su Gosyen, 29i Yusup simake karetane mědeạu mẹ̌sombang dingang i amange sene. Piạ i sire nẹ̌sombang, i Yusup limahěkụ si amange kụ marěngụ kụkiạ. 30Angkuěng i Yakub si Yusup, ”Ini e iạ seng balạe mạeng mate, u iạ e seng nakasilo si kau ringangu masingkạ u i kau e wědangbe wiahẹ̌.”
31Tangú angkuěngkeweng Yusup su manga tuhange ringangu anạ u su kataune lai wal᷊ine, ”Iạ e harusẹ̌ tamai kụ měhabarẹ̌ su ratu u manga tuhangku ringangu kal᷊awọu manga anạ u sěngkatauku apang mạtanạ su Kanaan e seng diměnta. 32Iạ e sarung mẹ̌bera u i kamene kai měndal᷊ukadẹ̌ domba ringangu sapi, ringangu kai sem bọu nẹ̌bawa kal᷊awọu binatangu ringangu kal᷊awọu arětạ tataghuanengu. 33Kereu ratu e mẹ̌kui si kamene ringangu makiwal᷊ong hal᷊ẹ̌ u e ute 34paul᷊ị si sie u i kamene ini e kai mělahiking binatang dem bědang dariọ kerẹewe lai nạung manga i upung i kamene e. Ual᷊ingu kawe kerene ute i sie e sarung dumolohʼi kamene pěmpẹ̌tanạ su wanuang Gosyen.” I Yusup něhabaru ene ual᷊ingu tau Misirẹ̌ e makạpěndang mạsanạ mẹ̌dal᷊ahapị u apam měndal᷊ukadẹ̌ manga binatang.
Tällä hetkellä valittuna:
PĚNDARIADI 46: SXN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään