Matias 12

So-sano mangale Sabata ma wangere

(Mrk. 2:23-28; Luk. 6:1-5)

1Toma 'orasa rimoi Sabata ma wangere, Yesus 'O tola'a i'a toma guḏa gandum ḇotu moi re 'Ai me-mete'e raḏi sawini. Dadi ananga 'aḏi 'utu'u gandum kara 'aḏi oromo.#Dad. 23:25 2Wakutu ngowa-ngowa'a Farisi ya'u oḏi'i, ananga 'aḏi kanau ra Yesus, “Oḏi'i, 'Ani me-mete'e ananga ya mete'e ua nanga 'agama ma 'atoranga toma Sabata ma wangere!”#12:2 Ngowa'a Farisi 'aḏi kanau so'o gena-ge sababu Yesus 'ai me-mete'e 'aḏi 'a'a 'ori i'a ga'a 'i wosono toma Sabata ma wangere!

3Yesus 'a sangoro, “Tantu ḏua, ngini reni baca mangale 'oru ga'a Daud 'a si'a'a wakutu unanga re 'ai ḏagilomu raḏi sawini! 4Unanga gena-ge 'o osama ra Ma Jou'ongu Madutu 'ai Wala, re unanga re 'ai ḏagilomu ananga 'aḏi oromo roti ga'a sipula'a ḏua sa'olo jou-jou ra Ma Jou'ongu Madutu. Kalaha, mete'e nanga 'agama ma 'atoranga, pa'i 'imam-'imam ḇato nyengara ya oromo roti gena-ge, mada'a Daud re 'ai ḏagilomu ananga gena-ge 'aḏi 'a'a sala ua.#1Sam. 21:1-6#Im. 24:9 5Re tantu ḏua ngini ḏi'i reni baca ra Musa 'ai hukumu ma dara mangale 'imam-'imam 'aḏi munara ra Ma Jou'ongu Madutu 'ai Wala toma Sabata ma wangere. Dadi ananga ya mete'e ua Sabata ma 'atoranga, mada'a 'aḏi sisala ua?!#Nyo. 28:9-10 6Mada'a Ngoi to siajele ra ngini nena-ne: 'Ane-ne 'age lebe la-lamo'o i'a reo Ma Jou'ongu Madutu 'ai Wala.#12:6 Ḏa Yesus bolo 'Ai pareta lebe lamo'o i'a reo Ma Jou'ongu Madutu 'ai Wala. 7Toma Boku 'Ofi-'Ofi rema bu-bula'a rimoi ma betongo so'o ne: ‘Ngoi to mau ngowa'a 'aḏi sijumu manga 'akala re sinyingara ma la-la toma ngowa'a lelegu, awa pa'i 'aḏi pula'a jou-jou haiwani ra Ngoi ḇato.’ Na'o ngini ni sahe mode-mode'e ma bu-bula'a gena-ge, tantu ḏua ngini ni sisala ua ngowa-ngowa'a ga'a kamanga sala ua.#Hos. 6:6; Mat. 9:13 8Ngoi nyengara to kanau so'o gena-ge, sababu Ngoi, Manusia ma Ngowa'a Nau'u to kuasa toma Sabata ma wangere!”#12:8 Yesus 'ai maksudu so'o ne: Unanga nyengara 'o sitantukanga 'oru ga'a si'a'a yoḏu'u, re 'oru ga'a nyengara si'a'a.

Toma Sabata ma wangere, Yesus 'o si-la ngowa'a matengo 'ai giama kaci moi 'i sengene

(Mrk. 3:1-6; Luk. 6:6-11)

9Yesus 'a sisoi'i tala ngi'i gena-ge re 'o osama toma wala puji. 10Toma wala puji gena-ge ma dara 'age rema ngowa'a matengo 'ai giama kaci moi 'i sengene. 'Age ḏi'i rema ngowa'a nga muḏuo i'a 'aḏi disa-disa Yesus 'ai sala. Dadi ananga 'aḏi sano ra Yesus, “Nyengara bolo ua, si-la ngowa'a siḏi toma Sabata ma wangere?”

11Yesus 'a sangoro, “Na'o 'age rema ngowa'a matengo ra ngini ninga sigolona unanga rai doba rimoi re toma Sabata ma wangere, doba gena-ge 'i eta'a toma tana'a ma ḇuongo; sanga ua doba ma dutu 'a sieanga 'ai doba toma tana'a ma ḇuongo gena-ge! Tantu ḏua, unanga 'a iḏala sisupu doba gena-ge.#Luk. 14:5 12Manusia lebe la-lamo'o i'a reo doba! Dadi na'o so'o gena-ge, ngene nyengara wo riono ngowa'a toma Sabata ma wangere.”

13Gena ḏua, Yesus 'o kanau i'a toma ngowa'a 'ai giama kaci moi 'i sengene gena-ge, “Na toa'a ino 'ani giama.” Dadi, ngowa'a gena-ge 'a toa'a i'a 'ai giama. Toma 'orasa gena-ge ḏua, 'ai giama ga'a sengene ri la, ma tero sa'olo 'ai giama ma kaci moi ga'a 'i sengene ua. 14Mada'a ngowa'a Farisi ya sisoi'i tala wala puji gena-ge re 'aḏi mafakati di'a 'aḏi sisengene Yesus.

Yesus, Ma Jou'ongu Madutu 'ai 'utusana

15Yesus 'a waro mangale ngowa'a Farisi manga 'ulungu ma jira ra Unanga. Dadi Yesus tagi 'a sisoi'i tala ngi'i gena-ge re ngowa'a repe 'aḏi mamete'e ra Unanga. Re Unanga 'o si-la ngowa'a siḏi mo-moini. 16Mada'a Yesus 'o simaha ua ananga 'aḏi siajele mangale Unanga ge 'a guna. 17Enanga 'i dadi mete'e Ma Jou'ongu Madutu 'ai demo-demo ga'a nabi Yesaya 'a siajele so'o ne:

18“Unanga nena-ne Ngoi 'Ari falalomu ga'a Ngoi reto cumutu.

Unanga ga'a to dadalara re ga'a 'a sisanangi 'Ari 'akala re sinyingara

'Ari Ngagara 'Ofi-'Ofi ḏuanga i'a ta sipula'a ra Unanga.

Re Unanga ḏuanga i'a 'o sihabari mangale 'Ari 'adili toma bangsa-bangsa.

19Unanga ḏuanga i'a kama rubutu mai ua bolo maboa-boa'a;

matengo i'a mai ua 'isene 'Ai bobita toma ngo'omo lamo'o.

20Unanga 'o sijumu 'Ai 'akala re sinyingara ma mereoso toma ngowa'a lamahana ma tero sa'olo Unanga 'o poti ua lou'u ga'a ri tu'o,

re Unanga 'a sisengene ua poci ma lejanga ga'a ma subu ri ḇoḇi'i.#12:20 Ma duhu so'o gena-ge Unanga 'a sijumu 'ai 'akala re sinyingara ma mereoso toma ngowa'a lamahana.

Unanga 'o munara singadolo 'Ai 'adili 'i waiti toma dungia sitabi donga;

21re bangsa mo-moini ḏuanga i'a manga ngo-nganono ra Unanga.”#Yes. 42:1-4

Ngowa'a Farisi 'aḏi ta'ajiri Yesus 'ai kuasa ra Beelzebul ino

(Mrk. 3:20-30; Luk. 11:14-23)

22Gena ḏua, ananga 'aḏi gasa ino ra Yesus, ngowa'a matengo 'o hafu re 'o mou sababu 'o roh ma jira 'u dungosama. Yesus 'o si-la unanga gena-ge singadolo unanga 'o oḏi'i re 'o kanau ri nyengara. 23Ngowa'a mo-moini matai heranga re 'aḏi kanau, “Unanga nena-ne ḏa 'Olana Daud 'ai ju'uda#12:23: 'Olana Daud 'ai ju'uda ma tero sa'olo: Daud 'ai Ngowa'a Nau'u. ga'a ngene wo totoma?”

24Mada'a ngowa'a Farisi ya 'isene so'o gena, ananga ya sangoro, “Ngowa'a nena-ne pa'i nga'unu 'o dusu'u roh ma jira ḇato sababu Beelzebul, 'o Roh ma Jira ma 'Olana, enanga 'i pula'a watasa ra Unanga.”#Mat. 9:34, 10:25

25Yesus 'a waro ngowa'a Farisi manga fikirana, dadi Unanga 'o kanau i'a ra ananga, “Toma nagara rimoi, na'o ma manusia 'i palangu toropo moi-toropo moi ga'a 'aḏi ma'u parangi i'a re ino, tantu ḏua nagara gena-ge ḏuanga i'a 'i wejere. Re ḏi'i, na'o limau rimoi bolo ngitu re ngale rimoi 'aḏi ma'u lawana matengo re matengo, limau bolo ngitu re ngale gena-ge ḏuanga i'a 'i wejere. 26So'o gena ḏi'i reo 'Iblisi ma pareta. Na'o roh ma jira toropo moi ma'u dusu'u reo roh ma jira da'a toropo moi; ma ḏo-ḏogumu tala, 'Iblisi ma pareta gena-ge 'i pinya'olo re 'i wejere. 27Ngini ni ta'ajiri Ngoi to dusu'u roh ma jira sababu Beelzebul 'i pula'a watasa ra Ngoi. Na'o so'o gena-ge, ra guna 'ai kuasa ninga me-mete'e 'aḏi dusu'u roh ma jira?!#12:27 Yesus 'ai maksudu: ananga 'aḏi pake Ma Jou'ongu Madutu 'ai kuasa ḏi'i. Sababu gena-ge, ninga me-mete'e gena-ge masiretene ya bukiti mangale ngini ni rapu! 28Mada'a Ngoi to dusu'u roh ma jira rea Ma Jou'ongu Madutu 'ai Roh ma kuasa. Gena-ge 'i dadi didina'o rimoi mangale Ma Jou'ongu Madutu ro mulaingi 'o parenta taninga sigolona.

29Bolo na'o 'a guna ḇato 'o osama toma wala ḏu moi di'a 'o ra-rabasa 'ori i'a rana toma wala ma dutu ga'a lao te'e; siḏa-siḏa unanga balasu 'o piri'u wala ma dutu gena-ge si, kara 'o ra-rabasa 'ai 'ori i'a rana.#12:29 'Iblisi ma tero sa'olo wala ma dutu ga'a lao te'e.

30'A guna marimoi ra Ngoi ua, unanga gena-ge mode-mode'e 'o malawana Ngoi. Re 'a guna riono Ngoi ua, unanga gena-ge mode-mode'e 'a dola'aku Ngoi 'ari munara.#Mrk. 9:40 31Sababu gena-ge, Ngoi to siajele ra ngini nena-ne: na'o ngowa'a 'aḏi madaga'a ḏosa re 'aḏi sije-jengere ra guna ḇato, ananga manga ḏosa nga'unu 'i singi-ngiranga. Mada'a na'o ngowa'a 'aḏi sije-jengere Ma Ngagara 'Ofi-'Ofi, ngowa'a gena-ge manga ḏosa singi-ngiranga yoḏu'u. 32'A guna ḇato 'o kanau cira mangale Ngoi, Manusia ma Ngowa'a Nau'u, unanga gena-ge 'ai ḏosa nga'unu singi-ngiranga. Mada'a 'a guna ḇato 'o kanau cira mangale Ma Ngagara 'Ofi-'Ofi, unanga 'ai ḏosa singi-ngiranga 'i yoḏu'u: bae toma dungia nena-ne, bae dungia ma su-sungi.”#12:32 Yesus 'o kanau so'o gena-ge sababu 'age ngowa'a 'aḏi kanau Yesus 'o roh ma jira 'u dungosama. Oḏi'i Mk. 3:30 #Luk. 12:10

Ate rema sowo'o

(Luk. 6:43-45)

33Yesus dadunu 'o kanau moju toma ngowa'a Farisi, “Na'o ate ma nga-ngamasa lai rousu, tantu ḏua ma sowo'o lai rousu ḏi'i. So'o gena ḏi'i, na'o ate ma nga-ngamasa 'i cira, tantu ḏua ma sowo'o 'i cira ḏi'i. Ate gena-ge bae 'i rousu bolo 'i cira 'i waiti toma sowo'o.#Mat. 7:20; Luk. 6:44 34Ngini, ngowa'a ma jira! Sanga ua ninga demo re ganau enanga 'i la-la, sababu ngini ni cira. Sababu 'oru ga'a 'i supu toma madanga, enanga gena-ge ma 'asala toma 'akala re sinyingara ma dara.#Mat. 3:7, 23:33, 15:18; Luk. 3:7, 6:45 35Ngowa'a la-la manga demo re manga ganau 'i la-la, sababu manga 'akala re sinyingara ma dara enanga 'i la-la. Siḏibo ḏi'i ngowa'a ma jira manga demo re ganau 'i cira, sababu manga 'akala re sinyingara ma dara 'i romanga 'ori i'a ma jira.

36Dadi Ngoi to siajele ra ngini nena-ne: Wakutu Kiamata ma Wangere 'i ngadolo, Ma Jou'ongu Madutu 'o sijuruhakimi ngowa'a manga demo re ganau mo-moini ga'a ma faeda 'i cua. 37Sababu ninga demo re ganau masiretene Unanga ḏuanga i'a 'A pake di'a 'O sitantukanga ngini reninga sala bolo ua.”

Ngowa'a Farisi 'aḏi golo'o Yesus 'o 'a'a didina'o heranga rimoi

(Mrk. 8:11-12; Luk. 11:29-32)

38Gena ḏua, guru-guru 'agama nga muḏuo i'a re ngowa-ngowa'a Farisi, ananga 'aḏi kanau, “Guru, ngomi mau mi oḏi'i Ngana no 'a'a didina'o heranga.”#Mat. 16:1; Mrk. 8:11; Luk. 11:16

39Yesus 'a sangoro, “Ngowa-ngowa'a 'orasa nange-ne ngowa'a ma jira ga'a oḏu'u ngaku Ngoi! Ngini ni golo'o Ngoi to 'a'a didina'o heranga, mada'a rimoi i'a mai ua To pula'a ra ngini, pa'i ḏuga-ḏuga ga'a 'age ra ngini ḏua, gena-ge didina'o heranga mangale nabi Yunus:#Mat. 16:4; Mrk. 8:12 40Yunus 'o tegoro toma nyao'o la-lamo'o ma po'olo ma di'ara wangere ro'ange re utu ro'ange. So'o gena-ge ḏi'i Ngoi, Manusia ma Ngowa'a Nau'u, ḏuanga i'a To tegoro toma tana'a ma dara ma di'ara wangere ro'ange re utu ro'ange.#Yun. 1:17 41Toma Kiamata ma Wangere, ngowa-ngowa'a Niniwe ḏuanga i'a dadunu 'aḏi 'ahu moju mamete'e ra ngini ngowa-ngowa'a toma 'orasa nena-ne, re ananga gena-ge ḏuanga i'a 'aḏi kalaki ngini. Sababu ngowa'a Niniwe ananga raḏi maḏibo toma ngo'omo boloto, wakutu ananga 'aḏi 'isene nabi Yunus 'ai habari. Kalaha 'ane-ne, nange-ne Ngoi lebe la-lamo'o i'a rea Yunus taninga sigolona, mada'a ni ngaku Ngoi ua re ni maḏibo toma ngo'omo boloto ua!#Yun. 3:5 42Toma Kiamata ma Wangere, 'olana we-were'a toma kore mie ino, munanga ḏuanga i'a dadunu mo 'ahu moju mamete'e ra ngini ngowa-ngowa'a toma 'orasa nena-ne re mo kalaki ngini. Sababu munanga mo tagi toma ngi'i lai kiḏanga di'a mo 'isene Salomo 'ai 'akala ma soro'unu. Kalaha 'ane-ne, nange-ne Ngoi lebe la-lamo'o i'a ḏi'i rea Salomo taninga sigolona, mada'a ni ngaku Ngoi ua re ni maḏibo toma ngo'omo boloto ua!”#1'Oln. 10:1-10; 2Taw. 9:1-12

Roh ma jira dadunu 'i osama toma ngowa'a

(Luk. 11:24-26)

43“Wakutu roh ma jira enanga 'i supu toma ngowa'a matengo sababu sanga dusu'u, re enanga 'i tagi sigoloḏi toma ngi'i-ngi'i du-dudungu di'a disa ngi'i ma ngomasa, mada'a 'i sanga ua. 44Ḏua enanga 'i kanau, ‘Ngoi ḏuanga i'a to maḏibo toma ngowa'a ga'a to supu ḏua nga'ene.’ Wakutu enanga 'i maḏibo toma ngowa'a gena-ge 'i sanga ua Ma Ngagara 'Ofi-'Ofi 'i tegoro tai 'ahu. Ngowa'a gena-ge ma tero sa'olo wala ma dara 'i batolo, 'i 'ofi-'ofi re 'i ḏu-ḏuanga ḏua di'a enanga dadunu 'i tegoro moju. 45Sababu gena-ge, enanga 'i tagi re 'i gasa ino roh ma jira tumudingi ma lelegu ga'a lebe cira i'a. Ḏua enanga 'i osama re 'i tegoro toma ngowa'a gena-ge. Ma ḏo-ḏogumu tala ngowa'a gena-ge 'ai 'ahu nange-ne lebe cira i'a reo 'ahu 'au nga'ene. Gena-ge 'i dadi toma ngowa-ngowa'a ma jira toma 'orasa nena-ne sababu ananga 'aḏi dawongo Ngoi ua.”

Yesus 'ai ngina re 'Ai ioro re nongoḏu

(Mrk. 3:31-35; Luk. 8:19-21)

46Wakutu Yesus 'o ka-kanau moju toma ngowa'a repe, 'Ai ngina re 'Ai no-nongoḏu ananga 'aḏi sapolo. Ananga 'aḏi made-de'oso toma wala ma soana, disa ma donga di'a ma'u sanga re ma'u kanau ra Yesus. 47Toma ngowa'a repe manga sigolona, 'age rema ngowa'a matengo 'o kanau ra Yesus, “Jou, 'Ani ngina, re 'Ani no-nongoḏu ananga da'a toma wala ma soana, ananga 'aḏi disa ma donga di'a ma'u sanga re ma'u kanau ra Jou.”

48Ḏua Yesus 'a sangoro, “ 'Ari ngina ngo guna? 'Ari ioro re nongoḏu 'a guna?” 49Ḏua Yesus 'o sijumu Tai me-mete'e kara 'O kanau i'a toma ngowa'a gena-ge, “Ananga nena-ne 'Ari ngina re 'Ari ioro re nongoḏu. 50Ngowa-ngowa'a ga'a 'aḏi si'a'a 'Ari Ḇaḇa toma soroga, Unanga 'Ai mau, ananga gena-ge 'Ari ioro re nongoḏu re 'Ari biḏanga re 'Ari ngina.”

Tällä hetkellä valittuna:

Matias 12: SNT

Korostus

Jaa

Kopioi