Matias 10

Yesus 'ai so-soma'a nga nyagi moi re nga muḏiḏi

(Mrk. 3:13-19; Luk. 6:12-16)

1'Age wange rimoi, Yesus 'o 'aro'o 'Ai me-mete'e 'aḏi malomu. Ḏua 'o pula'a kuasa ra ananga, di'a 'aḏi dusu'u roh ma jira re 'aḏi si-la ngowa-ngowa'a mo-moini ga'a remanga si-siḏi ma rupa 'oru ḇato.

2So-soma'a nga nyagi moi re nga muḏiḏi manga lomanga: mulaingi, 'a Simon, ga'a si'aro'o ḏi'i 'a Petrus re 'a Andreas: ananga gia nongoḏu; kara 'a Yakobus re 'a Yohanes; ananga gena-ge gia nongoḏu ga'a manga ḇaḇa Zebedeus. 3Ḏua 'a Filipus re 'a Bartolomeus; 'a Tomas re 'a Matius golo-golo'o balastengi; 'a Yakobus Alfeus 'ai ngowa'a nau'u, re 'a Tadeus. 4Ma ḏo-ḏogumu 'a Simon ga'a 'o dadalara masala bangsa Israel re 'a Yudas Iskariot; unanga gena-ge 'o wu'unu 'a Yesus.

Yesus 'o doto'o 'ai so-soma'a, la ya siḏagi 'Ai munara

(Mrk. 6:6b-13; Luk. 9:1-6)

5Yesus 'ai so-soma'a nga nyagi moi re nga muḏiḏi gena-ge, Unanga ya'u 'utusu 'o bererongo so'o ne: “Awa ni tagi toma ngowa-ngowa'a Yahudi ua manga daeraha. Re awa tuḏu toma limau-limau ngowa'a Samaria. 6Mada'a ni tagi toma ngowa-ngowa'a Israel: Ananga gena-ge ma tero sa'olo doba ga'a 'i iranga. 7Siajele ra ananga: ‘Ti'ara riwara, Soroga ma Pareta#10:7 “Soroga ma Pareta” ma tero Ma Jou'ongu Madutu 'ai Pareta 'i ngadolo toma dungia nena-ne.’ 8Ni si-la ngowa-ngowa'a siḏi, ni dadunu si'ahu moju ngowa'a ga'a raḏi sengene, ni si-la ngowa-ngowa'a si-siḏi 'eno'o, re ni dusu'u roh-roh ma jira. Ni sanga barakati gena-ge mo-moini kama fangu ua, dadi ni pula'a ḏi'i ni golo'o ma ngogele awa. 9Awa ni gasa pipisi guraci, pipisi salaka, bolo pipisi tamḇaga. 10Awa ni gasa ḏi'i tohe, bolo capato, bolo didiki re baju ga'i ḏiḏi toma ḏo-ḏagi ma dara. Sababu ngowa'a ga'a 'aḏi munara di'a Ma Jou'ongu Madutu, ananga gena-ge sanga manga 'ahu ma paralu toma ngowa'a ga'a ya'u de-de'oso.#1Kor. 9:14; 1Tim. 5:18

11Na'o ngini ni ngadolo toma limau, bolo toma gamu, ni disa matengo ga'a nyengara 'o dawongo ngini. Tegoro ra unanga singadolo ngini ni dowanga ninga ḏo-ḏagi. 12Wakutu ngini ni osama toma wala, ni kanau: ‘Na'o nga'unu Ma Jou'ongu Madutu 'o sibarakati ngini.’ 13Na'o ngowa'a toma wala gena-ge 'aḏi dawongo ngini, tantu ḏua Ma Jou'ongu Madutu 'o sibarakati ananga. Mada'a na'o ananga 'aḏi dawongo ngini ua, tantu ḏua Ma Jou'ongu Madutu 'o sibarakati ananga ua. 14Na'o ngitu re ngale toma wala bolo ngowa-ngowa'a toma limau, ananga 'aḏi dawongo ngini ua, bolo ngowa'a 'aḏi oḏu'u 'isene ngini, sisoi'i tala ngi'i gena-ge re ni sesara ninga rou ma korou'u.#Som. 13:51 15Ni ngaku mode-mode'e 'Ari demo-demo nena-ne: Toma Kiamata ma Wangere, ngowa-ngowa'a toma limau gena-ge, ḏuanga i'a 'aḏi sanga hukumu lebe tubuso reo ngowa-ngowa'a toma limau Sodom re Gomora 'ua re 'au wali!”#Luk. 10:4-12#Do. 19:24-28; Mat. 11:24

Sanga sikisa toma biono i'a

(Mrk. 13:9-13; Luk. 21:12-17)

16“Ni 'isene la-la: Ngoi nena-ne to 'utusu ngini sa'olo doba toma serigala ma sigolona. Ngini balasu ni pahe sa'olo cuku'u re ninga 'akala re sinyingara 'i boloto sa'olo namo dara.#Luk. 10:3

17Ni ma'istiari ino, sababu ngowa'a ḏuanga i'a 'aḏi cako'o ngini, re 'aḏi sitalaḏi toma mahkamah-mahkamah. Ngini ḏuanga i'a ni sanga ca'olo toma wala-wala puji. 18Ngowa'a ḏuanga i'a 'aḏi gasa ngini sitalaḏi toma ngowa'a la-lamo'o re 'olana-'olana, sababu ngini Ngoi 'ari me-mete'e. Toma 'orasa gena-ge, ngini ni sanga donga rimoi di'a ni pula'a sakisi mangale Ngoi ra ananga gena-ge re ngowa'a Yahudi ua ḏi'i. 19Mada'a wakutu ngowa'a 'aḏi gasa ngini sitalaḏi toma juruhakimi, ni mojongo awa mangale 'oru ga'a balasu ngini ni siajele, bolo 'oru ga'a balasu ngini sangoro. Sababu toma 'orasa gena-ge, Ma Ngagara 'Ofi-'Ofi ḏuanga i'a 'i pula'a demo ra ngini. 20Dadi ngini ninga demo-demo ma 'asala ra Ma Jou'ongu Madutu ga'a 'O tegoro toma soroga. Unanga ḏuanga i'a 'O pake Ma Ngagara 'Ofi-'Ofi, la ngini ni waro 'oru ga'a balasu ni siajele.#Mrk. 13:9-11; Luk. 12:11-12, 21:12-15

21Toma 'orasa gena-ge ḏi'i, ngowa'a matengo ḏuanga i'a 'o sipula'a 'ai ioro bolo nongoḏu ga'a 'o ngaku Ngoi, di'a ngowa'a 'u sisengene. So'o gena-ge ḏi'i ḇaḇa ḏuanga i'a 'o sipula'a 'ai ngowa'a ga'a 'o ngaku Ngoi di'a ngowa'a 'u sisengene. Manga ngowa-ngowa'a masiretene ḏuanga i'a 'aḏi malawana tamanga ḇaḇa re ngina ga'a 'aḏi ngaku Ngoi re 'aḏi sipula'a ananga gena-ge di'a ngowa'a ya'u sisengene.#Mrk. 13:12; Luk. 21:16 22Ngowa'a mo-moini ḏuanga i'a 'aḏi emono ngini, sababu ngini Ngoi 'ari me-mete'e. Mada'a ngowa'a ga'a 'aḏi cako'o namo-namoto tamanga ngo-ngaku ra Ngoi singadolo ma ḏo-ḏogumu, ḏuanga i'a 'aḏi sanga salamata.#Mat. 24:9, 13; Mrk. 13:13; Luk. 21:17 23Na'o ngini ni sanga sikisa toma limau rimoi, ni wiḏi toma limau rimoi ḏi'i. Ni ngaku mode-mode'e 'Ari demo-demo nena-ne: Limau-limau Israel ngini na tuḏu mo-moini nyangu, Ngoi, Manusia ma Ngowa'a Nau'u ḏuanga i'a reto sapolo.

24Murid matengo ua lebe pahe i'a reo 'ai guru, re 'o budaka lebe la-lamo'o ua i'a reo 'ai tuanga.#Luk. 6:40; Yoh. 13:16, 15:20 25Lai rousu ḏua na'o murid 'o dadi sa'olo 'ai guru, re budaka 'o dadi sa'olo 'ai tuanga. Na'o Ngoi ma tero sa'olo sae'e toma ngale ma dara silomanga Beelzebul,#10:25: Beelzebul: enanga Roh ma Jira ma 'Olana bolo 'Iblisi. ma la-lamo'o i'a ḏi'i ngini toma wala ma dara, silomanga lebe cira i'a ḏi'i!”#Mat. 9:34, 12:24; Mrk. 3:22; Luk. 11:15

Pa'i mojongo Ma Jou'ongu Madutu ḇato

(Luk. 12:2-7)

26“Dadi mojongo awa manusia. 'Oru ḇato ga'a 'i gogono nange-ne, ḏuanga i'a 'i supu, re 'oru ḇato ga'a 'i rahasia nange-ne, ḏuanga i'a 'i waiti.#Mrk. 4:22; Luk. 8:17 27'Oru ga'a Ngoi to kanau ra ngini toma hafu-hafu ngini balasu na dadunu kanau toma tarangi. Re 'oru ga'a to jujuḏu taninga ngau'u, ngini balasu ni siajele toma mandan. 28Awa ni mojongo manusia. Sababu ananga pa'i 'aḏi sisengene ninga lese, mada'a manga kuasa 'i cua di'a sihukumu ngini toma naraka. Momongolo ua Ma Jou'ongu Madutu, Unanga rai kuasa, 'O sisengene ninga lese re 'O sihukumu ngini toma naraka. Sababu gena-ge, mojongo pa'i Ma Jou'ongu Madutu ḇato. 29Pipisi senga moi, nyengara sitibo namo cuḇili romoḏiḏi. Kalaha so'o gena na'o Ḇaḇa 'ai mau ua, rimoi mai ua 'i eta'a toma tana'a. 30Ninga utu taninga sae'e mai Ma Jou'ongu Madutu 'a waro ma repe. 31Sababu gena-ge ni mojongo awa! Ngini ninga ijana lebe lamo'o i'a reo namo cuḇili ma repe ra Ma Jou'ongu Madutu 'ai momina!”

Mangaku mete'e Yesus toma mandan

(Luk. 12:8-9)

32“ 'A guna ḇato 'o mangaku toma mandan mangale unanga 'Ari me-mete'e, Ngoi ga'a toma soroga Tari Ḇaḇa 'ai biono Ngoi nena-ne ḏi'i to mangaku unanga 'Ari me-mete'e. 33Mada'a 'a guna ḇato 'o masoloto Ngoi toma mandan sababu 'o siajele mangale unanga 'Ari me-mete'e ua, Ngoi ga'a toma soroga Tari Ḇaḇa 'ai biono, Ngoi nena-ne ḏi'i to soloto unanga, To siajele unanga nena-ne 'Ari me-mete'e ua!”#2Tim. 2:12

Yesus 'o gasa dame ua, mada'a parangi

(Luk. 12:51-53, 14:26-27, 17:33)

34“Awa ngini ni ta'ajiri Ngoi to sapolo toma dungia di'a to gasa dame. Ngoi to gasa dame ua, mada'a parangi. 35Sababu Ngoi 'ari ta-sapolo, ngowa'a nau'u 'o malawana 'ai ḇaḇa, ngowa were'a mo malawana 'ami ngina, dunungu tagi-tagi ino mo malawana 'ami dunungu wala. 36Dadi ma'u saturu, ananga gena-ge 'aḏi 'ahu toma wala ḏu moi.#Mi. 7:6

37'A guna ḇato 'o lebe dadalara 'ai ḇaḇa bolo 'ai ngina reo Ngoi, unanga gena-ge 'o patasa ua 'o dadi Ngoi 'ari me-mete'e. So'o gena ḏi'i, ngowa'a ga'a lebe dadalara manga ngowa'a nau'u bolo ngowa'a were'a reo Ngoi, ananga gena-ge 'aḏi patasa ua 'aḏi dadi Ngoi 'ari me-mete'e.#Luk. 14:26 38'A guna ḇato 'o oḏu'u doiti 'ai salib re 'o mete'e Ngoi, unanga 'o patasa ua 'o dadi Ngoi 'ari me-mete'e sababu unanga 'o oḏu'u sanga susa re sangisara.#Mat. 16:24; Mrk. 8:34; Luk. 9:23 39'A guna ḇato 'o kadiarata pa'i 'ai 'ahu toma dungia nena-ne ḇato, unanga gena-ge 'o sanga ua 'ahu kasingado-ngadolo i'a. Mada'a 'a guna ḇato 'o ḏu-ḏuanga ḏua di'a 'o sengene sababu 'o mete'e Ngoi; unanga gena-ge ḏuanga i'a 'o sanga 'ahu kasingado-ngadolo i'a.”#Mat. 16:25; Mrk. 8:35; Luk. 9:24, 17:33; Yoh. 12:25

Ga'a lai rousu, sanga ngogele

(Mrk. 9:41)

40“ 'A guna ḇato 'o dawongo ngini, 'o dawongo Ngoi ḏi'i. Re 'a guna ḇato 'o dawongo Ngoi, 'o dawongo Unanga ga'a Ro 'utusu Ngoi.#Mrk. 9:37; Luk. 9:48, 10:16; Yoh. 13:20 41'A guna ḇato 'o dawongo nabi sababu unanga nabi, ḏuanga i'a 'o sanga ngogele ma tero sa'olo nabi 'ai ngogele. Re 'a guna ḇato 'o dawongo ngowa'a loasa re banari sababu unanga 'o loasa re banari, ḏuanga i'a 'o sanga ngogele ma tero sa'olo ngowa'a loasa re banari. 42'A guna ḇato pula'a ḇanyo malata toma ngowa'a mapake ua matengo sababu unanga Ngoi 'ari me-mete'e, ni ngaku mode-mode'e 'Ari demo-demo nena-ne: tantu ḏua unanga gena-ge ḏuanga i'a 'o sanga 'ai ngogele!”

Tällä hetkellä valittuna:

Matias 10: SNT

Korostus

Jaa

Kopioi