MATIUS 4
4
Bii Kapar Ipit, Yesus aempore atakam
(Mrk. 1:12-13; Luk. 4:1-13)
1Allah Jip arawa, Yesus, tame apok asan ajanetomasen. Are Bii Kapar Ipit Armat Ipit baempor era asan ajanetomasen. 2Ise 40, Yesus amos ambasemaaririn. Ararawa, amosto aememen. 3Era baempor ipitam, Yesus ajinaomen. “Wore Allah Andep apaye, ara aemansa eka, amos bajaorames, atakam, asakamtamey.” Emes atakam aesimen. 4Yesus arawa, “Alkitabam, ‘Asamot owe jatiaptam baemem, are amos taka banda apok. Are Allah atakam ji takes baekoromtas.’ ” Emes atakam akorem. 5Me Bii Kapar Ipit arawa, Armat Ipit, Akot kota aesomasen. Are Armat Ipit Allah Tame oupnak wone beak atemetetaapomen. 6Me Bii Kapar Ipit arawa, “Wore Allah Andep apaye, Wore bap ajondaey. Emesare, Alkitabam:
‘Allah, amalaikat owe, banamek wora bataiomem, atakam asakamtamtem. Era malaikat owerawa, ban wora atoomemtemanis. Wobai, eka bapakam-ombar.’
Alkitab emes atakam akorem.” Bii Kapar Ipit emes atakam aesimen. 7Yesus arawa, “Alkitabam, ‘Tuhan, woAllah. Wonom Armat Ipit baempor bas,’ emes atakam akorem.” Yesus emes atakam aesimen.
8Me Bii Kapar Ipitam Armat Ipit oupnak fami taka atoomtemeten. Are era tapirmiin takes, Armat Ipit ameteporomtamen. Are era tapirmi takes aakotnak pak, Armat Ipit aporomtamen. 9Are atakam Yesus aokoromen. “Wore debipu bi fop andaejiaptem, wanam dera asitimtanim ere, dere era pak takes wora atetamtemin.” Emes atakam aesimen. 10Yesus arawa, atakam Bii Kapar Ipit aokoromen. “Bii Kapar Ipit! Wonom te! Baesosey! Alkitabam, ‘Tuhan, woAllah. Wonom Armat Ipit tere baeomey. Karai A taka eetamey.’ Emes atakam akorem.” Yesus emes atakam aesimen.
11Emesare, Bii Kapar Ipit, Yesus beken ajiosen. Malaikat owerawa, andaesen. Are pak Yesus afaafetamesen.
Yesus, Galilea tapirmi aesose atakam
(Mrk. 1:14-15; Luk. 4:14-15)
12Emesare. Yesus, owe Yohanes buji tame bomon ajiitaapomes, atakam jane ajien. Ararawa, Galilea tapirmi aesosen. 13Are kota Nasaret baemapaar apoken. Emesare, Are jupima kota juas Kapernaum aemapen. Ere Sebulon anama Naftali tapirmin. 14Ere Allah atakam bakoretam ipit juas Yesaya aesimtame atakam jipun.
15“Sebulon tapirmiam, Naftali tapirmiam, jupima setep. Ere Yordan ju poman are. Ere Galilea tapirmi.
Emesare, Galilea tapirmi era Yahudi apok owe atapirmi.
16Era jiiti bomon aemapes owe. Sare daytinak apores.
Era owe dambir tapirmi aemapes. Ere jiiti asan. Me, era sare owepu asaramtopome.”
Yesaya emes atakam akoren. 17Era bare ajiire, Yesus atakam akoretamaarir: “Allah aowe baomep bare ere, setepnak asisimmara. Emesare tare tadosa takes bamakemteteray. Wanam Allah atakam ji aeay.” Emes atakam akoretamaarir.
Yesus jimi bapie owe eak taka apok ajate atakam
(Mrk. 1:16-20; Luk. 5:1-11)
18Emesare. Yesus fo daytu juas Galilea jupima ajaren. Are jipit amnuk aporen. Ere arepotamen. Me wan ipit juas Simon. (Armat ipit wan juas Petrus.) Areot ere, juas Andreas. Are jimi bapie tastu jipit amnuken. Erarawa are jimi apiemisen. 19Yesusam atakam era owe akoromen. “De! Dera jamkaianimi! Dere, tare, asamot owe dera bajamkai, enamo tamen bapietaa, aememtamtemin.” Emes atakam aesimen. 20Armat ipit amnukam ajimi beken ametejiemisen. Are Yesus ajamkaiemisen.
21Yesusam aojaremen. Are wan ipit amnuk aporen. Anom arepotamen. Ere Yakobusam, areot Yohanesam, are. Ere Sebedeus arereisen. Are, aritipit Sebedeusam, ajimi jafa bakekem, ti bomon aemapesen. Yesusam era ipit amnuk ajaten. 22Era ipit amnuk arawa, atiam, aritipitam, beken ametejiosemisen. Are Yesus ajamkaiemisen.
Yesus akoretame. Anom damo pota owe ajaoromtaae atakam
(Luk. 6:17-19)
23Emesare. Armat Ipit Galilea tapirmi samaniin samaniin ajatejaremen. Are Yahudi Owe samayen tame tanane bomon, atakam aememtama ajaien. Are, Allah aobaomep owe baemem Akot Atakam, akoretama ajaien. Are damo owe era damo pota kupisam, kumiti owe damo kupisam, ajaoromtaera ajaien. 24Armat Ipit andi Siria tapirmi takes afufuosen. Oweam, era asan pota owe takes, Armat Ipitpu atoomtinesen. Ere damo kupis oweam, damoiin asesa oweam, bii ajak bomon aemapteteres oweam, apiemas oweam, kam oweam, emes owee aren. Armat Ipit arawa, era owe ajaoromtaera ajaien. 25Owe tananeam Armat Ipit fe asaramesen. Galilea tapirmiam, kota Dekapolisam, kota Yerusalemam, Yudea tapirmiam, Yordan poman tapirmiam, emes owe ajinaoesen.
Tällä hetkellä valittuna:
MATIUS 4: LAIASC
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
