Matta 3

Nnabi Yaḥya isewjaḏ abriḏ i Lmasiḥ

1Ḏi ȓweqṯ nni imeḍhar-d Yaḥya, itṭehhar i yiwḏan s waman itbeccar-iṯen ḏi ȓexȓa n Yahuḏiya. 2Iqqar-asen: "Tubem, aqa yuḏes-d ȓmulk n ujenna." 3X Yaḥya ig inna nnabi umi qqaren Icaƹya ḏeg yijjen n zman:

<Ṯmijja tȓaɣa ḏi ȓexȓa ṯeqqar:

Swejḏeṯ abriḏ i Siḏi Arebbi,

ggem ibriḏen nnes nican.>#3.3 Xzar Icaƹya (Esaïe) 40:3.

4Yaḥya arruḍ nnes xeḏmen-ṯ s cƹar n uȓɣem, x nneṣṣ nnes ijjen n uḥezzam n yiȓem. Itett ṯmurɣi ḏ ṯamment ṯaḥurrect. 5Tasen-d ɣares imezḏaɣ n ṯendint n Lquds ḏ yinni n Yahuḏiya amen-ṯekmaȓ ḏ marra yinni iy d innḍen i yiɣzar n Lʼurdun. 6Teƹtarafen s ȓmuƹṣiyaṯ nsen, Yaḥya itṭehhar-iṯen s waman ḏeg yiɣzar n Lʼurdun.

7Walakin wami iẓra Yaḥya belli aṭṭas n ȓfuqaha ḏ ifarrisiyen ḏ iṣadduqiyen tasen-d ɣares ḥima aṯen iṭehhar s waman inna-asen: "Ya ṯarwa n ifiɣeran, wi ḏawem iƹeȓmen aḏ tarewȓem zi lɣaḍab n Siḏi Arebbi iy d ɣa yasen? 8Meȓa ṯtubem ḏ ṣṣaḥ, ggeṯ ȓexḏayem ṯiṣebḥanin. 9Maci aḏ tinim ḏi nnefs nwem qa neccin ḏ ṯarwa n Brahim u ṣafi. Meȓa ixes Arebbi ṯarwa n Brahim, ataf aḏ iysi izra-ya aṯen yarr ḏ ṯarwa n Brahim! 10Aqa caqur iwjeḏ ḥima aḏ iqess iẓewran n ȓcejjur. Mkuȓ ṯacejjarṯ iy war itirwen ca min iǧan ḏ aṣebḥan ataf aḏ twaqess aḏ tmenḍar ḏi ṯmessi. 11Nec tṭehhareɣ-kenniw s waman bac aḏ tubem, walakin wenni iy d ɣa yasen menbaƹd i nec, netta ijheḏ xafi. War sḏihiǧeɣ ca aḏas ysiɣ uȓa ḏ ṯisiȓa nnes. Netta akenniw iṭehhar s Arruḥ iqeddsen ḏ yiȓesawen n ṯmessi.#3.11 S ṯyunaniṯ n lʼaṣel iqqar "s Arruḥ iqeddsen ḏ ṯmessi." Imken issawaȓ ḏanita x min ɣa iweqƹen ḏi Ȓexḏayem n Arrusul 2:3. 12Ɣares ṯazzarṯ ḏeg ufus ḥima aḏ izuzzar ṯaffa nnes qaƹ, aḏ ismun ṯiḥebba n yirḏan aṯent igg ḏi ṯesrafṯ. Min war ineffƹen ca#3.12 "Min war ineffƹen," iƹni ḏ acarfa niɣ aḵarfa. aṯ issecmeḍ ḏi ṯmessi iy war ixessin ƹemmarṣ."

Nnabi Yaḥya itṭehhar i Siḏiṯneɣ Ƹisa s waman

13Ssenni yusa-d Ƹisa zi ṯmurṯ n Ljalil ɣar yiɣzar n Lʼurdun bac aṯ iṭehhar Yaḥya s waman. 14Walakin Yaḥya yugi inna-as: "Nec itxeṣṣa cek iy ḏayi ɣa iṭehharen, u cek ṯusiḏ-d ɣari?"

15Indeq-d Ƹisa inna-as: "Ɣir qbeȓ ȓexxu, ḏ manaya ig iǧan nican ḥima aḏ ikemmeȓ marra min ixes Siḏi Arebbi." Uca iqbeȓ Yaḥya.

16Wami itwaṭehhar Ƹisa iffeɣ-d ȓexddenni zeg waman nni. Aqa inurzem-as-d ujenna iẓra Arruḥ n Arebbi ihewwa-d igga am yijjen n ṯeḏbirṯ ṯmars-d xas. 17Ssenni iȓaɣa-d ijjen n ṣṣut zeg ujenna inna-d: "Wa ḏ Memmi iƹizzen, nec farrḥeɣ zzayes."

Tällä hetkellä valittuna:

Matta 3: RIF

Korostus

Jaa

Kopioi