Akisy. 9
9
Tocamun Akuj ka Noa
1Kiterereŋ Akuj Noa ka ŋidwe keŋ ŋulusapa. Tolimok ikes tema, “Touryata, topita kilelebunos nakwap. 2Ikikerete iyes ŋityaŋ ŋulu ka akwap daadaŋ, ŋikyeny ŋulu eporete daadaŋ ka ibore daadaŋ ŋini elyat alokwap ta ŋikolya daadaŋ. Ainak ayoŋ ikes nakan kus. 3Akainak ayoŋ iyes ibore daadaŋ, ŋini eyari tolosi, toruwor akimuj kus, lopite ŋolopei abunio okoinak iyes ŋikito ka ŋinya, akainak tokona ayoŋ iyes ibore daadaŋ. 4Nai nyinyama akiriŋ eyakasi ŋaokot, nyiira ŋaokot tari anakiriŋ. 5Nai kire, ŋini ebukori ŋaokot kon, eŋisi ayoŋ ŋuna kebukorya. Eŋisi ayoŋ ŋun ŋolotyaŋ ka ŋinituŋanan. Eŋisi ayoŋ ituŋanan kirwor ŋuna kebukorya iŋes ŋaokot a ŋinice.
6Iŋes ŋini ebukori ŋaokot a ituŋanan,
ituŋanan pei ebukori ŋaokot keŋ daŋ,
anerae abu Akuj tosub ituŋanan eyakar ŋasima keŋ.
7Nai iyes, touryata, topita kielakinos nakwap, topitut a nen.”
8Tolimok nai Akuj Noa kaapei ka ŋidwe keŋ ŋulusapa tema, 9“Kiirasi, ani eruwor ayoŋ, ewuakini acamunet ka iyes ka ŋikusipapae 10ta ibore ŋini eyari daadaŋ ŋini irukito ka iyes: Ŋikyeny, ŋibaren ka ŋityaŋ daadaŋ ŋulu anakwap, alokimar kec a daadaŋ a ŋulu apotu tolomut anataker. 11Ewuakini acamunet kaŋ ka iyes, ŋina nyemunyareta nabo ŋakipi ŋisubuna ŋulu eyarete ka nyemunaarete nabo ŋakipi akwap.” 12Tema Akuj, “Erae lo emacar ŋolo ka acamunet a ŋina alosi ayoŋ akiwuakin kidiŋ ayoŋ ka iyes ka ibore daadaŋ ŋini eyari ŋini iya ka iyes nakwap, ido eruwor acamunet na ŋina a ŋanyameta a daadaŋ a ŋuna eponito aloŋaren. 13Ewuak ayoŋ alokakinet lodouwon, eruwor iŋes emacar ŋolo ka acamunet kaŋ ka daadaŋ ŋulu eya nakwap. 14Apaki daadaŋ ŋina ewuakinia ayoŋ ŋidouwon kidiama, ido kiŋolikis iyes alokakinet alodowon, 15atamuni ayoŋ acamunet kaŋ ka iyes ta ibore daadaŋ ŋini eyari anakwap. Nyeruwor nabo ŋakipi a ŋidouwon a ŋul ŋuna emunyarete ibore daadaŋ ŋini eyari anakwap. 16Ani emini alokakinet lodouwon, eŋolikini ayoŋ iŋes, ido otamu acamunet ŋina a ŋikaru ka ŋikaru ŋina ikiyakar ayoŋ ka ibore daadaŋ ŋini eyari, ŋini eyai nakwap.” 17Tolimok Akuj Noa tema, “Erae ŋol emacar ŋolo ka acamunet a ŋina ewuak ayoŋ acamunor ka ibore daadaŋ ŋini eyari ŋini eyai nakwap.”
Noa ka ŋidwe keŋ ŋulusapa
18Erae lu ŋidwe a Noa ŋulu alomunete anataker: Sem, Am ka Yapes. Am iŋes abu touru Kanaan. 19Arae ŋuluuni ŋul ŋidwe a Noa, ido ŋuluuni ŋul ikes erae atapapaa a ŋituŋa a daadaŋ anakwap.
20Noa ŋolo sek arae eketan, iŋes abu kisyaki akidup ŋikito ŋulu ke epiini. 21Tocu epiini tomat, tomerakin, toper aloeema keŋ pa imukoro. 22Ani ebuni Am papa a Kanaan, kiŋolik papa keŋ eleri, tosodi toloma kiŋa, tolimok ŋikaitotoi keŋ ŋuluarei. 23Tolemut Sem ka Yapes elou kimukokis kidiama ŋiseketa kec, toloto neni a papa kec ikusikusete kimukosi iŋes iŋoliyarito nariet; nyiŋolikina ikes epite ŋolo aleryo papa kec. 24Ani ekyenyuni Noa alomeret keŋ, ido toyenu ŋuna kebu lokoku keŋ ŋolo cici kitiya, 25tolimu tema;
“Ilamam Kanaan,
eruwor iŋes epito ŋolocaryoit aneni a ŋipi a ŋikaitotoi keŋ.”
26Tema nabo,
“Erereŋ Ekapolon Akuj ŋina a Sem;
emaikina Kanaan toruwor epito a Sem.
27Elipi ayoŋ Akuj kipit Yapes,
Emaikina iŋes kiboi aloeemae a ŋulu a Sem,
emaikina Kanaan toruwor epito keŋ.”
28Abu Noa ekaku ka akalele kiboi ŋikaru ŋamiae ŋauni ka ŋatomonikan. 29Arae ŋikaru a Noa daadaŋ ŋamiae ŋakanikaomwon ka ŋatomonikan. Ekaku a ŋikaru a ŋul, totwan.
Tällä hetkellä valittuna:
Akisy. 9: NIB2008
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngakarimojong Interconfessional Bible © Bible Society of Uganda, 2008.