OMOCHANKO 6
6
Obobe bwa mwanyabanto
1Mwanyabanto bakagenderera komentekana ase ense, na abana abaiseke bakaiborwa asebare. 2Abamura ba Nyasae bakarora abaiseke ba mwanyabanto ng’a nigo baare nebieni ebiya, bakenyuomeria ase ogwechorera onde bwensi baganetie. 3Erio Omonene agateba, “Omoika one tokonyara komenya ime ase mwanyabanto kare na kare, ekiagera ere nomobere ogokwa. Ase ayio emiaka yaye nigo erabe rigana erimo na emerongo ebere yoka.” 4Ase engaki eyio, na kogenderera, amamonto namenyete ase ense, ekero abana abamura ba Nyasae baare konyuoma abaiseke ba mwanyabanto na konyora abana. Abwo nabwo barenge abanto chituoni, baare gotogigwa agwo kare.
5Omonene akarora ng’a obobe bwa mwanyabanto nobonge ase ense, na kera okoroberia na okorengereria gwe chinkoro chiabo nokobe botambe. 6Ase ayio Omonene ageitia, ekiagera atongete mwanyabanto ase ense, agaichana ase omoyo oye. 7Erio Omonene agateba, “Mwanyabanto abwo natongete nimbarusie ase ense, gose tari mwanyabanto boka, korende ne ching’iti, na echi kwagura, ne chinyoni. Neitirie ekiagera natongete barabwo na chirochio.” 8Korende Nuhu akanyora ogwancherwa ase obosio bw’Omonene.
Nuhu
9Oyo noro omoroberio bw’ororeria rwa Nuhu. Ere nigo arenge omonto omoronge na omoikeranu ase ekiaare kiaye; ere akaba ogotaara amo na Nyasae. 10Akaibora abana abamura batato, nabwo Shemu, na Hamu, na Yafeti.
11Ense ekaba yasarekire ase obosio bwa Nyasae, egaichorwa nobotindi na oboregani. 12Nyasae akarora ng’a ense yasarekire, ekiagera kera omonto obwatirie chinchera chi’obosareku ase ense.
Nuhu okoagacha obwato
13Erio Nyasae agatebia Nuhu, “Narorire ng’a ninkoore okobao kwa mwanyabanto bonsi, ekiagera baichoirie ense obotindi na oboregani, nimbasirie amo nense. 14Ekorere obwato obonene bw’emete y’ebirobo; obonachane ime ebinyomba, na oboome eramu ime na isiko. 15Obwato obwo nigo orabokore iga: Obotambe bwaye nigo borabe obw’ebirengo bi’amaboko amagana atato, na obogare bwaye amaboko emerongo etano, na obotambe bwaye gochia igoro amaboko emerongo etato. 16Inse y’ekerama otige ribaga ri’okorenta oborabu ase obwato obwo, orikore obotambe gochia igoro obw’ekerengo gi’okoboko okomo, obeke egesieri rikere ensemo. Onachane obwato obwo amarongo atato. 17Naki rora, nindete etoigo igoro y’ense, ninsirie mwanyabanto na binde bionsi bire moyo; kera egento kere ase ense goika gekwe. 18Korende ninkore okobwatana kw’ogotianania naye; aye nosoe ase obwato amo nabana bao abamura, na mokao, na baka bamura bao. 19Na orente ase obwato ime ching’iti, na chinde chionsi chire moyo echia kera egesaku, ibere ibere, chinsacha ne chinkungu, chibe moyo amo naye. 20Ase kera egesaku gie chinyoni, ne ching’iti chionsi, na echikwagura igoro ase ense, ochirente ibere ibere amo naye, erinde chibe moyo. 21Oire endagera egochia koriegwa, oyegache. Eyio erabe endagera yaino na eya chirochio.” 22Naboigo Nuhu akorete; agakora ayio onsi Nyasae amochigete.
Tällä hetkellä valittuna:
OMOCHANKO 6: EKEGUSIIBBLE
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
OLD EKEGUSII BIBLE PROTESTANT EDITION
©Bible Society of Kenya, 2020