Mphattuwelo 12
12
Apwiya Nluku ahomwiirela Aparamu
1Nkwaha mmoca Mwanene Nluku ahomwiirela Aparamu: Ukhume mwiilaponi mwaa, iriyari ya alokwaa ni wapuwani wa athumwana, ni urwee ilapo inhalaka wuthoonyera. 2Kinawuvaha atthu enci ookhuma mwirutthuni mwa mmo ni kinawuvaha iparakha, ni kinawunnuwiha ncina naa nno ni we unhala ukhala iparakha. 3Kinawaareriha anhala wureriha ayo ni waatapaniha anhala wulaphakaca ayo. Vano nlattu wo we, maloko othene o mwiilaponi anaahala urerihiya.
4Vaavale Aparamu ahokhuma toko Mwanene Nluku camwiirenlyawe, ni warwawe va ahontthukana ikwaha Loti. Ukati wakhumawe uHarani, Aparamu ahaana myakha sapini na mithanu (75). 5Wakhumawe va ahonkusa Sarayi mwaarawe, Loti mwana amunnawe, mihakhu cawe cothene caphwanyilyawe ni ipottha cawe cathumilyawe uHarani. Yahokhumaca arwaaka ilapo yo'Kanaa ni yahophiyaca salama. 6Aparamu ahottupulaniha ilapo eyo mpaka uphiya nipuro no mooko a Moree no'Sikeni. Yooyo ukati uyo annakanani phakhala ilapo eyo.
7Mwanene Nluku ahonkhumelela Aparamu phimwiirelaka: Ucuulu aa uyo kinaahala uvaha ila itthaya ela. Vano ahoteka ikhilompi yoonlapelela Mwanene Nluku ankhumelenle. 8Vaavale aheetta arwaaka myaako ciri ncoko woohitto wo'Peteli. Wonwo ahonkhurutula heema awe, akakhelaka uPeteli moono unkela ncuwa ni Ayi unkhuma ncuwa. Vano ahontekela ikhilompi Mwanene Nluku ni ahonlapela Mwanene Nluku. 9Wahoolo Aparamu ahokhuma arwaaka mphantte wo'Nekepi.
Aparamu ni Sarayi wIciipitu
10Yooyo ukati uyo ilapo iyo yahovola itala yinci. Vano Aparamu ahokhuruwela ilapo yo wIciipitu wiira akhale ukati vakani, kontha itala eyo yaanatepa mwiilaponi mmo. 11Ukati wattamenryawe wIciipitu, ahomwiirela Sarayi mwaarawe: Yoowe! Mi kihocuwela wiira we nthiyana oorera venci. 12Phimaana annaciipitu ayo yakela yawoonaka, ankocuwela wiira: Ala amwaarawe! Vano ankokiiva ni wuhiya we nkumi. 13Contte weere mwanrokoraka wiira yakipanke nnema mwa nlattu wo we ni commo khanhala ukiivaca. 14Khweli Aparamu uphiya wawe wIciipitu, annaciipitu yahoonaca wiira amwaarawe ayo ari oorera venci. 15Asuulupale a Farawoo yahomoonaca Sarayi n'unttottopela venci, mpaka Sarayi yahonkusaca uhano wa Farawoo. 16Vano mwa nlattu wa Sarayi, Aparamu ahopankiya nnema. Ule ahovahiya ikhontwaa, imope, apuuru, ipottha cilopwana ni cithiyana, apuuru onthiyana ni inkamira.
17Nanso Mwanene Nluku ahonrakaliha Farawoo na akhulupale awe othene ni iretta cowoopiha mwa nlattu wa Sarayi, amwaara a Aparamu. 18Phimaana Farawoo ahomwiihana Aparamu, ni ahomwiirela: Isiyani yeeyo ikipankilyaa iyo? Wahakihimyacenryaa wiira ala mi amwaaraka? 19Weerelani wiira ula mwanrokoraka? Hapo mi kahonthela! Paahi, yakhala amwaaraa wakuseke ni urweeke. 20Farawoo ahomwiirela Aparamu na amwaarawe wiira akhume mwIciipitu mmo ni ahaaruma anatoropa awe wiira anveleele mpaka umpikani ni citthu cothene caarinawe.
Tällä hetkellä valittuna:
Mphattuwelo 12: NNI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc. All rights reserved.