Mbete Matiye 8
8
1Zezu ur, ke ɗer ké tul kasawaw. Daɓa nzukri ɓa ŋgi̧-u dih fal ye. 2Í ko. Nzuk ndɔɓe a hani gi huk siɓa ké pol ye ɓahri : « Ŋgernzuk, ŋgerna woiri mah gah ndɔɓe bi-ay hi̧ mun bi teh#8.2 Sa̧w nzak gerek ɓahri : Mu yih le, mí nah sɔɓ ɓa ŋgerna woiri mah gah ndɔɓe bi-ay hi̧ mun bi teh rɔkɔ karaŋri ɓá lah goŋna nzuk ndɔɓe ra ɓa farna.. Le saŋna-si gel kani Ŋgerzah ɓay lu ké tul bi. »
3Zezu ndar ndɔk mí za nzuk ndɔɓe ra, ke ɓahri : « Mi yih. Ful-si gel kani Ŋgerzah ɓay dim ni ɓá ƴo ri. Mú teh wara. »
Sa gelaw mí mun ye teh peɗeɗe. 4Zezu el ɓah hi̧ ni ɓahri : « Ko-ko mú ɓah ɓayu hi̧ nzuk. Wara le mú si gel kani Ŋgerzah sɔk mun wo hi̧ nzuk fe puhna ɓá ko. Mú si ke fe puhna kandɔk ké Moyiz vbeh ɓil mbete bolkusol Ŋgerzah ɓay hi̧ kú te-teh ɓayu ɓahri, ndɔɓe wo ɔh ɓa ketina. »
5Zezu ba, el si Kapernayum. Kumandah mbew nzɔh nun ye. Ké ɓa mbay tul sozeri sɔɗ, sa̧w ye ɓa gun Izarayel ya. 6Ke ɓah hi̧ Zezu ɓahri : « Ŋgernzuk, gun bi mbew na sena. Mun ye hu yɔh. Sena-u ŋger mbamba. »
7Zezu ɓahri : « Mi si-u, mi gáh ni. »
8Mí kumandah yih nzak ye ɓahri : « Ŋgernzuk, mi mah ɓay í rih ɓil kerpuh bi-ay ya. Wara le í ɓah ɓay kaŋto kara mun gun bi ra ɓay gah-u. 9A bi ra mi ƴo lah nzak ŋgernzuk biri. Mi ɓa mbay tul sozeri pi. Gelke mi ɗi soze ɓahri, ké gi le, ke gi gaŋ ba. Mi ɓah hi̧ soze a ɓoru ɓahri, ké tɔr le, ke tɔr gaŋ ba. Mi ɓah hi̧ mgbal bi ɓahri, ké laɓ fe-ay le, ke laɓ fe-u laɓ gaŋ ba. »
10Zezu ɓá lah ɓay ké kumandah ɓah ra bale, na ni yer, mí ke el ɓah hi̧ nzukri ké dih fal ye ɓahri : « Ɓay ké kumandah ɓah-ay ɓa ketina. Mi ƴo ɓah hi̧ wuri, ké sakra wah gun Izarayelri mi ko nzuk mbew ké kan law ye sa tul bi mah ke nzukay ké sa̧w ye na ɓoɗay ya. 11Mi ƴo ɓah hi̧ wuri ɓahri se, daɓa nzuk a ɓoruri ké fál tí̧h seh ke fál ríŋ seh ɓay gi rih ɓil lák mbay a nzuk nunmbam. Ku káɓ nzak fe su̧na ziŋ Abaraham, Isak, Zakoɓ. 12Mí gun a puh lakna-uri ba, Mbay puh-u ɓay vbuk niri ku̧ kala ɓil tirima nduŋ. Gelaw ra ku ɓay vuh rew ke mbihnun woyri darara darara, ku sú̧ sel woyri ŋger ŋger. »
13Mí Zezu ɓah hi̧ kumandah ra ɓahri : « Mú si puh. Mun gahna gun wo ɓá laɓ kandɔk ké mu kan law wo ké tul bi kaŋ. »
Kandɔkaw mí mun gun ye ra gah ke sa̧wseh-u-aw.
14Zezu kal si kerpuh Piyer dale, ke ziŋ mahfay Piyer na ɓa sena. Mun ye zaŋ biɗ biɗ. 15Mí ke ndar ndɔk za mun mahfay Piyer ra, mí mun zaŋna ye voh, mí ke ur mgba niri gahru.
16Seh ƴo riŋna bale, nzukri fa̧h daɓa nzukri ké záh ƴo tul woyri gi keni ku̧ ta̧w Zezu. Zezu ba, ɓah ɓay mbew mí ni̧h keni záhri ké tul nzukri-aw. Nzuk senari ba, ke gah niri mbew mbew gbam. 17Fe laɓna-u hi̧ ɓay ké Ezay gun nzak pihna Ŋgerzah a lewsa̧ ɓah ra laɓ ƴo gelu. Ɓayu ɓahri, a ye ra ke fa̧h ɓeɓna wah kan tul ye, ke lu sena wah ku̧ kpah#8.17 Ɓayay na ɓil Mbete Esaïe 53.4..
18Zezu ko daɓa nzukri ké ɗoŋ ni, mí ke ɓah ɓay hi̧ nzuk-dih fal yeri ɓahri, kú tɔr si kala mahmbih fál sa̧. 19Bale nzuk-sɔk mbete bolkusol Ŋgerzah mbew gi ta̧w Zezu. Ke ɓahri : « Metere, mi díh fal wo ndeŋ ndeŋ. »
20Zezu ba, ɓahri : « Nzi̧wri ƴo ke lɔkɔ nam. Gundoyri ƴo ke vul nam. Mí gun nzuk pirmatulay ba, gel-eh tul kara ke ta keni ya. »
21Nzuk-dih fal Zezu a ɓoru ba, ɓahri : « Ŋgernzuk, mú poŋ mi mí el si puh. Seh hul bah bi le, mí gɔr hulu dara mí dih fal wo ɓáy. »
22Bale Zezu ɓah ɓayay hi̧ ni : « Mú dih fal bi-ay. Mú poŋ hulri ɓá gɔr hul mbaŋ woyri. »
23Bale Zezu rih kaɓ ɓil kumbon#8.23 Kumbonri ké seh-aw ra pehna-u ma tulndɔk 8, ahna-u ma tulndɔk 2 ke ndi̧ ke gaŋna-u ma tulndɔk 1 ke ndi̧. ɓay si kala mahmbih, nzuk-dih fal yeri kaɓ ziŋ ni. 24Ku ɗi-ɗih ke ɓel sew mahmbih ra dale, í ko, mahmbam to, kuna ku fa̧h mbih mbah ɓil kumbon. Zezu ba, toŋ na nam ɓil kumbon. 25Mí nzuk-dih fal yeri tom ni ɓahri : « Ŋgernzuk, nah ɓay hu wuri. Mú ya̧ na wo. »
26Mí Zezu ɓahri : « Uwa. Nzuk law hȩkmeri, law woiri kehr seɗe ɓáy le ? »
Wara mí ke ur, ke hah kuna ke mbih, mí kuna ke mbih tuk kelek hi̧ gel na ɗeŋ gaŋ ba. 27Nzuk-dih fal yeri ba, kaɓ yer na niri ɓa saŋ. Ku ɓahri : « Nzukay na ani mí mbih ke kuna kara lah nzak ye-ay le ? »
28Ku ka̧h kala mbih ké fál tusiɓa nzuk Gadarari bale, nzukri seɗe ké záhri ƴo tul woyri ti̧h ke gel-gɔr hulri gi nzɔh nun Zezu. Ku mgbɔr mbamba. Mahful kalna nzukri ta-a. 29Í ko. Ku vba̧ nzak ɓeleŋ ɓeleŋ ɓahri : « Gun Ŋgerzah, ɓay wo ɓa fe mí ziŋ na le ? Nam wah ka̧h ya ɓáy ba, mu gi ɓay laɓ na koseh mgbum ley ? »
30Ké ɓel woyri ɓa ɗih-u ndi̧ mí daɓa kɔsɔŋri ƴo ƴah ri lakna. 31Mí záhri ra vuh hi̧ ni ɓahri : « Mu ní̧h na le, mú pih na si rih tul kɔsɔŋri-aw. »
32Mí ke ɓahri : « Í ti̧h, í si rih tul kɔsɔŋri ra. » Mí ku ti̧h si rih tul kɔsɔŋri ra gaŋ ba. Í ko. Kɔsɔŋri riw kpa̧h ke ɗukna si ka̧h nzak hereŋ lih ku̧ mahmbih kirim kirim, mí mbih kal niri ndu̧y. 33Nzuk-kɔr kɔsɔŋri ra su ɗukna si ka̧h ɓil puh. Ku si ndazi ɓay feri riw ké kal hi̧ nzukri lah. Ku sɔk ɓay nzukri ké záhri ti̧h ke tul woyri ra. 34Í ko. Nzuk puhri gbam ti̧h yir mbu̧h ké ta̧w Zezu. Ku ko ni, mí ku laɓ kɔkrɔya hi̧ ni ɓay ké ti̧h ke tusiɓa woyri poŋ niri.
Tällä hetkellä valittuna:
Mbete Matiye 8: SIAFNK
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© Wycliffe Bible Translators, Inc. All rights reserved.
