Kananet 14
14
Angara Aburami Lot
1Okko e̱rki̱te̱ neci een Amraphel alaan ci Shinar, okko Ariochi een alaan ci Ellasar, okko Kedolaomori een alaan ci Elam, een Tidal alaan ci Goiim. 2I̱gga̱ngto̱zzi̱k alaata ne̱ko̱ Bera alaan ci Sodomi, okko Birsha een alaan ci Gomorrah, okko Shinab een alaan ci Admah, okko Shemeber een alaan ci Zeboiim, ki alaan ci Bela (een bo̱do̱k zara uggak Zoar). 3Iddongit zin alaata ne̱k e̱e̱ggi̱n tu̱r ko̱ do̱o̱k aciir cigge̱k tolole ci azi zar ne Siddim wa een zara i̱yo̱ko̱, Nyatapar ci a̱ddi̱ki̱re̱ Milo.#14:3 Nyatapar ci a̱ddi̱ki̱re̱ Milo: Anyak mile ci a̱ppwe̱ oroot maame cik iróng u̱lu̱gi̱ti̱ abak nginati. Azi bo̱do̱k zar u̱gge̱ ne, Nyatapar ci a̱ddi̱ki̱re̱ A̱da̱ha̱. 4Abal alaani ci een Kedolaomer nogo e̱rki̱to̱k omoto ki ram, ma̱i̱je̱ e̱rki̱te̱ ci een omoto ki i̱i̱yo̱ ko̱, utuburet nege nong oot zara.
5Ma̱i̱je̱ e̱rki̱te̱ wa een omoto ki we̱c, urumtte Kedolaomori ki alaat cik e̱e̱ggi̱n i̱i̱yo̱ ko̱ kar zin kommogit ol cik een Rephaites ngati een Ashteroth Karnaim, ommogit bo̱do̱k ol cik e̱e̱ggi̱n Zozites ngati een Ham, ki bo̱do̱k ol cik e̱e̱ggi̱n Emites ngati een Ashteroth Kiriyazaim. 6Ommogit ol cik een Horites abak biyene cik Seiri, ottok rok El Paran ojongzo ki balal. 7I̱mi̱rtte̱ zin nege oot ngati een En Mishpat (i̱yo̱ko̱ een zara Kadesh). A̱gga̱mtta̱ zin lo̱o̱c ci ol cik een Amalek do̱o̱k ki ol cik een Amorites bu̱k cik da̱ abak ngati een Hazazon Tamar.
8I̱gga̱ngto̱zzi̱k zin alaata ciko: alaan ci Sodomi ki alaan ci Gomorrah ki alaan ci Admah ki alaan ci Zeboiimi ki alaan ci Bela (een zara uggak Zoar) oot kar koorit illa tolole ci een Siddim, 9ki Kedolaomer alaan ci Elami, ki Tidal alaan ci Goiim, ki Amraphel alaan ci Shinar ki Arioch alaan ci Ellasari, alaat cik e̱e̱ggi̱n we̱c ko̱ cik ooro ki alaat tu̱r. 10I̱yo̱ko̱ ibbit da̱ tololi ci Siddimi lo̱o̱knya̱ ki gi̱i̱ ci o̱lle̱ amadmadi, kar baling i̱vi̱re̱t alaata cik Sodomi ki Gomorrah, u̱yu̱kte̱ zin ol uggak lo̱o̱knya̱i̱ ne̱ke̱ kar uggak ki̱vi̱re̱t koot zi̱i̱ri̱yo̱we̱. 11Aamtta zin alaata ne̱k e̱e̱ggi̱n we̱c ko̱ kaal cik Sodomi ki cik Gomorrah ki da̱i̱ne̱t cigge̱k do̱o̱k; kar zin koot. 12Odongit zin ki ngerrti gotoni Aburam wa een Lot ki kaal ciginnek do̱o̱k, eci abak enne ba̱li̱ye̱ o̱rge̱ ci Sodomi.
13Ma̱i̱je̱ e̱e̱ti̱ ci da̱ a̱vi̱r alaate ne̱k e̱e̱ggi̱n we̱c ke̱ i̱ki̱ya̱ u̱du̱wa̱k zoz neci Aburam wa een I̱bu̱ru̱#14:13 I̱bu̱ru̱: A̱kku̱ Aburahami boore ci I̱bu̱ru̱. Imma zara cik do̱le̱c cinne een a̱bu̱ azi zar ne, Israil. Ovvo dooli cik dooli cik Ya̱ko̱bo̱ awu ol azi ne, olli I̱bu̱ru̱ ki olli Israilo. I̱i̱te̱ne̱ ci Ye̱su̱ awu ol bu̱k azi ne, Ya̱u̱d. ko̱. Abak da̱ Aburami ngati ojono ki keen cik a̱ddi̱ki̱re̱ cik e̱e̱t ci een Mamre, e̱e̱t ci Amorites een gotoni Eshcol ki Aner, iddong nege do̱o̱k zoz ki Aburam. 14Baling izik Aburami ming a̱gga̱me̱ booriti cinne, uluta ol wak edemezit illa e̱e̱ggi̱n obet i̱i̱yo̱ ki omoto ki tu̱rge̱ (318) ol balik a̱rri̱ta̱i̱ ce̱e̱ze̱ cinne ke̱, kar zin kunu zo̱o̱ cik ol ne̱k a̱gga̱m boorit cinne ke̱ zee rok nginti een Dan. 15Ma̱i̱je̱ ba̱a̱li̱n neci, enger Aburami ol ciginnek kar koorit ol ne̱ke̱ bak ommog nogo kottoit rok orog ci een Hobah ci aave o̱to̱ne̱ ci i̱do̱we̱ ci Damascusi. 16Obodai zin enne kaal balik aama nege ke̱ do̱o̱k, kar kobodai boorit cinne Lot ki kaal ciginnek do̱o̱k, ki ngaai ki ol u̱gge̱ bu̱k.
17Baling oboda Aburami ngati ommoge Kedolaomer ki alaat balik iddong illa ki nonno ke̱ do̱o̱k, i̱ki̱ya̱ zin alaani ci Sodomi ki̱ki̱ya̱ kurumto ki nonno tolole ci een Shaveh (azi bo̱do̱k zar u̱gge̱ ne tolol ci Alaano).
18Anyahak zin Melchizedeki#14:18 Melchizedeki: Azi utuge ci I̱bu̱ru̱ keng cinne ne, alaan ci abunna. Ikeb zoz cinne bo̱do̱k,I̱bu̱ru̱ 5:6. alaani ci Salemi merte ki da̱i̱ne̱t. Een da̱ enne e̱e̱t ci wawaco Ta̱mu̱ta̱dde̱n wa A̱ddi̱ki̱re̱ Veelek, 19kar zin ku̱mu̱yu̱k Aburam kize ne,
“Anyik Ta̱mu̱ta̱dde̱n wa a̱ddi̱ki̱re̱ veelek ka̱mu̱yu̱k Aburam,
nonno ci adiman ta̱mu̱-keng ki lo̱o̱c.
20Kar anyik Ta̱mu̱ta̱dde̱n wa A̱ddi̱ki̱re̱ Veelek ka̱mu̱yu̱we̱,
nonno ci aanyik mo̱ddo̱ cigunnek kommogte.”
Anyik zin Aburami nonno kaal balik oora enne ke̱ u̱gge̱, adima co̱de̱ ewak een omoto ke̱, kar kaanyik alaan, guulnya veelek.
21Iizek zin alaani ci Sodomi Aburam ne, “Inya annit ol cik diirik kar i̱nna̱ bite kaal kizeto cigunnek.”
22Ma̱i̱je̱ Aburami a̱nne̱k alaan ci Sodomi ne, “Kodongeya anna a̱zzi̱t cinanni Manyi, Ta̱mu̱ta̱dde̱n wa A̱ddi̱ki̱re̱ Veelek, nonno ci eenyca ta̱mu̱-keng ki lo̱o̱c, kar zin anna ki̱tto̱n zare ciginnek, 23iróng atin anna kelemi gi̱i̱ imma ngatunne, kar atin i̱nna̱ iróng azi ne, ‘Kidimana Aburam kize bo̱to̱ro̱c.’ 24Iróng atin anna kelemi gi̱i̱ imma ngatunne kize da̱i̱ne̱t balik adait ol cigannik ko̱ do̱ niko ki taban ci ol balik korkor ki annit ke̱ ngati een Aner, Eshcol ki Mamre. Anyik nogo kanyait taban cinne̱ng.”
Tällä hetkellä valittuna:
Kananet 14: tex
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.