Kananet 13
13
Engerto Aburami ki Lot ngerrti gotononi
1I̱mi̱re̱ zin Aburami lo̱o̱ce̱ ci Masiro kar kuk rok lo̱o̱c ci een Negev, uwe ki ngaa cinne ki kaal cik anyak enne do̱o̱k, uk zin Loti ki nonno. 2Ize Aburami jaitot oroot anyak kaal ki ziik cik ataltali riilik ki dhahab.
3Imma lo̱o̱ce̱ ci een Negev, oto enne lo̱o̱co̱we̱ ki lo̱o̱co̱we̱ rok Bethel, nginti aave orgene ci Bethel ki Ai lo̱o̱c bali arrak aave ti̱ti̱ cinne ke̱ 4nginti bali eenycek enne Manyi i̱te̱le̱ arrak oowa ke̱. Kar nginati ala Aburami zar cik Manyi.
5Ma̱i̱je̱ bo̱do̱k Loti bali owo ki Aburam ko̱, abalo enne bu̱k, anyak eeza ki tiin, ki ti̱te̱t. 6Iróng looci ci egewe nege kaal ngen eleno ki nogo ming aavtte nege nga̱to̱de̱, eci anyak nege kaal cik meelek giir, iróng wo̱ye̱ nege abak nga̱to̱de̱. 7Adangto zin tuwayowa cik Aburami ki cik Loti. Abak zin da̱ olli Kanaani ki olli Perizzites lo̱o̱ce̱ neci bu̱k.
8A̱nne̱k zin Aburami Lot ne, “Gerza ming kanyak dango orgene cinna, icima orgene ci tuwayok cigunnek ki cigannik, eci ke̱e̱ggi̱n naga boor co̱de̱. 9Iróng een lo̱o̱c do̱o̱k ci kanyak naga ko̱? Kengerit e̱le̱tti̱. Ming okko i̱nna̱ angeta, kokko anna a̱zza̱, ming okko i̱nna̱ a̱zza̱, kokko anna angeta.”
10Atangamek Loti tolol ci Jordani o̱to̱ne̱ ci okko ki Zoar ke̱ ming anyak maam cik meelek, ogon ki ma̱na̱ ci Manyi, ogon bo̱do̱k ki looci ci Masiro. (Ogone zoz necu baling ngen Ta̱mu̱ta̱dde̱n ki̱li̱b Sodom ki Gomorrah).#13:10 Sodom ki Gomorrah: Azan Ta̱mu̱ta̱dde̱n o̱ro̱gjo̱k ne̱ke̱ eci bali mu̱nye̱na̱ cik ollu izeto meele oroot i̱i̱te̱ne̱ bali Aburahami ke̱.IkebKananet 18:20 rok 19:28. 11Atahala zin Loti tolol ci Jordani do̱o̱k kar zin ku̱lu̱k kuk ki je̱e̱n. Engertto zin ol cik e̱e̱ggi̱n rama ko̱. 12Abak zin Aburami lo̱o̱ce̱ ci een Kanaan, okko Loti abak o̱ro̱gjo̱we̱ cik a̱ddi̱ki̱re̱ aavtte mu̱u̱ra̱ kar zin kidimanek ti̱ti̱ cinne kojongoz orog ci een Sodom. 13Izeto zin ba̱li̱ye̱ ol cik Sodomi gerze, abaccit ba̱ci̱nno̱k cik meelek, abure Manyi bu̱k.
14Iizek zin Manyi Aburam ngati u̱lu̱ge̱ Loti la̱du̱n ne, “Dong ebere nginati aave ko̱ kar cin i̱do̱ ki i̱do̱li̱ya̱, je̱e̱n ki nyege. 15Kaanyi i̱nne̱t ki dooli cigunnek lo̱o̱c ci icinnu i̱nna̱ ko̱ do̱o̱k kize cunne udut. 16Kanyik atin anna dooli cigunnek kotorte kizeto meele giir kiwagon azac, kar zin ming ikeb e̱e̱ti̱ imma azac, ikebje wo̱ye̱ dooli cik dooli cigunnek bu̱k. 17Bit towe lo̱o̱c neci kaanyi anna i̱nne̱t ko̱ u̱u̱nze̱ta̱ ki li̱te̱nta̱.”
18Uduca zin Aburami ti̱ti̱ cinne kar kuk ku̱lu̱k kabak keene cik a̱ddi̱ki̱re̱ lo̱o̱ce̱ ci e̱e̱t ci een zara Mamre ojongzo ki orog ci een Hebron, kar zin enne kidimanek i̱te̱le̱ Manyi.
Tällä hetkellä valittuna:
Kananet 13: tex
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2018, Wycliffe Bible Translators, Inc. All rights reserved.