Lúkkë 1
1
Yee tah Lúkkë bíní unna ra
1Ɓah Tewofil, ow caak bíníyúté di oluu wa ri, di yii leŋke iña lah filiɓ fi fun dee bín fë rë, 2ti di ɓíllúu wë ɓëewë maasuu iñƴaaha dalaani wa ra, te daa wa ɓëewë na waariyu Unni Koope ra. 3Soˈ ɓal, mi nampee meelsaˈ yii lante sun fi iñƴaaha ɓéeɓ, mi na téebíɗ, dalaˈte dalaani wa, mantee ot biti ette mi bíníyíɗ ɗë wë. 4Hen ɗaaha raa, fay yúh biti iña teeɓu fu ra ɓéeɓ kaah.
Woni ban fi límí Saŋ Batis
5Jamanaa henaˈ Erot buuri Yúdée rë, húmú lahte seeƴohi hínú Sakari, ɗi non goomali seeƴoh yi Abiyaa koon. Ɓeleɓi hínú Ilsabet, ɗi sédí Aaron seeƴohi gaana. 6Wa ɓéeɓ ana húmú júɓúté íllí Koope, wa na hélíh yin túuƴëˈ yë, wa na pagu iña nahaˈ Koo-Yíkëe rë ɓéeɓ. 7Wa húmú lahuy koy, af biti Ilsabet húmú mínéh pok loo, te wa ɓéeɓ ana ɓahayute.
8Lahte bis, Sakari hompe waaji seeƴoha yuliɗ Koope na ra, ndah goomali daa eyuu paŋi. 9Di ɓaahuu wa ri, seeƴoh ya húmú tansuu ow, këɗrí Koope cuuraay tígë lukki sela filiɓ Faam fi gaani Koo-Yíkëe rë. Bee yínée tansa keen sun fi.
10Wahtaa na karaˈ cuuraaya ra, ɓëewë ɓéeɓ húmú ëssë na ɗagu. 11Sakari hom filiɓ níi ri otte malaakii Koo-Yíkëe hatna paaˈ tígë na tamuu cuuraay ra yaˈ ñamaa. 12Ɗi tíitté, afa kúnëhté. 13Ndaa malaakaa won ri tih : « Ngana tíit Sakari ! Koope tahte ɗaŋu : ɓeleɓu Ilsabet ay roo límíɗ koy ƴaal, lah dëekée rí Saŋ. 14Keeñu ay naa sos níi sos te límí ay neɓaˈ ow caak. 15Ɗi ac ow gaan íllí Koo-Yíkëe. Ɗi ii han béeñ mbée hani mín maniyil ɓéeɓ. Balaa ri límú, ɗi ay líif a Ruuh-Peseŋ. 16Ɗi ay nimiliɗ ow caak di ɓëy Israyel Koope na, Yíkíi wë. 17Ɗi ay këllëh Yíkëe, ñéerëˈ a doolii Ruuhi Koope húmú yonente Éelí në rë, yugusaˈ hanndal ki baappa a koyya, nimiliɗ ɓëewë súugúu Koope ra, wa ñéerëˈ a ɓëewë júɓú rë. Ɗi ay saam dúukëlí ɓëewí ay homɗe Koo-Yíkëe. » 18Sakari meelte malaakaa won ri tih : « May yúhée biti yii baa ay lah ɗíh ? Soˈ mi ɓahate te ɓeleɓ soˈ ɓitiffe. » 19Malaakaa tahte won ri tih : « Daa mi Gaburyel, mi homaˈ hëbís Koo. Daa ri wol soˈ ɗoo na, komu uni nebi bah. 20Yee won mi ro baa ra ay lahee ɗaaha biti wahtaa lah. Ndaa gémë gémëy fu soˈ ra tahte fii míníl won níi yiin nay lahe iñƴaaha ra. »
21Ƴaaha ɓéeɓ ɓëewë húmú ëssë na sehu, wa éemúté maaña maañ Sakari filiɓ tígí selaa ra. 22Ɗúhëˈ rí rë, ɗi mínéh won waa na, ɗi wonaˈ a wa wonaɗ likiɗ. Tígí daaha, ɓëewë anutee yúh biti ri ot yin tígë.
23Ɗúmlëˈ Sakari waalla eyuu ri Faam Koope ra, ɗi nimilte faam. 24Gétëˈ iñƴaa ɓéeɓ rë, hompe níi Ilsabet ɓeleɓi pokke loo, hompe yii mitte céyín iip faam ɗúhëy. Ɗi won nufi tih : 25« Ëlí yee pagiɗ soˈ Koo-Yíkëe rë kan ! Nufa payte soo na, ɗi níssé gacaa húmú homaˈ mi leelii ɓëewë rë. »
Woni ban fi límí Yéesú
26-27Céyín pëenë filoon fi heni Ilsabet loo, Koope wolte malaaka Gaburyel kúkëy cafaƴ na, hínú Maryaama ; ɗi dék Nasaret di Galile. Ɗi húmú onute ƴaal ; ƴaala Suseef sédí Dawit. 28Lahaˈ malaakaa faam Maryaama ra, ɗi won ri tih : « Coleere Maryaama, ɗo fa Koo-Yíkëe on ɗo mal ra. Ɗi ee ɗoo na. » 29Woni malaakaa kúnté af Maryaama ; ɗi na níɓ yee waɗti fahaa won wodohi baa ra. 30Malaakaa won ri tígí daaha tih : « Ngana tíit Maryaama, Koope daa on ɗo mal. 31Síkírée ! Fay pok loo te fay lahee koy ƴaal, lah dëekée rí Yéesú#1.31 Tii Yéesú di ébrë daa Yosuwe. Yosuwe daa ri : Yahwee daa Sëmlëhë.. 32Ɗi ac ow gaan te ri ay dëekúu Koy Koope fa sunaa-sun. Koo-Yíkëe ay rii yeɗ ñaani nguur ki Dawit ciffi. 33Ɗi ay hen buuri ɓëy Israyel faraah, Nguur ki ii mëssí ɗúm. » 34Maryaama won malaakaa tih : « Yii baa ay mínée lah ɗíh te mi yéeh ƴaal ? » 35Malaakaa won ri tih : « Ruuh-Peseŋ ay cép sun fu, Koope fa sunaa-sun ay teeɓaˈ doolii ɗoo na. Daa tah kúkëyí selaa nay fuu lahee ra ay dëekúu Koy Koope. 36Ɓitifaˈ mboko mu Ilsabet níi, ɗi pokke loo ; ɗi fa húmú wonu biti mínéh lah koy ra, ɗi hom céyín fí pëenë fí woteh. 37Lahay yii wooñ Koo. » 38Maryaama won tígí daaha tih : « Mi súrgíi Koo-Yíkëe ; yee won fu ra lahaan ɗaaha. » Tígí daaha, malaakaa takohte, saañce.
Yérí Maryaama Ilsabet
39Tíkëh i waal, Maryaama kolohte yíppée saañ gini hom daŋŋi deyi Yúdée. 40Lahaˈ ri ra, ɗi haalte faam Sakari, wodohte Ilsabet. 41Ilsabet na keloh wodohi Maryaama, koy ka lowa hégíƴëhté, Ruuh-Peseŋ yíppée rii haal. 42Tígí daaha, ɗi ɓéyíɗté uni sun won tih : « Koope lukki barkel ro ɓeleɓɓa feey fa ɓéeɓ te koy ka lowu barkelte ɓal. 43Daa mi wa níi, yaafi Yíkíi sëˈ na ac yérí sëˈ ? 44Ole ! Mi na keloh wodohu rek, keeñ koy ka loo soˈ sosse níi sos, tahte ri na hégíƴëh. 45Fu lahte sos-keeñ, gémë gém fu biti iña wonu fu te kolaˈ Koo-Yíkëe në rë ay lah. » 46Maryaama won tígí daaha tih :
« Mee kañ ɗee gaanaˈ Koo-Yíkëe rë,
47ɗi fa na sëmlëˈ sëˈ rë tahte keeñ soˈ sosse níi sos,
48di yee helaˈ ri nuf soo na ra, soˈ mi súrgë ɗii na kut ra.
Daa tah dalaˈte woteh níi kiri fi kirih,
ɓëewë ay soo dëekée sos-keeñ fe.
49Koope fa mín ɓéeɓ rë pagiɗte soˈ yii gaante ;
tiyi selate.
50Dee níi kiri fi kirih,
ɗi ay teeɓ ɓëewë neehu ri ra naaˈ-keeñ.
51Ɗi teeɓaˈte doolii, paŋke i yin gaan ;
ɗi tasaaraˈte ɓëewë në gaan-gaanluu ra.
52Ɗi cépíɗté buurra ñaanni nguur ki wa,
ɓéyíɗté ɓëewë lahuy doole ra.
53Ɗi onte ɓëewë yaaɓu ra njél,
líkké ɓëewë caaku yin ra wa suute a yaˈ holoŋ.
54Ɗi sëmlëˈté ɓëy Israyel súrgë yí,
teeɓpe wa naaˈ-keeñ,
55ti di húmú gapaˈ ri caacci yen nen, Abraham a séttí níi kiri fi kirih. »
Límí Saŋ Batis
56 Maryaama hompe Ilsabet na yii mitte céyín éeyë antee nimil faam. 57Lahaˈ loo Ilsabet ra, ɗi lahte koy ƴaal. 58Keluu ɓëewë dékú a ri ra a mboko yi biti Koo-Yíkëe teeɓpe ri naaˈ-keeñ níi rë, ɓani wa ɓéeɓ bokute lahute na sos-keeñ. 59Nimilaˈ bisa límú kúkëyë rë, ɓëewë ayute leji. Wa fahuu yeri tii Sakari koon, boffa ; 60ndaa yaafa tahte won tih : « Ëe-ëeˈ, ɗi hínú Saŋ. » 61Wa wonu ri tih : « Lahay ɓëyí hínú ɗaaha mboko yu na. » 62Wa anutee won a boffa wonaɗ likiɗ, meelute ri tiya nay yeru koohi ra. 63Tígí daaha, Sakari meelaˈte arduwaas, bíníté në unni ƴeh : « Ɗi ay hínú Saŋ. » Ɓëewë ɓéeɓ éemúté në. 64Pereem Sakari yíppée pëkísëh, ɗi dalaatte won, ɗi yampe na sím Koope. 65Ɓëewë ɓani wa dékú rë ɓéeɓ tíitúté. Wona hente lëyëŋ deyi daŋŋi Yúdée ɓéeɓ. 66Ɓëewë keluu iñƴaa ra ɓéeɓ na níɓú yii leŋ na, wa na meelu affi wa yee nay míllée kúkëyë rë, ndée lante biti Koo-Yíkëe ñéerëˈté a ri.
Kañi Sakari Koope
67 Ruuh-Peseŋ haalte Sakari boffi kúkëyë, ɗi na léhín unni kolaˈ Koope na won tih :
68« Ɓëewë ɓéeɓ símún Yíkëe, Koope fi ɓëy Israyel, di yee yeelaˈ ri ɓëewí, sëmlëˈté wë rë.
69Ɗi kompe yen ɓëyí gaani nay yen sëmlée, bi ɗúhëˈ tali Dawit súrgíi.
70Daa ri yee maañ rii gapaˈ, ñeyaˈte ri yonente yi sela yi ra.
71Ɗi húmú wonte yen biti ri ay yen sëmlëˈ yaˈ yi haaˈoh yi yen a kaaˈoh yi yen.
72Ɗi teeɓpe caacci yen naaˈ-keeñ, hampe yee húmú pok ri hanndal ki wa ra.
73Koope añohte ciffi yen Abraham biti
74ɗi ay yen sëmlëˈ yaˈ yi kaaˈoh yi yen, nda yen néekíñíih jaamiyohi ;
75nda pesi yen ɓéeɓ, yen hen ɓëewí selayute te júɓúté íllí.
76Te ɗo fi koy soˈ, fay dëekúu yonentii Koope fa sunaa-sun, ndée fay këllëh Yíkëe, fu ɗariɗ ri waali,
77fu teeɓe ɓëewí biti ri ay waa sëmlëˈ, baal wa bakaaɗɗi wa.
78Koope fi yen baahte te ri naaˈte keeñ, daa tah ɗi ay yen hawaan a niiñi ɗúhëˈ sun ti naˈa na púl rë nen,
79niiñli yen fa homu ñúus te tasuu seh kúl kë rë, ɗi tík yen waali jaammaa. »
80Saŋ na ooɗ, afa na ɓaatti kúnsëh. Ɗi húmú pesaˈ luufa níi yiin teekiroh ri ɓëy Israyel ra.
Tällä hetkellä valittuna:
Lúkkë 1: NDV
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active), Wycliffe Bible Translators, Inc. All rights reserved.
