Oyinyima ỌYỊSỊZỤ
ỌYỊSỊZỤ
Iwe Oyinyima ọnọnị vị ana aā hị́ Ijenesisi. Iruvo anị ini Ebira ọ vị oyinyima nị. Ọnị ọ vi iwe ịpaapa ịnị Ibayiburu ana a chẹrẹ avaba ịtọpa Ohomorihi mẹmẹ nyima ọyị mẹ avaba ịsavịsavị ene hi ẹhẹ nị. O nyima hụụnị ọ mẹmẹ tụ Ẹbẹẹba ọnịrị ẹhẹ beri ịsa irenyi-irenyi ene hi ini anị. Ịnị iwe ọnọnị ị yaa re ebira odivi mẹmẹ nyima ana sị ụya ọnịrị usu gẹ ẹngụ nị. Óhomorihi mẹmẹ mẹ̀ eto ka ọnị ọ sị dọ Anẹhẹ ha. Avaba iwe ọnọnị vị ana a ga hi oze ẹẹva. Ọnyị ịpaapa, ịtọpa a mẹmẹ tụ́ ẹhẹ ọnịrị a mẹmẹ mẹ̀ ọza vẹ ẹhẹ. Ịtọpa ọnọọ o nyima hụrị Adamị ọnịrị Iivi, ezi ẹnịnị Ikeeni ọnịrị Ẹba, Inowa ọnịrị ọhaara enyi ne beri irehi ọgọdọ 1-11. Ọgwọhụva, ịtọpa ohiku Anisirẹrị nịnị ene nyima hụrị Abụrahamị na ngụ ozi anị Ayiziiki huu na ngụ Ijekọvụ ọnị ịrẹha anị ọsa rị Isirẹrị, ezi anị ẹwụrẹva ana vị ịrẹsụ ẹwụrẹva ana ka Isirẹrị ẹtẹ. Ijosẹẹhụ mẹmẹ kụ́ Ijekọvụ ọnịrị ẹyịnyara anị ne beri aza ẹnịnị na ngụ Ijipiti 12-50.
Ịrẹyọyẹ ọnị ịtọpa ẹnịnị zụ yị ene hu kere-kere ọ vị ka Ohomorihi ô sì ịrẹyị ẹyị ọza. Ộ kà a ka ọ́nị vaa tẹsị aza anị pooro-pooro nị. Ịrẹyị Ohomorihi ọ ngụrẹyị hu ịnị avaba iwe ọnọnị nị. Ọnị ọọ̄ mẹ̀ ọkarẹyị, ọnị ọọ̄ sị ụya rị anakụvị, ọnị ọọ̄ zụ aza oze dị a gụ wa ụvọ nị. Ọnị ee tenyi ẹhẹ aza anị yị wa nị. Ịsa ọsa ọnị re ịnị iwe ọnọnị ọ vị ịtọpa aza ana sị ayị tụra Ohomorihi ana gụ ẹdọwụ ayị ụvọ vee tu ajịnị nị.
Eyi Ịrẹyị
Oyinyima ẹhẹ ọnịrị ọza 1.1-25
Oyinyima ịvị ọnịrị ụya 3.1-24
Ụmẹ Adamị na ngụ ụmẹ Inowa 4.1—5.32
Ụmẹ Inowa na ngụ ụmẹ ọhaara 6.1—10.32
Ireehi ọgọdọ Ịbabịrọnị 11.1-9
Ụmẹ Ịsẹmị na ngụ Abụrahamị 11.10-32
Ohiku nini: Abụrahamị, Ayiziiki, Ijekọvụ 12.1—35.29
Evere Iisọ 36.1-43
Ijosẹẹhụ ọnịrị ẹyịnyara anị 37.1—45.28
Anisirẹrị ịnị ẹtẹ Ijipiti 46.1—50.26
Tällä hetkellä valittuna:
Oyinyima ỌYỊSỊZỤ: EBTP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ebira First Bible © Bible Society of Nigeria, 2014.