PIANPATNAK 4
4
Kain le Abel
1Adam in, a zi zaupihin, a zi cu naupai hi. Capa nei in, “Topa i bopnak hangin capa nei ing,” tin ti in, a min cu Kain sa hi. 2Mahnung ten a naupa Abel hingleh hi. Abel cu tuucing hi a, Kain cu lobungmi hi. 3Hun a ngeideuh ten Kain in, a lo sungsuak ante cu Topa pia hi. 4Abel vangin a tuuno hing masabel ngo in, a taksa phabel cu Topa pia bok hi. Abel le a piakmi humah Topa cu a lungsizet hi.#Heb 11:4; 5Mahnaven Kain le a piakmi humah Topa cu a lungsi ma hi. Kain cu a thinukin, a maisan khawng hi. 6Topa in Kain lakah, “Ita thinuk nge cim? Ita na maisan khawng kaw? 7Thilpha na bawl ahin cosang ngawlin um tung maw, mahnaven thilpha ngawl na bawl hangin sualnakin, na kongka ah pang lengin, nangmah uk tum hi; mahnaven na nehkul loli tuk,” ti hi.
8Kain in, a nau Abel lakah, “Ngam sungah hawh nung,” tin zawm hi. Ngamsung a hen haw ten Kain in Abel cu that hi.#Mt 23:35; Lk 11:51; 1Jn 3:12;
9 Topa in, Kain lakah, “Na nau Abel ilai ah kaw?” tin dong hi. Kain in, “Thei kha mang. Ka nau cingtu hi ing maw?” tin donleh hi.
10 Topa in, “Itakaw hiti bang a lauhuai nate na bawl? Phuba la nuamin, a auli mi aw bangin, na naupa i thisanin, lei pen keimah sam li hi.#Heb 12:24; 11Nang cu na umnak mun lei pen hawlvawkin, tamsiat hi zo ci. Na khutin, a tultikmi na naupa i thisan hup tukin leipi cu a kamka in dawh leng zo hi. 12Anci na cing vangin lei pen imah suak tukma hi, umnak inn nei ngawlin leihumah mi vakvai hi tuk ci,” tin ti hi.
13Kain in, Topa i lakah, “Dantatnak na piakmi hi ka ca in thuak tuk hak leita hi. 14Hi ngam le na mai pen kei na hawlvawk i hum pen, inn nei ngawlin leihumah vakvaimi hi tung a, kei amutu hempoh ten that haw tuk,” tin ti hi.
15Mahnaven Topa in, “Mah kha ma hi, nangmah a thattu cu a let salihin phuba lak hi tuk,” ti hi. Topa in, Kain cu a mutu hempohin, a thah haw ngawlnak tukin a humah sialsiahnak bawl hi. 16Kain cu Topa i mai pen tai in, Eden huan i nisuahnak lam Nod tihmi, vahvaihnak ngamah um hi.
Kain Casuante
17Kain in, a zi zaupihin, a zi cu naupai a, capa hingin a min Enok sa haw hi. Kain in khuapi pa khat tohin, a capa min bulhin, Enok tin sa haw hi. 18Enok in capa nei in, a min Irad sa hi; Irad i capa cu Mehujael hi; Mehujael i capa cu Methushael hi; Methushael i capa cu Lamek hi; 19Lamek in zi pa nih nei hi; pa khat cu Adah hi a, pa khat saw cu Zillah hi. 20Adah in capa nei in, Jabal tin sam hi. Jabal cu khui khaltute le puanbuk a ummi tei cikhaihtu hi. 21A naupa Jubal cu phaidaak le pheveu tumtu tei cikhaihtu hi. 22Zillah in capa Tubal Kain nei hi. Tubal Kain cu thik le daal pumsu tei cikhaihtu hi. Tubal Kain i celnu cu Naamah hi.
23Lamek in, a zi tei lakah,
“Ka zi Adah le Zillah,
ngai hem un!
Keimah a vah le
a liamsuah hangin,
tangval pa khat that ing.
24Kain a thattu i humah
let salihin phu lak ahi tale,
keimah a thattu cu
let sawm salih i let salihin,
phuba lak hi tuk,” tin ti hi.#Mt 18:22;
Seth le Enosh
25Adam in, a zi zaupihlehin, capa pa khat neileh haw hi. “Kain in Abel a thah hangin ka ca tukin Pathian in capa pia hi,” tin a min Seth sa hi. 26Seth in capa nei in, Enosh tin sam haw hi. Mah pepan mihing ten Topa i min thiang salin bia pan haw hi.
Tällä hetkellä valittuna:
PIANPATNAK 4: NBF1
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ngawm Bible © Bible Society of Myanmar, 2014.