Lu̍kū 15
15
Tālo̍o̍ a̍ sāa̍ la̍a̍si̍a̍ŋndo̍ o̍kɔ̄ɔ̄
(Māa̍ti̍u̍ 18:12-14)
1Bōōndi̍i̍ pi᷅lɛ̍, mi̍ kɔ̍sɔ̄ŋnda̍ a̍ wāŋnda̍ ā pīli̍a̍a̍, ā Chu̍ūwa̍ chu̍a̍ māā wānāā fo̍ndūa̍a̍ nda̍ chō ni̍ wa̍, ā hūŋ nāa̍ Chi̍i̍sū chu̍a̍ le̍ ndu̍ nīla̍ŋ yāŋɔ̄ɔ̍. 2Kɛ̍, mi̍ ku̍ndā Fālīsi̍īya̍ a̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, ā kāndū ŋɔ̄ɔ̄chīa̍ŋnda̍ŋ āā, “Pōo̍ ho̍ō, mbō chɛ᷄l wānāā fo̍ndūa̍a̍, ndu̍yɛ̍ mbō dē nyɛ̄ dīa̍a̍ nda̍ nda̍ā.” 3Mi̍ Chi̍i̍sū lo᷅ o̍ ko̍ŋ mbo̍ nyūnā nda̍ o̍ lētāle̍ ni᷄ŋ āā,
4“Tē wānā wa̍ yɛ̄ dɔ̍ɔ̍ nya̍ tɛ̄ɛ̄ŋ, mbō nɔ̄ sāa̍ kɛ̄mɛ̄. Tē sāa̍ ha̍ā ō pīlɛ̍ lāāsi̍a̍ŋ ndu̍ o̍ bā pɛ̍, mɛ̄īyo̍ le̍ o̍ mɛ̍ī sa̍ā be̍le̍-ŋɔ̄ma̍hīɔ̍ɔ̍lu̍ a̍ ā ŋɔ̄ma̍hīɔ̍ɔ̍lu̍a̍a̍ ha̍ā, o̍ fo̍ndāŋ nda̍ māndā chɔ̍lūa̍a̍ wo̍ mbō kūɛ̄ o̍ lo̍ ho̍ō wo̍ nūūvīa̍a̍, ndu̍yɛ̍, mbō lo̍ o̍ ko̍ŋ mbō sāālu̍ŋ ndu̍ le̍? Nūūvīa̍a̍ o̍ nu̍u̍vīāā ndu̍ ni̍. 5Tē ō sāālu̍ŋ ndu̍ pɛ̍, ō na᷄ŋ kɔ̄l. Ndu̍yɛ̍, ō hāndu̍ŋ ndu̍ o̍ chōŋgu̍, 6ō kūɛ̄ a̍ ndu̍ o̍ chīɛ̄ī ndɔ̄ɔ̍. Tē ō kūɛ̄ pɛ̍, ō vēēlu̍ chāāŋāā ndūa̍a̍, a̍ wānāā nda̍ chīɛ̄ɛ̄li̍āŋ nda̍ nāa̍ pi᷅lɛ̍ ō dīmu̍l nda̍ āā, ‘Lā māla̍ ya̍ kpe̍njo̍o̍. I̍ sa̍a̍lu̍ŋ sa̍a̍ ni̍, ndu̍ o̍o̍ la̍a̍si̍a̍ŋ ndo̍.’ ” 7Mi̍ Chi̍i̍sū di̍mūl nda̍ āā, “Mī di̍mu̍l nya̍, tē wāna̍ yɔ̄ŋ wɔ̄ɔ̍ŋndo̍ ō pīlɛ̍ bɛ̍ɛ̍ ma̍l yɔ̄ŋ ndɔ̄ wɔ̍ɔ̍ŋndo̍ pɛ̍, le̍nde̍ ko̍ni̍ kɔ̄l kɛ̄ndɔ̄ɔ̍ wā o̍ fo̍nda᷄ŋ Mɛ̄lɛ̄ka̍a̍ ni̍, mbo̍ hīāū a̍ wānāa̍ cho̍ sa̍kpō wa̍ ŋ̄wāŋ be̍le̍ ŋɔ̄ma̍hīɔ̍ɔ̍lu̍ a̍ ā ŋɔ̄ma̍hīɔ̍ɔ̍lu̍, a̍ cho̍ o̍ ba̍ hāvɛ̍i̍ wa̍ā le̍nde̍ ni̍ŋ te̍ wa̍.”
Tālo̍o̍ a̍ ka̍ni̍i̍ lo̍ ve̍ o̍kɔ̄ɔ̄
8Mi̍ Chi̍i̍sū di̍mī vɛ̄lɛ̄ tālo̍o̍ āā, “Tē ō wa̍ yɛ̄ mī wānā la̍nɔ̍ɔ̍ nɔ̄ ka̍ni̍o̍ŋ tɔ̍, kɛ̍ mī ī pīlɛ̍ lo̍. Ō mɛ̍ndūl la̍mbūi̍yo̍, ndu̍yɛ̍ mbō bɛ̄ɛ̄sūū chīɛ̄īyo̍ mbō nūūvi̍a̍a̍ nyɛ̄ kɛ̄ndɛ̄ kɛ̍ndɛ̄, ha̍a̍a̍ mbō lo̍ o̍ ko̍ŋ mbō sāālu̍ŋ ka̍ni̍e̍i̍ he̍ī le̍? Nūūvīa̍a̍ o̍ nu̍u̍vīāā ni̍. 9Ndu̍yɛ̍ tē ō sāālu̍ŋ ndi̍ pɛ̍, ō vēēlu̍ chāāŋāā ndūa̍a̍, a̍ wānāā nda̍ chīɛ̄ɛ̄li̍āŋ nda̍ kpo̍u̍ na̍a̍ pi᷅lɛ̍. O̍ ko̍ŋ, ō dīmu̍l nda̍ āā, ‘Lā māla̍ ya̍ kpe̍njo̍o̍. I̍ sa̍a̍lu̍ŋ ka̍ni̍i̍ nīi̍ ndi̍ i̍ lo̍ ve̍.’ ” 10Mi̍ Chi̍i̍sū di̍mūl nda̍ āā, “Mī di̍mu̍l nya̍, tē wāna̍ yɔ̄ŋ wɔ̄ɔ̍ŋndo̍ ō pīlɛ̍ bɛ̍ɛ̍ ma̍l yɔ̄ŋ ndɔ̄ wɔ̍ɔ̍ŋndo̍ pɛ̍, le̍nde̍ ko̍ni̍ ki̍i̍la̍a̍ Mɛ̄lɛ̄ka̍a̍ tōsā kɔ᷅l kɛ̄ndɔ̄ɔ̍ ni̍.”
Tālo̍o̍ a̍ po̍ la̍a̍si̍a̍ŋ ndo̍ o̍kɔ̄ɔ̄
11Mi̍ Chi̍i̍sū hi̍a̍ū lāchī a̍ sūɛ̍i̍. Mbo̍ dīmī tālo̍o̍ āā, “Fāl pīlɛ̍ wa̍ ni̍, mbo̍ nɔ̄ pūa̍a̍ ā ŋīɔ̍ɔ̍ŋ. 12Mi̍ o̍ wa̍ chūāāmbɔ̄ɔ̍ wo̍ dīmūl fi̍nyā ndɔ̍ āā, ‘Kɛ̄kɛ̍, ke̍ ya̍ nyɛ̄m ki̍ɔ̍ɔ̍ŋ ŋ̍ nu̍ŋ.’ O̍ ko̍ŋ kɔ̍ɔ̍lī, mi̍ fāllo̍ mūli᷄ŋ mbo̍ pīɔ̄ū nyɛ̄m ndɔ̄ɔ̍ŋ pūa̍a̍ ndūāā ŋi̍ɔ̍ɔ̍ŋnda̍ ha̍ā tɛ̄ɛ̄ŋ. 13Nyɔ̄ɔ̍ŋ mu᷅ŋ pīɔ̄ūwo̍ nda̍ tɛ̄ɛ̄ŋ, te̍le̍ŋndo̍ bēndu̍ bɛ̍ɛ̍ le̍, mi̍ pōo̍mbɔ̄ɔ̍ ho̍ō chɔ̄ɔ̄vīāā ŋ̄ ndɔ̍ŋ kpo̍u̍, mbo̍ kūānu᷄ŋ pɔ̍ɔ̍li̍ o̍ lɛ̄ŋndē chēle̍ŋ ni᷄ŋ. Lo̍ŋ o̍ kɔ̍ chi̍ī nyɛ̄ o̍ nyɛ̄ tɛ̄ɛ̄mbūū o̍ sɔ̄ɔ̍ŋ fo̍ndo᷄ŋ ni᷄ŋ ni̍. 14Mɛ̄ɛ̍ o̍ chi̍i̍ nyɛ̄ o̍ nyɛ̄ tɛ̄ɛ̄mbūū, mi̍ yīmā bɛ̄ndūa̍ŋ mā dēl nyɛ᷅m o̍ lɛ̄ŋndē lēŋ ni᷄ŋ. Tē yīa̍a̍ŋ ma᷅ŋ mā de᷄l pɛ̍, pɛ̄ŋnde̍ŋ lē bīī ndu̍ bīyɔ̄ɔ̍ pi̍la̍. 15Pɛ̄ŋnde̍ŋ bīyɔ̄ɔ̍ ndu̍ mbo̍ kɔ̍ lu̍ɛ̍ī wa̍llo̍ wānā pi᷅lɛ̍ o̍ bā o̍ lɛ̄ŋndē lēŋ ni᷄ŋ. Mi̍ wānā ko̍ŋ ndu̍ mu̍li᷄ŋ mbo̍ yɔ̄ŋ ndu̍ le̍ pēūwāā ndūa̍a̍ māndāa̍ o̍ chīɛ̄ī ndūɛ̍i̍ ni᷄ŋ. Pēūwa̍ ha̍ā o̍ wa̍ ni̍ko̍ ma̍ndā ni̍. 16Kɛ̍ mɛ̄ɛ̍ yīa̍a̍ŋ mā nɛ̄i̍ ndu̍ te̍i̍, mi̍ kɔ̄llo̍ kūā ndu̍ le̍ nyɛ̄ dīāā pēūwa̍ wa̍ dīo̍o̍ wo̍ dīo̍o̍. Kɛ̍, wānā o̍ wānā ke̍ ndu̍ ndu̍ le̍. 17O̍ ko̍ŋ kɔ̍ɔ̍lī, mɛ̄ɛ̍ o̍ cha̍l, mbo̍ yīya᷄ŋ. Mbo̍ dīmī āā, ‘Bu̍ɛ̍i̍yāā wa̍lla̍ kpe̍de̍ fi̍nyā nūu̍ o̍ bā nda̍ chō nyɛ̄ dīa̍a̍ dīo̍o̍, ā cho̍ chi̍ī le̍. Kɛ̍, ya̍ kɛ̍i̍ le̍ yīa̍a̍ŋ mā chō nyɛ̄ yɔ̄ŋ nu̍a̍ā le̍?’ 18Mbo̍ dīmī āā, ‘I̍ cho̍ chɔ̄nɔ᷄ŋ mī mi̍i̍ŋgu̍ nāa̍ fi̍nyā nūu̍ chūā. I̍ ku̍ɛ̄ pɛ̍ I̍ kɔ̍ di̍mu̍l ndu̍ a̍a̍, “Kɛ̄kɛ̍, I̍ to̍sa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍, ndu̍yɛ̍ mi̍ to̍sā yɔ̄ŋ wɔ̄ɔ̍ŋndo̍ a̍ nūm. 19I̍ cho̍ lɛ̍ o̍ sɔ̄vɛ̍ kpo̍so̍ŋ mā ve̍e̍lu̍ lɛ̄ ya̍ āā, po̍ nu̍m te̍. Chu̍a̍ ya̍ ni᷅ŋ māā bu̍ɛ̍ī nūm pa̍a̍wāā.”’ 20O̍ ko̍ŋ kɔ̍ɔ̍lī, mbo̍ cha᷄ŋ mbo̍ kūā nāa̍ fi̍nyā ndɔ̄ chu̍a̍.
“Wāa̍ fūūlūūwo̍, ō lo̍ la̍nda̍ŋ mi̍ fi̍nyā ndɔ̄ cha᷅ ndu̍. Mi̍ nyīɛ̍ɛ̍yīī ndūɛ̍i̍ bīī fi̍nyā ndɔ̍ ta̍u̍. Mi̍ fi̍nyā ndɔ̄ cha̍ŋ mbo̍ ku̍ā ndu̍ lāchī a̍ kīlta̍ŋ, mbo̍ kɔ̍ kɔ̄ma᷄ŋ ndu̍, mbo̍ sɔ̄sā ndu̍ kūu̍wo̍. 21Mi̍ po̍ ndɔ̄ɔ̍ ho̍ō lō lo̍ŋ mbo̍ dīmūl ndu̍ āā, ‘Kɛ̄kɛ̍, I̍ to̍sa̍ yɔ̄ŋ wɔ̄ɔ̍ŋndo̍ a̍ Mɛ̄lɛ̄ka̍, mi̍ to̍sā yɔ̄ŋ wɔ̄ɔ̍ŋndo̍ a̍ nūm. I̍ cho̍ lɛ̍ o̍ sɔ̄vɛ̍ kpo̍so̍ŋ mā ve̍e̍lu̍ lɛ̄ yā āā, po̍ nu̍m te̍.’ 22Kɛ̍, mi̍ fi̍nyā ndɔ̄ di̍mūl bu̍ɛ̍i̍yāā ndūa̍a̍ āā, ‘Lā hu᷄ŋ a̍ nyɛ̄lā kɛ̄ndɛ̄ kɛ̍ndɛ̄la̍ŋ chɔ̍ chɔ̍ mī lā dōvi̍ ndu̍. Ndu̍yɛ̍, mī lā wōu̍ ndu̍ kēlɛ̄i̍ o̍ īsū mī lā wōu̍ ndu̍ kɔ̄ɔ̄vɛ̄i̍la̍ŋ. 23O̍ ko̍ŋ kɔ̍ɔ̍lī, mī lā hīŋ a̍ nāu̍ hi̍o̍ū ha̍ā kpo̍u̍ wo̍ mī lā dīī mī ŋ̄ dēnūŋ nyɛ̄ dīāā kɔ̄l kɛ̄ndɔ̄ɔ̍. 24Kāni̍ fo̍ndōle̍, po̍ nūu̍ ndu̍ o̍o̍ vi᷅, kɛ̍ ō mīīŋgu̍ yōōmū. Ndu̍ o̍o̍ la̍a̍si̍a̍ŋ, kɛ̍ ō mīīŋgu̍. O̍ ko̍ŋ kɔ̍ɔ̍lī, mi̍ kɔ̄l kɛ̄ndɔ̄ɔ̍ kāndu᷄ŋ bɛ̍ɛ̍.’
25“A̍ bōōndi̍i̍ ke̍ŋ, bɛ̄ ndɔ̄ wa̍ wa̍llo̍ o̍ chīɛ̍i̍ ni᷄ŋ. Mɛ̄ɛ̍ o̍ chɛ̍ŋ o̍ chīɛ̍i̍ ni᷄ŋ mbo̍ wā hūnɔ̄ɔ̍, fūūlūūwo̍ chi̍e̍e̍ le̍kɔ̍ɔ̍ ki̍nɛ̍i̍, mbo̍ tūɛ̄ī nyɛ̄ chāa̍. Wāŋnda̍ wa̍ yōla̍ŋ kpe̍e̍kpe̍i̍. 26Mbo̍ lō o̍ ko̍ŋ mbo̍ vēēlū bu̍ɛ̍i̍ fi̍nyā ndɔ̄ɔ̍ ō pīlɛ̍. Mbo̍ nyūnā ndu̍ āā vɛ̄ɛ̄, ‘Nyɛ̄ chāā yɛ̄ɛ̍nɛ̍ cho̍ yɛ̄ ho̍ō sūɛ̍i̍?’ 27Mbo̍ dīmūl ndu̍ āā, ‘Pɔ̄mbɔ̄ nu᷄m ndu̍ o̍o̍ ku̍ɛ̍ŋnu᷄ŋ ndo̍, ndu̍ hi᷅ŋ ni̍. Mɛ̄ɛ̍ o̍ hi᷅ŋ, mi̍ fi̍nyā nūm di̍ī nāū bɛ̄ndu̍ hi̍o̍ū ha̍ā kpo̍u̍ wo̍ āā, le̍ mɛ̄ɛ̍ o̍ mi̍i̍ŋgu̍ ndu̍ o̍ bā a̍ yōōmōo̍ o̍ mīli̍ŋ yɛ̍. Nyɛ̄ chāā ko᷄ŋ cho̍ sūɛ̍i̍ ni̍.’
28“Mi̍ bɛ̄ ndɔ̄ du̍a̍u̍nu᷄ŋ tu̍mbe̍ ta̍u̍. Mbo̍ kɛ̄ɛ̄ le̍ lūɛ̄īyɔ̄ɔ̍ chīɛ̄ī ni̍ŋ. O̍ kōŋ, mi̍ fi̍nyā ndɔ̄ fu̍lā, mbo̍ kɔ̍ nyɔ̍ɔ̍lū ndu̍. 29Kɛ̍, mbo̍ dīmūl fi̍nyā ndɔ̍ āā, ‘Wɔ̄sīla̍ŋ nda᷅ŋ kpe̍de̍ I̍ cho̍ nu̍m sāāŋgīāllo̍. Lē pīlɛ̍ bɛ̍ɛ̍ I̍ kɛ̍ɛ̍ wɔ̍ nu̍m dīōm te̍. Kɛ̍, o̍ pāa̍le̍ŋ ni᷄ŋ bɛ̍ɛ̍ a̍ ke̍ wɔ̍ ya̍ chūīŋndo̍ ō chūa̍a̍ bɛ̍ɛ̍ le̍ mī to̍sa̍ kɔ̄l kɛ̄ndɔ̄ɔ̍ na̍a̍ chāāŋāā nīa̍a̍ le̍. 30Kɛ̍, mɛ̄ɛ̍ po̍ nu̍m chi̍i̍ ho̍ō nyɛ̄m nūmndo̍ŋ kpe̍de̍ tɛ̍ɛ̍mbūū wāŋ lāāndūāā bāla᷄ŋnda̍ kɔ̄ɔ̄lī wo̍ hīŋ, ma̍ mūli᷄ŋ ma̍ dīīlūl ndu̍ nāū bɛ̄ndōo̍.’ 31Mi̍ fi̍nyā ndɔ̄ di̍mūl ndu̍ āā, ‘Po̍ nūu̍, le̍ lɔ̍ɔ̍ o̍ lɔ̍ɔ̍ na̍a̍ nūm ŋ̄ chō lātūlu̍. Ndu̍yɛ̍, nyɛ̄ o̍ nyɛ̄ ya̍ nɔ̍, nu᷄m nɔ̍ ni̍. 32Kɛ̍ ndu̍yɛ̍, ō bɛ̄nda̍ mī ŋ̄ tōsa̍ kɔ̄l kɛ̄ndɔ̄ɔ̍. Kāni̍ fu̍u̍le̍, pɔ̄mbɔ̄ nūmndo̍ ho̍ō ndu̍ o̍o̍ vi᷅, kɛ̍ ō mīīŋgu̍ yōōmū. Ndu̍ o̍o̍ la̍a̍si̍a̍ŋ, kɛ̍ ō mīīŋgu̍.’ ”
Tällä hetkellä valittuna:
Lu̍kū 15: YM
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Kisi Bible © Bible Society in Liberia, 2015.
