Matayo 8
8
Yesu kapfonya mujwazi jwa kwanga
Marko 1:40-45; Luka 5:12-16
1Yesu kasuka na hapfaḍe murimani, na wantu wenji na wenji wekimuuḅa. 2Iyo saa kukumpuya muntu eyekuwa na ujwazi wa kwanga. Kenda kamuvunzia nkuhi Yesu na kamwamba, “Ḅwana, amaa ukitsaka nkwanipfoza?”#8:2 Haya matsoro ya Kiyunani yahadza kudheresa. Wayahud̯i wewa na sharia ya kwamba muntu jwa kwanga nkekiruhusijwa kunjiiyana na yuḍejwonse kwa njia iḍeyonse, asidzatangazwa ni mukohani kwamba kadhereswa. 3Yesu kamunyopezea mukono kamuhora na kamwamba, “Nakupfoza.” Makisa kamwamba, “Pfowa!” Na iyo saa huyuḍe muntu kapfowa. 4Kisa Yesu kamuseresa kamwamba, “Manya utsemwambia muntu yuḍejwonse dzuu ya hiḍi hiḍi dzambo. Ishinu enda kwa huyu mukohani ukadziyanganye kwakwe kwamba kupfowa na uyavye mvuugiya dza vya *Sharia ya Musa ivyonakumala kuhenda, dza ushaahiḍi kwamba kudhereswa.”
Yesu kapfonya muhumisi jwa mukuu mumodza jwa Kirumi
Luka 7:1-10; Yohana 4:43-54
5Yesu epfonjia mudzi wa Kaperinaumi, kendejwa ni mukuu jwa kit̯aro cha asikari wa Kirumi.#8:5 Huyu ewa ni mukuu jwa kit̯aro cha asikari gana. Huyu mukuu kamuyomba Yesu 6kamwamba, “Ḅwana, huyu muhumisi jwangu kahinamfa ka nyumbani. Ni mujwazi kakuwaraghani hat̯a nkawezi kunuka na t̯at̯ani.”
7Yesu kamwambukuya kamwamba, “Nakudza namupfoza.”#8:7 Haya matsoro ya Kiyunani pia yanaweza kuwa na maana ya kwamba “Nidze nimupfoze?” 8Ela huyuḍe mukuu jwa asikari kamwamba, “Ḅwana, mimi sikwaa hat̯a muntu jwa kwamba wewe unjie nyumbani mwangu. Wewe nena chuuwo kimodza t̯u, na huyu muhumisi jwangu anapfowa! 9Koro hat̯a nami nina wakuu wangu, na nina asikari weo nsii yangu. Ninkimwambia mumodza, ‘Enda,’ nae anakwenda. Ninkyambia yungine, ‘Nzoo,’ nae anakudza. Na ninkimwambia muhumwa jwangu, ‘Henda visiku,’ nae anavihenda.”
10Yesu epfosikia hivi vya huyu mukuu aneneyevyo kamaka muno. Kisa kanena na hawa weowakimuuḅa kawamba, “Hachi nyakumwambiani, sidzaona muntu awee na faro nkuu dza hi hat̯a kahi ya Waisiraeli! 11Na nyakumwambiani kwamba, wantu wenji wadzakudza kuyawa muyao dzuwa na mutso dzuwa, hangu dzuu hat̯a nsini, na wadzakaa vihako Uhajuni mwa Mbingu, wakiḍya karamu pfamodza na Iburahimu, Isaka na Yakobo. 12Ela hawaḍe weopangijwa kuwa wantu wa hu huu Uhaju, Muungu kadzawafat̯ula kiza cha nze, wadzekoiya na kurhigha magego.” 13Makisa Yesu kamwamba huyu mura jwa Kirumi, “Enda nyumbani, hivi uhikiziyevyo visakuhendeka.” Na iiḍe saa, huyuḍe muhumisi jwa huyu mura kapfowa.
Yesu kapfonya wajwazi wenji
Marko 1:29-34; Luka 4:38-41
14Yesu epfonjia nyumbani mwa Pet̯ero, kamuona mukwanguwe muke Pet̯ero karomokwa ni kanat̯a na kat̯ambaara. 15Yesu kamuhora hu mukono na hi kanat̯a imuyatsa. Nae kanuka kamuwekea chakuḍya Yesu.
16Ipfofika mioro, wantu wamuyehea Yesu wajwazi wenji na wenji weokuwa na mpepfo nzuka. Nae Yesu ekiziyavya hizi mpepfo nzuka na kuwapfonya wajwazi wonse kwa kut̯amuka chuuwo t̯u. 17Hivi vihendeka ili hikiḍe chuuwo cha *nabii Isaya aneneyecho kit̯imiye. Nabii Isaya ewa kamba,
“Jeje kayahunwiiya majwazi yehu,
na kahupfonya kuyawana na nd̯wari zehu.”
Atsakiye kumuuḅa Yesu ni had̯i ayatse yakwe yonse
Luka 9:57-62
18Yesu epfoona hi t̯ut̯a ya wantu imuzingiyeyo, kawaamuru hawa wanafund̯iwe kawamba, “Nahuvukeni hiḍi ziwa hwende huḍoombe.” 19Wasidzanuka, kwenda Mwaalimu mumodza jwa Sharia kamwamba Yesu, “Mwaalimu, mimi nya t̯ayari kukuuḅa kuḍekwonse udzekokwenda.” 20Ela Yesu kamwamba, “Hamabworama wana mpango zao, na nyuni wana vitsanza vyao. Ela mimi *Mwana jwa Ad̯amu, hat̯a pfantu pfa kujufinikiza yukopfe si kintu.”
21Mumodza jwa hawa wanafund̯i wangine weowakimuuḅa Yesu kamwamba, “Ḅwana, mimi natsaka kukuuḅa, ela niyatsa nguzi nyende nikamuzike baba.”#8:21 Ambu: niyatsa nguzi nigale nyumbani nikamut̯unze baba hat̯a adzepfofwa. 22Ela Yesu kamwamba, “Wewe niuḅa t̯u! Wayatse wafu wawazike wafu wao.”#8:22 Hapfa, Yesu ekinena dzuu ya wantu wafwiyeo kiruhu.
Yesu kabusa vut̯o
Marko 4:35-41; Luka 8:22-25
23Makisa Yesu na wanafund̯iwe wanjia humuḍe chomboni na waḍabva kuvuka kwenda yombe jwa pfii jwa hiḍi ziwa. 24Iyo saa kuḍabva kubiga vut̯o kali humu ziwani, na hichi chombo kiḍabva kubigwa ni mawimbi hat̯a kiḍabva kunjia madzi. Hiyo hiyo saa, ae Yesu ewa ekiyaa. 25D̯ubva hawa wanafund̯iwe wamwendea wamuyamusa na madzwi wamwamba, “Ḅwana hupfonye, hwakuhihimiani!” 26Yesu kawambukuya kawamba, “Kut̯i mu woga dza hivi? E nywinywi muna faro ndoḍo t̯i!” Makisa kasumama kaḍibusa hiḍi vut̯o na haya mawimbi, na iyo saa ziwa ḍyonse ḍinyamaa mya! 27Hawa wanafund̯i wamaka muno hat̯a waḍabva kuuzana wao na wao wakyamba, “Huyu huyu ni muntu jwa namuna ga, jwa kwamba hat̯a vut̯o na mawimbi navyo vinamut̯ii?”
Yesu kapfonya wantu wawii weokuwa na mpepfo nzuka
Marko 5:1-20; Luka 8:26-39
28Yesu na wanafund̯iwe wepfokwojeka ḍoombe ya hiḍi ziwa, nsi ya Wagad̯ara,#8:28 Matsoro yangine ya Kiyunani yanakwamba: nsi ya Wagerasa. kendejwa ni wantu wawii weokuwa na mpepfo nzuka. Hawa hawa wantu wowii wekiishi maḅeerani na wewa wazuka muno chima cha kwamba hihiiḍe njia ntaikichijwa ni yuḍejwonse. 29D̯ubva wamuḅaiya madzwi Yesu wamwamba, “E Yesu Mwana jwa Muungu! Unaswini? Munamba kumakudzia kuhuhukumu kaḅila nsiku yehu#8:29 Hii ni nsiku ya hukumu ya mwiso. ntaidzafika?” 30Hafufi na hapfaḍe, kwiwa gwolu nkuu ya nguyuwe iyoikiisa. 31D̯ubva hizi mpepfo nzuka zimuyomba Yesu zimwamba, “Ikiwa kwamba ujwakuhuyavya, ḅasi huyatse hukainjie hiḍe gwolu ya nguyuwe hiiḍe.”
32Na Yesu kaziamuru kazyamba, “Endani!” Ndookomu hizi mpepfo nzuka ziwayawa hawaḍe wantu ziwanjia hawa nguyuwe. Iyo saa gwolu yonse ya nguyuwe id̯arama yenda igwa ḅaharini. Na nguyuwe wonse wafwa madzi tswee! 33D̯ubva hawa wat̯unga#8:33 Wagad̯ara wekifuga nguyuwe na kuwat̯unga dza mbuzi. wa hawaḍe nguyuwe kudzaona hivyo, wad̯arama wenda mudzini. Wenda wawasumwiiya wantu dzuu ya hivi viwahendekeyevyo hawa nguyuwe pfamodza na hawaḍe wantu weokuwa nezi mpepfo nzuka. 34Ndookomu wantu wonse humuḍe mudzini wanuka kwenda wakamuone Yesu. Na wepfomuona wamuyomba ayawe d̯aid̯oni mwao.
Tällä hetkellä valittuna:
Matayo 8: pkb
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2004, Bible Translation and Literacy
