Matayo 10

Yesu kahuma wanafund̯iwe kumi na wawii

Marko 3:13-19; 6:7-13; Luka 6:12-16; 9:1-6

1Yesu kawahana wanafund̯iwe kumi na wawii na kawapfa uwezo wa kuyavya mpepfo nzuka na kupfoza majwazi na nd̯wari za kula aina. 2Na haya ndiyo masari ya hawa *ntumi kumi na wawii: Jwa d̯ura ni Simioni eyeakihanigwa Pet̯ero, na ndugujwe eyeakihanigwa And̯erea. Wangine ni Yakobo na Yohana wana wa Zebed̯ayo. 3Na wangine ni aḍe Filipo, Bat̯olomayo, Tomasi, Matayo eyekuwa *muhwaa kuwa, Yakobo mwana jwa Alifayo, na Tadayo 4pfamodza na Simioni eyeakihanwa Jangina.#10:4 Huyu ewa ni muntu eyekuwa jwa kit̯aro cha Wayahud̯i chichochikihehea uhuru wa Wayahud̯i kuyawa kwa Warumi. Yungine ewa ni Yud̯a Isikariota, huyu adzeyeakimuḍawanya Yesu.

5D̯ubva Yesu kawahuma hawa ntumi kumi na wawii na kawaḍama kawamba, “Namutsekwenda kwa wantu wa vyeet̯i vingine wala kwenda midzi ya Wasamaria. 6Nywinywi endani kwa Waisiraeli t̯u. Wao waa dza mbuzi zyaariyezo. 7Endani mukawasumwiiye kwamba Uhaju wa Mbinguni umaawa hafufi.#10:7 Ambu: wisakufika. 8Pfozani wajwazi na kufufuya wafu. Wapfozeni hawaḍe weo na kwanga na kuyavya mpepfo nzuka. Dza mupfokeeyevyo ḅure hi hii t̯ola, nanywi kawahendeyeni wantu pfasipfo maipfo!

9Mukwakwendani, namutsedzitsukwiiya fwedha ziḍezonse#10:9 Haya matsoro ya Kiyunani yanakwamba: namutsetsukuya dhahaḅu, fwedha wala shaḅa. 10na wala namutsetsukuya minkoḅa ya kuwekea fwedha. Namutsetsukuya nguo zingine za kuperuya wala kuhwaa viyahu ambu kutsukuya nsimbo za kwenendea. Namutsedziwaryeghea kiḍechonse koro nywinywi mu wahenda kazi wangu, na kula muhenda kazi anamala kuḍya.

11Na kula mudzi ambu kadzidzi mudzekonjia, lachani muntu eye t̯ayari kumupfokea, mukae nyumbani mwakwe hat̯a mudzepfonuka kwenda mudzi ungine. 12Mukinjia nyumbani mwa huyo huyo muntu wakedhyeni hawa wenye nguzi. 13Ikiwa kwamba wakuḅali kumupfokea, wayatsiyeni mvoni. Ela wakitsamupfokea, hi mvoni inamuhafia nywinywi. 14Ikiwa kwamba mwenda nyumbani kwa muntu ambu munjia mudzi uḍewonse na muona kwamba ntaku muntu akuḅaliye kumupfokea, ḅasi iyaweni hiyo hiyo nyumba ambu huo huo mudzi. Na mukwakuyawani ḍiwakukuntieni hiḍi ḍukuu ḍya humu maguuni mwenu, kuyanga kwamba ntamukutsakizwa na hivi wahendeyevyo. 15Nami hachi nyakumwambiani, nsiku ya hukumu idzepfofika, Muungu anawafwia t̯ei zaid̯i wantu wa midzi ya Sod̯oma na Gomora, kuliko wantu wa huo huo mudzi!”

Yesu kawambia wanafund̯iwe dzuu ya mad̯ina wadzeyokunta

Marko 13:9-13; Luka 21:12-17

16Yesu kagija kunena na wanafund̯iwe kawamba, “T̯asikiani, nyakumuhumani mwende dza mbuzi za hako kahi ya mahiyeye. D̯ubva wani makaro muno dza nyoka, ela pia ni muwe wampowe dza ndiwa. 17D̯ubva manyani! Koro wantu wangine wadzamugija na kumupfiika magasani, na mudzabigwa na malucha masunagogini mwao. 18Kwa dzambo ḍyangu, mudzasit̯akigwa usoni ya mahaju na wat̯awala wangine. Nanywi mudzayavya ushuhuḍa dzuu yangu kwao na hat̯a kwa wantu wa vyeet̯i vingine. 19Na mudzepfogijwa, wala namutsehangaika na mat̯aro kwamba mwendanena kintu gani, ambu mwendadziheheadze. Koro hiyo hiyo saa ikifika Muungu kadzamumpa hivi vya kunena. 20Na munawa kwamba sinywi mwiwokunenani, ela huyu Ruhu jwa Muungu anawa kwamba ndiye eyekunenani kuchiiya na kwenu nywinywi.

21Wantu wadzawaḍawanya wandugu zao wakayagwe, na wavyazi wadzawaḍawanya wana wao wakayagwe. Wana nao wadzawagarukia wavyazi wao na kuwaḍawanya wakayagwe. 22Na wantu wenji wadzamukeva kwa dzambo ḍyangu. Ela huyuḍe adzeit̯isa hat̯a mwiso, kadzapfonywa. 23Mukikuntiswa d̯ina mudzi mumodza, d̯aramani mwende mudzi ungine. Hachi nyakumwambiani kwamba mimi *Mwana jwa Ad̯amu nakudza kaḅila ntamudzakwisa kuizinga midzi yonse ya Isiraeli.

24Mwanafund̯i si mukuu kumuchia mwaalimuwe, na wala muhumwa si mukuu kuchia huyu ḅwana jwakwe. 25Si viwi kwa mwanafund̯i kupata hayaḍe yeyonamupata mwaalimuwe. Na pia si viwi kwa muhumwa kupata hayaḍe yeyonamupata huyu ḅwana jwakwe. Koro ikiwa kwamba mimi muyongozi jwenu t̯u wanihana, ‘*Belizebuli,’ ehe fat̯i nywinywi wanafund̯i wangu wadzamumpa masari mazuka yeyodze! 26Ndookomu namutseshooga, koro ngera zakudzani ambapfo kula kifinikizijwecho kidzapfenujwa wekeani, na kula kifitsijwecho kidzamanyikana. 27Haya niyonakaa na kumuyongweeza kizani, yalalabveni kweupe. Na haya niyonakaa na kumunongonea, yalalabveni wekeani tswee ili kula mumodza ayasikie.

28Namutsewashooga hawaḍe weonaweza kumuyaga mii ḅasi na hali ntawa uwezo wa kuziyaga ruhu zenu. Ela mushoogeni Muungu, koro jeje ana uwezo wa kungiza *mohoni mwii na ruhu ya muntu, na avinange-nange tswee. 29Uriye nchiji wawii ntawanaguzwa kwa peni modza?#10:29 Ngera za Yesu kwikiguzwa nsongo garagara, na nchiji ndiwo weowakiguzwa ḅei ya nsi ya mwiso. Yani, nchiji wawii kwa peni modza, ḅei yezihiziḍe ngera. Ela hachi nyakumwambiani, Muungu Baba jwenu anawanahia chima cha kwamba, ntaku hat̯a mumodza jwao eyenaweza kugwa mutsangani pfasipfo jeje kutsaka. 30Na Muungu kamanya hat̯a ya kwamba vitswa vyenu vina nywii nyenga! 31Ndookomu namutseshooga kiḍechonse, koro kwa Muungu nywinywi muna maana zaid̯i kuchia hat̯a kumbi zima ḍya nsongo.

32Yuḍejwonse adzeenena usoni ya wantu kwamba jeje njwangu, nami nidzanena usoni kwa Baba jwangu jwa mbinguni kwamba huyo huyo muntu njwangu. 33Ela yuḍejwonse adzenikana usoni kwa wantu, nami nidzamukana usoni kwa Baba jwangu jwa mbinguni.”

Wantu wadzatsowa naghea kwa dzambo ḍya Yesu

Luka 12:51-53; 14:26-27

34Yesu kagija kunena kamba, “Namutset̯ara kwamba nidzia kuyeha naghea lumwenguni hat̯a, ela nidzia kuyeha nkondo. 35Koro nidzia kuwahendeza wanawayume wawagarukie wababa zao, na wanawake wawagarukie wamama zao, na wakaza wana wawagarukie wakwaangu zao wake. 36Na wazuka wa muntu wadzawa wantu wa nyumbani mwakwe jeje mwenye! 37Ikiwa kwamba muntu kamutsaka babajwe na mamajwe zaid̯i, kuliko kunitsaka mimi, ḅasi muntu dzae nkafae kuwa jwangu. Na muntu akimutsaka muuraniwe ambu mwanamukewe zaid̯i, kuliko kunitsaka mimi, nae pia huyo muntu nkafae kuwa jwangu. 38Yuḍejwonse asiyeutsukuya muhiwe wa mpatsa na kuniuḅa mimi, huyo nkafae kuwa jwangu. 39Yuḍejwonse atsakiye kuyapfonya maishaye ya hapfa lumwenguni anadzitsovya maisha ya kuunga na yuungo. Ela huyuḍe eye t̯ayari kudzitsovya maishaye ya lumwenguni kwa dzambo ḍyangu, huyo anapata maisha ya kuunga na yuungo.

40Yuḍejwonse adzeemupfokea nywinywi, kanipfokea mimi. Na muntu anipfokeeye mimi, kamupfokea huyuḍe anihumiye. 41Yuḍejwonse amupfokeeye *nabii jwa Muungu kwa dzambo ḍya kwamba huyu nabii ni muhumisi jwa Muungu, huyo anapfokea t̯ubvo ḍiḍyonapfegwa manabii. Na yuḍejwonse amupfokeeye muntu muhachi kwa dzambo ḍya kwamba ni muntu mwema, huyo nae anapfokea t̯ubvo ḍiḍyonapfegwa wantu wahachi. 42Yuḍejwonse adzeehwaa nangaa chikombe cha madzi ya mpepfo t̯u, amumpe mumodza jwa hawa wanafund̯i wangu hawa, weonahwajwa kwamba ntawa maana, huyo nkatsowe t̯ubvoḍye.”

Tällä hetkellä valittuna:

Matayo 10: pkb

Korostus

Jaa

Kopioi