Jɔɔn 19

1Paalɔt ale wom dii ate nuruma a weeni la, wa yaa basi ate tugurik tɔŋdɔma a miiri wa. 2Ba yaa yaali munsa a yɔk naam zutɔk vuk wa zukku ale ge pai garuk ŋmiŋmiruk a jo wa, 3a fɔbi wa ale a puusi wa ayen, <<Juuma naawa, ti a puusi fu.>> 4Paalɔt yaa ŋman nyini Juuma jigi dabiaka po a weeni ba ayen, <<M le ŋman ta wa a nyini a sak ni, ate ni seba ayen mi an nya kaasuŋ wa jigiya.>> 5Tugurik tɔŋdɔma yaa deri ta Yeezu a nyini zaani nuru boanni niŋ. Wa diem jam jo ka wa garuk ŋmiŋmiruku ale vuk wa naam zutɔkka. Paalɔt yaa weeni nuru boanni ayen, <<Ni nya, nuruwa ale nna.>> 6Ase kaabteerɔ kpaŋŋa ale ba nuruba ale ga nya wa la, ba yaa kaari ate ku jueli ayen, <<Ko wa! Ko wa!>> Paalɔt yaa weeni ba ayen, <<Ni dek yik wa a ta ga ko, mi an nya wa kaasuŋŋoa.>> 7Nuru boanni a yaa weeni wa ayen, <<Tama sinsaŋŋa a sak ti kama ayen ku a magsi kama ate nuruwa de a kpi, dii nyiŋla wa pai ka wadek a chim Wen Nidoabili.>>#19:7 Kaabka 24:16

8Paalɔt ale wom dii ate ba weeni la, yɔgsum yaa yik wa nna yegayega. 9Wa yaa ŋman cheŋ ga jo buusa yenni po, a bek Yeezu ayen, <<Fi nyini ka be?>> Alege Yeezu an tulisi ya. 10Paalɔt yaa ŋman bek wa ayen, <<Fi kan biisi ale mu? Fi zɛ ayen mi ta pagrim a baga vari fu a basi ale ŋman baga a kpi fu jabarimu nyiŋŋa?>> 11Yeezu yaa tulisi wa ayen, <<Ase Wen a dan kan te fu pagrimu de, fi an baga a nye mi wari ya. Nuru waai ale pai mu a nyo fi nisa po la, wala biemu a gaam fi biemu kama.>> 12Kude nyiŋ Paalɔt yaa nye popola ayen wa basi wa, alege Juuma a kaari ate ku jueli ayen, <<Fi dan basi nuruwa de fi daa Siiza doa, waai meena ale a bobi naam la a ta ka chaab ale Siiza.>>

13Ase Paalɔt ale ga wom wieŋa de la, wa yaa ta Yeezu nyini ale kali buusa boka zukpaglika zuk juijui ate ba a wi ayen tintana suik la, Yiburu tɛŋka biika po dula yuei ale Gabata. 14Ku jam ka baŋ pi ale buye kantueŋ. Da dila danni mɛ ate Juuma a boro a gomsi ba Gaambasika Tigini daaŋa. Paalɔt yaa weeni nuru boanni ayen, <<Ni nya, ni naawa ale nna.>> 15Ba yaa ŋman kaari ayen, <<Ko wa! Ko wa! Basi ate ba kpi wa jabarimu nyiŋ!>> Paalɔt yaa weeni ba ayen, <<Nama a yaali ayen m basi ate ba ta ni naawa a ga kpi ka jabarimu nyiŋŋa?>> Kaabteerɔ kpaŋŋa baai ale jam bo nuru boanni po la, yaa kaari ayen, <<Naab waai nyiini ate ti ta la ale Siiza.>>

16Paalɔt yaa jam weeni wa tugurik tɔŋdɔma ayen ba ta Yeezu a cheŋ a ga kpi wa jabarimu nyiŋ ate wa kpi. Ba yaa deri yik wa.

17Ba jam pai ka jabarim a te Yeezu ayen wa ji ate ba cheŋ juijui ate Juuma a wi ale badek tɛŋka biika ayen, <<Golgota>> la. Dula jigini kiri a jam le zukoluku jigini. 18Ba le ga paari ku jigini la, ba yaa pai wa a kpi jabarimu nyiŋ. Ba jam maa ta ka nuruba baye a jam kpi ŋanbarinta nyiŋ dula jigini a gum Yeezu po, ate wanyi a bo wa gala nwala mɛ a bo wa juga. 19Paalɔt a jam ŋmarisi ka jaab a maŋ wa jabarimu nyiŋ. Dii ate ba jam ŋmarisi la ale, <<Yeezu Nazaret Denɔwa Ale Juuma Naawa.>> 20Ba le jam kpi Yeezu juijui la an yalima ale Jerusalem tɛŋka. Juuma yegayega yaa jam nyini ba tɛŋka a cheŋ ayen ba nya jabuui ale jam a nye la. Ba le ga paari dula jigini la, ba yaa nya tugurik tɔŋdɔma ale ŋmarisi dii a pai maŋ la. Ba jam pai ka biisa buta a ŋmarisi, si jam ka Juuma ale Girik demma ale Aroom demma biisaŋa. 21Juuma kaabteerɔ kpaŋŋa yaa weeni Paalɔt ayen, <<Kan ŋmarisi ayen, <Juuma naawa ale la,> alege nuruwa de ayen, <Mi ka Juuma naab.> >> 22Paalɔt yaa tulisi ayen, <<Dii ate mi ŋmarisi la, m ŋmarisi kama.>>

23Tugurik tɔŋdɔma ale jam kpi Yeezu jabarimu nyiŋ la, ba yaa pai wa gattaŋa a lab bunaansi, tugurik tɔŋdɔ meena kunyi, ale wa garuk woŋku mɛ. Alege garuk woŋku ba jam yɔk ku kama a nyini ŋmazuk a siŋ tɛŋ. 24Ba yaa weeni chaab ayen, <<Ni kan basi ate ti cheeri ku, alege ni basi ate ti nak gbaŋ a nya waai dek ale wa dɛ garukku la.>> Tugurik tɔŋdɔma ale ga nye dila la, dii ate ba jam ŋmarisi Wen Gbaŋka po la a chim wensie. Ba ŋmarisi ayen, <<Ba pai m ŋmazuk gattaŋa a chari chaab, ate m gattaŋa nyiŋ ba nak gbaŋ.>> (Yiila 22:18) Tugurik tɔŋdɔma ale jam nye diila ale la. 25Yeezu mawa, ale wa mawa suoku, ale Kolopase powa Mɛɛri ale Mɛɛri Magdalene ale jam za a moata Yeezu kama. 26Yeezu yaa nya wa mawa ale wa za moata wa ŋaaŋviirɔ waai ate wa jam a yaali nna yegayega la. Wa yaa weeni wa mawa ayen, <<Nipowa nya fi nidoabinni.>> 27Yeezu yaa ŋman weeni wa ŋaaŋviirɔ waai ate wa a yaali nna yegayega la ayen, <<Nya fi mawa.>> A nyini da dila danni, a cheŋ ŋaaŋviirɔwa yaa jam ta Mɛɛri a kuli wadek yenni.

28Yeezu ale weeni dila la, wa yaa deri seba ayen wa tuimaŋa tɛŋzuk de a nueri kama, ate wa yaa weeni ayen, <<Nyanyuila ale ta mu.>> Wa weeni wieŋa de kama ate dii ate ba ŋmarisi Wen Gbaŋka po dipo la a chim wensie. 29Damiisiŋ ale jam bo chin po a za dula, nuru baai ale jam za dula jigini la wanyi a yaa yaali sosok a pai lusi bu po a pai yik diok woŋ nyiŋ a zak ta jueli Yeezu jigi ayen wa nyu. 30Yeezu yaa nyu ale weeni ayen, <<Ku nueri kama.>> Wa le weeni dila a ga nueri la, wa yaa deri chigsi wa zukku tɛŋ a kpi.#19:18-30 Nya fotowa, Matiu 27:38-56.

31Ase ku le jam ka Gomsika Dai la, ba an jam a yaali ayen Yeezu nyiŋka a bo jabarimu zuk Vuusum Danni ale paasaŋ la, Juuma yaa weeni Paalɔt ayen wa te suik ate ba wɛ ba naŋsaŋa abe ba yeeri ba ŋanbarintaŋa zuk. 32Wa yaa siak ate ba cheŋ. Ba le ga la, ba yaa liŋ wɛ nuru baai bayewa ate ba kpi a gum Yeezu po dula jigini la naŋsaŋa. 33Ba le ga ayen ba wɛ Yeezu naŋsaŋa la, ba yaa nya ale wa kpi kama ate ba yaa pai wa naŋsaŋa weka a basi. 34Tugurik tɔŋdɔma wanyi yaa pai gbaluk a chubi wa gauŋku ate ziim ale nyiam a nyini. 35Ka mi dek, Jɔɔn, ale nya ale m nina. Ka dila ale soa ate mi ale ŋmarisi diila ka wensie la. Mi a weeni ni kama ayen ni ta siaka ale ku. 36Kude a nye kama ayen Wen wieŋa a chim wensie. <<Wa kobi yeŋ mɛ la an wɛ ya.>> (Yiila 34:20) 37Ba ŋman ŋmarisi Wen Gbaŋka po ayen, <<Ba le nya waai ate ba chub ale gbaluku la.>> (Zakaria 12:10)

38Ku ŋaaŋnyiŋ Josefi Arimatia denɔwa ale jam ka Yeezu susugi ŋaaŋviirɔ Juuma yɔgsum chalika nyiŋ la, yaa ga bek Paalɔt ayen wa te wa suik ate wa ta Yeezu nyiŋka ga gu, ate Paalɔt a te wa suik ate wa ga yeeri nyiŋka a ta cheŋ. 39Nikodimusi waai ale jam liŋ cheŋ Yeezu jigi yokku la, a jam maa bo dula kama a yaa ta wa kpaam, bu nyummu a jam masa kama.#19:39 Mir ale alos ka kpa tii ale ta nyum masik ate ba pai a sa kpieba a gu. 40Ba yaa jam pai kpaamu a sa Yeezu nyiŋka ale ge a pai guka garuk pali naliŋ a vili wa. Juuma ale a gu ba nuruba diila ale la. 41Juijui ate ba kpi Yeezu jabarimu nyiŋla, ba jam vuk ka tiisa. Dula jigini puŋ vɔrup ale jam boro ate ba an diem a gu nuru du a nya ya. 42Ba jam a yaali ayen ba ta Yeezu a ga gu ka vɔrup bula po, dii nyiŋla Juuma Gomsika daaŋa a jam paari kama a nueri.

Tällä hetkellä valittuna:

Jɔɔn 19: BWU

Korostus

Jaa

Kopioi