Tuima 19
19
1Apolos ale jam bo Korinti la, Pɔɔl yaa cheŋ va Galatia ale Firijiya tɛŋsaŋa suŋsuŋ a taam nyini cheŋ Efisos. Dula jigini, wa yaa nya ŋaaŋviirɔba ba gela 2a yaa bek ba ayen, <<Diipo ate nama chim Kirisita bisa la, nama tuesi Wen Chiika?>> Ba yaa tulisi wa ayen, <<Tama an poom wom ayen Wen Chiik boro.>>
3Pɔɔl yaa bek ba ayen, <<Ka boan soka ate nama a tuesi?>> Ba yaa tulisi Pɔɔl ayen, <<Ka Jɔɔn soka ate tama tuesi.>>
4Pɔɔl yaa tulisi ayen, <<So kaai ate Jɔɔn te la, wa te ka baai ale basi ba wabaataŋa tomka la. Wa jam te ba kama ale ge weeni Izirali demma ayen ba be pai badek a te waai ale bo ŋaaŋ a cheena la. Kula nyɔnɔwa ale Yeezu.>>
5Ba ale wom nna la, ba yaa tuesi soka Nyɔnɔwa Yeezu yuenni nyiŋ. 6Pɔɔl yaa pai nisima a vi ba zuk ate Wen Chiika yaa siŋ jam ba zuk ate ba deri jam biisi biik sii ale kan daa badek biisa la a yaa weeni Wen ale weeni ba ayen ba weeni diila. 7Ba meena jam a nye ase ka nuruba pi ale baye la.
8Chiisa sita meena Pɔɔl kasim jam a jo ka Juuma tuka yenni po a biisi wie ale nuruma. Pɔɔl a kasim pii nyiŋ a biisi ale ba ayen ba miŋ chak Wen naamu wie ale ka diila. 9Alege ba gela tue a jam kpari ate ba jam kan yaali ayen ba ta siaka, ate ba jam a biisi biik bulorisa nuruma meena niŋ a magsi chaab ale Wen Suiku la, Pɔɔl yaa yik ŋaaŋviirɔma ate ba maa chaab a basi ba ale cheŋ. Daa meena Tiranus yenni po Pɔɔl jam a biisi ka biik ale nuruba dɔk kpioŋ kuui po ate nuruba kali a sak nuruba la. 10Wa kasim jam a nye ka dila ate ku ga paari bena ŋaye ate nuru baai meena ale jam bo Asia tɛŋka po la, Juuma ale baai ale kan daa Juuba, a jam wom Naawen wanni.
11Wen a jam pai Pɔɔl a tom wakperikaliisa ate ŋa nye ŋa tɔga. 12Nuruma gela a jam pai ka lakiba ale garuk tii ale tiri wa la a ta ga tiri yɔgnyieŋsaŋa. Ba ale jam nye dila la, yɔgnyieŋsaŋa a nya nyiŋyɔgsa kama ate chichirik baata a basi nuruba. 13Juuma baai mɛ ale jam boro a nyiem a gilim a yiak chichirik baata nuruba po a basi la, ba me a jam pii ka nyiŋ pai Nyɔnɔwa Yeezu yuenni nyiŋ a nye dila. Ba yaa weeni chichirik baataŋa ayen, <<Yeezu waai ate Pɔɔl a sak wa wieŋa la, yuenni nyiŋ ate mi a weeni fu ayen fi nyini nuruwa po a nyini.>> 14Sikiiva, Juuma kaabteerɔ kpaŋŋa wanyi, nidoabilisa bayopɔi ale jaa nye dila.
15Dai yeŋ chichirik bioku yaa weeni ba ayen, <<Mi seba Yeezu kama, m be seba Pɔɔl mɛ kama. Alege nama, ka bana?>>
16Nuru waai ate chichirik bioku bo wa po la yaa yiti tu chaab ale ba a nya pagrim ba zuk, ate ku jo ba nyiŋ ate ba chali nyini yenni po a nyini ale chaboala ale mula. 17Juuma meena ale baai ale kan daa Juuba ate ba meena bo Efisos la a jam wom nya kude kama ate yɔgsum yaa jam yik ba meena ate Nyɔnɔwa Yeezu yuenni a jam nya zula nna yegayega. 18Baai ale chim Kirisita bisa yɔgyɔgla de la bala yegayega yaa jam nyini peelim a siak ale a weeni wie ŋaai ate ba jam nye la. 19Baai ale jam ka tinansa nyam la yaa ta ba gbaŋsaŋa a jam jigi yeŋ a ju si waai meena niŋ, ba le jam ŋmɛ ligraŋa a gum chaab la jam ka ligbie tusa pisinu (50,000). 20Dila Wen wanni a kasim jam a tagli tɛŋka meena ale pagrim.
21Wieŋa de meena ale ga nye la ŋaaŋnyiŋ ate Pɔɔl yaa poli ayen wa le va ka Masidoniya ale Akaaya ŋaaŋnyiŋ a taam cheŋ Jerusalem. Wa yaa weeni wadek ayen, <<M dan cheŋ dula, ku a fɛ kama ayen m basi dula abe m cheŋ Aroom tɛŋka.>> 22Dila nyiŋ wa yaa tom baai ale a maari wa la po baye, Timoti ale Erasitus ayen ba cheŋ Masidoniya ale ge ate wadek a diem wari Asia tɛŋka ate ku beni maga.
23Ku jam ka dila powa dek ate daani kpieŋ a jan jam Efisos tɛŋka ti Wenni Suiku wieŋa nyiŋ. 24Nuru ale jam boro wa yuei ale Dimetirus, wa jam ka choabiik, wa jam mɛ ka jaab ate wa nye ase nipok bɔglukku Atimis la. Baai ale jam a tom tuini de la a jam ka ligra. 25Wa yaa jam wi nuruma de chaab ale baai ale a tom ale ba la ate ba jam jigi yeŋ ate ba nye tuka. Wa yaa weeni ba ayen, <<M doaba, nama dek seba ayen ti jigsika meena a nyini ka tuini de po. 26Nama dek abe nya kama ale wom nuruwa de Pɔɔl ale a nye diila. Wa a weeni kama ayen bɔgluk tii ate nuruba pai ba nisima nye la, a ka pagrim fiik fiik mɛ la. Wa biisi dila a paasi nuruba yegayega kama. Efisos ale Asia tɛŋka meena po ba siak wa ale a biisi diila kama. 27Mi abe a chali ka yɔgsum ayen ti tuimaŋa de ale nya ka yuei kaasuŋ. Daa dila nyiini, mi a chali yɔgsum mɛ ayen bɔgluk kpioŋku Atimis yenni kan ta kiri ya. Bɔglukku dek mɛ le jɔk yuei, ku kan ŋman nya zula. Waai meena Asia tɛŋka po ale tɛŋka meena ale doa a ga saari la abe a te zula bɔglukku de kama.>>
28Nuru boanni ale ga wom wieŋa de la, ku yaa puuri ba sue ate ba yaa deri a kaari a weeni ate ku a jueli wein a tulisi chaab ayen, <<Efisos bɔglukku Atimis ka bɔgluk kpioŋ.>> 29Nuem ka de yaa jam deri basi ate Efisos tɛŋka po meena a nye nna ŋaglam. Nuru boanni de yaa maa chaab a yik Masidoniya demma bayewa ate ba a wi ba ayen Gayus ale Arisitaakus la. Ba jam va ka Pɔɔl a cheŋ ate ba yaa yik ba nɔi bayewa a ta ba chali cheŋ juijui ate tɛŋka nuruma a nyiem tigsi chaab a nye tuka la. 30Pɔɔl dek a jam a yaali kama ayen wa zaani nuru boanni niŋ a biisi alege Kirisita bisaŋa an jam siak ate wa nye dila. 31Tɛŋka meena kpaŋŋa gela baai ale jam ka Pɔɔl doaba la, ba mɛ a jam maa te Pɔɔl tuntomiŋ a saalim wa ayen wa kan pai naŋ a tabi tuka jigini. 32Ba gela a weeni wayeŋ, ba gela mɛ a na a weeni wa di choa, dii nyiŋla, ba yegayega jam poom zɛ ba ale jam ayen ba nye tuka ale dii nyiŋla, ba jam butim kama. 33Juuma yaa weeni Alezanda ate wa taam niŋ ate nuru boanni ba gela yaa kaari ate ku jueli a weeni a sak wa, wa le wa weeni diila. Alezanda yaa zak nisima ayen ba goori ate wa biisi a tuesi Juuma basi. 34Alege ba ale ga miŋ ayen wa ka Juu la, ba meena yaa kasim a nuem a na ale nɔiyeŋ ate ku a jueli a ayen, <<Efisos bɔglukku, Atimis ka bɔgluk kpioŋ.>> Ba kasim jam a weeni ka nna ate ku ga beni nna yegayega.
35Kpaŋŋa dinyi waai ale ta pagrim a nya nuru boari zuk la yaa weeni ate nuru boanni a goori. Wa weeni ba ayen, <<M mabisa, Efisos demma waai meena seba kama ayen ka Efisos tɛŋka ale a nya bɔgluk kpioŋku Atimis yenni zuk. Ka maara nya ka tintain weleŋ kaai ale nyini wenŋmazuk a jam lo la zuk.
36<<Nuru abe karo a nak nanpaga ayen nyaŋa de daa wensie. Dila nyiŋla, ku a fɛ kama ayen ni goori abe ni poli abe ni kan nye wari dii ale kan ta kiri la. 37Ni ale ta nuruma de a jam dela nna, ba be an zu jaab jaaboa Atimis yenni po, yaase ba lɛ ku. 38Dimetirus ale wa nuruma abe dan ta wari a magsi chaab ale nuru waai, ti be ta Aroom tɛŋka kpaŋŋa kama, dɔk kuui ate ba a biisi biisaŋa la, abe kasim lagri za kama daa meena ate waai a dan ta wa biik ayen wa biisi, wa a cheŋ ka dula. 39Alege ku dan ka wari dii ate ni ŋman ta bega ŋa chaab, ku a fɛ kama ayen ti biisi nya kude ti tuka dai a nueri. 40Mi a weeni kude kama dii nyiŋla, nuruba gela ale nya daanika jinla ayen tama ta ka wɔkwɔk cheena, te kan bag biisi ate ba miŋi dii nyiŋla ti potim ka wari a zaani di zuwa.>> 41Tɛŋka kpagni ale biisi wieŋa de la ŋaaŋnyiŋ wa yaa weeni nuruma ayen ba kuli yeri.
Tällä hetkellä valittuna:
Tuima 19: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
