Tuima 1
1
1Mi ale liŋ ŋmarisi gbaŋ kaai a te Teofilos la, a weeni ka Yeezu ale jam piilim nye dii ale sak dii la, 2a ta ga paari dai dii danni ate wa jueli wenŋmazuk la. Ale ge ate kude nye la, Wen Chiika a jam maari wa kama ate wa weeni wa tomteerɔma ayen mi lueri ni kama ni ale ni nye diila. 3Wa ale kpi la, ŋaaŋnyiŋ ku ale jam paari daa pisinaansi la, wa yaa pai wadek a sak ba ate ku paari dii choa ayen ku sak ayen wa vua kama. Wa yaa sak ba Wen naamu wie. 4Wa ale jam boro ale ba la, Yeezu yaa weeni ba ayen, <<Ni kan ŋman basi Jerusalem tɛŋka. Alege ni limisi m Kowa pumpuulimaŋa ŋaai ate wa weeni ayen, <Nama dek abe wom a nyini m jigi kama.> 5Jɔɔn a te ni soka ale ka nyiam, alege ku kan beni ate Wen pai wa Chiika ase soka la a sueri ni suiniimaŋa.>>
6Ba ale jam jigi yeŋ la ba yaa bek wa ayen, <<Ti Nyɔnɔ, yɔgyɔgla de fi le pai Izirali naamu a ŋman te ba?>>
7Wa yaa tulisi ba ayen, <<Ku daa nama wari ayen ni seba diipo ate Kowa a lueri ale wadek pagrim la. 8Alege ni le nya pagrim ase Wen Chiika a nin jam ni jigi, ate nama ale chim m seerɔba Jerusalem ale Judia ale Samaria tɛŋsaŋa po ale tɛŋzuk de meena kpeglimka jigi.>> 9Yeezu ale biisi a nueri la, Wen yaa pai wa a ta jueli wenŋmazuk. Ba yaa za a nya wa ale a jueli la, ate chiŋmari a jam lik wa ta jueli ate ba an ŋman nya wa.
10Ba ale za a nya la, nuruba baye a deri jam a za ba niŋ. Ba jam jo ka garuk peeta, 11a yaa weeni ba ayen, <<Nama Galili demma, ka boa ate ni za zak a nya wenŋmazuwa? Yeezuwa de ate ni nya ale wa jueli wenŋmazuk dii la, wa le ŋman pilim jam ka dila dekdega ase ni le nya wa dii ale wa jueli wenŋmazuk la.>>
12Tuimtomdɔma yaa nyini guuk kuui ate ba a wi ayen Olivi Guuk la zuk a siŋ, a cheŋ Jerusalem tɛŋka. Ku jam yalima ase ka mɛɛli geli la ale Jerusalem. 13Ba ale jam paari la, ba yaa ga jueli kiani dɔkku po ate ba poom liŋ boro la. Ba jam ka Piita ale Jɔɔn ale Jeemsi ale Andiru ale Filip ale Tomasi ale Batolomiu ale Matiu ale Alfiyus nidoabinni Jeemsi, ale Simon waai nyiŋka ale jam a zeenti la ale Jeemsi nidoabinni Judas. 14Nyaba de meena ale nipooma ale Yeezu mawa Mɛɛri ale Yeezu suataŋa a kasim jam wari ka Wen puusika ale popola yena.
15Va ŋala po Piita yaa yiti zaani ayen wa biisi, nuruma meena jam paari ka nuruba kook ale pisiye. Piita yaa weeni ayen, 16<<M suata, Wen ale weeni dii la a magsi ka di nye, dii ate Wen Chiika a va Deevid zuk a ŋaam biisi Judas waai ale jam de baai ale yik Yeezu la niŋ. 17Wa jam ka ti po wanyi, wa mɛ a jam ta wa tuini kama a tom.>>
18Judas ale jam nye biem a nya ligni la, wa da ka talim. Alege wa jam lo kama a na ate wa nyuetaŋa a nyini ate wa kpi. 19Waai meena Jerusalem tɛŋka po a jam wom wanni de kama ate ba yaa jam a wi talim bula ayen Akeldama. Ku kiri ale Ziimu tɛŋka.
20<<Ku ŋmarisi Yiila Gbaŋka po kama ayen, <Basi ate ba boka jigini a duak koruk, kan basi ate waai tali wari du, (Yiila 69:25) abe nuru yoŋ a tuesi wa kpaŋtaŋa jigini.> (Yiila 109:8)
21<<Dila nyiŋ ku magsi kama ayen ti lueri nuru baai ale jam bo ale ti diipo meena ate ti Nyɔnɔwa Yeezu a jam a nyiem ale ti la wanyi, 22a piilim Jɔɔn Soka teka daaŋa a ta jam paari diipo ate Wen a pai Yeezu a ta jueli la. Bade wanyi ale wa chim seerɔ ale tama wa ale yiti kum po la.>>
23Ba yaa lueri nuruba baye, Wanyiwa yuei jam le Josefi ate ba a wi ayen Baasabas la. Ba jam a wi wa mɛ ayen ka Jasitus. Wa choawa mɛ ale Matayas. 24Ba yaa puusi ayen, <<Ti Naawen yaa, fi seba nuru meena suinum po ale ka diila kama. Be sak ti nuruma de bayewa po, fi ale lueri ka waai 25ayen wa tagri tuimtomdɔwa Judas tuim ŋaai ate wa basi ale cheŋ wadek jigini la.>> 26Ba yaa nak gbaŋ ayen ba lueri nuru wala ate gbaŋka a yaa lueri Matayas ate ba yaa pai wa a gum tuimtomdɔba pi ale wanyiwa po.
Tällä hetkellä valittuna:
Tuima 1: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
