cēnisis 24
24
1ēprēām māka ki kisēyiniwiw mina ki ati ispisikihkāw; ēkosi kā tipēyihcikēt ki sawēyimēw ēprēāma misiwē isi. 2ēprēām māka ki itēw ot atoskēyākana kā ostēsimāwiskamiyit o wāskāhikan, kā pamitāyit kahkiyaw kēkway kā ayāt, astā ki pakosēyimitin kicihci sipā nipwāmihk; 3ki ka aspi kihci itwēitin māka kā tipēyihcikēt kisēmanito kā tipēyihtahk kisik, mina kisēmanito kā tipēyihtahk aski, ēkā kita mēkiskwēwamat nikosis otānisiyiwa kēnanaita kā witaskimimak. 4māka ki ka itohtān nit askihk, mina ki ka natawāpamāwak ni wākomākanak, ēkota māka kita ohtinimat kita wiwit nikosis āisak. 5ana atoskēyākan māka ki itwēw, kispin nantaw isi ana iskwēw ēkā itēyitaki kita pimitisaot ota askihk, ni ka itohtaāw ci māka kikosis kāwi anita askihk kā ki pē ohtotēyan? 6ēprēām māka ki itēw, mēyākwām ēkāwiya ēkotē mina itotah nikosis. 7kā tipēyihcikēt kisēmanito kihci kisikohk kā ayāt, kā ki otinit notāwiya wikiyihk ohci, mina ot askiyihk ni wākomākana ohci, mina kā ki kitosit, mina kā ki kihci isit, ē itwēt, kit awāsimisak ni ka miyāwak oma aski, ki ka nikānitēsaamāk okisikoma, ēkota māka ki ka ohtinimāwa kē wiwit nikosis. 8kispin māka ana iskwēw ēkā itēyitaki kita pimitisaosk, ki ka āpikonikon oma kihci itwēwin ohci, piko ēkāwiya ēkotē kāwi itotah nikosis. 9ana atoskēyākan māka ki astāw ocihci sipā opwāmiyihk ēprēāma ot okimāma, mina ē ki kihci itāt ēwakwēyiw ohci.
10ana atoskēyākan māka ki otinēw mitātaht piskwāwikana o piskwāwikanēmiyiwa ot okimāma, ēkosi ē ki sipwētēt, cikēmā kahkiyaw ot ayāwiniyiwa ot okimāma ki miciminam; ki sipwētēw māka, ki itohtēw mēsapotēmiya askihk, ot otēnāyihk nēhor. 11ki nipaskoēw māka opiskwāwikanēma wayawitimihk otēnāhk tipiskoc ohtaipānihk, ē ati otākosiniyik, ita māna iskwēwak kā wayawicik kita kwāpikēcik. 12ki itwēw māka, kā tipēyihcikēyan o kisēmanitoma nit okimām ēprēām, isitisahamawin kit isi natotamātin kita miyopayiyān anohc kā kisikāk, mina kisēwātotaw nit okimām ēprēām. 13mātika, ota ni nipawin ohtaipānihk; otānisiwāwa māka ayisiyiniwak otēnāhk pē natawi kwāpikēwak; 14kiyām kita ihkim ana oskinikiskwēw kē itak, pakitina ki kwāpikākan ki pakosēyimitin kita minihkwēyān, itwēci māka, minihkwē, mina māka ki piskwāwikanēmak ni ka minaāwak, kiyām ēwako kita āwiw anihi kā ki oyakitamawat kit atoskēyākan āisak; ēkota māka ni ka ohci kiskēyitēn ē ki kisēwātotawat nit okimām.
15ki ispayiw māka mwayēs poni pikiskwēt, poti ripēka ki pē wayawiw, ēwako kā ki nihtāwikitamāht pētyoil, okosisa milka, wiwa nēhor, ēprēām ociwāma, ē pē onikātahk o kwāpikākan. 16ana oskinikiskwēw māka nāspic ki katawasisiw ē itāpaminākosit, kwayask oskinikiskwēw, ēkā awiya nāpēwa ē ki ohci kiskēyimikot, ki nāsipēw māka ohtaipanihk, ēkosi ki moskinatāw o kwāpikākan mina ē ki pē āmaciwēt. 17ana atoskēyākan māka ki ispatāw ē natawi nakiskawāt, omisi ē ki itāt, ki pakosēyimitin kiyām apisis nipi ni ka minikwān ki kwāpikākanihk ohci. 18ki itik māka, minihkwē nit okimām, ki kakwēyāo māka ē ki pakicinikātahk o kwāpikākan ēkosi ē ki minaāt. 19ispi māka kā poni minaāt omisi ki itēw, ni ka kwāpikawāwak mina ki piskwāwikanēmak isko iyikohk ki minihkwētwāwi. 20ki kakwēyāo māka ē ki sikinahk o kwāpikākan wāyikahikanihk, mina māka ē ki ispatāt monaipānihk kita kwāpaahk nipi ēkosi ē ki kwāpikāwāt kahkiyaw o piskwāwikanēmiyiwa. 21ana māka nāpēw ē māmaskātāt nama nāntaw itwēw, ē wi kiskēyitahk māhti kā tipēyihcikēyit kā naipayiikokwē kā ohci pimohtēot ahpo ēkā. 22ki ispayiw māka ispi piskwāwikana kā poni minihkwēyit ana nāpēw ki otinēw osawi soniyāwi tāpitēpisona āpitaw sēkil ē ispitinikwatiyit, mina niso mispitonāpiskwa ocihciyihk kita astāyit mitātaht sēkil ē ispitinikwaki osāwi soniyāw. 23ki itēw māka, awēna otānisa kiya? wihtamawin ki pakosēyimitin. tawāyiw ci kotāwi wiki ita kita ki ayāyāhk? 24omisi māka ki itik, niya otānisā pētyoil okosisa milka kā ki nihtāwikitamawāt nēhora. 25mina māka ki ati itēw, nit ayānān ēkoyikohk pahkwēsikanaskwa mina awakāni miciwin, mina tawāw kita ayāyēk. 26ana māka nāpēw ki nawakiskwēyiw ē ayamihāwi atoskawāt kā tipēyihcikēyit. 27ki itwēw māka, kita wi nanāskomāw kā tipēyihcikēt o kisēmanitoma nokimām ēprēām, ana ēkā kā ki maniāt nit okimāma o kisēwātisiwin mina o tāpwēwin; mēskanāhk ni ki ayān, kā tipēyihcikēt māka ni ki pē isi kiskinotahik wikiyihk nokimāma ociwāmiyiwa. 28ana oskinikiskwēw māka ki ispatāw ēkosi ē ki wihtamawāt okāwiya wikiyihk kā ayāyit.
29ripēka māka ki otawēmāw lēpān ē isiyihkāsoyit; lēpān māka ki ispatāw ita ē ayāyit anihi nāpēwa anita ohtaipānihk. 30ki ispayiw māka ispi wiyāpahtahk tāpitēpisona mina mispitonāpiskwa ocihciyihk otawēmāwa, mina ispi kā pēhtahk kā itwēyit ripēkawa otawēmāwa, ē itwēyit, ēkosi oma kā isit ana nāpēw, ki pē nātēw anihi nāpēwa, ēkosi poti ki nipawistawēyiwa piskwawikana anita ohtaipānihk. 31ki itwēw māka, pē pihtokē, kā sawēyimisk kā tipēyihcikēt, tānēhki wayawitimihk kā nipawiyan? cikēmā ni ki kwayācihtān wāskāhikan mina ita kē ayācik piskwāwikanak.
32ēkosi ana nāpēw ki pihtokēw wāskāhikanihk, ki āyāpaomēw māka o piskwāwikanēmiyiwa, mina ē ki miyāt piskwāwikana pahkwēsikanaskwa mina awakāni miciwin, mina nipi kita kisipēkinamiyit ositiyiwa mina ositiyiwa anihi nāpēwa kā wicēwikot. 33ēkota māka ki oyāstamawāw miciwin kita micisot, māka ki itwēw, namawiya ni ka micison pātimā piko ki wihtamāni nit atotēkowin. ki itik māka, pikiskwē. 34ēkosi ki itwēw, niya ēprēām nit atoskawāw. 35kā tipēyihcikēt māka ki kihci sawēyimēw nokimāma, ēkosi māka ati kihcāyiwiw; mina ki miyik māyatihkwa, mina awakāna mina wāpiski soniyāwa, mina osāwi soniyāwa, nāpēw atoskēyākana mina iskwēw atoskēyākana, mina piskwāwikana mina sosomistatimwa. 36sērah māka nit okimām wiwa, ki nihtāwikitamawēw okosisiyiwa nit okimāma ē kisēyiniwiyit, ēwakoni māka kā miyāt kahkiyaw anima kā isi ayāt. 37nit okimām māka ni ki kihci itwēik, ē itwēt, namawiya ki ka otinimāwa kē wiwit nikosis otānisiyiwa kēnanaita kā witaskimimak. 38māka ki ka itohtān notāwi wikihk, mina ni wākomākanak, ēkota māka kē ohtiniskwēwēstamawat nikosis. 39ni ki itāw māka nit okimām, māskoc nāntaw isi ana iskwēw namawiya ni ka pē pimitisahok. 40omisi māka ni ki itik, kā tipēyihcikēt ot āstamiwinihk kā pimohtēyān, kita isitisawēw okisikoma kita wicēwisk, mina kita nanahipayik ki pimohtēowin, ni wākomākanak māka mina notāwi wikihk ki ka ohtiniskwēwēstamawāw nikosis. 41ēkosi māka ki ka pakitinikon oma kā kihci itwēitān ispi otitatwāwi ni wākomākanak; kispin māka ēkā miyiskwāwi, ēkosi ki ka pakitinikon kā kihci itwēitān. 42ni ki takosinin māka anohc kā kisikāk ohtaipānihk, omisi māka ni ki itwān, tēpēyihcikēyan, o kisēmanitoma ēprēām nit okimām, kispin anohc ki naipayitān oma kā itohtēyān, 43mātika, ni nipawin ciki ohtaipānihk, kiyām māka kita ispayiw ana oskinikiskwēw ē pē natawi kwapikēt kē itak, miyin ki pakosēyimitin apisis nipi ki kwapikākanihk ohci kita minihkwēyān; 44isici māka, minihkwē kiya, mina māka ni ka kwāpikawāwak ki piskwāwikanēmak, kiyām kita āwiw ēwako iskwēw kā tipēyihcikēt kā ki oyakitamawāt nit okimāma okosisiyiwa. 45mwayēs māka poni pikiskwēyān nitēhihk, poti ripēka ki pē itohtēw, ē pē onikātahk o kwāpikākan ki itohtēw māka ohtaipānihk ē kwāpaahk nipi; omisi māka ni ki itāw, kiyām ni ka minikwān ki pakosēyimitin. 46ki kakwēyāo māka ē ki pakicinikātahk o kwāpikākan omisi ē ki itwēt, minihkwē, mina māka ni ka minaāwak ki piskwāwikanēmak. ni ki minikwān māka mina ē ki minaāt piskwāwikana. 47ni ki kakwēcimāw māka ē itak, awēna otānisa kiya? ki itwēw māka, otānisa pētyoil, nēhor okosisa, anihi milka kā ki nihtāwikitamākot; ni ki akomoimāwa māka tāpitēpisona mina mispitonāpiskwa ocihcihk. 48ni ki patapiskwēyin māka ē ki ayamihāwi atoskawak kā tipēyihcikēt, mina ē ki nanāskomak kā tipēyihcikēt o kisēmanitoma nit okimām ēprēām kwayask kā ki kiskinotait kita otinimak nit okimām ociwāma otānisiyiwa okosisa kita ayāwāyit. 49ēkwa māka kispin ki wi ihtotawāwāw nit okimām kisēwātisiwinihk mina tāpwēwinihk, wihtamawik; kispin māka namawiya, wihtamawik kiyām; kita isi kiwēyān kihciniskihk ahpo namatinihk isi. 50ēkwa lēpān mina pētyoil ki naskwēwasimēwak mina ē ki itwēcik, kā tipēyihcikēt ohcipayiw oma; nama kēkway ē miywāsik ahpo ē māyātahk ki ka ki ititinān. 51mātika, ripēka ki wāpamāw, otin mina sēpwētē, kiyām māka kit okimām okosisa kita wiwiw, mwēhci kā tipēyihcikēt kā ki itwēt. 52ki ayikin māka ispi ēprēām ot atoskēyākana piyētāhk kā itwēyit ki nawakistawēw kā tipēyihcikēyit mocihk isi. 53ana māka atoskēyākan ki moskinam wāpiski soniyāwi wawēsiowina, mina osāwi soniyāwi wawēsiowina, mina kikiskācikana, ēkosi ki miyēw ripēkawa; mina māka ki miyimēw otawēmāyiwa mina okāwiyiwa ē miywāsiniyiki. 54ki micisowak māka mina ki minihkwēwak, wiya mina nāpēwa kā wicēwāt, kapētipisk ēkota ē ki ayācik; ki waniskāwak māka ē kēkisēpāyāyik ki itwēw māka, sipwētisahok kita natawāpamak nit okimām. 55māka otawēmāwa mina okāwiya ki itwēyiwa, kiyām kanakē mitātaht kisikāwa ni ka wiciayāmikonān oskinikiskwēw, ēkwa māka kē sipwētaat. 56omisi māka ki itwēw, ēkāwiya otamiik, wiya miyāmā kā tipēyihcikēt ē ki nanahipayiit; sipwētisahok kita nātak nit okimām. 57ki itwēwak māka, ni ka natomānān oskinikiskwēw kita kakwēcimāyahk kē itwēkwē. 58ēkosi ki natomēwak ripēkawa, mina ki itēwak, ki ka wicēwāw ci awa nāpēw? ēkosi ki itwēw, ni ka wicēwāw. 59ēkosi ki sipwētisawēwak ripēkawa otawēmāwāwa, mina kā kanawēyimikoyit, asici ēprēām ot atoskēyākana mina ot oskinikima. 60ki sawēyimēwak māka ripēkawa omisi ē ki itācik, kiya nitawēmānān kiyām ki ka okāwimikwak kihci mitāhtomitanawāw mitāhtwāw kihci mitāhtomitanaw, mina kiyām ki nihtāwikihākanak kita tipēyihtamwēwak ot iskwātēmiyiwa anihi kā pakwātikocik.
61ripēka māka ki pasiko asici oskinikiskwēma, ki tēhtapiwak māka piskwāwikana mina ki pimitisawēwak anihi nāpēwa; ēkosi ana atoskēyākan ki otinēw ripēkawa mina ki sipwētēw. 62āisak māka ki pē ohtotēw anitē piarlēhairāy; cikēmā ki ot ihtāwiniw sāwano askihk. 63āisak māka ki wayawiw ohpimē ē natawi māmitonēyitahk ē otākosiniyit; ki itāpiw māka mina wāpamēw, poti piskwāwikana ki pētāstamotēyiwa. 64ripēka māka ki itāpiw, ispi māka wiyāpamāt āisaka ki nihcipayiho piskwāwikana kā ki tēhtapit, 65cikēmā ki itēw anihi atoskēyākana, kēko nāpēw ana kā pimohtēt ohpimēayihk ē pē nakiskākoyahk? anihi atoskēyākana māka ki itik, ēwako nit okimām; ki otinam māka ot ākoyāpikwēon ē ki ākoyāpikēot. 66ana atoskēyākan māka ki wihtamawēw āisaka kahkiyaw kēkway kā ki ayisicikēt. 67ēkosi āisak ki pihtokahēw okāwiya sērahwa wikiyihk, ki otinēw māka ripēkawa ēkosi ki wiwiw, mina ki sākihēw; āisak māka ki nistāsēyimo kā ki poni pimātisiyit okāwiya.
Tällä hetkellä valittuna:
cēnisis 24: KKMR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
This Bible text is a transliteration of a corrected edition of the 1908 Western Cree Bible; it is in the public domain.