MATIYU 7

1Yisa daa laa n‑yɛli ba, “Ya di teesiri taaba yɛla, ka Naawunni ku ti teesi ya gba yɛlibeeri. 2Ka yan ma'asiri n‑tiri ya taaba seem, lala ka Naawunni nin ti ma'asi n‑ti ya gba.” 3U daa laa m‑boosi ba, ni, “Ni wula ka i nya muŋŋa i mabii nimbiri ni ka zaantɔliga dee n‑sa i maŋtoori dinni ni ka i bu nya ka? 4Bee wula ka i nin toaai n‑yɛli i mabiiya, ni, u kyɛ ka i yiisi munseaa kan bɛ u nimbiri ni, ka zaantɔliga maa kpalim m‑bɛ i maŋtoori dinni ni? 5Nyin birikɔnsi daana wa! Nyin daŋŋma n‑voaai i nimbiri ni zaantɔliga maa m‑basi ka nyari suŋŋa pɔi, ka naayi yiisi munseaa kan bɛ i mabii nimbiri ni!” 6Ni, “Ya di zaŋŋi bunni din nyɛ kasi n‑tiri baasi, ba nin ŋmaligi n‑dum ya. Di zaŋŋi buna an veela n‑dooli kurikyuudima tooni, ba nin nɔ a ni n‑sa'am.”

7Ka Yisa daa laa n‑yɛli, “Ya susima ka nin deaai yan susi seelli maa; ya booma ka nin nya yan boori seelli maa; ya kpaasima ka ba nin yoaai kyɛburu maa n‑ti ya. 8Dama ŋɔnkam susira deaari ni; ŋɔnkam boora nyari ni; ka ŋɔnkam kpaasira, ba nin yoaai n‑ti u. 9Sɔ m bɛ ya puuni ka u biiya nin susi paanu ka u mɔŋŋi, ka zaŋŋi kugri n‑ti u? - Ay! 10Bee, u yi ti susi ziŋŋa ka u mɔŋŋi ka zaŋŋi waafu n‑ti u? - Ay! 11Tɔ! ya nyɛ la ninvugseeba bam mari teesibeeri ya beebu ni, ka halli yarima gba yi mi yan zaŋŋi piinisuma n‑tiri ya biisi; ka dinŋɔna ya Ba ŋɔn bɛ saazugu ku zaŋŋi u piinisuma n‑ti ban susiri u?” 12Ni, “Dinŋɔna yan boori ni niriba niŋi seem n‑ti ya zaa, see ka ya niŋi lala n‑ti ba gba. Zaaligu yɛla maa zaa nla, ni anabidima maa bulisigu m‑paasi.”

13Ni, “See ka ya dɔli la za'anɔbila maa n‑kpɛa. Dama za'anɔri bɛ ni n‑yɛlima, ka sɔsuŋŋu gba bɛ ni, ka a mun wa la bugum ni sa'aŋŋu ziiya - halli niriba pam n dɔli anŋɔ maa! 14Sɔseaa n bɛ ni, ka ka za'anɔri poora, ka soori maa bu yɛlima; ka mun wa la nyɔvuri ziiya, amaa niriba ban nya ka n‑dɔla bu zoaai.”

15Ni, “Ya baŋŋma, ka ziri anabidima m bɛ ni. Ba ŋmani la kunduna ban yeeri peesi gbana, ni ba ti la'am ni peesi maa n‑gbaai ba. 16Ba wala nin kyɛ ka ya baŋŋi ba. Goaa bu wanni sisibi ka kpikpaliga mun ku toaai n‑wali kinkama. 17Tiseaa kan mari alaafɛ wanni la walisuma. Tiseaa kan ka alaafɛ muna - walibeeri ka ka nin wali. 18Tiseaa kan mari alaafɛ ku toaai n‑wali walibeeri, halli ka kan ka alaafɛ ku toaai n‑wali bunsuma. 19Tiseelli kam kan bu wanni walisuma, ba nin ŋmaai ka m‑basi, ka zaŋŋi ka n‑niŋi bugum ni. 20Lala zugu ka n yɛliya, ni, ba wala - di nyɛ la ba tuma maa - nin kyɛ ka ya baŋŋi ba.”

21Ka Yisa daa laa n‑yɛli ba, ni, “Pa seeba ban boonni ma, ni, ‘N Dugma, n Dugma’ zaa n nin kpɛ arizana naam ziiya, amaa seeba ban tumni m Ba ŋɔn bɛ arizana ni la yuubu maa nin ti kpɛa. 22Dabsiri maa yi ti paai na, niriba pam nin ti yɛli ma, ni, ‘Ti Dugma, ti Dugma! I yuuri ni ka ti daa yɛli anabitiri yɛla; i yuuri ni ka ti daa kari arizimbeeri m‑basi; i yuuri ni ka ti daa tum alahazibu tuma pam! Bee, ti ma'ari ni?’ 23Di saha maa ka n nin mooli n‑yɛli ba, ni, ‘Man zi ya kɔtaa! Ya zɔma ka kyɛ ma, yan tumbeeri dima wa!’ ”

24Ni, “Dizugu ŋɔnkam zaa wum n yɛligu ka dɔli ka, u ŋmanni la yam daansɔ ŋɔn daa mɛ u yiri n‑tɔm tampii zugu. 25Saa daa mi pam, ka mɔ'a daa paali n‑yakki m‑pɔbri na, ka pɛbsigu daa dam pam. Ka di zaa yɔri, yiri maa daa bu lu, ka nyeeba ŋɔn tɔm tampii maa ni zugu. 26Ŋɔnkam zaa mun wum n yɛligu ka bu dɔli ka, u ŋmanni la gyɛrigu sɔ ŋɔn daa mɛ u yiri n‑tɔm tambisigu ni. 27Saa daa mi pam, ka mɔ'a daa paali n‑yakki m‑pɔbri na, ka pɛbsigu daa dam pam. Ka yiri maa daa lu zaa, ka ka luuwa daa bu veela gba.”

28Tɔ: ka Yisa ŋɔn daa yɛli anŋɔ zaa n‑naai maa, di daa niŋi daadam maa alahazibu pam u yɛttɔ'a maa zugu. 29Dama u daa tɔ'asi yɛttɔ'amaŋni, ka u bu birisira halli beela; ni, di pa la kaman ba zaaligu baŋŋniba la ŋɔn yi wulisiri seem la.

Tällä hetkellä valittuna:

MATIYU 7: maw

Korostus

Jaa

Kopioi