Noo Luke 17
17
CAB. XVII
1Eisht dooyrt eh rish e ostyllyn, Cha vod eh ve, agh dy bee oyryn peccah ayn: agh smerg dasyn liorish hig ad. 2Veagh eh ny bare dasyn clagh‐wyllin ve croghit mysh e wannal, as eh dy ve baiht ayns y cheayn, na eh dy hayrn gys peccah unnane je’hn vooinjer veggey shoh.
3Cur‐jee twoaie diu hene: My nee dty vraar aggair dhyt, cur oghsan da; as my ghoys eh arrys, leih da. 4As my nee eh peccah dt’oï shiaght keayrtyn ’sy laa, as shiaght keayrtyn ’sy laa chyndaa reesht hood as gra, Ta mee goaill arrys; te ort leih da.
5As dooyrt ny ostyllyn rish y Chiarn, Bishee yn credjue ainyn. 6As dooyrt y Chiarn, Dy beagh credjue eu myr grine dy rass mustard, oddagh shiu gra rish y billey‐sycamine shoh, Bee er dty hayrn ass ny fraueyn, as bee er dty hoiaghey ayns y cheayn; as yinnagh eh biallys diu. 7Agh quoi eu ta sharvaant echey traaue, ny bochillagh ollagh, jirrys rish chelleeragh, tra vees eh er jeet veih’n vagher, Immee as soie gys y voayrd? 8As nagh jir hoshiaght rish, Fow aarloo my hibber, as kiartee oo hene dy hirveish orrym’s, derrey vee’m erreish gee as giu, as ny lurg shen nee uss gee as giu? 9Vel booise er da’n charvaant shen, son jannoo my v’eh oardit? Er‐lhiam nagh vel. 10Myr shen neesht shiuish, tra vees shiu er n’yannoo ooilley ny t’er ny harey diu, abbyr‐jee, She sharvaantyn neu‐frioosagh shin: ta shin er n’yannoo ynrican ny va orrin dy yannoo.
11As haink eh gy‐kione, myr v’eh er e yurnah gys Jerusalem, dy jimmee eh trooid mean Samaria as Galilee. 12As myr ve’h goll stiagh ayns balley dy row, haink ny whail jeih deiney va nyn louranee, as hass ad foddey veih: 13As hrog ad seose nyn goraa, as dooyrt ad, Yeesey, Vainshter; jean myghin orrin. 14As tra v’eh er yeeaghyn orroo, dooyrt eh roo, Immee‐jee as jeeagh‐jee shiu hene da ny saggyrtyn. As haink eh gy‐kione, myr v’ad goll, dy row ad er nyn ghlenney. 15As hyndaa fer jeu back, tra honnick eh dy row eh er ny laanaghey, as lesh ard‐choraa hug eh moylley da Jee, 16As huitt eh sheese er e eddin ec ny cassyn echey, cur booise da: as v’eh ny Samaritan. 17As dreggyr Yeesey, gra, Nagh row jeih er ny ghlenney? agh cre vel yn nuy? 18Cha vel er nyn gheddyn t’er jyndaa dy chur gloyr da Jee, agh yn ynrycan joarree shoh. 19As dooyrt eh rish, Irree, immee royd; ta dty chredjue er dty laanaghey.
20As tra dênee ny Phariseeyn jeh, cre’n traa harragh reeriaght Yee? dreggyr eh ad, gra, Cha jig reeriaght Yee lesh stayd chronnal. 21Chamoo jir ad, Jeeagh shoh, ny jeeagh shid: son cur‐my‐ner, ta reeriaght Yee cheu‐sthie jeu. 22As dooyrt eh rish e ostyllyn, Hig y traa dy bee shiu aignagh dy akin unnane jeh laghyn Mac y dooinney, as cha vaik shiu eh. 23As jir ad riu, Jeeagh‐jee ayns shoh, as jeeagh‐jee ayns shid: ny roie‐jee geiyrt orroo, as ny lhian‐jee roo. 24Son myr ta’n tendreil soilshean veih ard dy ard fo yn aer: myr shen myrgeddin vees Mac y dooinney ayns y laa echeysyn. 25Agh hoshiaght shegin da ymmodee seaghyn y hurranse, as ve beg soit jeh liorish y cheeloghe shoh. 26As myr ve rish lhing Noe, shen myr vees eh neesht ayns laghyn Mac y dooinney. 27V’ad gee, v’ad giu, v’ad poosey, v’ad er nyn goyrt ayns poosey, derrey’n laa hie Noe stiagh ayns yn arg: as haink y thooilley as vaih eh ad ooilley. 28As er yn aght cheddin myr ve ayns laghyn Lot, v’ad gee, v’ad giu, v’ad kionnaghey, v’ad creck, v’ad soiaghey biljyn, v’ad troggal thieyn: 29Agh er yn eer laa hie Lot magh ass Sodom, gheayrt neose orroo aile as brimstone veih niau, as ren eh ad ooilley y stroie: 30Eer er yn aght cheddin vees eh er y laa vees yn Mac dooinney er ny hoilshaghey. 31Ayns y laa shen, eshyn vees er mullagh y thie, as e chooid sthie, ny lhig da cheet neose dy chur lesh eh: as eshyn ta ayns y vagher, ny lhig dasyn myrgeddin chyndaa back. 32Coinee‐jee er ben Lot. 33Quoi‐erbee ta shirrey e vioys y hauail, caillee eh eh: as quoi‐erbee nee e vioys y choayl, saue‐ee eh eh. 34Ta mee ginsh diu, ayns yn oie shen dy bee daa ghooinney ayns un lhiabbee: as bee yn derrey yeh goit, as y jeh elley faagit. 35Bee daa ven blieh cooidjagh, bee yn derrey yeh goit, as y jeh elley faagit. 36Bee daa ghooinney ayns y vagher; bee yn derrey yeh goit, as y jeh elley faagit. 37As dreggyr ad, as dooyrt ad rish C’raad Hiarn? As dooyrt eshyn roo, Raad erbee dy vel yn convayrt shen‐y‐raad vees ny urlee er nyn jaglym cooidjagh.
Tällä hetkellä valittuna:
Noo Luke 17: CON1810
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© British and Foreign Bible Society 1810, 2019
