Sirach (Ecclesiasticus) 14
14
CAB. XIV.
1Bannit ta’n dooinney nagh vel er skyrraghtyn lesh e veeal, as nagh vel guint lesh earroo e pheccaghyn.
2Bannit ta eshyn nagh vel e chooinsheanse er gheyrey, as nagh vel er duittym veih e hreishteil ayns y Chiarn.
3Cre sheeagh berchys da’n dooinney nagh lhig e chree da ymmyd y yannoo jeh; as cre baillish yn dooinney sondagh jeh argid?
4Eshyn ta chaglym liorish molley e chorp hene, t’eh chaglym son feallagh elley, nee baarail e chooid dy rouanagh.
5Eshyn ta olk rish hene, quoi rish vees eh mie? cha gow eh soylley jeh e chooid.
6Cha vel fer ayn ny smessey na eshyn ta mooaraghey da hene, as ta shoh cooilleeney er e olkys.
7As my t’eh jannoo dy mie, t’eh jannoo eh marran as fy-yerrey t’eh coyrt e olkys er-ash.
8Ta’n dooinney trooagh, as sooill sondagh echey, t’eh chyndaa ersooyl e eddin, as soiaghey beg jeh ny boghtyn.
9Cha vel sooill yn dooinney sondagh bwooiagh lesh e chooid hene, as ta olkys yn vee-chrauee shirgaghey seose e annym.
10Ta sooill sondagh mooaraghey yn arran t’eh dy ee, as t’eh ny phiteog ec e voayrd hene.
11My vac, jean mooar jeed hene, rere dty fort, as cur da’n Chiarn yn cheesh ta cair da.
12Cooinee nagh vuirree yn baase foddey, as nagh vel conaant yn oaie soilshit dhyt.
13Jeeagh kenjallys da dty charrey roish my vow baase, as lurg rere dty phooar sheeyn magh dty laue, as cur da’n voght.
14Jean mooar jeed hene er laa mie feailley, as ny jean shaghney dy ghoaill ayrn ayns dy chooilley yeearree mie.
15Nagh n’aag oo cooid dty hooilleil da feallagh elley? as dty chosney deinagh son cooid ronney?
16Cur as gow, as jean mooar jeh dty annym, son jeh dty chooid seihlt cha vod oo goaill soylley ’syn oaie.
17Ta dy chooilley eill gaase shenn myr garmad: son ta’n conaant veih’n toshiaght, Dy vow son shickyrys baase.
18Goll-rish duillagyn glassey er billey banglaneagh, ta paart tuittym, as paart gaase; shen myr ta sheelogheyn feill as fuill ta fer geddyn baase, as fer elley er ny ruggey.
19Ta dy chooilley obbyr loau as shymley ersooyl, as hed yn obbree hene mow myr-chaagh.
20S’maynrey yn dooinney ta dy dowin smooinaghtyn er reddyn mie ayns creenaght, as ta resooney mychione nheeghyn casherick liorish e hushtey:
21Ta goaill gys e chree ny raaidyn eck, as toiggal echey myrgeddin ayns ny folliaghtyn eck.
22Ta goll er e eiyrt’s myr scrialtagh geyre, as farkiaght ayns ny raaidyn eck:
23Ta jeeaghyn dy aggindagh gys ny uinniagyn eck, as geaishtagh ec ny dorryssyn eck:
24Ta goaill aaght er-gerrey da’n thie eck, as myrgeddin kibbin shickyr echey ayns ny voallaghyn eck.
25Nee eh soiaghey e chabbane er-gerrey jee, as nee eh aaght y ghoaill fo clea raad ta reddyn mie ry-gheddyn.
26Nee eh e chloan y hoiaghey fo’n fastee ecksh, as aaght y ghoaill fo e banglaneyn.
27Lioreeish bee eh er ny choadey veih yn fowan-loshtee, as fo yn ghloyr ecksh nee eh beaghey.
Tällä hetkellä valittuna:
Sirach (Ecclesiasticus) 14: YNAP
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Published by the Society for Promoting Christian Knowledge (SPCK) in 1773.