TAUNET 18
18
Kayomisetap Weeriit
1Kimong'ji `Kamuktaindet ne Toroor Abraham eng' ye neegitee keetiigap Mamre kotebyei eng' kurgeetap emainnyi ko kang'wanit asiista. 2#Heb 13.2 Kingo tabendo, kogeer piik somok kotonondos ko kaitoorchigei ineendet. Ye kingo keer, komanda ak kolabat kotorookta kong'etee kurgeetap emainnyi ak ipkogutung'ji icheek. 3Ak kile, “Kiptaiyandennyu, ngot ko kaanyooru myeeindo eng' taing'ung', asaain ale amesiirtoe otwogindeng'ung', 4ingeibwok peek tutigin, si oune keelyekwok, ak omuuny eng' keetit keel. 5Ya tugul aibwok amitwogik tutigin, si ogimegitu, ak ye ibata otestai eng' pandang'wong', amu kaaoitu uitugul kap otwogindeng'wong'.” Kowol icheek kole, “Yai ko uu ye kaimwa.” 6Ki chaakta anyun Abraham kwo ko ole ki mi Sarah, ak ipkoleenji, “Chokyi ker keruutik somok che po peek che ng'ootiin che tambulul ak itangwar si ichop magatiinik.” 7Ki labat Abraham ole ki mi tuuga kwo koget kiptoiyot ne myee, ak kogoochi otwogindet ne ki chokyi kochop. 8Yeityo konam mwaitap cheego, cheego, ak kiptoiyondonooto kagagechop konde tainnywa, ak kotonon ineendet eng' ole neegitee keetit keel yooto ki amisyei icheek.
9Ki teebee `icheek ineendet koleenji, “Mi ano Sarah kwondong'ung'?” Kowolji koleenji, “Mi emait oriit.” 10#Rom 9.9 Koleenji agenge eng' icheek, “Aweekyiningei iman peetuusyek che uu chu eng' kenyiit ne nyoonei, ak keero, sichei `kwondong'ung' Sarah weeriit.” Ki ebei iit Sarah komi kurgeetap emait ne ki mi patai. 11Kiga koosegitu Abraham ak Sarah; ki tinyei kenyiisyek che chaang', ak kiga kong'et iyato Sarah. 12#1Pet 3.6 Kirori anyun Sarah eng' muguleldanyi koleen, “Tos ta abaibaitu ago kogotertera osindo, ak kagoosit agine manong'otyonnyu?” 13Ak ki leenji `Kamuktaindet ne Toroor Abraham, “Amu nee si korori Sarah koleen, ‘Tos ta amuuchi iman anee asich lakwa ko kaaositu?’ 14#Luk 1.37 Tos mi kiy age tugul ne temenee Kamuktaindet ne Toroor? Aweekyiningei peetuusyek che uu chu eng' kenyiit ne nyoonei, eng' peetuut ne kaachop, ak sichei `Sarah weeriit.” 15Amu ki iywei anyun Sarah, kotiiyo kole, “Ma aroori.” Ak ki leenji, “Achicha; keroori.”
Saaetap Abraham agobo Sodom
16Ki ng'eetyo anyun pichooto koba eng' yooto, kotokyigei Sodom ko yamisi Abraham. 17Ak ki le Kamuktaindet ne Toroor, “Tos aung'e Abraham iman kiit ne amache ayai, 18ago tuun egu Abraham ne matiny pororyet ne oo ne tinyei kimnateet, ne kiberuure pororyosyek tugul che po ng'wony? 19Amu ki alewen ineendet si komuuch koboi lagokyik ak koonnyi ne tuun piitu, si kobiit koriip ooreetap Kamuktaindet ne Toroor eng' yaeet ak kirwoogetap imanda; si kosuldochi `Kamuktaindet ne Toroor Abraham kiit ne ki mwa agobo ineendet.” 20Ak ki le Kamuktaindet ne Toroor, “Oo kateiyet agobo Sodom ak Gomorah, ak kosamisen tengekwogikwak miising'. 21Achoortaigei anyun nguno asi ageer ngo ki koyai iman ko uu kateiyennywa, ne ki konyoonjo, ak ngo ma uu nooto, anai.”
22Ki week anyun pichooto eng' olooto ak koba kotokyigei Sodom, kita kotonon Abraham eng' taitap Kamuktaindet ne Toroor. 23Kiriikyi anyun `Abraham Kamuktaindet ne Toroor, ak koteebe koleenji, “Tos iwong'u piik che po iman kobooto che yaacheen? 24Ngot komi piik che po iman konomu eng' nganaseet; ko tos iwong'u ameriree nganaseet agobo pichooto konom che po iman che mi olooto? 25Ingolooit eng' inyee, yaeet ne uu ni, ne kebarei che po iman kobooto che yaacheen; si kogergeit che po iman ak che yaacheen. Ingolooit eng' inyee nooto. Tos ma yaei iman Kirwoogindet ne po ng'wonyuni komugul.” 26Kole Kamuktaindet ne Toroor, “Ngot anyoorchi Sodom piik konom che po iman, ariiree anyun olooto tugul amu icheek.” 27Ak ki wolji Abraham kole, “Keero, kaagany ang'alaalji Kiptaiyat, nga aa temburyek ak ko aa oreek kityo. 28Tos ngot koma piit piik muutu eng' piik konom che po iman, ko tos ing'em nganaseet komugul amu piik muut che ma mi?” Ak ki le, “Ma ng'eme ngot anyoorchi piik artam ak muut.” 29Kita kong'alaalji kogeny koleenji, “Ngot anyun kenyoorchi artam?” Kowol kole, “Ma yae kiy amu chooto artam.” 30Kole, “Amat konereech Kiptaiyat, si kota ang'alaal. Ngot anyun kenyoorchi sosom.” Kole, “Ma yae kiy, ngot anyoorchi sosom.” 31Kole, “Keero, kaagany ang'alaalji Kiptaiyat. Ngot anyun kenyoorchi tiptem olooto?” Kole, “Ma ng'eme amu chooto tiptem.” 32Kole, “Amat konereech Kiptaiyat, si kota amwa ni kityo. Ngot kenyoorchi taman olooto?” Kole, “Ma ng'eme amu chooto taman.” 33Ye kingo tar anyun Kamuktaindet ne Toroor kong'alaaldos ak Abraham, kwo pandanyi; ak ki week Abraham kwo kaa.
Tällä hetkellä valittuna:
TAUNET 18: KAPR
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Bible Society of Kenya, 2019