Tutui Makasososak 7
7
Faa moꞌok
1Basa boe ma MANETUALAIN kokolak no Noh nae, “Au mete uni sudi bee uu, tehuu hambu kada o mesa ngga ndia, dale ndoos. Huu naa de, o mua o sao-anam mara maso meni ofak dale miu leo. 2-3Numa basa bandar mata-matak kara mai fo ei bole miꞌan, ma bee fo ei bole menin fee Au, na, o here mala pasan hitu-hituk, fo muni sara reni ofak naa dale reu. Numa basa mbuik mata-matak kara mai oo, muni pasan hitu-hituk boe. Tehuu numa bandar laen nara mai, muni kada pasan esa-esak. No dalak naa, bandar ma mbuik kara raa dadi bini, fo ta ramaketu.
4Masaneda matalolole! Huu faik hitu bali, Au akonda udan ta namaketu hatu-leledon losa faik haa hulu. No dalak naa, Au akamate basa horis lalaꞌen marai mada lai fo Au akadadadi alak kara ena.”
5Basa boe ma Noh tao tungga basa MANETUALAIN parendan lalaꞌen. 6Neu lelek fo faa moꞌok mai naa, Noh teun nara 600. 7Boe ma Noh no saon, anan nara, ma feto-feun nara, maso reni ofak naa dale reu, fo ara rasoda numa faa moꞌok naa mai. 8-9Tungga MANETUALAIN parendan naa, boe ma Noh neni basa mbuik mata-matak kara, ma bandar laen nara, esa-esak no ndia pasan numa bee fo hatahori bole naꞌan, ma bee fo hatahori ta bole naꞌa sana, de ana neni sara ofak dale reu. 10Basa faik hitu, boe ma faa moꞌok lala mai, de mulai tatana nala dae-bafok ia.
11Ndaa neu Noh teun nara 600, tamba bulak dua ma faik 17, boe ma faa moꞌok lala mai! Lelek naa, leo bali lelesu lalais neni soik, de oen mboꞌa dae mai. Ma basa oe bubuk kara marai dae dale kadi sara, de oe rasapupura dea mai. 12Boe ma udan konda ta namaketu hatu-leledon, losa faik haa hulu dalen.
13Tehuu faik naa oo, Noh, saon, ana katelun nara, ndia Sem, Yafet, ma Ham, ma Noh feto-feun nara, maso reni ofak naa dale reu. 14Ara maso sama-sama ro bandar, ndia banda nekeboik, banda fuir, banda mana manodo-manamak, mbuik kara, ma banda laen fo kalidak kara. 15-16Pasan esa-esak numa basa horis lalaꞌen mai, maso reni ofak dale reu, sama-sama ro Noh, tungga hata fo Manetualain fee parenda neun.
Neu basa sara maso rala ofak dale, boe ma MANETUALAIN nggoe ofak naa lelesun.
17-19Uda moꞌok konda nakandoo losa faik haa hulu, de faa moꞌok hene tamba namadema, losa ofak laa boꞌu-boꞌu. Oe hene nakandoo losa ana tatana nala lete demak kara. 20Oe naa hene ta namaketu, losa deman nakalena letek kara meter hitu.
21-23No dalak naa, basa horis marai mada lai, mate basa sara. Ndia: hatahori dae-bafok, banda nekeboik, banda fuir, banda mana manodo-manamak, ma mbuik kara. Kada Noh ma basa marai ofak naa dale, rasoda. 24Oe naa ta reꞌe-reꞌe, losa faik 150.
Tällä hetkellä valittuna:
Tutui Makasososak 7: txqNTPO
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2016, Wycliffe Bible Translators, Inc. in cooperation with (UBB) Unit Bahasa dan Budaya