RAPHA HIQWA LAK 2
2
1Krai mren ra nai hiq phansang jaqsham ka lotto. 2Ramiishi ranaiq she angu na Shiikeawe raq apaiq jaqsham ka tlotto. Raüta ajaqsham ka athaq she riito. 3Raüta apaiq raq ramiishi ranaiq ka shiimanto. Raüta kra ranaiq ka pong na tiitsang dada arai riithüto. Jamkhano ngukla kra ranaiq akhing na apaiq raq aphan sang wan jaqsham ka tlotto. Raüta jaqsham ka athaq she riito. 4Akha ra nai hiq ka phansangto.
Eden Sonruk
Ümtiikiiwa Tati Shiikeawe raq ra nai hiq ka tiiqtaq, 5hiqraikhü na pechong wiirü ka ahü riito kiimaq petsi wiqtsam cham min ahü riito. Jamkhano ngukla apaiq raq ra ka mitiijun shaq. Kiimaq hiqraikhü na jaqshamseati min ahü shaqli riito. 6Shatmaq kham ka hiq mong wa dong raüta hiqraikhü ka kham maq tiipiimto.
7Kra raütiishe Tati Shiikeawe raq hiq ka phanshise tsunto. Raüta kriimaq maiq weshi kloto. Raüta apaiq raq tsitsü rilung ka akhüpu wiinai na meikuqto. Kiimaq maiqwe ka atra miishe jawanto.
8Raütiishe Tati Shiikeawe raq Eden hiq na sonruk ashi chhito. Kriika shedong nü na. Raüta apaiq raq maiq phantaq we ka kiijaq tiisito. 9Apaiq raq kiijaq phanrap phanrii pechong tsomhea phan thun ka tiijongto. Raüta atsi ango ka aheawiq tiitsi ngoto. Kra sonruk mong ba na rilung keti pechong kiimaq ahea nai abi sap wan chang phaqchi pechong kra asi riito.
10Kiimaq Eden hiq na jüraise ashi kitlo raüta sonruk ka chehotlo. Eden hiq ka leaho jai kra jürai ka raiblai miishe tiiphiiqhoto. 11Kriiwa apha shaqshaq raiti mang ka Pishon ngutlo. Kra rai kok ka Hawila mung na kihoto. 12(Kiijaq chiisan chaq asi humtlo. Kiimaq ahin na hummak phan rahea phan homseng nai longseng sitlo). 13Kiimaq rainai ngoja jürai mang ka Gihon ngutlo. Kra rai kok ka Kush mung na kihoto. 14Kiimaq raitsam ngoja jürai mang ka Taigris ngutlo. Kra raikok ka Asiria mung maq shedong nü siim maq kihoto. Kiimaq raiblai ngoja jürai mang ka Euphretis ngutlo.
15Raütiishe Tati Shiikeawe raq maiqwe ka Eden hiq na Sonruk kiijaq jaq shamsea miitu kiimaq kra khebom miitu tiisito. 16Shiikeawe raq apaiq ma nguto, “Ümniiraq sonruk wa petsi ka wiita phaqsea mimai. 17Shatmaq ahea abi sap chang phaqchi pechong tsi kriili pansea maimak. Ümniiraq kra chongtsi ka sea maimak dongdii. Ümniiraq kriila pansiq haüla, kra ranaiq li ümniika mitsai haü.”
18Raütiishe Tati Shiikeawe raq tiingoto, “Maiqwe ma apaiq laq laqseli si ka peo mak. Ngi raq apaiq khrumti kongti riikhaqli ashi mikloha.” 19Kra ningkhan apaiq raq hiq ka phanshi tsunto. Raüta phanrap phanrii ngamsaü ngiqse thun kiimaq peshap washi thun kra tiidongto. Raütiishe apaiq raq kriithun ka maiqwe phana tsuq wanto. Raüta apaiq raq kriithun ka jamkho mangjiiq nguta liito. Akha kra nyamse thun wiita raq tsangshiq mangpon thun ka lapto. 20Kiimaq kra maiqwe raq wushi thun tlotli kiimaq ngam thun tlotli mangto. Shatmaq kriithun kiiwa apaiq khrum ma kongti miitu ka ashi ra dongdii min hongmak riito.
21Kiijiishe Tati Shiikeawe raq maiqwe ka akon makaiq she tiikon baiqto. Kiimaq apaiq ka akon shon na, apaiq raq maiqwe siimrii phong kiiwa riishi ka lamto. Raüta angam ka pangbaiqto. 22Apaiq raq maiqwe siim rii wa jechak nyung ashi kloto. Raüta kriinyung ka apaiq phana shea wanto. 23Kiijiishe kra maiqwe raq akha nguto,
“Atiisup niishe, ara ngi rai shamshi ngamshi
Arii ka irii wa alam,
kiimaq apaiq ngam ka ingam wa alam.
Apaiq mang ka ‘Jechak’ nguta mingu jamkhano ngukla apaiq ka maiqwe khum wa lam raüta kloto.”
24Arningkhan tiina maiqwe raq awe nai anyung ka baiqthütlaq raüta achak rai pumshi hanshi she tiipum wantlaq. Kiimaq tsangnai ka pumshi she jakitlo.
25Kra maiqwe nai jechak nyung ka tsangnai wiita kheahü riito. Shatmaq tsangnai ka jam jeasi ngo min ahü sito.
Tällä hetkellä valittuna:
RAPHA HIQWA LAK 2: TANGSBSI
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.