Matayo 9
9
Moto oMokɔbɛlɛ
1Yesu atamba koko a bwato, alekela, na ahula a ngando ende mɛne. 2Bato badoa ai yo na moto omokɔbɛlɛ yona odaka asambi a litɔkɔ, Yana anɛ Yesu ejimeli ebu, abala na moto omokɔbɛlɛ bo, Mwana, da na sepi; jibe jiwɛ jikinami. 3Bakina basɔni ko balɛ bo, Moto yoyo atangolaka Njambe. 4Yesu ko ajeba bilɛli bibu, na abala na bu bo, Ino olɛkɛni mijɔ mibe a milema minu mojɔ moye? 5Nakabala bo, Jibe jiwɛ jikinami, isa Angɔ, dala; mojɔ monɔi na bopipo nda? 6Mbi ko nadi boneja no bo Mwana ’Moto adi na kpaci ya nase a boyɛ jibe. Oko boa abala na moto omokɔbɛlɛ bo, Angɔ, tomba litɔkɔ liwɛ; yana a ndako ewe. 7Moto omokɔbɛlɛ angɔ oko bongɔ, na ayana a ndako ende. 8Yana anɛ bimumu bibato mojɔ momina, badaka oko na bɔ, na bakumeja Njambe yona opa kpaci emina ai bato.
Yesu abea Matayo
9Yana adonga Yesu a esika emina, anɛ okina moto a bilo ende etako, kombe ende Matayo. Yesu abala na nde bo, Cingama na mbi. Iyo angɔ na acingama na nde.
10Adaka Yesu a mesa a ndako tei, bato banɛnɛ badoa a boda na nde na bacingami bande a mesa, baputeja batako, na bato bagala ebe. 11Bakina BaPalusi baya babanɛ babala na bacingami bande bo, Mokoja onu ayakaka na baputeja batako na bato babe mojɔ moye?
12Yesu ko aka ekenge emina, na yo abala na bu bo, Babwani na monganga oko baya bapekaka, te baya badi baniilake. 13Kɛni adukeni cina eekenge yeye,
Mojɔ mopalaka mbi modi wa, te tito bamasiko.
Mojɔ bo mbi nadoi a bobea bato babe, te bato bapele.
Bacingami baYoane
14Bacingami baYoane badoa ai Yesu, na bamohɔjɔ bo, Iso na BaPalusi bodi na bikia binɛnɛ; bacingami bawɛ ko te bakiake mojɔ moye? 15Yesu abasɔmbeja bo, Isa momi obolongana adi na bina ’nde a lihango, badi boyea bio? Badi bokia ko a masu mangɔngɔ, oko momi obolongana amaka donga. 16Moto t’abambake kasaka eyou na ebolo eyene. Mojɔ bo ebolo eyene edi bodonga, na edi bohɛje lipose oko bohɛjɛ. 17Bato te balumejake bikutu bibiobo biyou na vino eyene. Bakakɔ boa, badi bobatoja bikutu; vino edi bosopea, na bikutu bidi bobeha. Bahangojaka vino eyene oko a bikutu biyene. Oko boa badi bobanea bikutu na vino pongono.
Mwana ’Yailo
18Amaka yo bala ngando jiji, okina kumu adoa oko ai yo, asumana a boso bonde na abala bo, Mwana’mbi mwali agwi oko edɛye mɛnɛ; wɛ ko doa omobakee ebɔ ewɛ nongo ahele koko. 19Yesu angɔ, akɛ na nde, na bacingami bande pongono.
20Okina mwali yona oma peka na ekia bianga domi-na-bibae, adoa ngɔngɔ jinde na abɛnjɛ gbomba ekasaka ende na ebɔ. 21Mwali omina alɛ bo, Mbi nakabakea ebɔ embi a kasaka ende, nadi bohela a yogo embi. 22Yesu ahekoa, amonɛ, na abala na nde bo, Mwana, titeja molema mowɛ. Ejimeli ewɛ ehelejai wɛ. Na mwali ahela oko bohela a yogo ende a ehole emina.
23Amea Yesu a ndako ekumu omina, anɛ bato bapoolo, na emumu ebato baya badaka na daka enɛnɛ. 24Abala bo, Yanani; mwamwali aditi nongo mogo; ahwɛkɛ oko hiɔ pɛ. Ibo ko bamosɛkɛ oko bosɛkɛ. 25Ama bo meja emumu ebato sokolu, Yesu ami kwea oko a ndako. Apea ebɔ emwamwali, na yo angɔ oko bongɔ. 26Na bananganeja mwako momojɔ momina a likota dia lisusu.
Bato bamiso mago
27Yana adonga Yesu a esika emina, bami babae bamokimana. Badaka na miso mago, na babekoa bo, Wɛ Mwana ’Dawidi, ikea so wa! 28Yesu akwea a ndako, na bami bamiso mago badoa ai yo. Yesu abala na bu bo, Ojimakani bo mbi nabwani bokɔ mojɔ mu? Bamosɔmbeja bo, Ee Kumu. 29Yesu abɛnjɛ miso mabu na ebɔ ende, na abala bo, Yɛ modae na nu boa cina eejimeli enu. 30Miso mabu masɔ njɛnɛ, na Yesu abaleha na bopipo bo batatɔndɔ bato mojɔ momina. 31Ibo ko bayana na batundeja gala epele eYesu a likota dia lisusu.
32Yana amanaka bo, bato badoa na okina momi, emimi, yona odaka na mwembo mobe. 33Yana ameja Yesu mwembo mobe, momi abala oko bobala, na bato basusu bakamoa bou mɛnɛ. Bajɔ bo, Iso boipaka ne mokina mojɔ boa a Yisalaele. 34BaPalusi ko babala bo, Iyo amejaka miembo mibe oko na kpaci ekumu omiembo mibe.
Yesu aloma Bacingami bande a Elomu
35Yesu akɛ akadale a ngando jisusu jinɛnɛnɛ na jikɛkɛ. Akoja a sinagoge jibu, Atɔndɔ Mwako Mopele moBokumu, na aheleja bato a bego bisusu na biɛmɛ bisusu. 36Yana anɛkɛ yo bimumu bibato, aba’keaka wa. Mojɔ bo badaka na mokakwano na bwɛmbu, o ekɔmɛli ebata baya bapeliti mobanei. 37Oko boa Yesu abala na bacingami bande bo, Ejueli edi enɛnɛ; basali ko badi oko baleka pe. 38A mojɔ momina, ingani Kumu oejueli bo alome basali a bojua.
Tällä hetkellä valittuna:
Matayo 9: NTNG61
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Alliance Biblique de la R. D. Congo
